Aksi boksoe
◼ Fa wi moesoe loekoe boen te wi e wroko ini kefarlek gebied?
1 Moro nanga moro wi e jere foe njoensoe di e taki foe ogridoe, foefoeroe nanga sociaal feti, spesroetoe ini kontren foe a foto. Ala di wi e broko wi ede, tokoe wi sabi taki srefi ini kontren pe sma e feti, opregti sma de, di sa piki boen tapoe a Kownoekondre boskopoe. So boen na ten di fiti, wi moesoe abi deki-ati foe go doro nanga wi preikiwroko, èn de overtoigi taki Jehovah e sorgoe gi wi èn e loekoe wi. — Odo 29:25; 1 Tes. 2:2.
2 Te wi e go na wan kontren di kan de kefarlek, dan Jehovah e froewakti foe wi, taki wi e loekoe boen èn taki wi e kroetoe sani boen. De na ai. „Koni na a wán di si a rampoe èn baka dati e go kibri ensrefi, ma a wán di no abi ondrofeni, waka doro èn a moesoe kisi a strafoe” (Odo 22:3). Preikiman di abi ondrofeni, e warderi en foe wroko nanga wan patna noso srefi ini wan groepoe foe preikiman, efoe a de fanowdoe. Preikiman 4:9, 12 e froeklari: „Toe sma moro boen leki wán . . . Efoe wan sma ben sa kan wini wán sma, dan toe sma makandra ben sa man kakafoetoe gi en.” Ogriman foeroetron e loekoe foe denwan di de den wawan èn na so fasi a de moro makriki foe doe den ogri.
3 Loekoe boen gi den kontren di no abi boen faja. De na ai foe teki wan kari foe sma foe kon na ini den oso noso den tanpresi. No hari taki nanga sma, te den e taigi joe taki den sa doe joe ogri noso te den e soekoe joe nanga trobi. De esi-esi foe meki sma kon sabi joe leki wan Kotoigi foe Jehovah. Son preikiman alaten e hori wan bijbel noso wan Waktitoren noso wan Ontwaakt! ini den anoe, so taki sma kan sabi soema na den.
4 De na ai gi sma di e koirikoiri sondro foe den abi wan spesroetoe sani foe doe ini a kontren. Loekoe boen foe go ini wan djari nanga trawan, di densrefi no e tan ini a djari dati. No weri diri moi ston nanga gowtoe sani. Efoe joe moesoe go na strati te neti, dan koti pasa den doengroe strati pe foeroe verkeer no de. Efoe sma kon foefoeroe joe, no feti efoe na soso joe moni den wani noso sani di joe abi; a libi foe joe warti moro leki ala sortoe goedoe na skin fasi di joe abi. — Mark. 8:36.
5 Brada di e teki fesi moesoe de na ai, èn den moesoe sabi doronomo san den preikiman e doe èn pe den de ini a gebied. Foeroetron a de moro boen foe hori a groepoe na wán presi, so taki alaten den de krosibei foe trawan. Efoe iniwan sortoe ogri noso feti broko kon ini a birti, dan a groepoe moesoe gowe libi a gebied wantewante.
6 Efoe wi de na ai èn e loekoe boen, dan wi kan go doro foe miti den sma ini den kontren pe foeroe ogri de, den sma di „e geme èn e soktoe foe ala den tegoe sani di e pasa”. — Esek. 9:4.