Joe na wan foeroeten Kotoigi?
1 Joe ben sa piki na aksi disi nanga ’ija’? Ala di no alamala foe den foetoeboi foe Jehovah di gi densrefi abra na en kan go na ini a foeroeten diniwroko, a no de wan reidelek sani dan foe froewakti taki wi alamala moesoe si wisrefi leki En foeroeten Kotoigi? Seiker a moesoe de so.
2 A no kan taki wan sma de wan afoeten kresten. Jesus ben taki foe en papa: „Ala ten mi e doe den sani di e plisi en” (Joh. 8:29). Paulus, di ben denki na a srefi fasi, ben gi wi a tranga foe „doe ala sani gi a glori foe Gado” (1 Kor. 10:31). Foe dati ede, wi alamala moesoe si wisrefi leki foeroeten Kotoigi foe Jehovah. Te wi e denki na a fasi disi, dan dati sa abi wan boen krakti na wi tapoe na ini ibri sani di wi e doe.
3 Loekoe den boeweisi: A fasi fa wi e sori na dorosei, a fasi fa wi e taki, èn wi maniri kan sori tra sma taki wi na Jehovah Kotoigi troetroe. Wi e froestan taki a de fanowdoe foe de bescheiden na a fasi fa wi e sori na dorosei, foe abi wan boen fasi foe taki èn foe abi boen maniri ala ten te wi de ini a velddienst noso te wi e go na den kresten konmakandra. Ma te wi e go na skoro, e wroko na wan grontapoe wroko, noso abi ontspanning, ibri sani di abi foe doe nanga wi moesoe gi boeweisi taki wi e libi akroederi den regtfardiki markitiki foe Jehovah.
4 Jesus ben taki: „Wan foto di de na tapoe wan bergi, den no kan kibri. . . . Meki oen leti skèin gi sma, so taki den kan si den boen wroko foe oenoe èn gi glori na oen Tata, di de na hemel” (Mat. 5:14-16). Disi moesoe de so na ini ala sani di wi e doe èn ala ten. Te wi kon si taki wi e draidrai foe gi kotoigi foe di wi de na wan spesroetoe presi noso wi e doe wan spesroetoe sani, dan wi moesoe aksi wisrefi: ’Mi e dini Jehovah afoeten noso foeroeten?’ Meki a de so, taki noiti wi abi foe meki wan okasi pasa gowe sondro taki wi taki nanga tra sma foe a boen njoensoe foe Gado Kownoekondre.
5 Hori na prakseri, taki wi e gi Jehovah grani èn wi e plisi en te wi kan piki na aksi, „Joe na wan foeroeten Kotoigi?”, nanga wan tranga „ija!”