A prisiri di a furuten diniwroko e gi
1 A no de fu taki dati yu leki yonguwan prakseri kaba fu a tamara fu yu. Odo 21:5 e fruteri wi taki „den plan fu a sma di de fayafaya seiker sa abi winimarki”. A sa abi winimarki gi yu te yu e prakseri seryusu sortu marki yu wani doro na ini yu libi. Ma te yu e prakseri san yu sa du na ini a ten di de na yu fesi, dan prakseri tu fa yu kan go na ini a furuten diniwroko. Fu san ede?
2 Yu kan taki nanga iniwan bigisma di ben de na ini a pionierwroko di den ben moro yongu. Aksi den fa den ben feni en, èn a no de fu taki dati den alamala sa taigi yu a srefi sani: „A ten dati ben de a moro bun ten fu mi libi!” Wan brada di ben ondrofeni a prisiri fu a furuten diniwroko sensi di a ben de wan yonguman, fruteri bakaten: „A de wan sani di e meki yu firi bun srefisrefi te yu sidon denki a ten di yu ben yongu èn di yu ben man gi yesi na a koni rai: ’Memre now yu Gran Mekiman na ini den dei fu yu yongu yari’” (Preik. 12:1). Dati wani taki dati yu makandra nanga yu papa nanga mama, musu seti sani bun nownow kaba, fu luku fa yu kan ondrofeni a sortu prisiri disi na ini yu yongu yari leki yonguman noso yongu-uma.
3 Papa nanga mama, gi den deki-ati fu teki a furuten diniwroko: Leki wan papa di e broko en ede nanga yu, na so Yehovah e sori yu soifri pe fu go (Yes. 30:21). Yehovah de wan bun eksempre gi Kresten papa nanga mama na ini a lobi-ati fasi fa a e gi tiri. Na presi fu meki den pikin fu yu du san densrefi denki taki bun gi den, dan a sa de wan koni sani fu leri den fa den musu tyari densrefi, fu kisi blesi fu Yehovah te fu kaba. Te den kon moro owru, dan a leri di den ben kisi sa yepi den fu „si krin san bun èn san ogri” (Heb. 5:14). Bigisma ondrofeni taki den no man frutrow tapu a fasi fa densrefi e si sani; den abi fu frutrow tapu Yehovah fu meki den pasi fu den kon reti (Odo 3:5, 6). Yongusma abi a tiri disi moro tranga fanowdu srefi, fu di den no abi so furu ondrofeni na ini a libi.
4 Te den pikin fu unu e tron tini, noso bifo dati srefi, dan a bun fu taki nanga den finifini fu den sani di den wani du na ini a ten di e kon. Sma di e gi pikin rai na ini skoro afersi, sma di e gi leri na skoro, nanga tra skoropikin, o pruberi fu gi yu pikin deki-ati fu feti baka moni noso grontapu afersi. Yepi den pikin fu yu fu teki skoroleri di kan yepi den na ini na aladei libi; sani di kan yepi den fu sorgu gi san den abi fanowdu, sondro taki den poti Kownukondre afersi na wan sei (1 Tim. 6:6-11). Furu tron a de so taki te wan sma kisi skoroleri na wan middelbaarskoro makandra nanga leri di abi fu du nanga wan spesrutu wroko noso leri di yu e kisi na wan wrokope srefi, dan dati kan yepi en kaba fu sorgu gi den moro prenspari sani di a abi fanowdu. Dati kan gi en na okasi fu bigin nanga a gewoon pionierwroko.
5 Gi den yonguwan deki-ati fu meki muiti fu suku fu tan sondro trowpatna. Efu den bosroiti fu trow te fu kaba, dan a sa moro makriki gi den fu teki den moro bigi frantwortu di fu a trowlibi. (Luku paragraaf 19 fu na inlegvel na ini Wi Kownukondre Diniwroko fu yuni 2001, „Yu Kan Seti Sani fu Man Dini?”) Taki bun fu sani soleki a pionierwroko, Bethel wroko, a zendelingwroko, noso fu sma di go dini pe moro preikiman de fanowdu. Na a fasi disi yu kan bigin frukufruku kaba fu poti a winsi na ini yu pikin fu gebroiki den heri libi na wan fasi di Yehovah feni bun; wan fasi di sa abi winimarki gi trawan, èn wan fasi di sa gi den bigi prisiri sosrefi.
6 Yonguwan, poti a furuten diniwroko na a fosi presi: Yonguwan, unu no abi fu aksi unsrefi fa a sa firi fu de na ini a pionierwroko. Unu kan pruberi fu go na ini a yepi-pionierwroko, spesrutu te skoro no de, noso na tra momenti na ini a yari. Na so fasi unu sa sabi o furu prisiri a pionierwroko kan gi unu! Unu denki taki wan fasi de fa unu kan go na ini a yepi-pionierwroko bigin nanga now te go miti a kaba fu a fakansi?
7 Efu yu na wan yongu brada na ini na organisâsi fu Gado, dan prakseri sosrefi na wan seryusu fasi san yu kan du fu doro a marki fu de leki wan dinari ini a diniwroko (1 Tim. 3:8-10, 12). Boiti dati yu kan bigin prakseri tu fu go dini na Bethel, noso fu go na a Dinariskoro, te yu si taki yu doro a yari fu du dati. Den sani di yu ondrofeni na ini a pionierwroko sa leri yu wan tu tumusi prenspari sani, soleki fa fu libi na wan fasi di orga bun, fa fu seti yu eigi afersi na wan moro bun fasi, fa fu abi wan bun matifasi nanga trawan, èn fa fu tyari frantwortu na wan bun fasi. Ala den sani disi o sreka yu fu man tyari moro bigi frantwortu bakaten.
8 Wan prenspari sani di kan yepi wan sma fu abi bun bakapisi na ini a furuten diniwroko, na fu de wan sma di alaten e wroko tranga fu du a wroko fu Gado. Na apostel Paulus ben gi trawan a deki-ati fu abi a fasi disi, èn a ben tyari kon na fesi san ben sa de a bakapisi fu dati: „Awansi san unu e du, du en nanga un heri sili leki gi Yehovah, . . . bika unu sabi taki na fu Yehovah unu sa kisi a reti pai” (Kol. 3:23, 24). Meki Yehovah blesi yu nanga bun furu prisiri na ini a furuten diniwroko!