Sortoe marki joe poti gi den pikin foe joe?
1 Foe abi boen bakapisi na ini a libi, e anga foe a poti di sma e poti boen marki èn a doro di sma e doro den marki disi. Den sma di e feti na baka lawlaw marki noso marki di den no man doro, te foe kaba den e lasi-ati èn den de sondro satisfaksi. A e aksi foe wan sma de koni foe man si sortoe marki a moesoe feti na baka so taki a kan „hori a troe libi boen steifi” (1 Tim. 6:19). Fa wi de nanga tangi taki Jehovah, nanga jepi foe en Wortoe nanga organisâsi, e sori wi soifri sortoe pasi wi moesoe waka!—Jes. 30:21.
2 Na ini a gi di Jehovah e gi so wan lobi tiri, a e gi papa nanga mama wan moi eksempre. Na presi foe libi en gi den pikin foe den di no abi ondrofeni foe froekisi sortoe pasi moro boen gi den, dan koni papa nanga koni mama e leri den pikin foe den a pasi di den moesoe waka, èn te den kon bigi, dan den „no sa drai baka foe en” (Odo 22:6). Den kresten papa nanga mama sabi foe den eigi ondrofeni taki den no kan froetrow na tapoe den eigi kroetoe; den moesoe froetrow tapoe Jehovah (Odo 3:5, 6). Gi pikin-nengre disi de moro fanowdoe srefi, foe di den pikin-nengre no sabi foeroe èn den no abi ondrofeni.
3 Papa nanga mama kan poti boen marki gi den pikin foe den di sa jepi den pikin foe poti ala den prakseri na tapoe „den moro prenspari sani” (Fil. 1:10). Den kan bigin nanga na osofamiri studie, e gi den pikin deki-ati foe warderi o prenspari a de èn foe den leri foe dati. A boen foe pikin kisi a gwenti foe studeri na fesi gi den gemeente konmakandra èn sreka densrefi foe gi komentaar nanga den eigi wortoe. A de prenspari foe abi wan doronomo prati na ini a preikiwroko. Jongoe pikin kan abi wan prati foe di den e pristeri traktaat, e leisi bijbel tekst, noso e pristeri tijdschrift. Te den man leisi kaba, dan te den kon tapoe a Theokrasia Diniwroko Skoro, dan dati kan jepi den foe gro moro esi na jejefasi. Te den de bekwaam leki wan preikiman di no teki dopoe, noso te den de klariklari foe teki dopoe, dan dati na wan bigi stap go na fesi.
4 Te den pikin e doro den tini jari, noso moro esi srefi, dan papa nanga mama moesoe taki nanga den pikin troetroe foe den sani di den wani doe na ini a libi èn sortoe marki den kan poti. Raiman foe skoro nanga kompe na skoro makriki kan abi krakti na tapoe den pikin foe feti na baka grontapoe sani, foe kisi materia sani. Papa nanga mama moesoe jepi den pikin foe den foe froekisi wan skoro programa di e leri den na wan praktis fasi, èn di sa meki taki den sa de srekasreka foe sorgoe gi den materia sani di den abi fanowdoe, sondro taki den moesoe lasi den belang foe a Kownoekondre (1 Tim. 6:6-10). Den kan kisi deki-ati foe feti na baka a „presenti” foe tan den wawan sondro foe trow, èn baka dati, efoe den teki a bosroiti foe trow, den sa man foe teki den hebi frantiwortoe di e kon nanga a trowlibi (Mat. 19:10, 11; 1 Kor. 7:36-38). Te papa nanga mama e taki na wan positief fasi foe a pionierwroko, foe dini pe dati de moro fanowdoe, foe doe Bethel diniwroko, noso foe doe zendeling wroko, dan, srefi te den pikin jongoe ete, papa nanga mama kan bow na ini den pikin a wani di den wani foe gebroiki den libi foe plisi Jehovah, foe de wan jepi gi trawan, èn foe tjari blèsi gi densrefi.
5 Taki na ini a ten disi wi abi so foeroe jongoe sma na ini na organisâsi di e hori densrefi na den hei kresten markitiki èn e feti na baka theokrasia marki, a no wan sani di e kon foe soso. Taki sani e waka so boen nanga den jongoewan disi, foeroetron de a boen bakapisi foe lobi papa nanga lobi mama. Efoe joe na wan papa noso wan mama, dan san a gersi den pikin foe joe sa doe? Den e go na fesi safrisafri foe libi wan libi pe den e poti ala den prakseri na tapoe den afersi foe a Kownoekondre? Memre, taki wan foe den moro prenspari sani di joe kan doe na foe poti waarheid dipi na ini den pikin foe joe, èn taki nanga den foe dati ibri dei. A kan taki joe sa kisi blèsi, foe di joe osofamiri na wan osofamiri di e dini Jehovah getrow.—Deut. 6:6, 7; Jos. 24:15.