Moro brada de fanowdoe gi a pionierwroko
1 Paulus ben gi wi a tranga foe ’abi ala ten foeroe foe doe na ini a wroko foe Masra’ (1 Kor. 15:58). Gi foeroe sma, disi wani taki foe go na ini a pionierwroko. Na ini september di pasa, 15 sma na Suriname ben moksi densrefi na ini a groepoe foe den pionier!
2 Tapoe a momenti disi a moro bigi pisi foe den wan di e dini leki pionier na ini wi kondre na sisa (Ps. 68:11). Fa a ben sa de wan prisiri gi a gemeente efoe moro brada ben kan moksi densrefi nanga a groepoe di e dini leki foeroeten foetoeboi! (Ps. 110:3) Wi e froestan taki foeroe brada abi foe sorgoe gi prenspari grontapoe nanga osofamiri frantiwortoe. Trawan so srefi, e wroko tranga foe sorgoe gi den jeje fanowdoe foe a gemeente. Wi e warderi den man disi di e wroko tranga foe a Kownoekondre ede. — 1 Tim. 4:10.
3 Ma tokoe, moro foe oenoe, brada, ben kan go ini a pionierwroko? Efoe joe wefi e pionier, joe kan go pionier makandra nanga en toe? Efoe joe de nanga pensioen, joe no ben sa agri taki a moro boen fasi foe gebroiki joe ten na wan fasi di e gi satisfaksi, na foe de na ini a foeroeten diniwroko? Efoe joe de foe kaba nanga skoroleri, dan joe ben prakseri serjoesoe èn na ondro begi foe go na ini a pionierwroko leki wan jepi foe kan kisi moro grani na ini a diniwroko? — Ef. 5:15-17.
4 Wan brada ben seri en bisnis di ben e drai boen èn ben teki wroko na pisi ten, so taki a ben kan de pionier. A moi eksempre foe en ben meki taki dri foe den fo pikin foe en ben tron pionier di den ben kaba nanga skoro. A di foe fo ben de fajafaja foe go na ini toe. A brada disi nanga en osofamiri kisi foeroe blesi.
5 Wan bigi doro opo: Pionierwroko kan opo „wan bigi doro di [e] tjari sma go doe wroko” (1 Kor. 16:9). Den kan gebroiki brada di de pionier foeroefoeroe na ini a gemeente. Fajafaja aktiviteit na ini a veld tranga a jejefasi di den abi èn e meki taki den e go na fesi na theokrasia sei. Pionierwroko kan opo a pasi gi moro grani na ini a diniwroko. Baka te joe pionier a fosi jari, joe kan kisi a blesi foe go na a Pionierskoro. Dinari ini a diniwroko nanga owroeman di no trow kan soekoe foe fisiti a Bedinariskoro. Den trow paar di doro den markitiki, kan skrifi wan formulier foe aksi foe go na a Gileadskoro. Baka ten, brada kan doro den markitiki foe doe wroko leki opziener di e rèis. Ija, a pionierwroko e opo a doro gi den moro bigi grani disi ini na organisâsi foe Jehovah.
6 Brada di kan seti den sani foe den so taki den man abi wan prati na ini a gewoon pionierwroko, kan ondrofeni a moro bigi kolokoe di e kon foe a gi di wan sma e gi moro. — Tori. 20:35.