Joe kan dini Jehovah leki wan pionier?
1 Na a „Tjariman foe leti”-distriktkongres, wan takiman ben aksi: „Joe kan pionier? Joe wani pionier?” A ben taki dati a boen foe poti den aksi disi, bika Armagedon de krosibei srefisrefi, èn disi e meki taki a preikiwroko de prenspari moro leki wan ten na fesi.—1 Kor. 7:29a.
2 A no de foe taki, dati a pionierwroko, na wan hebi wroko. A e aksi foe joe taki joe man hori joesrefi na sani di joe moesoe doe èn taki joe man foe orga sani boen. Ma, wi wroko ini a diniwroko „no de foe soso” (1 Kor. 15:58). Wi kan taki a srefi foe tra aktiviteit di wi wani doe èn di e teki foeroe foe wi ten nanga krakti? Lobi gi Jehovah e poesoe trawan foe de fajafaja ini en diniwroko, èn faja gi Jehovah en wroko ben meki foeroe sma go ini a pionierwroko.—1 Joh. 5:3; Openb. 4:11.
3 Foeroe jongoe dienstknekti foe Jehovah di kaba nanga den skoro, e denki serjoesoe foe go pionier. Dati e fiti srefisrefi. Sortoe tra libiwroko kan de moro prenspari leki a foeroeten diniwroko? (Mat. 6:33) A boen njoensoe foe Gado Kownoekondre moesoe preiki; disi na Jehovah wroko, èn fa a de wan grani foe abi foe doe dorodoro nanga en, bigin foe joe jongoe jari!—Mat. 24:14.
4 Papa nanga mama, oenoe e gi den pikin foe oenoe deki-ati foe teki a foeroeten diniwroko? Den pikin foe joe e froestan krinkrin taki joe wani foe den gebroiki den heri ati, sili, froestan nanga krakti gi a warti wroko disi? (Markus 12:30). Foeroe jongoe preikiman e sreka densrefi gi a gewoon pionierwroko foe di den e teki prati na a jepipionierwroko na ibri okasi di den abi ini den skoro jari. A de seiker taki a gi di den e gi densrefi na a fasi disi na Jehovah, e waran en ati!—Odo 27:11.
5 A no de foe taki, dati no ibri wan sma situwâsi e gi en pasi foe man pionier. Ma, efoe joe trow noso no trow, jongoe noso owroe, joe ben prakseri serjoesoe foe en èn ben begi foe en foe dini Jehovah leki wan pionier diniman foe a boen njoensoe? (Kol. 3:23). Foeroe jongoe sma di trow, e doe moeiti foe meki den diniwroko kon moro bigi, so taki wan noso ala toe kan pionier.
6 Efoe joe no man go ini a gewoon pionierwroko now, joe kan dini leki wan jepipionier? So leki fa a sori, dan foeroe preikiman ini joe gemeente sa sreka sani foe doe dati ini april. Joe kan abi wan prati nanga den? Ala di, ala foe Jehovah dienstknekti e kisi foeroe blesi, moro blesi e wakti denwan di man gi moro ten ini a Kownoekondre diniwroko foe soekoe den wan di agersi skapoe.—Tori. 20:35.