Tra sma e misi joe!
1 Kande wanwan leisi wi e misi wán noso moro gemeente konmakandra, foe di wi e denki taki ’no wan sma sa misi mi; den no sa si srefi taki mi no de drape’. Dati no troe! Leki ibri pisi foe wi skin, na so ibriwan foe wi e plèi wan prenspari ròl na ini a fasi fa a gemeente e wroko (1 Kor. 12:12). Te wi no de na wan alawiki konmakandra dan dati kan abi krakti na tapoe a jeje gosontoe foe tra sma di e fisiti a konmakandra. Joe kan sabi seiker taki te joe no de drape—den e misi joe!
2 A prenspari ròl di joe e plèi: Paulus ben angri foe abi demakandra nanga den brada foe en. Romesma 1:11, 12 e froeklari foe san ede: „Taki mi kan gi oenoe wan toe jeje presenti . . . taki oenoe kan gi makandra deki-ati, foe di ibriwan e kisi deki-ati nanga a bribi foe a trawan, a di foe oenoe èn a di foe mi.” Na a srefi fasi, nanga den komentaar foe wi, den toewijzing di wi abi na a konmakandra, èn srefi a de di wi de drape, wi e doe foeroe foe gi makandra deki-ati foe go doro na wan getrow fasi.—1 Tes. 5:11.
3 Joe no e angri foe si tra sma na den gemeente konmakandra? Joe e arki den komentaar foe den heri boen èn e warderi a sori di den e sori a bribi foe den. Den jeje presenti foe den e bow joe na jejefasi. Te den no ben sa de na a konmakandra, joe ben sa firi taki joe ben misi wan prenspari sani. Joe brada nanga sisa e firi a srefi fasi te joe no de drape.
4 A prenspari ròl di den konmakandra e plèi: Wan leisi A Waktitoren ben taki o prenspari den konmakandra de foe meki wi tan na libi na jejefasi, di a ben e taki: „Na ini a grontapoe disi di feti prati èn di no e hori ensrefi na boen gwenti nanga wet, a kresten gemeente de wan troetroe kibripresi . . . , wan lanpe foe vrede nanga lobi. De foe dati ede wan sma di e fisiti ala den gemeente konmakandra doronomo” (wO93 15/8 11). Ibri dei wi e miti situwâsi di e weri wi na jejefasi. Efoe wi no e loekoe boen, wi ben kan abi so foeroe foe doe nanga den eigi sorgoe foe wi, taki wi no man si moro san na den moro prenspari sorgoe foe wi gi jeje afersi. Wi alamala abi makandra fanowdoe foe kisi a deki-ati di wi abi fanowdoe so taki wi kan tan na ini wánfasi èn fajafaja na ini a diniwroko foe Gado.—Hebr. 10:24, 25.
5 A de toemoesi prenspari taki wi e fisiti den konmakandra. Siki, noso sani di wi no ben kan si na fesi, kan tapoe wi wanwan leisi. Ma efoe a no de so, dan meki wi abi a fasti bosroiti foe de ala ten na mindri den ipi-ipi sma di e kon makandra èn e prèise Jehovah makandra!—Ps. 26:12.