Wan olijfbon di e meki froktoe
„Na a fasi disi heri Israël sa kisi ferloesoe.” — ROM. 11:26.
1. San wi kan taki foe olijfbon?
A DE WAN SANI di de bekenti taki olijfbon e tan gro hondrohondro jari. Srefi te foeroetron na owroe olobon e dede te foe kaba, sontron njoen sproiti e gro kon foe den roetoe, e meki wan ofoe moro njoen olijfbon doe kon. A wans fa a no fa, wan olijfbon de di ben prani pikinmoro 4.000 jari psa kaba èn di de te now ete na ini a ten disi a libi èn di e meki froktoe!
2. Nanga sortoe pramisi ini prakseri Paulus e taki foe wan olijfbon, èn san a olijfbon e agersi?
2 Na ini en brifi gi den Romeinisma, na apostel Paulus e gebroiki na olijfbon leki wan agersitori foe na heri moi fasi fa Jehovah e meki pisi foe wan pramisi di a ben gi na Abraham hondrohondro jari a fesi kon troe:
„Mi sa blesi joe foe troe èn mi sa meki joe siri kon foeroe foe troe leki den stari na hemel èn leki den ai santi di de na sekanti; èn joe siri sa teki na doro foe en féjanti abra. Èn nanga jepi foe joe siri ala naatsi foe grontapoe sa blesi densrefi foe troe, foe di joe ben arki na mi sten.” — Gen. 22:16-18.
Na Abrahamitis ferbontoe
3, 4. Fa Abraham djonsrode ben sori taki a ben abi bribi? (b) San na pisi tori disi ben agersi?
3 Abraham ben sori djonsrode taki a ben de klari foe offer Isaäk, en wan enkri manpikin na en fosi wefi Sara (Hebr. 11:17-19; tangitangi lési Genesis 22:1-18). Foe sensi den moro fosi ten den kristensma ben si na ini a pisi tori disi wan agersi fasi foe na offer di Jehovah ben offer en manpikin èn foe a kisi di a ben kisi en dan baka nanga jepi foe na opobaka. Ija, „Gado ben lobi, na grontapoe foe [libisma] sote, dati a ben gi en wan enkri gebore Manpikin, sodati ibriwan sma di e poti bribi na ini en, no sa kisi pori, ma ben sa kisi tégo libi”. — Joh. 3:16.
4 Na ini a profétis prenki disi foe dat’ede Abraham ben e agersi Jehovah Gado, aladi Isaäk — wan jonkoeman di ben kan kakafoetoe gi en papa di ben owroe 125 jari — ben de wan prenki foe Jezus Kristus, di ben de klari foe gi en libisma libi abra leki na ferloesoe ofrandi. — Hebr. 7:27; 10:12.
5. Na ini a tori foe na pramisi siri san ben kon na krin na ini Genesis 3:15 ini a ferbontoe di Gado ben sroto nanga Abraham?
5 Foe di Abraham ben sori wan tranga bribi, meki Jehovah ben sroto na fesi kaba wan ferbontoe nanga en di ben bigin wroko na ini 1943 bifo G.T. (Gen. 12:4, 7; Gal. 3:17). Sowan 50 jari na baka, na baka di Jehovah ben si na égifasi foe a bribi foe Abraham di ben hori doro na ondro tesi, Jehovah ben taki agen foe na ferbontoe pramisi disi èn a ben poeroe moro foe en kon na doro, soleki fa a skrifi na ini Genesis kapitel 22. Na Abrahamitis ferbontoe disi di ben tjari kon a krin dorodoro ben gi den fini pisi foe na fasi tapoe san den moi prakseri foe Gado ben sa kontroe. A ben sori taki na siri foe ferloesoe di ben pramisi na ini Eden, ben sa kon na grontapoe leki wan bakapikin foe Abraham, dati a ben sa de wan siri di ben o de foe moro leki wan sma (foe san na joisti nomroe no ben tjari kon na krin ete), dati a ben sa wini en féjanti èn dati te foe kaba ala naatsi foe grontapoe ben sa kisi blesi gi densrefi nanga jepi foe na siri dati. — Gen. 3:15.
Kon sabi soema de na siri foe Abraham
6, 7. (a) Soleki den Boekoe e taki dan soema de na prenspari Siri foe Abraham? (b) Fa wi sabi taki wan tweederarig siri foe Abraham ben o de? (c) Oten a soifri nomroe ben tjari kon na krin, èn o bigi a nomroe disi de?
6 Ibri wan fini pisi foe na pramisi dati de prenspari gi sma di abi na srefi bribi leki Abraham èn di wani kisi blesi foe Johovah (Rom. 4:16). Soema ben de na prenspari siri foe Abraham, nanga jepi foe soema te foe kaba ala naatsi foe grontapoe ben sa blesi densrefi? Na apostel Paulus e meki oen kon si taki na prenspari siri disi na Kristus. — Gal. 3:16.
7 Moro fara, sortoe sma ben sa de na pisi foe na siri di ben sa den tweederang siri foe Abraham, foe di Jehovah ben pramisi Abraham dati a ben sa meki en siri kon tron foeroe? Soema ben sa tron den „erfgenaam na ini a tori foe wan pramisi”, den „mede-erfgenaam” nanga na prenspari Siri, Kristus? (Gal. 3:29; Rom. 8:17) Sowan 2.000 jari langa srefi na nomroe foe den sma disi di ben sa de na tweederang ’siri foe Abraham’, sma no ben sabi, soleki „den stari foe hemel” ofoe leki „den aisanti di de na sekanti”. Na a kaba foe na fosi jarhondro G.T. na apostel Johannes ben jere moro fara „na nomroe foe den di ben kisi wan ségelmarki, wan hondro fotenti na fo doesoen, di kisi wan ségelmarki komoto foe ini ibri lo foe den manpikin foe Israël”. — Gen. 22:17; Openb. 7:4.
8. Sortoe spesroetoe okasi den djoe di ben besnij ben abi?
8 Ma na mindri foe soema den 144.000 „manpikin foe Israël” disi ben sa piki poeroe èn kisi wan ségelmarki? Efoe a ben de so taki nofo Israëlsma na skinfasi ben waka baka a Wetsferbontoe soleki wan „leriman . . . di e tjari joe go na Kristus [na prenspari Siri foe Abraham]”, dan ala memre foe den 144.000 foe na tweederang siri foe Abraham ben sa kan teki na mindri foe den èn soboen den kon tron „wan kownoekondre foe priester nanga wan santa naatsi” foe a blesi foe ala naatsi foe grontapoe (Gal. 3:24; Ex. 19:5, 6). Ma a ben de so taki nofo foe den (den Israëlsma na skinfasi) ben sori taki den de troetroe pikin foe Abraham, „na tata . . . foe ala sma di abi bribi”? — Rom. 4:11.
9. Fa Johannes a Dopoeman ben sori taki na jeje siri foe Abraham no ben moesoe foe komoto nomonomo na mindri foe den djoe?
9 Srefi bifo Jezus ben bigin en diniwroko na grontapoe, Johannes na Dopoeman ben warskow den kerki fesiman foe den djoe: „No prefoeroe foe taki gi oensrefi taki: ’Wi abi Abraham leki tata.’ Bikasi mi e taki gi oenoe, taki Gado kan meki pikin gi Abraham foe den ston disi. Na béri de kaba na a roetoe foe den bon; ibri bon dan di no e meki heri boen froktoe, moe koti trowe èn iti go na ini a faja” (Matt. 3:9, 10). Na ini a ten foe Paulus a wondroe konifasi fa Jehovah ben o opo na heri nomroe foe na tweederang siri foe Abraham, ben kon na krin (Rom. 16:25-27). Paulus e brokobroko a tori disi finfini na ini en brifi gi den Romeinsma.
Paulus’ brifi gi den Romeinsma
10. Sortoe kroektoe fasi foe prakseri den djoe na skinfasi ben hori na ede?
10 Den djoe ben froestan boenboen taki den ben de a pipel foe Gado di a ben teki. Na ini The Concise Jewish Encyclopedia den e taki foe na wortoe „pipel di a ben teki”: „Wan fasi foe taki sani foe sori a bribi dati den djoe de na ini wan spesroetoe matifasi nanga Gado. Na fasi disi foe prakseri abi en roetoe na ini a ferbontoe nanga Abraham.” Foe di den ben firi densrefi kefarlek taki den ben de Abraham bakapikin, meki den djoe ben prakseri taki den ben de na siri nanga jepi foe soema ala tra naatsi ben sa kisi blesi èn dati den ben kan krin densrefi na fesi foe Gado nanga jepi foe wroko di den ben doe soleki na wetsferbontoe ben taki. — Joh. 8:33, 39; Rom. 9:31, 32; 10:3, 4; 11:7.
11, 12. (a) Sortoe situwasi ben de na ini a gemeente foe Rome di Paulus ben skrifi gi den Romeinsma? (b) Foe san-ede Paulus ben skrifi gi djoe nanga heiden kristen na ini Rome?
11 Nanga na sani disi na ini prakseri na apostel Paulus ben skrifi gl na kristen gemeente na ini Rome. Sonwan foe den djoe na ini Rome ben tron kristen, ma a moro bigi pisi foe den ben wégri foe sori bribi na ini Jezus leki Messias. Na kristen gemeente na ini Rome ben abi ooktoe foeroe kristen di no ben de djoe.
12 Foe difrenti réde ede, meki djoe leki heiden ben e firi densrefi moro hé leki tra sma — den djoe, foe di den roetoe ben de ini na fosfosi Abrahamitis gesiagti èn den heiden, foe di den ben kisi na okasi tapoe na fundamenti foe na Abrahamitis ferbontoe foe kisi spesroetoe grani leki wan bakapisi foe na mankeri foe bribi foe a sé foe den djoe di no ben sori bribi. Paulus ben meki moeiti foe overtoigi kristen di ben de djoe èn no-djoe, dati ala toe groepoe abi foe taki tangi foe a regtvaardiki positsi foe den na a fesi foe Gado na a bribi foe den na ini Kristus na presi foe na den wroko (Rom. 3:21-27). Di Paulus ben skrifi en brifi, a ben poti na marki na en fesi foe kristen wánfasi èn a meki foe froktoe, ala disi foe gi grani na Jehovah foe na heri moi fasi fa wanfroe-wan a e meki na Abrahamitis ferbontoe kontroe.
Wan symbolis olijfbon
13. Foe san-ede Paulus ben taki taki a ben sari, èn san a ben agersi nanga wan olijfbon di ben kweki?
13 Na apostel Paulus e taki fa a ben sari foe na tori taki „a no alasma di komoto foe Israël, de troetroe ’Israël’” èn a e ferklari: „Sosrefi toe den no de pikin alamala [wan pisi foe Abraham jeje siri] foe di den de Abraham siri.” Dan a e go moro fara foe agersi fa Jehovah ’ben meki pikin doe kon gi Abraham’ (Rom. 9:1, 2, 6, 7). Foe ferteri fa na Abrahamitis ferbontoe e meki na heri nomroe foe memre foe na jeje siri fee pramisi, doe kon, a e gebroiki na symbool foe wan olijfbon di kweki spesroetoe, — Tangitangi lési Romeinisma 11:13-26.
14. Soema de na roetoe foe na agersi olijfbon, èn sortoe bijbel tekst e sori dati?
14 Bifo Paulus taki foe na bon ensrefi, a e taki foe na roetoe, èn a e taki dan taki „na roetoe de santa” (Rom. 11:16). Jehovah Gado de na „Moro Santawan” (Hos. 11:12). Foeroetron den e kari en „na Moro Santawan foe Israël”, spesroetoe na ini a boekoe Jesaja (Jes. 10:20; 29:19; 60:9). Na apostel Petrus e gi salfoe kristen na rai di e kon now: „Joe moe de santa joesrefi na ini joe heri libifasi na ini akroederi nanga na santawan di kari joe” (1 Petr. 1:15, 16). Jehovah Gado, na Moro Bigi Abraham, de na roetoe foe na agersi olijfbon.
15. (a) Na sortoe fasi Jehovah de na roetoe foe na jeje Israël? (b) Soema de na bonskin foe na agersi olijfbon? Foe sanede?
15 Neleki na famiri-edeman Abraham ben de na roetoe foe na naatsi Israël, na so Jehovah e gi libi na na jeje Israël. Èn na a srefi fasi fa den twarfoe lo foe Israël ben komoto foe Abraham, langalanga psa en manpikin Isaäk èn Jakob èn den twarfoefamiri-edeman, na so den twarfoe agersi lo foe na jeje Israël e komoto foe Jehovah langalanga psa na moro Bigi Isaäk, Kristus Jezus. En, leki na prenspari siri foe Abraham, e kon agersi nanga na bonskin foe na olijfbon (Gal. 3:16). Nanga jepi foe en manpikin, Kristus Jezus, Jehovah — na roetoe — e meki na heri nomroe foe memre foe na tweederang siri (Gal. 3:29). Ma fa èn na sortoe fasi Jehovah e meki na nomroe foe agersi taki di de fanowdoe doe kon?
Son taki kapoe poeroe trawan ènter na ini
16. San de na „santa kibritori” di Paulus e taki foe en na ini Romeinisma 11:25 èn Efesesma 5:3-6?
16 Paulus e leg na heri moi seti disi uit moro fara. A e skrifi: „Bikasi mi no wani brada, taki oenoe tan sondro oen sabi foe na santa kibritori disi, sodati oenoe no de koni na ini oenoe égi ai: dati abra Israël wan pisi foe den senwe kon dede te leki na heri nomroe foe den sma foe den naatsi kon na inisé, èn na a fasi disi [Griki: kai houtoos] heri Israël sa kon kisi ferloesoe” (Rom. 11:25, 26; teki gersi Efesesma 3:3-6). Jehovah ben o ’meki pikin gebore gi Abraham’ foe di a ben o meki „na heri nomroe foe sma foe den naatsi [heiden]” kon de na ini na tweederang siri foe Abraham. Foe di den ben sa sori „na bribi foe Abraham”, meki na nomroe disi di skotoe foe den no-djoesma sa sori taki den de jeje djoe, wan pisi foe na jeje „Israël foe Gado”. — Rom. 4:16; 2:28, 29, Gal. 6:15, 16.
17. (a) Sortoe fasi foe prani di no de na gwenti Paulus ben taki foe en? (b) Soema den taki di ben kapoe poeroe ben agersi èn soema den taki foe wan wilde olijfbon di ben ènter na ini? (c) Fa den bigimemre nanga bigifasi djoe den bere ben poeroe kon na doro nanga na agersitori disi?
17 Paulus ben agersi na fasi fa na „santa kibritori” disi ben sa waka nanga wan fasi foe prani di no de a gwenti. Na normale fasi foe doe de, dati den e teki sproiti foe wan kweki bon èn ènter en na tapoe wan wilde bonfoetoe foe meki a kan meki froktoe, soleki fa Paulus ben sabi heri boen. A ben taki gi den heiden kristen taki „tége ala fasi foe na natuur, den ben ènter na tapoe na olijfbon di ben kweki” (Rom. 11:24). Na so fasi a ben agersi den no-djoe di ben kisi primisi foe go na ini na Abrahamitis ferbontoe, nanga sproiti ofoe taki foe wan wilde olijfbon di ben sa ènter na tapoe na bonfoetoe foe wan „kweki olijfbon”. Den ben sa kon na ini a presi foe den taki di kapoe-poeroe — wan agersifasi foe den djoe na skinfasi di ben trowe foe di den ben mankeri bribi (Rom. 11:17, 19, 20, 24). Na ongewoon agersitori disi de wan krakti fasi foe poeroe na bere foe den bigifasi, hémemre èn di de sondro bribi djoe kon na doro, èn di ben e loekoe den heiden neleki den ston di no abi libi ofoe neleki wilde olijftaki di no man foe meki heri boen froktoe. Nanga dati a ben sori krin taki Jehovah ’abi na makti foe meki pikin gebore gi Abraham’, soleki Johannes na Dopoeman ben taki a fesi leki wan warskow. — Luk. 3:8.
18. (a) San ben psa na ini 36 G.T., ma son taki di ben kapoe poeroe, ben ènter njoen baka tapoe na Abrahamitis-verbontoebon? (b) Fa Paulus ben meki wánfasi kon na (. . .)?
18 Tokoe ete den no-djoe kristen, di ben ènter „tége na natuur” leki wan pisi foe na jeje siri na ini na Abrahamitis ferbontoebon, no ben abi réde foe firi densrefi moro bigi leki den djoe. Paulus ben ferklari: „Den toe [den djoe], efoe den no tan na ini den mankeri foe bribi, sa ènter na ini; bikasi Gado kan ènter den agen na ini” (Rom. 11:23). Wan pikin fikapisi foe den djoe na skinfasi ben teki na prenspari siri èn den ben tron taki, di e tan, foe na agersi bon (Rom. 9:27; 11:5). Ma a moro bigi pisi foe den djoe ben broko poeroe foe na Abrahamitis-ferbontoebon, na ini 36 G.T., na a kaba foe na sébitenti jariwiki foe san Daniël ben taki a fesi (Dan. 9:27). Bakadati son djoe ben ènter njoen baka „na ini den égi olijfbon” foe di den ben sori bribi na ini na Messias, Jezus, na penspari Siri foe Abraham (Rom. 11:24; Tori 13:5, 42, 43; 14:1). Foe di a ben ferrklari den sani disi, meki Paulus ben meki wánfasi kon na mindri den salfoe kristen, bikasi alamala ben kisi, foe „Gado boenfasi” ede, ’prati na a roetoe foe fatoefasi foe na olijfbon’. — Rom. 11:17, 22.
Wan olijfbon di e meki froktoe
19. Fa na Abrahamitis ferbontoe meki safrisafri na jeje siri kon gebore foe meki „heri Israël” kisi ferloesoe?
19 Na ini den jarhondro di psa, èn spesroetoe na ini den ten disi foe a kaba, moro djoe èn no-djoesma ben ènter na tapoe na agersi olijfbon. Na so fasi na Abrahamitis ferbontoe e meki na „heri nomroe” foe djoe èn heiden di de fanowdoe foe meki na jeje siri kon doro en marki. „Na a fasi disi heri Israël sa kisi ferloesoe”, no na Israël na skinfasi, ma den sma di de „Israël troetroe”, den 144.000 memre foe na jeje Israël. — Rom. 11:12, 25, 26; 9:6-8; Openb. 7:4.
20, 21. (a) San na kontroe foe na moro prenspari pisi disi foe na Abrahamitis ferbontoe moe bewégi wi foe doe? (b) San sa de den afersi di wi sa taki foe den na ini na artikel di e kon now?
20 Na wondroefasi fa Jehovah ben meki a moro prenspari pisi foe na Abrahamitis ferbontoe disi kontroe, foe di a meki na bonskin nanga na heri nomroe foe den taki foe na agersi bon doe kon, moesoe foeroe wi nanga ferwondroe. Neleki Paulus wi e bari taki: „O na dipi foe Gado goedoe èn koni èn sabi! Fa sma no man foe kon sabi en fasi foe kroetoe sani te na a inibere foe den, èn fa en pasi no de foe ondrosoekoe! Bikasi soema leri sabi na fasi foe prakseri foe Jehovah, ofoe soema tron en raiman? Ofoe: ’Soema fosi ben gi en wan sani, sodati a ben sa kisi pai foe dati?’ Bikasi foe en èn nanga jepi foe en èn gi en ala sani de. En moesoe kisi ala grani foe tégo. Amen.” — Rom. 11:33-36.
21 Ma sortoe praktis leri wi kan kisi foe na agersitori foe na olijfbon di ben nter, soboen foe den agersi taki (salfoe kristen) leki den trawan di kan blesi densrefi now nanga jepi foe na siri di na Abrahamitis ferbontoebon ben meki? Den afersi disi wi sa taki foe den na ini na artikel di e kon now.
[Prenki na tapoe bladzijde 4 di e tjari sani kon na krin]
(Efoe joe wani si pe den sani disi skrifi, loekoe a tijdschrift)
NA GERSI OLIJFBON — Model èn agersi model
TAKI
12 lo foe Israël
144.000 (jeje Israëlsma Tweederang siri)
BONSKIN
Izaäk, Jakob èn 12 famiri-edeman
Messias Jezus (prenspari siri)
ROETOE
Abraham
Jehovah