Bow makandra foe di wi e gi komentaar na den konmakandra
1 Na Hebrewsma 10:24 wi e kisi a froemane foe „gi makandra deki-ati foe sori lobi èn doe boen wroko”. Disi wani taki toe foe bow makandra foe di wi e gi komentaar di e leri wi wan sani te wi de na den gemeente konmakandra. Foe san ede wi moesoe gi komentaar? Fa wi kan doe disi? Soema o kisi wini?
2 Prakseri den foeroetron di joe ben kisi wini te joe ben jere trawan e taki makriki èn krin wortoe di e meki joe man froestan sani moro boen èn di e tranga joe na jejefasi. Joe abi a grani foe doe a srefi sani gi den. Te joe abi wan prati, dan joe e sori taki joe angri foe ’gi wan toe jeje presenti’ so taki ala den fisitiman e kisi deki-ati. — Rom. 1:11, 12.
3 Fa foe gi boen komentaar: No gi langa komentaar, di e taki foe ala den prakseri na ini a paragraaf. Langa komentaar foeroetron no e tjari a spesroetoe penti ini a piki kon na krin èn a kan meki trawan lasi-ati foe abi wan prati. A fosi komentaar tapoe a paragraaf moesoe de wan piki di sjatoe, èn di e piki na aksi di skrifi na ondrosei langalanga. Den sma di e gi komentaar baka a wan dati, kan sori fa foe gebroiki a materiaal noso kan sori fa den bijbeltekst fiti na ini a tori. Loekoe a Handleiding-boekoe bladzijde 90-92.
4 Efoe a prakseri foe gi komentaar e gi joe pikinso broko-ede, dan sreka wan sjatoe komentaar na fesi èn aksi a studieleider foe a kari joe nen foe joe gi piki tapoe a paragraaf dati. Baka di joe doe disi na wan toe konmakandra, dan joe sa man teki prati moro makriki. Memre taki Moses nanga Jeremia ben taki dati den no ben seiker dati den ben man taki na poebliki (Ex. 4:10; Jer. 1:6, foetoewortoe). Ma Jehovah ben jepi den foe taki gi en èn a sa jepi joe toe.
5 Soema sa kisi wini foe den komentaar foe joe? Joesrefi sa kisi wini, foe di den komentaar foe joe e meki waarheid kon moro dipi na ini joe froestan nanga joe ati èn dati e meki taki a e kon moro makriki gi joe foe memre den sani di taki baka ten. Tra sma toe e kisi wini te den e jere den sani di joe e taki èn di e bow sma. Wi e kisi deki-ati te ala sma, awansi den abi ondrofeni, den jongoe, den e sjensjen noso den njoen, e meki moeiti foe taki foe a bribi foe den na den gemeente konmakandra.
6 Wi de seiker taki wi o kon si dati „wortoe di taki na a joisti ten — o boen [den] de” te sma e gebroiki den foe bow makandra na den konmakandra! — Odo 15:23.