Ala sma moesoe ’teki a wortoe nanga den heri ati’!
1 Miljoenmiljoen sma e studeri bijbel nanga Jehovah Kotoigi. Foe den kan doro den markitiki foe kisi têgo libi, den moesoe ’teki a wortoe nanga den heri ati’, leki den 3000 sma di ben sori berow èn ben teki dopoe na a dei foe a Pinksterfesa foe 33 G.T. (Tori. 2:41). Sortoe frantiwortoe disi e poti na wi tapoe na ini a ten disi?
2 Wi moesoe jepi den bijbelstudenti foe wi, foe den kan gi densrefi moro na ini a dini foe Jehovah (1 Tim. 4:7-10). Foe kan jepi den, dan na inlegvel foe Wi Kownoekondre Dienst foe juni 1996, paragraaf 20 e gi a rai: „Soekoe na ini a heri pisi ten di joe e hori a studie, okasi foe meki a kisi warderi gi den eigifasi foe Jehovah. Taki foe joe eigi dipi firi gi Gado. Jepi a studenti foe denki na a fasi foe kweki wan waran, persoonlijk matifasi nanga Jehovah.”
3 A tjalensi di wi tanapoe na en fesi: Moro foeroe sma, di falsi relisi abi krakti na den tapoe, de tevrede nanga wan fasi foe anbegi di no e teki someni ten nanga moeiti, sondro a de fanowdoe foe tjari troetroe kenki kon ini a fasi fa den e libi (2 Tim. 3:5). A tjalensi di wi e tanapoe na en fesi, na foe jepi den sma di wi e studeri bijbel nanga den, foe den kon si taki troe anbegi abi moro na ini leki foe de jereman nomo foe a wortoe foe Gado. Den moesoe poti san den e leri, na ini a libi foe den (Jak. 1:22-25). Efoe Gado no lobi wan sani foe a fasi fa den e tjari densrefi, dan den moesoe erken a froeplekti di den abi foe „drai baka” gi dati èn doe san de joisti foe plisi en (Tori. 3:19). Foe kan kisi têgo libi, den moesoe ’span densrefi boen tranga’ èn teki a sei foe waarheid na wan krakti fasi. — Luk. 13:24, 25.
4 Te joe e takimakandra foe difrenti fasi foe boen gwenti nanga wet, dan aksi joe bijbelstudenti fa a e si den afersi disi troetroe èn san a moesoe doe efoe a e si taki a de fanowdoe foe tjari kenki kon na ini en libi. Poti en prakseri tapoe na organisâsi di e jepi en foe leri waarheid, èn gi en deki-ati foe fisiti gemeente konmakandra doronomo. — Heb. 10:25.
5 Meki wi poti leki marki gi wisrefi foe doro na ati foe a studenti nanga a leri di wi e gi. Wi sa prisiri te wi e gi njoen sma deki-ati foe teki a wortoe foe Gado nanga den heri ati èn teki dopoe! — 1 Tes. 2:13.