Gi joesrefi ini a leisi
„Te leki mi kon, go doro nanga a poti di joe e poti joesrefi na tapoe a leisi na poebliki, a gi foe froemane, a gi di joe e gi leri.” — 1 TIMOTEUS 4:13.
1. Fa wi kan kisi wini te wi e leisi bijbel?
JEHOVAH GADO gi a libisma famiri a toemoesi moi koni foe leri leisi èn skrifi. A gi en Wortoe, bijbel, toe so taki wi kan kisi boen leri (Jesaja 30:20, 21). Na agersi fasi, den bladzijde foe bijbel e meki taki wi man „waka” nanga famiri-edeman di ben e frede Gado, soleki Abraham, Isak, nanga Jakob. Wi kan „si” den oema di ben lobi Gado, soleki Sara, Rebeka, nanga a loyaal oema foe Moab, Rut. Ija, èn wi kan „jere” Jesus Krestes e gi a Bergitaki foe en. Ala a prisiri disi nanga a moi leri foe den Santa Boekoe foe bijbel, wi kan kisi efoe wi na boen leisiman.
2. San e sori taki Jesus nanga den apostel foe en ben kan leisi boen?
2 Tweifri no de, taki a volmaakti man Jesus Krestes ben man leisi toemoesi boen, èn a de seiker taki a ben sabi den Hebrew Boekoe foe bijbel heri boen. Dati meki, di Didibri ben tesi en, dan ibri leisi baka Jesus ben sori go na den, èn ben taki: „Boekoe taki” (Mateus 4:4, 7, 10). Na wán okasi na a snoga na Nasaret, a ben leisi wan pisi foe a profeititori foe Jesaja na poebliki èn ben fiti dati na tapoe ensrefi (Lukas 4:16-21). San de foe taki foe den apostel foe Jesus? Nofo tron den ben teki sani na ini den Hebrew Boekoe foe bijbel poti na ini den sani di den ben skrifi. Ala di den djoe tiriman ben si Petrus nanga Johanes leki sma di no ben man leisi nanga skrifi èn leki aladei sma foe di den no ben go na den Hebrew akademia foe kisi leri, tokoe den brifi di Gado ben meki den skrifi, e sori krin taki den ben kan leisi èn skrifi boen (Tori foe den Apostel 4:13). Ma a de troetroe prenspari foe abi a koni foe man leisi?
„Kolokoe foe a sma di e leisi nanga wan tranga sten”
3. Foe san ede a de so prenspari foe leisi den Boekoe foe bijbel nanga den kresten poeblikâsi?
3 Foe teki èn foe gebroiki a soifri sabi foe den Boekoe foe bijbel, kan abi têgo libi leki bakapisi (Johanes 17:3). Dati meki Jehovah Kotoigi e froestan taki a de toemoesi prenspari foe leisi èn studeri den Santa Boekoe foe bijbel nanga den kresten poeblikâsi di Gado gi nanga jepi foe a getrow èn koni srafoe foe salfoe kresten (Mateus 24:45-47). Te joe loekoe en boen, dan foe di den gebroiki den Waktitoren poeblikâsi di ben meki spesroetoe foe leri sma foe leisi, meki doesoendoesoen sma leri fa foe leisi èn na so fasi den e kisi a sabi foe Gado Wortoe di e gi libi.
4. (a) Foe san ede kolokoe de a bakapisi te joe e leisi, e studeri, èn e gebroiki Gado Wortoe? (b) San Paulus ben froeteri Timoteus ini a tori foe leisi?
4 Te wan sma e leisi, e studeri, èn e gebroiki Gado Wortoe, dan kolokoe na a bakapisi foe dati. Disi de so, foe di na a fasi dati wi e plisi Gado èn e gi en grani, e kisi a blesi foe en, èn abi prisiri. Jehovah wani, taki den foetoeboi foe en moesoe de kolokoe. Foe dati ede, a ben gi den priester a komando foe leisi a Wet foe en gi a pipel foe Israèl foe owroeten (Deuteronomium 31:9-12). Di Esra, a kopi skrifiman nanga trawan ben leisi a Wet gi a heri pipel di ben kon makandra na Jerusalem, dan den ben tjari kon na krin san a wet ben wani taki, èn „bigi prisiri” ben de a bakapisi (Nehemia 8:6-8, 12). A kresten apostel Paulus ben taigi en kompe wrokoman Timoteus baka ten: „Te leki mi kon, go doro nanga a poti di joe e poti joesrefi na tapoe a leisi na poebliki, a gi foe froemane, a gi di joe e gi leri” (1 Timoteus 4:13). Na ini wan tra vertaling wi e leisi: „Gi joesrefi ini a leisi na poebliki foe den Boekoe foe bijbel.” — New International Version.
5. Fa Openbaring 1:3 e sori taki kolokoe abi foe doe nanga leisi?
5 Na ini Openbaring 1:3 den e tjari kon na krin taki a kolokoe foe wi e anga foe a leisi di wi e leisi èn e gebroiki a Wortoe foe Gado. Drape den e taigi wi: „Kolokoe foe a sma di e leisi den wortoe foe a profeititori disi nanga wan tranga sten, èn den wan di e jere den èn di e doe den sani di skrifi na ini; bika a fasti ten de krosibei.” Ija, wi moesoe leisi den profeiti wortoe foe Gado na ini Openbaring èn na ini ala den Boekoe foe bijbel, nanga wan tranga sten èn jere den. A sma di de troetroe kolokoe na a sma di „en prisiri de na ini a wet foe Jehovah, èn na ini en wet a e leisi nanga wan safri sten dei nanga neti”. San na a bakapisi? „A sa waka boen nanga ala san a e doe” (Psalm 1:1-3). Dati meki boen reide de, taki na organisâsi foe Jehovah e gi ibriwan foe wi tranga foe leisi èn studeri en Wortoe te wi de wi wawan, leki osofamiri, èn nanga mati.
Doe moeiti foe denki èn foe prakseri dipi foe sani
6. Foe sortoe sani Josua ben kisi a komando foe leisi, èn fa disi ben tjari wini kon?
6 Fa joe kan kisi a moro boen wini te joe e leisi Gado Wortoe nanga den kresten poeblikâsi? Kande joe feni en wan boen sani foe doe san Josua, wan fesiman foe Israèl foe owroeten di ben e frede Gado, ben doe. A ben kisi a komando: „A wetboekoe disi no moesoe komoto na joe mofo, èn joe moesoe leisi na ini en nanga wan safri sten dei nanga neti, so taki joe kan handri soifri akroederi ala sani di skrifi na ini; bika na so fasi joe sa meki joe pasi waka boen èn na so fasi joe sa handri nanga koni” (Josua 1:8). ’Leisi nanga wan safri sten’ wani taki dati joe e taki den wortoe na joesrefi nanga wan safoe sten. Disi na wan jepisani foe hori sani na ede, bika a e poti san joe e leisi dipi na ini a froestan. Josua ben moesoe leisi a Wet foe Gado „dei nanga neti”, noso doronomo. Dati ben de a fasi foe abi boen bakapisi èn foe handri nanga koni te den frantiwortoe di Gado gi, ben moesoe doe. Foe leisi Gado Wortoe doronomo na so wan fasi, kan jepi joe na wan srefi fasi.
7. Foe san ede wi no moesoe meki a leisi di wi wani leisi Gado Wortoe esi-esi, de a marki?
7 Te joe e leisi Gado Wortoe, no meki a leisi di joe e leisi en esi-esi, de a marki. Efoe joe ben abi a prakseri foe gebroiki wan pisi ten foe leisi bijbel noso a wan noso tra kresten poeblikâsi, dan kande joe ben sa wani teki joe ten. Disi de spesroetoe prenspari te joe e studeri nanga a marki foe memre prenspari penti. Èn te joe e leisi, doe moeiti foe denki. Ondrosoekoe den wortoe foe a bijbel skrifiman, finifini. Aksi joesrefi: ’San a abi na prakseri? San mi moesoe doe nanga den sani disi di mi e leri?’
8. Foe san ede a boen foe prakseri dipi te wi e leisi den Boekoe foe bijbel?
8 Teki ten foe prakseri dipi foe sani te joe e leisi den Santa Boekoe foe bijbel. Disi sa jepi joe foe memre bijbel tori èn foe gebroiki bijbel gronprakseri. Te joe e prakseri dipi foe Gado Wortoe èn na so fasi e hori penti foe bijbel na prakseri, dan dati sa meki toe dati joe man taki san de na ini joe ati, èn gi boen piki na tapoe san opregti sma e aksi joe, na presi taki joe e taki wan sani di joe kan sari foe dati baka ten. Wan odo di Gado ben meki sma skrifi en, e taki: „Na ati foe a regtfardikiwan e prakseri dipi foe sani, so taki a kan gi piki.” — Odo 15:28.
Kroederi njoen sani di joe leri, nanga sani di joe ben leri kaba
9, 10. Fa a leisi di joe e leisi bijbel kan go na fesi, foe di joe e kroederi njoen sani di joe e leri foe bijbel nanga den wan di joe sabi kaba?
9 Moro foeroe kresten moesoe erken taki wan ten ben de dati den no ben sabi foeroe foe Gado, en Wortoe, nanga den prakseri foe en. Ma now den kresten bedinari disi, foe bigin nanga a meki di Gado ben meki sani èn a sondoe foe libisma, kan tjari a prakseri foe Krestes ofrandi kon na krin, den kan froeteri foe a pori foe a godelowsoe seti foe sani disi, èn den kan sori fa a libisma famiri di e gi jesi sa kisi a blesi foe têgo libi na ini wan paradijs na grontapoe. Disi man, moro foeroe foe di den foetoeboi disi foe Jehovah teki ini den „a sabi foe Gado” foe di den ben studeri bijbel nanga kresten poeblikâsi (Odo 2:1-5). Safrisafri den kroederi njoen sani di den ben leri, nanga den owroe sani di den ben froestan kaba.
10 Foe kroederi den njoen sani di joe e leri foe bijbel, nanga den wan di joe sabi kaba, na wan boen sani èn a e pai (Jesaja 48:17). Te joe e si bijbel wet, gronprakseri, noso srefi prakseri di no taki so krin, dan kroederi den nanga san joe sabi kaba. Meki a tori fiti na san joe leri kaba foe „a model foe gosontoe wortoe” (2 Timoteus 1:13). Soekoe tori di kan jepi joe foe tranga a matifasi di joe abi nanga Gado, foe meki a sortoe sma di joe de leki kresten kon de moro boen, noso foe jepi joe foe prati bijbel waarheid nanga trawan.
11. San joe ben sa kan doe, te joe e leisi wan sani di bijbel e taki ini a tori foe a fasi wan sma moesoe tjari ensrefi? Sori disi nanga eksempre.
11 Te joe e leisi wan sani di bijbel e taki foe a fasi fa wan sma moesoe tjari ensrefi, proeberi foe si krin sortoe gronprakseri de ini a tori. Prakseri dipi foe disi, èn loekoe san joe ben sa doe na ini den srefi situwâsi dati. Na wan krakti fasi, Josef, a manpikin foe Jakob, ben weigri foe doe seks hoeroedoe nanga a wefi foe Potifar, èn a ben aksi: „Fa mi ben kan doe a bigi ogri disi èn troetroe sondoe na Gado?” (Genesis 39:7-9) Na ini a tori disi di e naki sma ati, joe e si wan prenspari gronprakseri — seks hoeroedoe na wan sondoe na Gado. Nanga joe froestan joe kan kroederi a gronprakseri disi nanga tra sani di taki na ini Gado Wortoe, èn joe sa kisi wini foe a sabi disi te den e tesi joe foe doe wan srefi sortoe ogri. — 1 Korentesma 6:9-11.
Si den sani di pasa na ini bijbel, na ini joe prakseri
12. Foe san ede joe moesoe si bijbel tori na ini joe prakseri te joe e leisi den?
12 Foe poti sani di joe e leri dipi na ini joe froestan te joe e leisi, joe moesoe si na ini joe prakseri san e pasa. Si nanga joe froestan a kontren, den oso, den sma. Jere den sten foe den. Smeri a brede di den e baka na ini wan onfoe. Ondrofeni na ini joe prakseri den sani di ben pasa. Dan te joe e leisi, a sa de wan ondrofeni di e boeweigi na ati, bika joe kan si wan owroeten foto, kren na tapoe wan hei bergi, froewondroe foe den moi sani di Gado meki, noso de makandra nanga man nanga oema di abi wan tranga bribi.
13. San joe ben sa taki foe san skrifi na ini Kroetoebakra 7:19-22?
13 Meki wi taki, dati joe e leisi Kroetoebakra 7:19-22. Si na na ini joe prakseri san e pasa. Kroetoeman Gideon nanga dri hondro deki-ati Israèl man go lontoe a kampoe foe den Midiansma. A de wan sani foe tin joeroe na neti, a bigin foe wan „mindrineti wakti joeroe”. Didjonsro den Midian sroedati-waktiman go tanapoe na den presi, èn doengroe e tapoe a kampoe foe den feanti foe Israèl, di e sribi. Loekoe! Gideon nanga den man foe en abi toetoe nanga den. Den abi bigi watrakan di e tapoe den flambo di den e hori na ini den kroektoe-anoe. Wantronso, den dri groepoe di ibriwan foe den abi wan hondro man, e blo na tapoe den toetoe, e naki den watrakan broko, e opo den flambo go na loktoe, èn e bari: „A feti-owroe foe Jehovah nanga di foe Gideon!” Joe e loekoe na a kampoe. Ija, den Midiansma e lon èn bigin bari! Te den dri hondro man e tan blo na tapoe den toetoe foe den, dan Gado e meki den Midiansma feti nanga makandra. Midian abi foe lowe, èn Jehovah gi Israèl a wini.
Leri warti sani foe disi
14. Fa Kroetoebakra kapitel 9 ben sa kan gebroiki foe leri wan pikin, taki a de fanowdoe foe abi sakafasi?
14 Te wi e leisi Gado Wortoe, dan wi kan leri foeroe sani. Foe eksempre, kande joe wani leri den pikin foe joe taki a de fanowdoe foe abi sakafasi. We, a moesoe de makriki foe si na ini joe prakseri san ben taki na ini a profeititori foe Jotam, a manpikin foe Gideon, èn froestan san a wani taki. Bigin leisi na Kroetoebakra 9:8. „Wan leisi”, na so Jotam ben taki, „den bon ben go foe salfoe wan kownoe na den tapoe.” Na olijfbon, a figabon, nanga a droifibon ben weigri foe tiri. Ma a pikin makaboesi ben breiti taki a ben kan tron wan tiriman. Te joe leisi a tori nanga wan tranga sten gi den pikin foe joe, dan joe ben sa kan tjari kon na krin taki den diri prani ben prenki lespeki sma di no ben soekoe foe de kownoe foe kompe Israèlsma. A makaboesi, di den ben gebroiki soso foe bron sani, ben prenki a kownoekondre foe a bigimemre Abimeilèk, wan kiriman di ben wani basi trawan, ma leki wan kontroe foe a profeititori foe Jotam, a ben kon na en kaba (Kroetoebakra, kapitel 9). Sortoe pikin ben sa wani gro kon bigi èn tron leki wan makaboesi?
15. Fa a e kon na krin na ini a boekoe Rut taki a de prenspari foe de loyaal?
15 A prenspari di loyaalfasi de prenspari, e kon na krin na ini a bijbel boekoe Rut. Meki wi taki dati ibriwan foe den memre foe joe osofamiri e kisi wan okasi foe leisi a tori dati nanga wan tranga sten èn den e proeberi foe froestan san a tori e taki. Joe e si na oema foe Moab, Rut, di e teki waka foe go na Betlehem makandra nanga Naomi, en masra mama di de wan weduwe, en joe e jere Rut e taki: „Joe pipel sa de mi pipel, èn joe Gado, mi Gado” (Rut 1:16). Joe e si taki Rut, di lobi wroko, e piki karoe na den kotiman baka na tapoe a gron foe Boas. Joe e jere taki a e prèise Rut, foe di a e taki: „Ala sma na a doro foe mi pipel sabi taki joe na wan toemoesi boen oema” (Rut 3:11). No langa na baka, Boas e trow nanga Rut. Akroederi a seti foe a swagri-trow, dan nanga jepi foe Boas, Rut e meki wan manpikin „gi Naomi.” Rut e tron wan afo foe David èn te foe kaba foe Jesus Krestes. Na so a ben kisi „wan volmaakti pai”. Boiti dati, den wan di e leisi a bijbel tori, e leri wan warti sani: De loyaal na Jehovah, èn joe sa kisi foeroe blesi. — Rut 2:12; 4:17-22; Odo 10:22; Mateus 1:1, 5, 6.
16. Sortoe tesi den dri Hebrewman ben kisi, èn fa a tori disi kan jepi wi?
16 A tori foe den Hebrewman di ben nen Sadrak, Mesak, nanga Abednego kan jepi wi foe de getrow na Gado na ini situwâsi di de wan bigi tesi. Si a tori na ini joe prakseri, ala di joe e leisi Danièl kapitel 3 nanga wan tranga sten. Wan bigi popki foe gowtoe de hei na tapoe a lagi presi foe Dura, pe den tiriman foe Babilon kon na makandra. Te den e jere a babari foe den sani foe plèi pokoe, dan den e fadon na gron èn e anbegi a popki di kownoe Nebukadnesar meki. Dati wani taki, ala sma, boiti Sadrak, Mesak, nanga Abednego, e doe dati. Na wan lespeki fasi, ma nanga wan fasti bosroiti den e taigi a kownoe taki den no o dini den gado foe en èn anbegi a gowtoe popki. Den e trowe den jongoe Hebrewman disi na ini wan boen faja onfoe. Ma san e pasa? Te a kownoe e loekoe go na inisei, dan a e si fo trangaskin man, èn wan foe den „gersi wan manpikin foe den gado” (Danièl 3:25). Den e poeroe den dri Hebrewman foe na onfoe, èn Nebukadnesar e blesi a Gado foe den. A ben de wan prisiri sani foe si a tori disi na ini joe prakseri. Èn disi e leri joe wan warti sani troetroe ini a tori foe a de di wan sma de getrow na Jehovah te a e kisi tesi!
Kisi wini foe a leisi foe bijbel leki wan osofamiri
17. Kari sjatoe wan toe boen sani di joe osofamiri kan leri foe di oenoe e leisi bijbel makandra.
17 Na osofamiri foe joe kan njan boen foe den foeroe wini efoe joe teki ten doronomo foe leisi bijbel makandra. Te joe e bigin na Genesis, dan joe kan si a meki di Gado ben meki sani, èn loekoe pikinso na ini a fosi Paradijs oso foe libisma. Joe kan abi wan prati na den ondrofeni foe den getrow famiri-edeman nanga den osofamiri foe den èn waka baka den Israèlsma te den e koti abra na tapoe drei gron foe a Redi Se. Joe kan si a jongoe skapoeman David di e wini a langa Filistijnman Goliat. Joe osofamiri kan si fa den e bow a tempel foe Jehovah na Jerusalem, den kan si fa den legre foe Babilon e gi a tempel pori, èn den kan si fa sma e bow en baka na ondro a Tiriman Serubabel. Makandra nanga den sakafasi skapoeman krosibei foe Betlehem, joe kan jere fa den engel e bariwroko gi a geborte foe Jesus. Joe kan kon sabi finifini tori foe en dopoe nanga en diniwroko, joe kan si fa a e gi en libisma libi leki wan loesoe-paiman, èn joe kan abi wan prati na a prisiri di sma e prisiri foe di a opo baka. Baka dati, joe kan teki waka makandra nanga na apostel Paulus èn si fa gemeente e opo te a krestendom e panja ensrefi. Baka dati, na ini a boekoe Openbaring joe osofamiri kan prisiri foe a toemoesi moi fisjoen di na apostel Johanes ben kisi foe a tamara, so srefi foe a Doesoen Jari Tiri foe Jesus.
18, 19. Sortoe rai wi e kisi di abi foe doe nanga a leisi di wi e leisi bijbel leki osofamiri?
18 Te joe e leisi bijbel nanga wan tranga sten leki wan osofamiri, dan leisi en nanga wan krin sten èn nanga faja. Te joe e leisi son pisi foe den Boekoe foe bijbel, dan wan osofamiri memre — kande a papa — ben sa kan leisi den wortoe di e froeteri a tori. Den trawan foe na osofamiri kan teki den ròl foe den sma foe bijbel, èn leisi den pisi foe den nanga a joisti firi.
19 Te joe abi wan prati na a leisi foe bijbel leki osofamiri, dan joe sa man leisi moro boen. Dan soleki fa a sori, joe sa kisi moro sabi foe Gado, èn disi moesoe tjari joe moro krosibei na en. Asaf ben singi: „Na foe mi sei, a kon di mi e kon krosibei na Gado, boen gi mi. Na ini a Soeverein Masra Jehovah mi poti mi froeloesoe, foe meki ala den wroko foe joe bekènti” (Psalm 73:28). Disi sa jepi joe osofamiri foe de leki Moses, di „ben tan stanfaste neleki a ben e si a Sma di wi no kan si”, èn dati na Jehovah Gado. — Hebrewsma 11:27.
Leisi èn a kresten diniwroko
20, 21. Fa a komando di wi kisi foe preiki, abi foe doe nanga a man di wi man leisi?
20 Na angri di wi abi foe anbegi „a Sma di wi no kan si”, moesoe poesoe wi foe doe moeiti foe de boen leisiman. A man di wi man leisi boen e jepi wi foe gi kotoigi nanga jepi foe Gado Wortoe. A e jepi wi troetroe foe teki prati na a Kownoekondre preikiwroko di Jesus ben gi den bakaman foe en a komando foe doe, di a ben taki: „Go . . . èn meki disipel foe sma foe ala nâsi, èn dopoe den na ini a nen foe a Tata èn foe a Manpikin èn foe a santa jeje, èn leri den foe doe ala den sani di mi komanderi oenoe” (Mateus 28:19, 20; Tori foe den Apostel 1:8). A kotoigiwroko na a moro prenspari wroko foe Jehovah en pipel, èn a man di wi man leisi, e jepi wi foe doe disi.
21 Moeiti de fanowdoe foe de wan boen leisiman èn wan koni leriman foe Gado Wortoe (Efeisesma 6:17). So boen, ’doe ala san joe man foe sori joesrefi na Gado leki wan sma di a feni boen, èn gebroiki a wortoe foe waarheid na wan reti fasi’ (2 Timoteus 2:15). Meki joe sabi foe bijbel waarheid nanga a koni di joe abi leki wan Kotoigi foe Jehovah gro, foe di joe e gi joesrefi ini a leisi.
San na joe piki?
◻ Fa kolokoe e anga foe a leisi di wi e leisi Gado Wortoe?
◻ Foe san ede joe moesoe prakseri dipi foe den sani di joe e leisi na ini bijbel?
◻ Foe san ede joe moesoe kroederi sani nanga makandra èn si den na ini joe prakseri te joe e leisi den Boekoe foe bijbel?
◻ San na wan toe sani di wi kan leri foe a leisi di wi e leisi bijbel?
◻ Foe san ede wi moesoe leisi bijbel nanga wan tranga sten, leki osofamiri, èn san leisi abi foe doe nanga a kresten diniwroko?
[Prenki na tapoe bladzijde 24]
Te joe e leisi bijbel leki osofamiri, dan si den tori foe bijbel na ini joe prakseri èn prakseri dipi foe san den wani taki