„Leti so den ben doe”
„Disi wani taki a lobi foe Gado, taki wi e hori den komando foe en.” — 1 JOHANES 5:3.
1. San wi kan taki foe a fasi fa Gado lobi bigi?
„GADO NA LOBI.” Ala sma di kon sabi Gado èn e gi jesi na den komando foe en, e kisi dipi warderi gi a tranga foe en lobi. „A lobi de na a fasi disi, no taki wi lobi Gado, ma taki en ben lobi wi èn a ben seni en Manpikin leki wan zoen-ofrandi gi den sondoe foe wi.” Te wi e sori bribi na ini a warti loesoe-ofrandi foe Jesus, dan wi ’e tan na ini a lobi foe Gado’ (1 Johanes 4:8-10, 16). Na a fasi disi wi kan njan boen foe foeroe blesi na jejefasi nownow èn na ini a seti foe sani di moesoe kon, têgo libi. — Johanes 17:3; 1 Johanes 2:15, 17.
2. Fa a hori di den foetoeboi foe Gado hori den komando foe en tjari winimarki kon gi den?
2 Bijbel verslag lai nanga eksempre foe den wan di hori den komando foe Gado èn di kisi foeroe blesi leki bakapisi. Disi de so toe nanga den kotoigi di ben libi bifo a ten foe den kresten, èn foe wan toe foe den na apostel Paulus ben skrifi: „Na ini bribi ala den wan disi ben dede, ala di den no ben kisi a kontroe foe den pramisi, ma den ben si den foe farawe èn ben gi den wan switikon èn den ben meki bekènti na poebliki taki den ben de freimde sma nanga sma di ben tan gi wan pisi ten nomo na ini a kondre” (Hebrewsma 11:13). Baka ten, kresten foetoeboi foe Gado di ben gi densrefi na a dini foe En, ben kisi winimarki foe „a no-froedini boen-atifasi nanga waarheid [di] ben kon nanga jepi foe Jesus Krestes” (Johanes 1:17). Na ini pikinmoro 6000 jari foe libisma historia, Jehovah pai getrow kotoigi di gi jesi na den komando foe en di „no de wan hebi” srefisrefi. — 1 Johanes 5:2, 3.
Na ini den dei foe Noa
3. Na sortoe fasi Noa ben doe „leti so”?
3 Bijbel verslag e taki: „Na ini bribi Noa, baka di a ben kisi wan warskow foe Gado, foe sani di a no ben si ete, ben sori taki a ben abi frede gi Gado èn a ben bow wan ark gi a froeloesoe foe na osofamiri foe en; èn nanga jepi foe a bribi disi a ben kroetoe grontapoe, èn a ben tron wan erfgenaam foe a regtfardikifasi di de akroederi bribi.” Leki „wan preikiman foe regtfardikifasi”, Noa ben gi jesi na Gado dorodoro, èn a ben e warskow na ogri grontapoe di ben de bifo a froedoe, gi a kroetoe foe Gado di ben sa kon heri esi (Hebrewsma 11:7; 2 Petrus 2:5). Di a ben e bow na ark, a ben wroko soifri akroederi a plan di Gado ben gi en. Dan a ben tjari den meti nanga njanjan di a ben teki go na ini. „Noa ben doe akroederi ala sani di Gado ben komanderi en foe doe. Leti so a ben doe.” — Genesis 6:22.
4, 5. (a) Fa wan ogri-ati krakti ben abi krakti na tapoe a libisma famiri te na ini a ten disi? (b) Foe san ede wi moesoe doe „leti so” te wi e gi jesi na den gebod foe Gado?
4 Noa nanga en osofamiri ben abi foe feti nanga na ogri-ati krakti di den trangajesi engel kan abi na den tapoe. Den manpikin disi foe Gado ben teki libisma skin èn den ben libi nanga oemasma, èn den ben meki basra pikin di ben de moro hei leki libisma èn den ben handri na wan ogri-atifasi nanga libisma. „Èn grontapoe ben kon pori na ini na ai foe a troe Gado èn grontapoe ben kon foeroe nanga ogridoe.” Jehovah ben seni a Froedoe kon foe figi na ogri geslakti dati poeroe (Genesis 6:4, 11-17; 7:1). Foe sensi den dei foe Noa, den ogri jeje no ben kisi pasi foe teki libisma skin moro. Ma tokoe, ’heri grontapoe e tan didon na ini a makti foe na ogriwan’, Satan Didibri (1 Johanes 5:19; Openbaring 12:9). Na wan profeitis fasi, Jesus ben teki a geslakti dati foe den dei foe Noa, di ben opo densrefi teige Jehovah, gersi nanga a geslakti foe libisma di no ben wani teki en foe sensi a marki foe en „denoja” ben kon na krin na ini 1914. — Mateus 24:3, 34, 37-39; Lukas 17:26, 27.
5 Na ini a ten disi, neleki na ini den dei foe Noa, Satan e proeberi foe pori a libisma famiri nanga a planeiti foe wi (Openbaring 11:15-18). Foe dati ede, a de tranga fanowdoe taki wi e gi jesi na a komando di skrifi nanga jepi foe santa jeje: „Weri a heri fetisani foe Gado, so taki joe kan tanapoe steifi teige den triki foe Didibri” (Efeisesma 6:11, foetoewortoe). Foe doe disi, wi e kisi krakti te wi e studeri Gado Wortoe èn e gebroiki en na ini wi libi. Moro fara, wi abi na organisâsi foe Jehovah di e sorgoe gi wi, makandra nanga en salfoe „getrow èn koni srafoe” nanga den lobi owroeman foe wei wi nanga pasensi na ini a pasi di wi moesoe go. Wi abi wan preikiwroko na heri grontapoe foe doe (Mateus 24:14, 45-47). Neleki Noa di ben gi jesi finifini na den leri foe Gado, meki a de so taki ala ten wi e doe „leti so”.
Moses — A moro safri-ati man
6, 7. (a) Sortoe bosroiti Moses ben teki di ben tjari winimarki gi en? (b) Sortoe eksempre foe deki-ati Moses ben libi gi wi?
6 Loekoe wan tra man di ben abi bribi — Moses. A ben kan njan boen foe wan libi foe abi prisiri nomo, na mindri a goedoe libi foe Egipti. Ma a ben froekisi „foe den handri en nanga a pipel foe Gado takroe na presi foe abi a prisiri foe sondoe di ben de foe wan pisi ten”. Leki a foetoeboi di Jehovah ben poti, „a ben poti ala en prakseri na tapoe a paiman, [èn] a ben tan stanfaste neleki a ben si a Sma di wi no kan si”. — Hebrewsma 11:23-28.
7 Na Numeri 12:3 wi e leisi: „A man Moses, ben de a moro safri-atiwan foe ala sma di ben de na tapoe grontapoe.” Kontrari foe en, a Farao foe Egipti ben handri leki a moro bigifasi man di ben de. Di Jehovah ben gi Moses nanga Aron a komando foe froeklari a kroetoe foe En gi Farao, dan fa den ben handri? Wi e leisi: „Moses nanga Aron ben go doe soleki fa Jehovah ben komanderi den foe doe. „Leti so den ben doe” (Exodus 7:4-7). Dati na wan eksempre foe deki-ati srefisrefi gi wi di e meki den kroetoe foe Gado bekènti na ini a ten disi!
8. Fa den ben aksi foe den Israèlsma foe doe „leti so”, èn fa a prisiri di ben de leki bakapisi foe dati, sa de a srefi na ini a ten di e kon heri esi?
8 Den Israèlsma ben horibaka na wan getrowfasi gi Moses? Baka di Jehovah ben pina Egipti nanga neigi foe den tin plaag, a ben gi Israèl finifini bodoi fa foe hori a Paska. „Ne a pipel ben boigi na gron èn den ben trowe densrefi na gron. Baka ten, den manpikin foe Israèl ben gowe èn ben doe leki fa Jehovah ben komanderi Moses nanga Aron. Leti so den ben doe” (Exodus 12:27, 28). Na mindrineti foe a dei dati pe foeroe sani ben feni presi, 14 Nisan 1513 b.G.T., na engel foe Gado ben bigin foe kiri ala den fosi geborewan foe Egipti, ma a ben pasa den oso foe den Israèlsma. Foe san ede den fosi geborewan foe Israèl ben kisi kibri? Bikasi den ben kisi kibri na ondro a broedoe foe a Paska pikinskapoe, di ben moesoe poti na den doro foe den. Den ben doe leti fa Jehovah ben komanderi Moses nanga Aron. Ija, „leti so den ben doe” (Exodus 12:50, 51). Na a Redi Se, Jehovah ben doe ete wan wondroe foe kibri a pipel foe en di ben gi jesi, ala di a ben pori Farao nanga en tranga sroedati wrokosani. Den Israèlsma ben prisiri srefisrefi! Na so a de na ini a ten disi toe, taki foeroe sma di gi jesi na den komando foe Jehovah, sa prisiri foe de kotoigi foe a regtfardiki di A sa kon regtfardiki na Armagedon. — Exodus 15:1, 2; Openbaring 15:3, 4.
9. Sortoe grani na ini a ten disi den Israèlsma e prenki foe di den ben e doe „leti so” na ini a tori foe a tabernakel?
9 Di Jehovah ben komanderi Israèl foe poti wan bijdrage èn foe bow wan tabernakel na ini a sabana, dan na wan frifasi a pipel ben gi ala jepi. Ne, srefi na ini a moro pikin afersi, Moses nanga den friwani kompe wrokoman foe en ben wroko akroederi a bowplan di Jehovah ben gi. „So boen, a wroko foe a tabernakel foe a tenti foe konmakandra ben kon na wan kaba, foe di den manpikin foe Israèl ben tan doe akroederi ala san Jehovah ben komanderi Moses. Leti so den ben doe.” Na a srefi fasi, na a inwijding foe a priesterschap, „Moses ben bigin doe akroederi ala san Jehovah ben komanderi en. Leti so a ben doe” (Exodus 39:32; 40:16). Na ini a ten disi, wi abi na okasi foe horibaka nanga wi heri ati gi a preikiwroko nanga gi programa foe bradi a Kownoekondrewroko. A de a grani foe wi foe dati ede, foe bondroe makandra foe doe „leti so”.
Josua — A abi deki-ati èn a tranga srefisrefi
10, 11. (a) San ben meki taki Josua ben de srekasreka foe kan handri nanga boen bakapisi? (b) Fa wi kan kisi krakti foe kakafoetoe gi den disiten tesi?
10 Di Moses ben gi Josua a komando foe tjari Israèl go na ini a pramisi kondre, dan soleki fa a sori, dan a Wortoe foe Jehovah di skrifi nanga jepi foe santa jeje ben de foe kisi soso na ini den feifi boekoe foe Moses, wán noso toe psalm, nanga a boekoe Job. Moses ben taigi Josua foe tjari a pipel kon makandra te den ben doro a Pramisi Kondre èn foe „leisi a wet disi na fesi foe heri Israèl so taki den kan jere” (Deuteronomium 31:10-12). Moro fara, Jehovah srefi ben komanderi Josua: „A boekoe disi foe a wet no moesoe drifi komoto na joe mofo, èn joe moesoe leisi na ini dei nanga neti nanga wan safoe sten, so taki joe kan handri soifri akroederi ala sani san skrifi na ini; bika dan joe sa meki joe pasi waka boen èn dan joe sa handri nanga koni.” — Josua 1:8.
11 A leisi di Josua ben leisi a „boekoe” foe Jehovah ala dei, ben meki a de srekasreka foe man foe handri den tesi di ben de na en fesi, neleki fa a leisi di den disiten Kotoigi e leisi Jehovah en Wortoe, bijbel, ala dei, e tranga den foe kakafoetoe gi den tesi foe den toemoesi moeilek „lasti dei” disi (2 Timoteus 3:1). Foe di na ogri grontapoe disi lontoe wi, meki wi teki a froemane na ati toe di Jehovah ben gi Josua: „Hori deki-ati èn de tranga. No krempi foe frede ede, bika Jehovah joe Gado de nanga joe, ala presi pe joe sa go” (Josua 1:9). Baka di den lo foe Israèl ben wini Kanan, dan den ben kisi foeroe blesi di den ben seti densrefi kaba na ini a kondre di den ben kisi. „Leti fa Jehovah ben komanderi Moses, na so den manpikin foe Israèl ben doe” (Josua 14:5). Na ini a ten disi, wan srefi sortoe pai e wakti wi alamala di e leisi a Wortoe foe Gado èn e gebroiki en na ini wi libi, ala di wi e gi jesi „leti so”.
Kownoe — Getrow èn trangajesi
12. (a) Sortoe komando ben gi na den kownoe foe Israèl? (b) San ben de a bakapisi foe di a kownoe no ben gi jesi?
12 Fa a ben de nanga den kownoe na Israèl? Jehovah ben poti a plekti disi na tapoe a kownoe: „Te a e go sidon na tapoe a kownoestoeroe foe en kownoekondre, dan a moesoe meki wan kopie gi ensrefi na ini wan boekoe, foe a wet disi di den priester, den Leifisma, abi. Èn a moesoe tan nanga en, èn a moesoe leisi en ala den dei foe en libi, so taki a kan leri foe frede Jehovah en Gado, èn foe hori ala den wortoe foe a wet disi nanga den gebod disi, foe di a e doe den” (Deuteronomium 17:18, 19). Den kownoe foe Israèl ben gi jesi na a komando dati? A de wan sari foe taki dati moro foeroe foe den no ben doe dati, èn dati ben meki taki den ben pina foe den froefroektoe di ben taki na fesi na Deuteronomium 28:15-68. Te foe kaba, Israèl ben panja „foe a wan kaba foe grontapoe go na a tra kaba foe grontapoe”.
13. Fa wi kan abi winimarki, soleki David, te wi e sori lobi gi a Wortoe foe Jehovah?
13 Ma David — a fosi getrow libisma di ben de kownoe na ini Israèl — ben sori na wan apartifasi taki a gi ensrefi na a dini foe Jehovah. A ben sori foe de ’wan pikin lew na Juda’, èn a ben prenki Krestes Jesus, a ’lew foe a lo foe Juda, a roetoe foe David’ di e wini (Genesis 49:8, 9; Openbaring 5:5). Foe pe David ben kisi krakti? A ben abi dipi warderi gi a Wortoe foe Jehovah di skrifi, èn a ben libi akroederi dati. Na Psalm 19, „wan melodie foe David”, wi e leisi: „A wet foe Jehovah volmaakti.” Baka te David ben taki foe den froemane, den gebod, den komando nanga den kroetoe bosroiti foe Jehovah, a e taki moro fara: „Sma moesoe angri foe dati moro leki gowtoe, ija, moro leki foeroe krin gowtoe; èn a switi moro leki oni èn na oni di e lon foe den oni-oso. So srefi joe eigi foetoeboi ben kisi warskow foe den; foeroe pai de te den e hori den” (Psalm 19:7-11). Efoe a leisi di sma ben leisi Jehovah Wortoe ala dei èn ben e prakseri dipi foe en ben e gi pai so wan 3000 jari pasa, dan dati de moro foeroe srefisrefi na ini a ten disi! — Psalm 1:1-3; 13:6; 119:72, 97, 111.
14. Fa a pasi di Salomo ben waka e sori taki moro de fanowdoe leki nomo foe abi sabi?
14 Tokoe a no nofo foe teki sabi nomo. A de prenspari toe taki den foetoeboi foe Gado e handri na tapoe a sabi dati, foe gebroiki en akroederi a wani foe Gado — ija, foe doe „leti so”. Wi kan sori disi ini a kefal foe a manpikin foe David, Salomo, di Jehovah ben froekisi „foe sidon na tapoe a kownoestoeroe foe a kownoekondre foe Jehovah na Israèl”. Salomo ben kisi a toewijzing foe bow a tempel èn foe gebroiki den bow plan di David ben kisi „nanga jepi foe Gado en santa jeje” (1 Kroniki 28:5, 11-13). Fa Salomo ben kan doe a kefalek bigi wroko disi? Leki piki na tapoe wan begi, Jehovah ben gi en koni nanga sabi. Nanga disi, èn foe di a ben hori ensrefi na den plan di Gado ben gi, Salomo ben man bow a kefalek bigi oso dati di ben kon foeroe nanga a glori foe Jehovah (2 Kroniki 7:2, 3). Ma baka ten Salomo ben misi. Na sortoe fasi? A wet foe Jehovah ben taki foe a kownoe na Israèl: „A no moesoe teki moro wefi gi ensrefi, so taki en ati no drai gowe” (Deuteronomium 17:17). Ma tokoe Salomo „ben kon abi seibi hondro wefi, prinses, nanga drihondro oemapatna; èn safrisafri den wefi foe en . . . boigi en ati foe waka baka tra gado”. Na ini den jari di a ben kon owroe, Salomo ben drai gowe foe no doe „leti so”. — 1 Kownoe 11:3, 4; Nehemia 13:26.
15. Fa Josia ben doe „leti so”?
15 Wan toe kownoe di ben gi jesi ben de na Juda, èn a lastiwan foe den ben de Josia. Na ini a jari 648 b.G.T., a ben bigin foe krin afkodrei poeroe foe a kondre èn a ben seti a tempel foe Jehovah kon boen baka. A ben de na a ten dati taki a heipriester ben feni „a boekoe foe a wet foe Jehovah di Moses ben skrifi”. San Josia ben doe na tapoe a tori disi? „Now a kownoe opo go na a oso foe Jehovah nanga ala den man foe Juda èn ala den sma di ben tan na Jerusalem, nanga den priester nanga den Leifisma nanga ala sma, bigiwan nanga pikinwan; èn a ben bigin leisi gi den ala den wortoe foe a boekoe foe a froebontoe, di den ben feni ini na oso foe Jehovah. Èn a kownoe ben tan tanapoe tapoe en presi èn a ben sroto a froebontoe na fesi foe Jehovah foe waka baka Jehovah èn foe hori en gebod èn en kotoigi èn en wet nanga en heri ati èn nanga en heri sili, èn foe doe den wortoe foe a froebontoe di tanapoe na ini a boekoe disi” (2 Kroniki 34:14, 30, 31). Ija, Josia „ben doe leti so”. Leki wan bakapisi foe a getrow pasi di a ben waka, a tjari di Jehovah ben tjari kroetoestrafoe kon na tapoe Juda di no ben de getrow ben tapoe teleki den dei foe den manpikin foe en di ben broko a wet.
Libi akroederi a Wortoe foe Gado
16, 17. (a) Na ini sortoe afersi wi moesoe waka na baka den foetoestap foe Jesus? (b) Sortoe tra getrow foetoeboi foe Gado de leki wan eksempre gi wi?
16 Foe ala den man di ben libi oiti, a moro boen eksempre foe wan sma di ben prakseri dipi foe Gado Wortoe èn di ben libi akroederi dati, ben de Masra Jesus Krestes. A Wortoe foe Gado ben de leki njanjan gi en (Johanes 4:34). A ben taigi den arkiman foe en: „A manpikin no kan doe no wan sani foe di ensrefi wani dati, ma soso a sani san a e si a Tata e doe. Bika ala sani di a Sma dati e doe, na dati a Manpikin e doe toe na a srefi fasi” (Johanes 5:19, 30; 7:28; 8:28, 42). Jesus „ben doe leti so” di a ben froeklari: „Mi no ben saka kon foe hemel foe doe mi wani, ma a wani foe en di ben seni mi kon” (Johanes 6:38). Wi di de Kotoigi foe Jehovah di gi wisrefi abra na En, e kisi a kari foe doe „leti so”, foe di wi e waka baka den foetoestap foe Jesus. — Lukas 9:23; 14:27; 1 Petrus 2:21.
17 Foe doe a wani foe Gado ben de alaten a moro prenspari sani na ini a prakseri foe Jesus. A ben sabi Gado Wortoe heri boen èn na so fasi a ben man foe gi piki di gron tapoe den Boekoe foe bijbel (Mateus 4:1-11; 12:24-31). Te wi e poti prakseri doronomo tapoe Gado Wortoe, dan wi toe kan kon „de koni dorodoro, de srekasreka dorodoro gi ibri boen wroko” (2 Timoteus 3:16, 17). Meki wi waka na baka na eksempre foe den getrow foetoeboi foe Jehovah na ini owroeten èn na ini a ten na baka, èn moro prenspari na baka na eksempre foe wi Masra, Jesus Krestes di ben taki: „So taki grontapoe kan sabi taki mi lobi a Tata, srefi leki fa a Tata gi mi a komando foe doe, na so mi e doe” (Johanes 14:31). Meki a de so, taki wisrefi e sori lobi gi Gado foe di wi e tan doe „leti so”. — Lukas 12:29-31.
18. San moesoe boeweigi wi foe „tron sma di e doe a wortoe”, èn foe san wi sa taki na ini a tra artikel?
18 Te wi e prakseri dipi foe a gi di den foetoeboi foe Gado na ini bijbel ten ben gi jesi, dan a no de so dan, taki wi kisi deki-ati foe doe getrow diniwroko na ini den lasti dei foe Satan en ogri seti foe sani? (Romesma 15:4-6) Foe troe, sani moesoe poesoe wi foe „tron doeman foe a wortoe” dorodoro, soleki fa na artikel di e kon now sa taki foe en. — Jakobus 1:22.
Joe e memre disi?
◻ San „a lobi foe Gado” moesoe wani taki gi wi?
◻ San wi e leri foe den eksempre foe Noa, Moses, nanga Josua?
◻ O fara den kownoe foe Israèl ben go foe gi jesi na a „wortoe” foe Gado?
◻ Fa Jesus de wi Eksempre foe doe „leti so”?
[Prenki na tapoe bladzijde 23]
Noa, Moses, nanga Josua „ben doe leti so”