Den fesa foe a kotiwroko e plisi Gado?

SWITI froktoe, moi groentoe, èn gosontoe karoe tiki di poti hei na wan ipi, na wan moi sani foe si. Na a kotiten, den sortoe sani disi di sma e poti foe si, e moi den altari èn den preikistoeroe foe den kerki na ini heri Ingrisikondre. Na ini Europa, èn so srefi na tra presi, foeroe fesa de spesroetoe sani na a bigin èn a kaba foe a pisi ten foe a kotiwroko.

Den sma di abi a gron fanowdoe foe man sorgoe gi densrefi, de spesroetoe tangi gi a njanjan di den e kisi foe a gron. Ija, Gado ben gi na owroeten nâsi Israèl a komando foe hori dri fesa ibri jari, fesa di ben abi foeroe foe doe nanga a kotiwroko. Na ini a bigin foe a lente, na a fesa foe brede sondro sroedeki, den Israèlsma ben gi Gado wan bosoe foe den fosi froktoe foe a gerst di den koti. Na a wikifesa (noso Pinksterfesa) na a kaba foe a lente, den ben òfer brede di ben meki foe den fosi froktoe foe a tarwe di den ben koti. Na ini a herfst, a fesa foe poti sani makandra ben de, di ben sori taki a pranigron-jari foe Israèl kon na wan kaba (Exodus 23:14-17). Den fesa disi ben de „santa konmakandra” èn ten foe abi prisiri. — Lefitikus 23:2; Deuteronomium 16:16.

Fa a de dan nanga den disiten fesa foe a kotiwroko? Den e plisi Gado?

Den abi foe doe nanga heiden sani

Wan kerki tiriman foe na Anglikan kerki na ini Cornwall, Ingrisikondre, ben bosroiti na ini 1843 foe bigin baka nanga a gwenti di den ben abi na a ten foe a kotiwroko na ini den mindri-jarihondro, foe di a no ben lobi a grontapoefasi foe a fesa njanjan di ben hori na a ten foe a kotiwroko èn foe di sma ben e droengoe na a fesa. A ben teki pikinso foe den fosi siri-njanjan di den ben koti èn ben meki brede nanga en gi a komuni fesa na ini en kerki. Nanga a sani disi di a ben doe, a ben seti a fesa foe Lammas gi ala ten — wan „kresten” fesa foe san son sma e taki dati a ben bigin na a owroeten anbegi foe a Keltis gado, Lug.a So boen, a disiten kotiwroko fesa foe na Anglikan kerki bigin na den heiden.

Fa a de nanga tra fesa di e hori na a kaba foe a ten foe a kotiwroko? Soleki fa na Encyclopædia Britannica e taki, foeroe foe den gwenti di de wan pisi foe den fesa disi, bigin na „a animist bribi pe sma e bribi na ini a karoe [siri-njanjan] jeje, noso na ini a mama foe a karoe”. Na ini son kontren den gronman ben bribi taki wan jeje ben tan na ini a lasti bosoe siri-njanjan di ben moesoe koti ete. Foe jagi a jeje, den e fon a siri-njanjan meki siri-njanjan fadon na gron. Na tra presi den e frekti wan toe wiwiri foe a siri-njanjan kon tron wan „karoe popki” di den e kibri foe kisi „kolokoe” te den sai siri a jari na baka. Dan den e ploegoe den karoe go baka na ini a doti, nanga a howpoe taki disi ben sa blesi a njoen gron-njan.

Wan toe fositen tori e taki dati a kotiten abi foe doe nanga na anbegi di sma ben e anbegi a gado foe Babilon, Tamoes, a patna foe Isjtar, na oemagado foe a kisi di sma man kisi pikin. A koti di den e koti a lepi tiki foe a siri-njanjan, de a srefi leki a dede di Tamoes ben dede toemoesi froekoe. Tra fositen tori e froeteri srefi taki a kotiwroko abi foe doe nanga na òfer di sma e òfer libisma — wan sani di Jehovah Gado e tegoe gi. — Lefitikus 20:2; Jeremia 7:30, 31.

Fa Gado e prakseri foe dati?

A fasi fa Gado ben handri nanga na owroeten Israèl e sori krinkrin taki Jehovah, a Kriaman nanga Fonten foe libi, wani taki den anbegiman foe en moesoe gi densrefi na ini na anbegi foe en wawan (Psalm 36:9; Nahum 1:2). Na ini a ten foe a profeiti Esekièl, a gwenti di sma ben abi foe krei gi a gado Tamoes ben de wan „kefalek tegoe sani” gi Jehovah. Disi, makandra nanga tra falsi relisi ceremonia, ben meki taki Gado ben tapoe en jesi gi den begi foe den falsi anbegiman dati. — Esekièl 8:6, 13, 14, 18.

Agersi disi nanga den komando di Jehovah Gado ben gi Israèl foe doe, di abi foe doe nanga a kotiwroko. Na a fesa foe poti sani makandra, den Israèlsma ben hori wan serjoesoe konmakandra, pe den jongoewan nanga owroewan, goedoe sma nanga pôti sma, ben libi na ini kampoe di ben de gi wan pisi ten nomo èn di den ben meki moi nanga den foeroe wiwiri foe kefalek bigi bon. Disi ben de wan bigi prisiri ten gi den, ma a ben de so srefi wan ten foe prakseri foe a fri di Gado ben gi den afo foe den na a ten di den ben lowe gowe foe Egipti. — Lefitikus 23:40-43.

Na ini a ten foe den fesa foe den Israèlsma, den ben tjari òfer gi Jehovah, a wan-enkri troe Gado (Deuteronomium 8:10-20). Ma foe den animist bribi di wi ben kari na fesi, na no wan presi bijbel e taki dati gron-njan, soleki den tarwe bosoe, abi wan sili.b Èn den Boekoe foe bijbel e sori krinkrin taki kroektoe gado no abi libi, den no man taki, si, jere, smeri, firi, noso jepi den anbegiman foe den. — Psalm 115:5-8; Romesma 1:23-25.

Kresten na ini a ten disi no de na ondro a Wet froebontoe di Gado ben sroto nanga na owroeten nâsi Israèl. Ija, Gado ’ben poeroe en na pasi foe di a ben spikri en na a pina-oedoe foe Jesus’ (Kolosesma 2:13, 14). Den disiten foetoeboi foe Jehovah e libi akroederi „a wet foe Krestes” èn den e sori warderi gi ala sani di Gado e gi. — Galasiasma 6:2.

Na apostel Paulus ben taki krinkrin taki den djoe fesa ben de „wan skaduw foe den sani di moesoe kon ete” èn a e taki moro fara: „Ma a troetroe sani na foe Krestes” (Kolosesma 2:16, 17). Foe dati ede, troe kresten e erken a denki foe den Boekoe foe bijbel: „Den sani di den nâsi e tjari leki ofrandi, den e òfer gi den ogri jeje, èn no gi Gado . . . Oenoe no kan dringi a beker foe Jehovah nanga a beker foe den ogri jeje” (1 Korentesma 10:20, 21). Boiti dati, kresten e waka na baka a tirilin foe „no fasi moro san no krin”. Den fesa foe a kotiwroko di sma e hori na ini joe birti, abi foe doe nanga sani foe heiden noso falsi relisi? Efoe dati de so, dan troetroe kresten no sa wani doe sani di no e plisi Jehovah foe di den sa weigri foe abi foe doe nanga den anbegi disi di doti. — 2 Korentesma 6:17.

Te wan pikin di abi tangi, e kisi wan kado foe en papa, na soema a e gi tangi dan? Wan freimde sma, noso en papa noso mama? Nanga opregti begi den anbegiman foe Gado e taigi Jehovah, a hemel Tata foe den, tangi ibri dei gi a lobi di a lobi foe gi sani pasa marki. — 2 Korentesma 6:18; 1 Tesalonikasma 5:17, 18.

[Foetoewortoe]