Sabi Jehovah — A Gado di de wan troetroe sma
TE DR. S. RADHAKRISHNAN foe India e teki a Hindoe idea ini a tori foe Gado, gersi di foe tra sistema foe relisi, a e taki: „A Gado foe den Hebrewsma na wan tra sortoe Gado. A de wan sma èn a e doe sani na ini a historia èn a abi belangstelling gi den kenki nanga den sani di pasa sondro taki sma froewakti, foe a grontapoe disi di e kenki. A de wan Sma di abi komunikâsi nanga wi.”
A Hebrew nen foe a Gado foe bijbel na יהוה, di sma e vertaal moro foeroe nanga „Jehovah”. A e pasa ala den tra gado. San wi sabi foe en? Fa a ben handri nanga sma na ini bijbel ten?
Jehovah nanga Moses „fesi na fesi”
„Fesi na fesi” froetrow matifasi ben de na mindri Jehovah nanga en foetoeboi Moses, ala di Moses no ben kan si Gado troetroe (Deuteronomium 34:10; Exodus 33:20). Na ini en jongoe jari, na ati foe Moses ben de nanga den Israèlsma, di ben de na ini katibo na Egipti na a ten dati. A no ben wani a libi moro di a ben abi leki wan memre foe na osofamiri foe Farao, „èn a ben froekisi foe den handri en takroe nanga a pipel foe Gado” (Hebrewsma 11:25). Leki wan bakapisi foe dati, Jehovah ben gi Moses foeroe spesroetoe grani.
Leki wan memre foe na osofamiri foe Farao, „Moses ben kisi leri na ini ala koni foe den Egiptisma” (Tori foe den Apostel 7:22). Ma foe man tiri a nasi Israèl, a ben moesoe kweki den eigifasi sakafasi, pasensi nanga safri-atifasi toe. A ben doe disi na ini den 40 jari di a ben de leki wan skapoeman na ini Midian (Exodus 2:15-22; Numeri 12:3). Jehovah ben tjari ensrefi nanga en prakseri kon na krin gi Moses, ala di A ben tan sondro foe a kan si en, èn Gado ben froetrow den Tin Komando na en nanga jepi foe engel (Exodus 3:1-10; 19:3–20:20; Tori foe den Apostel 7:53; Hebrewsma 11:27). Bijbel e froeteri wi taki „Jehovah ben taki nanga Moses fesi na fesi, neleki fa wan sma ben sa taki nanga en kompe” (Exodus 33:11). Ija, Jehovah srefi ben taki: „Mofo nanga mofo mi e taki nanga en.” Moses ben abi troetroe wan warti èn froetrow matifasi nanga en Gado, di sma no kan si, ma di de wan troetroe sma! — Numeri 12:8.
Boiti a froekoe historia foe a nâsi Israèl, Moses ben skrifi a Wet sistema nanga ala den fasi foe en. Wan tra warti grani ben froetrow na en toe — foe skrifi a boekoe Genesis. A lasti pisi foe a boekoe dati ben de historia di en eigi famiri ben sabi heri boen èn foe dati ede ben de pikinmoro makriki foe skrifi. Ma foe pe Moses ben kisi den finifini tori foe a moro froekoe historia foe libisma? A kan taki Moses ben abi owroeten tori di skrifi èn di en fositen tata ben kibri, foe gebroiki leki fonten pe a ben kan feni bodoi. Na a tra sei, a ben kan kisi finifini tori di gi abra nanga mofo noso a ben kan kisi bodoi langalanga foe di Jehovah tjari sani kon na krin gi en. Langa ten kaba, man nanga lespeki frede èn foe ala libimarki erken a persoonlijk matifasi di Moses ben abi nanga en Gado ini a tori disi.
Jehovah — a Gado foe Elia di de wan troetroe sma
A profeiti Elia ben sabi Jehovah toe leki wan Gado di de wan troetroe sma. Elia ben abi faja gi a soifri anbegi èn ben dini Jehovah awansi a ben tron wan sma di sma ben abi bigi bita-ati gi èn di ben kisi gens foe den anbegiman foe Bâ-al, a prenspari gado foe ala den gado foe Kanan. — 1 Kownoe 18:17-40.
Akab, kownoe foe Israèl, nanga en wefi, Iseibèl, ben soekoe foe kiri Elia. Foe di Elia ben frede foe lasi en libi, meki a ben lowe go na Berseiba, na a westsei foe a Dede Se. Drape a ben wakawaka na ini a gran sabana èn ben begi taki a wani dede (1 Kownoe 19:1-4). Jehovah ben drai en baka gi Elia? A no ben abi belangstelling moro gi en getrow foetoeboi? Elia kan denki dati, ma a ben fowtoe srefisrefi! Baka ten, Jehovah ben taki safri nanga en èn ben aksi: „San joe e doe djaso, Elia?” Baka wan kefalek fasi foe sori krakti na wan wondroe fasi, „wan sten ben de gi en, èn a sten ben taigi en moro fara: ’San joe e doe djaso, Elia?’” Jehovah ben sori a persoonlijk belangstelling disi gi Elia, so taki a kan gi deki-ati na en foetoeboi di de foe froetrow. Gado ben abi moro wroko gi en foe doe, èn na wan fajafaja fasi Elia ben doe wan sani na tapoe a kari dati! Elia ben doe den wroko di a ben kisi na wan getrow fasi, èn ben meki a nen foe Jehovah, a Gado foe en di de wan troetroe sma, kon santa. — 1 Kownoe 19:9-18.
Baka di Jehovah trowe a nâsi Israèl, a no ben taki persoonlijk moro nanga den foetoeboi foe en na grontapoe. Disi no ben wani taki dati a persoonlijk belangstelling di a abi gi den ben kon moro mendri. A ben tiri den èn ben tranga den ete na ini en diniwroko, nanga jepi foe en santa jeje. Teki foe eksempre na apostel Paulus, di sma ben sabi fosi leki Saulus.
Santa jeje e tiri Paulus
Saulus ben kon foe Tarsus, wan prenspari foto foe Silisia. En papa nanga mama ben de Hebrewsma, ma a ben gebore leki wan borgoe foe Rome. Ma Saulus ben kweki akroederi den strak bribi foe den Fariseiman. Baka ten, na Jerusalem, a ben kisi na okasi foe kisi leri „na den foetoe foe Gamalièl”, wan prenspari leriman foe a Wet. — Tori foe den Apostel 22:3, 26-28.
Foe a faja ede di Saulus ben abi gi djoe gwenti, ma di no ben boen, meki a ben teki prati ini wan ogri feti teige den bakaman foe Jesus Krestes. Srefi a kiri di den ben kiri Stefanus, a fosi kresten di den ben kiri foe en bribi ede, a ben feni boen (Tori foe den Apostel 7:58-60; 8:1, 3). Baka ten a ben erken taki, ala di a ben de wan blasfemiasma èn wan sma di ben froefolgoe trawan, èn wan asrantisma, tokoe „[Gado] ben sori sari-atifasi gi [en], bika [a] ben de ini don èn ben handri sondro bribi”. — 1 Timoteus 1:13.
Wan troetroe angri foe dini Gado ben boeweigi na ati foe Saulus. Baka di Saulus drai en libi di a ben de na tapoe a pasi e go na Damaskus, Jehovah ben gebroiki en na wan kefalek aparti fasi. Ananias, wan fosi kresten disipel, ben kisi a tiri foe Krestes di ben opo baka, foe jepi Paulus. Baka dati, Paulus (na a Rome nen dati sma ben kon sabi Saulus leki wan kresten) ben kisi tiri foe a santa jeje foe Jehovah foe doe wan langa diniwroko di ben tjari froktoe kon, na pisi foe Europa nanga Pikin Asia. — Tori foe den Apostel 13:2-5; 16:9, 10.
Wi kan si dati sma e kisi a srefi tiri foe a santa jeje na ini a ten disi? Ija, wi kan si dati.
Atheisme no e tapoe Jehovah foe sori a persoonlijk belangstelling di a abi gi sma
Joseph F. Rutherford ben de a di foe toe presidenti foe a Waktitoren Genootschap. A ben teki dopoe na ini 1906 leki wan Bijbel Ondrosoekoeman — na a nen dati sma ben kon sabi Jehovah Kotoigi na a ten dati — èn a ben poti na wroko leki a raiman foe wet foe a Genootschap a jari na baka, èn ben tron a presidenti foe a Genootschap na ini januari 1917. Tokoe wan ten a jongoe afkati disi ben de wan atheistsma. San ben poesoe en foe tron so wan kresten foetoeboi foe Jehovah?
Na ini juli 1913, Rutherford ben dini leki fesiman foe wan kongres foe na International Bible Students Association di ben hori na Springfield, Massachusetts, Amerkankondre. Wan njoensoeman foe a koranti foe a foto, The Homestead, ben interview Rutherford, èn a verslag ben druk baka na ini a souvenir report foe a kongres dati.
Rutherford ben tjari kon na krin taki, na a ten di a ben abi plan foe go trow, den sani di a ben bribi na relisi sei ben de foe a Baptist relisi, ma a di foe na oema di ben o tron en wefi, ben de foe a Presbyteriaan relisi. Di a pastoor foe Rutherford ben taki dati „na oema ben o go na hèlfaja, bika a no ben dopoe èn taki en ben o go langalanga na hemel bika a ben dopoe, dan a logis fasi foe denki foe en ben bigin tegoe gi dati èn a ben tron wan atheistsma”.
A ben teki wan toe jari, di Rutherford ben ondrosoekoe sani finifini, foe kan bow en bribi baka na ini wan Gado di de wan troetroe sma. A ben wegi a sani go-kon, na so a ben taki, foe a prakseri dati „san no kan satisferi a froestan, no abi a reti foe satisferi na ati”. Kresten „moesoe de seiker taki den Boekoe foe bijbel di den bribi na ini, de troe”, na so Rutherford ben tjari kon na krin, èn a ben taki toe: „Den moesoe sabi a fondamenti di den e tanapoe na tapoe.” — Loekoe 2 Timoteus 3:16, 17.
Ija, a kan na ini a ten disi srefi taki wan atheistsma noso wan agnostis-sma e ondrosoekoe den Boekoe foe bijbel, e bow a bribi èn e kweki wan tranga persoonlijk matifasi nanga Jehovah Gado. Baka di wan jonkoeman studeri bijbel finifini nanga jepi foe a Watch Tower poeblikâsi Sabi di e tjari joe go na têgo libi, a ben erken: „Mi no ben bribi na ini Gado di mi ben bigin nanga a studie disi, ma now mi e feni taki a sabi foe bijbel kenki mi prakseri krinkrin. Mi e bigin sabi Jehovah èn foe froetrow tapoe en.”
„A donman” nanga Gado
„Noiti iniwan skrifiman foe na OT [Hebrew Boekoe foe bijbel] no ben prakseri foe boeweisi noso foe haritaki foe a de di Gado de”, na so Dr. Jakobus Hastings e taki na ini A Dictionary of the Bible. „A no e kroederi nanga a firi foe [sma foe] na owroe grontapoe ini algemeen foe taki dati Gado no de, noso foe gebroiki froeklari foe boeweisi dati. A bribi ben de wan gewoon sani gi a libisma prakseri èn ala sma ben denki so.” A no de foe taki, disi no wani taki dati ala sma na ini a ten dati ben frede Gado. Dati seiker no ben de so. Psalm 14:1 nanga 53:1 e taki ala toe foe „a sma sondro froestan”, noso soleki fa a King James Version e taki, „a donman”, di taki na ini en ati: „No wan Jehovah no de.”
Sortoe sma na a donman disi, a sma di e taki dati Gado no de? A no de so taki a sma no sabi sani na froestan sei. Na presi foe dati, a Hebrew wortoe na·valʹ e sori go na wan mankeri na moreel sei. Profesor S. R. Driver e taki na ini den komentaar di a skrifi na ini The Parallel Psalter, dati a fowtoe a „no swakifasi foe wegi sani go-kon, ma a firi di sma no e firi na moreel sei èn na relisi sei, a froestan di sma no e froestan noso si sani srefisrefi”.
A psalm singiman e go doro foe taki foe a go di sma e go na baka na moreel sei èn di de a bakapisi foe so wan fasi foe denki: „Den handri na wan pori fasi, den handri na wan tegoe fasi na ini a fasi fa den e tjari densrefi. No wan sma de di e doe boen” (Psalm 14:1). Dr. Hastings e taki sjatoe: „Foe di sma e prakseri taki Gado no de na grontapoe èn den no e kisi strafoe, meki den kon tron kroeka èn e doe toemoesi ogri sani.” Sondro foe kibri wan sani den e teki godelowsoe gronprakseri abra èn e wisiwasi wan Gado di de wan troetroe sma, na soema den no wani gi frantiwortoe. Ma na ini a ten disi, so wan fasi foe denki don èn de foe sma sondro froestan neleki fa a ben de di a psalm singiman ben skrifi den wortoe foe en moro leki 3000 jari pasa kaba.
Warskow di e kon foe a Gado foe wi di de wan troetroe sma
Meki wi go baka now na den aksi di ben opo na ini a fosi artikel foe wi. Foe san ede foeroe sma no man kroederi wan Gado di de wan troetroe sma, nanga a pina di e panja so na ini a grontapoe foe tide?
Bijbel abi bodoi di skrifi na ini, foe libisma di „Gado ben meki [den] . . . taki soleki fa santa jeje ben tjari den” (2 Petrus 1:21). Bijbel wawan e tjari a Gado di de wan troetroe sma, Jehovah, kon na krin gi wi. Bijbel e warskow wi toe gi wan ogri sma, di sma no kan si, di abi a krakti foe tiri èn foe basi a fasi fa libisma e denki — Satan Didibri. A de wan logis sani, taki efoe wi no abi bribi na ini wan Gado di de wan troetroe sma, dan fa wi kan bribi taki wan Didibri noso Satan de toe di de wan troetroe sma?
Na apostel Johanes ben skrifi na ondro a krakti foe a santa jeje: „A wan di den e kari Didibri nanga Satan . . . e kori heri grontapoe pe sma e libi” (Openbaring 12:9). Baka ten Johanes ben taki: „Wi sabi taki wi e komoto na Gado, ma a heri grontapoe e didon na ini a makti foe a godelowsoe wan” (1 Johanes 5:19). Den froeklari disi e sori den wortoe foe Jesus, di Johanes srefi ben skrifi na ini en Evangelie: „A tiriman foe grontapoe de na pasi e kon. Èn a no abi krakti na mi tapoe.” — Johanes 14:30.
A bijbel leri disi de fara troetroe foe san sma e bribi now! „Foe taki foe Didibri de krinkrin wan sani di sma no wani moro na ini a ten disi. A jarihondro foe wi foe sabidensi èn pe sma e tweifri foe sani, seni Satan go nanga pensjoen”, na so a Catholic Herald e taki. Tokoe na wan krakti fasi Jesus ben taigi den man di ben abi na prakseri foe kiri en: „Oenoe na foe oen tata Didibri, èn oenoe wani foe doe den winsi foe oen tata.” — Johanes 8:44.
A fasi fa bijbel e tjari a makti foe Satan kon na krin de reidelek. A e tjari kon na krin foe san ede, ala di moro foeroe foe den sma wani libi na ini vrede nanga wánfasi, tokoe grontapoe e kisi foe doe nanga a si di sma no wani si trawan na ai, feti, ogri di e doe nanga tranga foe soso, soleki fa ben sori na Dunblane (di kari tapoe bladzijde 3 nanga 4). Boiti dati, Satan no de wan feanti di de en wawan nanga soema wi moesoe feti. Bijbel e gi tra warskow di abi foe doe nanga foeroe didibri, noso ogri jeje — ogri jeje kriatoeroe di langa ten pasa kaba ben moksi den krakti makandra nanga Satan foe kori libisma èn foe gebroiki den na wan fowtoe fasi (Judas 6). Jesus Krestes ben kisi foe doe nanga a krakti foe den jeje disi foeroe leisi, èn a ben man wini den. — Mateus 12:22-24; Lukas 9:37-43.
A troe Gado, Jehovah, abi na prakseri foe krin a grontapoe disi foe godelowsoefasi èn te foe kaba poeroe den wroko foe Satan nanga den ogri jeje foe en. Tapoe a gron foe a sabi di wi abi foe Jehovah, wi kan abi tranga bribi nanga froetrow na ini den pramisi foe en. A e taki: „Fosi mi no wan Gado ben meki, èn baka mi no wan tra Gado ben de moro. Mi — mi na Jehovah, èn boiti mi no wan tra froeloesoeman de.” Jehovah na troetroe wan Gado di de wan troetroe sma gi ala sma di sabi en, e anbegi en, èn e dini en. Wi kan howpoe tapoe en, èn tapoe en wawan, foe froeloesoe wi. — Jesaja 43:10, 11.
[Prenki na tapoe bladzijde 7]
Wan sani foe a di foe tina-aiti jarihondro di kerfoe èn di e prenki Moses di e skrifi Genesis 1:1 na ondro a krakti foe a santa jeje
[Sma di abi a reti foe a prenki]
From The Holy Bible by J. Baskett, Oxford
[Prenki na tapoe bladzijde 8]
Foeroe leisi Jesus Krestes ben wini den ogri jeje