Disi na troetroe den lasti dei?

JOE de na a ede foe wan kroejara te a e doro wan moeilek pisi foe a liba. Kefalek bigi klipston de foe si na ini soela nanga foeroe skoema di e fadon kon. Joe e proeberi foe poesoe a kroejara poeroe foe den klipston. A sma di e sidon na baka joe ben moesoe jepi foe stiri a kroejara nanga en pari, ma a no abi nofo ondrofeni. Moro takroe ete, joe no abi wan karta, foe dati ede joe no sabi srefisrefi efoe den soela disi sa tjari joe go na wan tiri watra noso go na ini wan waterval.

A no wan switi situwâsi, a no so? Meki wi kenki en foe dati ede. Prakseri taki joe abi wan tjariman di abi ondrofeni, wan tjariman di sabi ibri klipston foe a liba, ibri boktoe foe a liba. A ben sabi langa ten na fesi kaba taki den ben e doro a djoegoedjoegoe watra disi, a sabi pe a watra disi sa tjari den go, èn a sabi fa foe koela pasa en. Joe no ben sa firi joesrefi moro seiker?

Foe troe, wi alamala de na ini wan srefi sortoe moeilek situwâsi. Wi de na ini wan djoegoedjoegoe pisi ten foe a libisma historia, ala di a no de wi fowtoe. Foeroe sma no sabi srefisrefi o langa a situwâsi sa tan na a fasi disi, èn efoe a situwâsi sa kon moro betre, noso fa foe man tan na libi disiten. Ma wi no abi foe denki taki jepi no de srefisrefi. Wi Mekiman gi wi wan tjariman — wan tjariman di ben taki na fesi taki a doengroe pisi ten disi foe a historia ben sa de, fa a ten disi sa kon na wan kaba, èn a e gi wi a tiri di wi abi fanowdoe foe man tan na libi. A tjariman dati na wan boekoe, bijbel. A Skrifiman foe en, Jehovah Gado, e kari ensrefi a Bigi Leriman, èn nanga jepi foe Jesaja a e gi a djaranti: „Oen eigi jesi sa jere wan wortoe na oen baka di e taki: ’Disi na a pasi. Waka na tapoe, oen pipel’, efoe oenoe moesoe go na oen reti-anoesei noso efoe oenoe moesoe go na oen kroektoe-anoesei” (Jesaja 30:20, 21). Joe ben sa wani so wan tiri? Meki wi ondrosoekoe dan efoe troetroe bijbel ben taki na fesi fa a ten foe wi ben sa de.

Den bakaman foe Jesus poti wan aksi di wani taki foeroe

Den bakaman foe Jesus ben moesoe froewondroe. Didjonsro Jesus ben taigi den krinkrin taki den kefalek moi tempelgebow foe Jerusalem ben sa pori krinkrin! A sani disi di a ben taki na fesi, ben e gi froewondroe. Sjatoe na baka, di den ben sidon na tapoe na Olijfbergi, fo foe den disipel ben aksi Jesus: „Taigi wi: O ten den sani disi sa de, èn san sa de a marki foe joe denoja èn foe a bosroiti foe a seti foe sani?” (Mateus 24:3; Markus 13:1-4) Efoe den ben froestan en ofoe no, a piki foe Jesus ben sa abi foe doe nanga moro leki wán sani.

A pori di a tempel foe Jerusalem ben kisi èn a kaba foe a djoe seti foe sani no ben de a srefi leki a ten foe a denoja foe Krestes èn leki a kaba foe a heri seti foe sani na grontapoe. Ma tokoe, na ini a langa piki foe Jesus, na wan koni fasi a ben taki foe ala den pisi disi foe na aksi. A ben taigi den fa a situwâsi ben sa de bifo a pori foe Jerusalem; a ben taigi den so srefi san den ben kan froewakti fa grontapoe ben sa de na a ten foe en denoja, te a ben sa tiri leki Kownoe na hemel èn te a ben sa de na a dromofo foe tjari a heri seti foe sani na grontapoe kon na wan kaba.

A kaba foe Jerusalem

Loekoe fosi san Jesus ben taki foe Jerusalem èn foe a tempel foe en. Moro leki dritenti jari na fesi, a ben taki na fesi foe wan ten di ben o moeilek srefisrefi gi wán foe den moro bigi foto na grontapoe. Loekoe spesroetoe den wortoe foe en di skrifi na Lukas 21:20, 21: „Te oenoe e si taki legre kampoe lontoe Jerusalem, sabi dan taki a pori foe en kon krosibei. Dan meki den wan di de na Judea, lowe go na den bergi, èn meki den wan di de na en mindri, hari gowe foe drape, èn no meki den wan di de na den boiti presi, go na en ini.” Efoe legre kampoe ben o lontoe Jerusalem, dan fa „den wan di de na en mindri” ben kan „hari gowe foe drape” nomo, soleki fa Jesus ben komanderi? A de krin, taki Jesus ben abi na prakseri taki wan okasi ben sa opo gi den. A ben opo toe?

Na ini 66 G.T., den Rome legre na ondro a komando foe Cestius Gallus ben drifi den djoe oproeroe legre nanga tranga go baka na Jerusalem èn ben fasi den na ini a foto. Den Romesma ben meki wan pasi go na ini a foto srefi èn ben doro te na a skotoe foe a tempel. Ma, ne Gallus ben komanderi den legre foe en foe doe wan kefalek froewondroe sani. A ben komanderi den foe hari gowe! Den djoe sroedati di ben prisiri, ben lon go na den baka èn ben gi den Rome feanti di ben lowe, mankeri. Na so fasi na okasi di Jesus ben taki na fesi, ben opo. Den troe kresten ben gi jesi na en warskow èn ben gowe foe Jerusalem. Disi ben de wan koni sani di den ben doe, bika fo jari nomo na baka, Rome legre ben kon baka, nanga generaal Titus di ben e tiri den. A leisi disi sma no ben man foe lowe srefisrefi.

Den Rome legre ben lontoe Jerusalem agen; den ben bow wan skotoe foe oedoe postoe di abi srapoe penti, lontoe en. Jesus ben taki na fesi, foe Jerusalem: „Den dei sa kon na joe tapoe te den feanti foe joe sa bow wan skotoe foe postoe nanga srapoe ede na joe lontoe èn den sa lontoe joe èn sa banawtoe joe na ala sei”a (Lukas 19:43). No langa na baka, Jerusalem ben lasi a feti; a kefalek moi tempel foe en ben kon tron wan broko pranasi di e poeroe smoko. Den wortoe foe Jesus ben kon troe na ini ibri pikin pisi!

Ma Jesus ben abi moro foeroe sani na prakseri, leki nomo a pori di Jerusalem ben kisi. Den disipel foe en ben aksi en toe foe a marki foe en denoja. Na a ten dati den no ben sabi soifri san den ben aksi en, ma disi ben taki foe wan ten te a ben sa poti na wroko foe tiri leki Kownoe na hemel. San a ben taki na fesi?

Feti na ini den lasti dei

Te joe e leisi Mateus kapitel 24 nanga 25, Markus kapitel 13, nanga Lukas kapitel 21, dan joe sa si krinkrin boeweisi taki Jesus ben e taki foe a ten foe wi. A ben taki na fesi foe wan ten pe feti sa de — no soso „feti èn njoensoe foe feti” di ben pori libisma historia ala ten kaba, ma feti foe ’nâsi nanga nâsi èn kownoekondre nanga kownoekondre’ — ija, bigi feti na heri grontapoe. — Mateus 24:6-8.

Prakseri fa feti kenki na ini a jarihondro disi. Di fositen feti ben de soso a feti na mindri toe legre foe nâsi di e gens makandra, ala di den e koti makandra nanga feti-owroe noso e soetoe makandra srefi nanga gon na a feti presi, a ben ogri nofo kaba. Ma na ini 1914 a Bigi Orlokoe ben broko kon. A wan nâsi na baka a trawan ben kon na ini a strei — a fosi grontapoe feti. Automatik fetisani ben meki foe kan kiri moro nanga moro sma èn komoto na moro farawe presi. Dagadaga ben soetoe koegroe na wan soifri fasi; mosterdgas ben bron, ben gi sma foeroe skin-ati, ben meki sma kon malengri èn ben kiri doesoendoesoen sroedati; tank ben lolo sondro sari-ati pasa den skotoe foe den feanti, ala di den ben e soetoe den bigi gon foe den. Den ben gebroiki so srefi opolangi nanga duikboto — den ben de soso a bigin nomo foe san den sani disi ben o tron baka ten.

A di foe Toe Grontapoefeti ben doe moro leki san sma ben man prakseri — a ben meki a Fosi Grontapoefeti sori leki noti, foe di a ben kiri someni miljoenmiljoen sma. Kefalek bigi opolangi sipi, di de pikinmoro leki wan foto na tapoe watra, ben waka go-kon na tapoe den se èn ben loesoe feti opolangi foe saka bom komoto na loktoe na tapoe den feanti. Duikboto ben soetoe torpedo èn ben soengoe den bigi fetisipi foe den feanti. Èn den ben saka atoombom, di ben kiri doesoendoesoen sma te wán bom ben soetoe! Soleki fa Jesus ben taki na fesi, foe troe „kefalek ogri sani” sa de foe si leki wan marki foe a ten disi di lai nanga feti. — Lukas 21:11.

Orlokoe kon moro mendri foe sensi a di foe Toe Grontapoefeti? Kwetikweti. Son tron foeroe feti e feti na ini wan-enkri jari — srefi na ini den jari na baka 1990 — di kiri miljoenmiljoen sma. Èn wan kenki kon na den sma di de den fosi sma di e dede na ini feti. A no de so moro taki den sma di e dede moro foeroe, na sroedati. Na ini a ten disi, moro foeroe foe den sma di e lasi den libi na ini feti, — te joe e loekoe en boen, 90 procent foe den — na borgoe.

Tra pisi foe a marki

Orlokoe na soso wán pisi foe a marki di Jesus ben kari. A ben warskow toe taki „mankeri foe njanjan” ben sa de (Mateus 24:7). Èn na so a de toe, ala di kontrari foe dati, grontapoe e meki moro njanjan leki san de fanowdoe foe kan gi ala sma njanjan, ala di sabidensi foe gronwroko go moro na fesi leki oiti bifo na ini libisma historia, ala di transport kon moro esi èn kon moro boen foe tjari njanjan go na iniwan presi na grontapoe. Ala di ala den sani dati de, tokoe pikinmoro wán foe feifi pisi foe den sma na grontapoe e go sribi nanga angri ibri dei.

Jesus ben taki so srefi na fesi taki „na a wan presi baka a trawan pestsiki” ben sa de (Lukas 21:11). Agen a ten foe wi abi wan freimde sani di de kontrari foe makandra — moro boen datra jepi leki oiti bifo, njoen teknik, vaccine foe no kisi foeroe foe den siki di sma kan kisi tide; ma tokoe pestsiki kon moro foeroe leki iniwan ten na fesi. A Spanjoro Griep ben kon wantewante na baka a Fosi Grontapoefeti èn ben kiri moro sma leki a feti ben kiri. A siki disi ben panja so esi taki na ini foto leki New York, sma ben kan kisi boetoe noso ben kan poti na strafoe srefi soso foe di den ben e meki etsjei! Na ini a ten disi, kanker nanga ati-siki e teki miljoenmiljoen libi ibri jari — den na troetroe pestsiki. Èn AIDS e tan kiri sma, èn foe taki en leti, a de wan siki di sabidensi tapoe a kontren foe datrawroko no abi dresi gi.

Ala di Jesus ben taki foe den lasti dei moro foeroe ini a tori foe bigi historia nanga politiek situwâsi, na apostel Paulus ben poti krakti moro na tapoe problema na sociaal sei èn eigifasi di ben sa de foeroe. A ben skrifi gi wan pisi: „Sabi disi, taki na ini den lasti dei moeilek ten sa kon, di tranga foe pasa. Bika sma sa lobi densrefi nomo, . . . no sa de loyaal, no sa abi natuurlijk firi foe lobi, no sa de klariklari foe meki kroederi, . . . de sondro foe man dwengi densrefi, sa abi wan krasi fasi foe doe sani, de sondro lobi gi boen sani, de toriman, no sa ke foe noti, sa abi bigimemre, sa lobi prisiri moro leki den lobi Gado.” — 2 Timoteus 3:1-5.

Den wortoe dati na sani di joe sabi? Loekoe soso wán sei foe a go di a libi na sociaal sei e go na baka na ini a grontapoe foe tide — a broko di na osofamiri libi e broko na pisipisi. Den kefalek foeroe osofamiri di e broko, trowpatna di e kisi fonfon, pikin-nengre di sma e mesbroiki, owroe papa nanga mama di sma no e handri boen — den situwâsi disi e sori krinkrin taki sma no abi „natuurlijk firi foe lobi”, „abi wan krasi fasi foe doe sani”, de „toriman” srefi, „de sondro lobi gi boen sani”! Ija, wi e si den eigifasi disi di e panja na ala sei na ini a ten disi.

A geslakti foe wi na a wan di a ben taki foe en na fesi?

Ma kande joe e aksi joesrefi: ’Den situwâsi disi no pina a libisma famiri ala ten kaba? Fa wi doe sabi taki a disiten geslakti foe wi na a wan di ben kari na fesi na ini den owroeten profeititori disi?’ Meki wi loekoe dri fasi foe kisi boeweisi taki Jesus ben e taki foe a ten foe wi.

Fosi, ala di a pori di Jerusalem nanga en tempel ben kisi, ben de wan pisi foe a fosi kontroe, tokoe den wortoe foe Jesus ben sori krinkrin go na a ten na baka a pisi ten dati. Pikinmoro 30 jari na baka a rampoe di ben pori Jerusalem, Jesus ben gi na owroe apostel Johanes wan fisjoen di e sori taki den situwâsi foe san a ben taki na fesi — feti, angriten, pestsiki, èn dede di de leki wan bakapisi foe dati — ben moesoe kon ete na heri grontapoe na ini a ten di e kon. Ija, den banawtoe disi no ben sa graboe wán presi wawan, ma heri „grontapoe”. — Openbaring 6:2-8.

A di foe toe, na ini a jarihondro disi wan toe foe den pisi foe a marki foe Jesus, e kon troe na ini wan moro hei marki. Foe eksempre, a kan taki feti kan kon moro ogri leki san den ben de foe sensi 1914? Efoe wan di foe Dri Grontapoefeti ben de, nanga ala den kondre di e gebroiki den nucleair fetisani na ini a ten disi, dan a bakapisi ben sa de taki a grontapoe disi ben sa tron wan doti-ipi di e bron — èn libisma no ben sa de moro. Na a srefi fasi, Openbaring 11:18 ben taki na fesi taki na ini den dei disi te den nâsi e „atibron”, dan libisma ben sa „pori grontapoe”. Fositron na ini a historia, a pori di a kontren e pori èn a go di a moraal e go na baka, de wan kefar taki sma no sa man libi moro na tapoe a planeiti disi! So boen, so srefi a pisi disi foe a marki, e kon troe na ini en moro hei marki noso a doro en pikinmoro. Orlokoe nanga a pori di grontapoe e pori, kan go doro teleki libisma pori ensrefi èn a planeiti disi? Nôno; bika bijbel srefi gi a komando taki grontapoe sa tan foe têgo, nanga reti-ati sma di e libi na tapoe. — Psalm 37:29; Mateus 5:5.

A di foe dri, a marki foe den lasti dei e overtoigi wi spesroetoe te wi si den leki wán makandra. Nanga ala sani na prakseri, te wi e prakseri foe den pisi di Jesus ben kari na ini den dri Evangelietori, den wan na ini den brifi foe Paulus, èn den wan na ini Openbaring, dan a marki disi abi foeroe pisi. Wan sma ben sa kan kragi ibri aparti pisi, foe di a e taki dati tra ten ben abi densrefi sortoe problema, ma te wi e prakseri foe den alamala makandra, dan krinkrin den e sori go na wán pisi ten nomo — a di foe wi.

Ma san ala den sani disi wani taki? Taki bijbel e kari wi ten nomo wan ten di e meki sma lasi-ati, taki howpoe no de? Kwetikweti!

Boen njoensoe

Wán foe den toemoesi aparti pisi foe a marki foe den lasti dei skrifi na Mateus 24:14: „A boen njoensoe disi foe a kownoekondre sa preiki na heri grontapoe pe sma e libi, leki wan kotoigi gi ala nâsi, èn dan a kaba sa kon.” Na ini a jarihondro disi Jehovah Kotoigi doe wan wroko di de wan aparti sani na ini a historia foe libisma. Den erken a bijbel boskopoe foe a Kownoekondre foe Jehovah Gado — san a de, fa a e tiri, èn san a sa doe — èn den panja a boskopoe dati na heri grontapoe. Na ini moro leki 300 tongo den tjari poeblikâsi kon na doro di e taki foe a tori disi èn den tjari en na sma na ini den oso noso na tapoe strati noso na den bisnis presi, na pikinmoro ibri kondre na grontapoe.

Foe di den doe disi, den meki a profeititori disi kon troe. Ma den prati howpoe toe. Loekoe taki Jesus ben kari disi „boen njoensoe”, no takroe njoensoe. Fa dati ben kan na ini den doengroe ten disi? Bika a moro prenspari boskopoe foe bijbel a no foe taki o takroe sani sa de na a kaba foe na owroe grontapoe disi. En moro prenspari boskopoe abi foe doe nanga Gado Kownoekondre, èn a Kownoekondre dati e pramisi wan sani di warti na ini na ati foe ala sma di lobi vrede — namkoe, froeloesoe.

San na a froeloesoe dati, èn fa joe kan kisi en? Grantangi, ondrosoekoe den artikel di e kon now èn di e taki foe a tori disi.

[Foetoewortoe]

[Prenspari pisi na tapoe bladzijde 5]

Sma e soekoe piki na tapoe den moeilek aksi soleki: Foe san ede sani ogri so? San sa pasa nanga a libisma famiri?

[Prenspari pisi na tapoe bladzijde 6]

Na ini a ten disi, moro leki 90 procent foe den sma di e lasi den libi na ini feti, na borgoe

[Prenki na tapoe bladzijde 7]

A profeititori foe Jesus di ben taki foe a pori di Jerusalem ben kisi, ben kon troe na ini ibri pikin pisi