Foe san ede den ten disi ogri so?
TE JOE e sidon leisi wan koranti noso e loekoe a TV njoensoe noso e arki njoensoe na radio, a no de so dan taki joe e froewakti foe jere takroe njoensoe? A no e froewondroe joe kande foe jere taki wan langa orlokoe e feti ete, taki ogridoe di doe nanga tranga e rigeri ete, noso taki wan angriten e swaki a krakti foe wan pôti kondre ete.
Efoe joe e libi fara foe den sortoe sani disi di e feni presi, dan kande joe no e broko joe ede toemoesi nanga den sortoe njoensoe disi. Te joe loekoe en boen, soema man firi gi ala den ipi-ipi sma di e pina? Na a srefi fasi a moeilek srefisrefi foe no firi no wan fasi te wi e miti nanga a fasi fa pina abi krakti na tapoe aparti sma. Nanga tra wortoe, a de wan heri tra sani te wi e leisi foe orlokoe èn te wi e prakseri finifini foe den nomroe foe sma di dede, leki te wi e leisi foe a pikin boi Adnan, wan Bosnia boi di abi neigi jari, di en mama ben kon dede di wan bom ben pori na oso foe den. Wan toe moen nomo na baka, wan sma ben loeroe èn ben soetoe a papa foe Adnan kiri, di den ben waka makandra na tapoe wan strati. En sisa ben broedoe te leki a dede leti na en fesi, wan toe wiki nomo na baka dati, di wan artillerie bom ben fadon na tapoe a skoro djari. Den datra di ben loekoe Adnan foe di a ben abi trauma, ben kon si taki a boi no ben abi no wan firi — a no ben wani sabi sani srefi. Frede èn fositen sani di a e si baka wantronso, ben kwinsi en te a ben wiki; takroe dren ben meki taki a no ben man sribi boen. Adnan a no wan nomroe. A de wan pikin di e pina; wi no man jepi en, ma wi ati e firi sari gi en.
Na so a de toe nanga tra siki foe a grontapoe disi. A de wan heri tra sani foe leisi nomo foe angriten, leki foe si wan meisje di abi feifi jari, nanga wan sweri bere èn mangri anoe nanga foetoe, wan sma di pikinmoro e dede foe angri. A de wan heri tra sani foe leisi nomo omeni ogridoe e doe, leki foe jere taki sma ben fon wan owroe weduwe na wan kefalek ogri fasi, ben foefoeroe en, èn ben didon na en nanga tranga. A de wan heri tra sani foe leisi nomo foe a go di osofamiri libi e go na baka, leki foe jere taki foe espresi wan mama ben meki en eigi pikin dede foe angri èn taki a ben mesbroiki en na wan ogri fasi.
A e hati wi foe leisi foe den sortoe sani disi. Ma o moro takroe a de te wan foe den sani disi di e trobi grontapoe, e kwinsi wi persoonlijk! Te joesrefi e ondrofeni takroe, dan a kan moro joe te joe e si a situwâsi foe heri grontapoe na njoensoe. A e gi kefalek frede foe kon sabi taki pina foe ogridoe, feti, angriten, nanga siki, e kon moro foeroe na so wan fasi di noiti ben pasa na ini a libisma historia. A kan moeilek srefisrefi te wi kisi foe doe nanga den bakapisi foe a fasi fa sani de troetroe na ini a di foe 20 jarihondro disi — broeja, frede, nanga depressie na gewoon sani.
Sma foe foeroe relisi e soekoe piki na tapoe den sortoe moeilek aksi soleki: Foe san ede sani ogri so? San sa pasa nanga a libisma famiri?
A de wan sari sani taki pikinmoro noiti den relisi na ini a ten disi e gi boen piki. Di joe ben si na aksi di de tapoe a kafti foe a tijdschrift disi gi a fosi leisi, dan kande joe ben tweifri na en — wan sani di wi man froestan. Fundamentalist relisi nofo tron e proeberi foe froeklari den sani di de na ini bijbel, na wan fasi di no boen srefisrefi — a joisti dei èn joeroe te a grontapoe disi sa kaba. (Loekoe Mateus 24:36.) Den sma di tjari a tijdschrift disi kon na doro, e froekisi foe meki bijbel srefi froeklari ensrefi. A sa froewondroe joe kande foe sabi taki a taki di bijbel e taki foe den lasti dei, abi foe doe nanga troetori èn a de reidelek. Èn bijbel no e froeklari wawan foe san ede sani ogri so. A e gi so srefi howpoe gi a ten di de na wi fesi, wan howpoe di e gi troetroe trowstoe. Wi e aksi joe foe ondrosoekoe den artikel di e kon now, foe man si foe san ede a de so.
[Sma di abi a reti foe a prenki na tapoe bladzijde 3]
Jobard/Sipa Press