San Yu Sa Taigi wan Hindusma?
1 Soleki fa yu sabi kande, furu Hindusma e libi na ini difrenti kondre, so srefi na ini a kondre disi. Disi wani taki dati wan ten yu sa miti wan Hindusma kande te yu e du yu diniwroko. Te yu miti wan, san yu sa taki na a fisiti dati?
2 Hori den Penti Disi na Prakseri: Zendeling di ben taki nanga Hindusma nanga bun bakapisi e taki dati a no de fanowdu fu studeri a Hindu bribi dipi, so taki yu kan gi kotoigi nanga bun bakapisi. Wan makriki pristeri fu a waarheid èn nanga takt, nofotron kan meki taki a sma e handri bun na tapu dati. Aksi fu taki nanga na edeman fu na osofamiri fosi. Efu a e handri bun dan a sa de moro makriki fu gi den tra memre fu na osofamiri kotoigi. No gi na idea na a bigin taki yu e tyari wan boskopu di bun moro a wan di na ososma e bribi, noso taki yu wani taki fu a wan-enkri tru Gado, noso a moro owru santa buku di skrifi. Fu di furu Hindusma e si Bijbel leki wan buku fu den Westsei kondre, meki yu kan puru a fowtu denki di den abi fu Bijbel, te yu e tyari kon na krin taki Bijbel no e horibaka gi a basi di a wan kondre e basi wan trawan noso taki a wan ras hei moro wan trawan.
3 Gebroiki den Yoisti Wrokosani: Tu brochure sreka spesrutu gi den Hindusma. Waarom dienen wij God te aanbidden in liefde en waarheid? (Fu San Ede Wi Musu Anbegi Gado na ini Lobi Nanga Waarheid?) druk na ini Guyarati èn Punyabi. Onze problemen—Wie zal ons helpen ze op te lossen? (Den Problema fu Wi—Suma Sa Yepi Wi fu Lusu Den?) druk na ini ete 11 tongo fu India. Den ala tu de fu kisi na ini Bakratongo nanga Ingrisitongo. Den brochure „Zie! Ik maak alle dingen nieuw” („¡Luku! Mi E Meki Ala Sani Kon Nyun”) èn Gado e broko en ede troetroe nanga wi?, ben abi bun bakapisi tu te wi e gi den wan di abi wan Hindu background kotoigi. A San Gado e aksi-brochure nanga a Sabi-buku kan gebroiki bun tu fu hori bijbelstudie.
4 Suku Sani Di Abi a Belangstelling fu Unu Ala Tu: A no muilek fu feni sani di abi a belangstelling fu Hindusma tu. Den e bribi taki wi e libi na ini wan ten pe ogridu doro wan heimarki èn taki Gado sa puru ala problema na grontapu nanga yepi fu wan bigi rampu, èn baka dati wan ten fu waarheid sa de. Yu kan si o makriki den bribi disi kan tai nanga den sani di Bijbel e leri fu den lasti dei disi, fu a bigi banawtu, èn fu a nyun grontapu di de na pasi e kon. Fu di moro furu Hindusma e si a libi leki soso wan lo problema di no abi lusu, meki den abi belangstelling gi sani di e taki fu na osofamiri libi, ogridu nanga veiligheid, èn san e pasa nanga wan sma te a dede. Dyaso wi e gi yu tu pristeri leki eksempre di yu ben sa kan pruberi.
5 Disi kan hari wan man di lobi en osofamiri:
◼ „Mi e fisiti sma di e broko den ede nanga a situwâsi fu na osofamiri libi na ini furu kondre na ini a ten disi. San yu denki sa yepi fu meki na osofamiri tan krosibei na makandra? [Gi okasi fu piki.] Son sma sabi san den Hindu buku e taki fu na osofamiri libi, ma noiti den ben abi na okasi fu agersi disi nanga san Bijbel e taki fu a tori disi. Mi ben o wani sori yu a prakseri disi na ini Kolosesma 3:12-14.” Baka te yu leisi a tekst, sori na ososma kapitel 15 fu a Sabi-buku èn taki: „Mi ben sa prisiri fu teki pikinso ten fu leisi a kapitel disi nanga yu.”
6 Wan yongu sma ben sa kan handri na tapu disi:
◼ „Seiker yu e bribi na ini Gado. San yu denki na a prakseri di Gado abi nanga wi?” Gi okasi fu piki. Dan leisi Genesis 1:28, èn taki: „Na furu presi, grontapu lai tumusi nanga sma èn abi furu problema. ¿Yu denki taki a Kriaman ben o wani yepi wi fu lusu den problema fu wi?” Baka te yu yere a piki, dan teki wan publikâsi di fiti.
7 Abi Bun Bakapisi: Wan Hinduman di abi 22 yari ben miti wan sisa di ben gi kotoigi na wan wowoyo èn ben aksi en wan bijbelstudie. A ben taigi a sisa taki aiti yari pasa a ben arki wan Bijbel takimakandra na mindri en mama nanga a sisa. Ala di den praktisch piki fu Bijbel gi den problema fu a libisma famiri ben naki en ati, en mama no ben abi belangstelling èn en ben feni taki a ben yongu tumusi fu suku a waarheid gi ensrefi. Now leki wan bigisma, a ben wani kon sabi moro. A yonkuman no ben lasi ten. ¡Na ini 23 dei nomo a ben kaba studeri a Sabi-buku, fo mun nomo na baka di a ben miti a sisa na a wowoyo èn a ben aksi fu dopu!
8 Wan brada ben bigin wan studie nanga wan Hinduman di a ben miti na ini wan tren. A man ben ondrofeni problema na ini en trowlibi. A ben abi wan sopi problema tu. A man ben agri fu meki a Kotoigi fisiti en èn fruteri en a Bijbel rai di abi fu du nanga na osofamiri libi. A man ben abi belangstelling gi den sani di Bijbel ben leri na moreel sei, èn a ben agri fu studeri Bijbel. En nanga en osofamiri ben bigin fisiti den konmakandra makandra. Baka ten den ben fruteri mati nanga famiri a waarheid. ¡Te nanga now, siksi fu den sma disi teki waarheid!
9 A de a wani fu Gado taki „ala sortu sma musu kisi frulusu èn kon kisi wan soifri sabi fu waarheid” (1 Tim. 2:4). Dati wani taki man nanga uma di no abi wan Kresten relisi, soleki a Hindu bribi. ¿Efu Hindusma de na ini yu kontren, fu san ede yu no e fisiti den heri esi èn gebroiki wan tu fu den pristeri di ben gi leki rai na ini na artikel disi?