Gi kotoigi na sma foe ala tongo èn foe ala relisi
1 Kresten na ini a fosi jarihondro ben gi wan fajafaja kotoigi na sma di ben taki tra tongo èn di ben abi difrenti relisi. Leki wan bakapisi foe dati, „na a jari 100 so leki fa a sori ibri distrikt di ben de na a lanki foe a Mindrikondre Se ben abi wan kresten libimakandra na en mindri”. — History of the Middle Ages.
2 Na ini den Verenigde Staten foe Amerkankondre, foeroe sma e taki tra tongo boiti Ingrisitongo. Foeroe foto nanga pikin foto de di abi libimakandra foe sma foe tra kondre, di bigi srefisrefi foe di loweman lowe go na den presi disi. Wan heri ipi sma di abi difrenti relisi di no de kresten relisi, froisi go na Amerkankondre, èn so srefi hondrohondro doesoen Boedasma, Hindoesma, djoe nanga Moslimsma toe. Foe di someni difrenti tongo nanga relisi de, dan a de wan troetroe tjalensi gi den kotoigi drape foe sabi fa foe taki èn fa foe gi kotoigi na ala den sortoe sma disi te den e miti den. Te joe e loekoe en boen, dan sosrefi na ini Sranan wi abi den sortoe gebied disi. Fa wi kan waka na baka den komando foe Jesus „foe preiki gi sma èn foe gi wan finifini kotoigi”, na sma foe ala tongo èn foe ala relisi? — Tori. 10:42.
Gi kotoigi na sma di e taki wan tra tongo
3 Na ini Amerkankondre foeroe njoen preikiman e kon foe sma di e taki wan freimde tongo èn di e libi na ini den 48 distrikt foe a bijkantoro gebied. Gemeente seti na ini 17 freimde tongo, èn groepoe de di e gebroiki ete 7 tongo. Ma moro kan doe ete na presi pe no wan gemeente no de di e taki wan freimde tongo èn di e wroko na ini a gebied kaba.
4 Wini a tongo problema: Tweifri no de taki, te sma e kisi leri na ini den mamatongo foe den, dan foeroe foe den e leri moro esi èn den e froestan sani moro boen. Foeroe brada nanga sisa na ini Amerkankondre leri wan tra tongo „foe a boen njoensoe ede”, so taki den „kan tron sma di e prati en nanga trawan” (1 Kor. 9:23). Ala di wan sisa di e taki Ingrisitongo ben abi wan oemasma di e taki Sneisi, foeroe jari langa na tapoe a lijst foe sma di a e teki njoen tijdschrift na en doronomo, tokoe na oema no ben wani teki wan bijbelstudie, te leki wan tra sisa di ben e leri Sneisi, ben pristeri en wan boekoe na ini a tongo dati. Wantewante a ben teki a boekoe nanga wan studie toe. A difrenti ben de taki, a di foe toe sisa ben meki moeiti foe taki wan toe wortoe na ini a tongo foe na oema. — Teki gersi Tori foe den Apostel 22:2.
5 Nanga boen reide a Waktitoren foe 1 november 1992 e gi a piki disi: „A leri foe wan freimde tongo . . . no wawan sa meki a man di jongoe sma man gebroiki a froestan foe den, gro, ma a sa meki taki den kan gebroiki den moro boen na ini na organisâsi foe Jehovah.” Foeroe memre foe a Bethelfamiri na ini Amerkankondre teki a wroko foe e leri wan njoen tongo. Na so fasi, brada de wan troetroe jepi na ini gemeente pe den de fanowdoe foe teki fesi. Efoe joe sabi wan tra tongo noso efoe joe wani leri wan tra tongo, dan kande joesrefi toe sa kan gi jepi na wan gemeente noso groepoe foe sma di e taki wan freimde tongo. — Mat. 9:37, 38.
6 Wan brada na ini Florida di ben leri Vietnameisi bifo a ben kon ini waarheid, abi bigi prisiri now foe prati a boen njoensoe nanga sma di e taki Vietnameisi. A ben froisi go nanga en osofamiri na wan tra sei foe a kondre pe a nowtoe gi preikiman na ini a Vietnameisi gebied ben de moro bigi, so taki a kan gebroiki a sabi di a abi foe a tongo dati moro, foe man gi kotoigi. Sensi a froisi, a abi boen bakapisi ini a studeri di a e studeri bijbel nanga foeroe sma foe Vietnam.
7 Wan pionier sisa na ini California ben miti difrenti dofoesma na ini a gebied foe en. A ben begi efoe Jehovah kan jepi en foe feni wan sma di ben sa kan leri en gebaartongo, so taki a ben sa kan leri den dofoesma a waarheid. Wan dei, di a ben bai sani na wan wenkri na ini en birti, dan wan jongoe dofoe oema ben kon na en èn a ben skrifi tapoe papira efoe a sisa ben sa kan jepi en foe feni wan sani di a ben wani bai. Baka di a sisa ben jepi en foe feni a sani, a pionier skrifi tapoe wan papira taki a ben wani srefisrefi foe leri gebaartongo, so taki a ben sa kan jepi den dofoesma na ini a kontren. Baka dati, a dofoe oema ben skrifi, èn a ben e aksi en: „Foe san ede joe wani jepi dofoesma?” A sisa ben skrifi baka: „Mi na wan Kotoigi foe Jehovah, èn mi wani jepi dofoesma foe froestan bijbel. Mi sa prisiri foe leri joe bijbel efoe joe ben sa wani leri mi gebaartongo.” A sisa e taki: „Joe no man prakseri o breiti mi ben de di a ben taki: ’A boen.” ’ A sisa ben go na a oso foe na oema, ibri mofoneti, siksi wiki langa. A ben leri a sistema di sma e gebroiki foe taki nanga dofoesma, èn a dofoe oema ben leri a waarheid èn a ben teki dopoe! Dati ben pasa moro leki 30 jari pasa kaba, èn a pionier sisa e gi kotoigi ete na den dofoewan, èn a de now na ini wan gemeente foe sma di e gebroiki gebaartongo.
8 Efoe joe man taki wan tra tongo heri boen èn joe wani èn joe man froisi go pe a nowtoe gi preikiman de moro bigi na tapoe a kontren dati, dan foe san ede joe no e taki foe na afersi dati nanga den owroeman na ini a gemeente. Efoe den feni taki joe de bekwaam nofo foe froisi, dan aksi a kring-opziener efoe wan kontren de krosibei pe joe kan dini. Efoe no, dan joe kan skrifi go na a Genootschap, ma den owroeman moesoe seni wan brifi go nanga dati, di e sori san den e denki foe den bekwaamfasi foe joe èn a man di joe man taki tra tongo. — Loekoe a Wachttoren foe 15 augustus 1988, bladzijde 21-23.
9 Gebroiki den wrokosani di de: Den poeblikâsi foe wi de foe kisi na ini foeroe freimde tongo. A ben sa gi winimarki foe abi traktaat na joe — noso, efoe no wan tra gemeente foe sma di e taki wan freimde tongo de di e wroko a srefi gebied, dan joe kan gebroiki a San Gado e aksi-brochure — na ini den tongo di sma e taki na ini joe gebied. Efoe a de krin foe si taki Bakratongo no de a fosi tongo di wan sma e taki, dan aksi en sortoe tongo a e leisi. Disi kan meki taki joe man pristeri difrenti sortoe poeblikâsi. Foe eksempre, wan sma di e taki Oerdoe noso Sarnami kande e leisi Arabiatongo toe.
10 Srefi efoe joe no e taki a tongo foe a sma di joe e miti na ini joe preikiwroko, tokoe a kan taki joe man pristeri en a boen njoensoe. Fa joe kan doe dati? Foe di joe e gebroiki a pikin boekoe Goed nieuws voor alle natiën (Boen njoensoe gi ala den nâsi). A abi wan sjatoe boskopoe na ini di druk na ini 59 tongo. Soleki fa den bodoi tapoe bladzijde 2 foe a pikin boekoe e tjari kon na krin, dan baka di joe kon sabi san na a tongo foe na ososma, meki a leisi a bodoi di druk na tapoe a joisti bladzijde na ini a pikin boekoe. Baka di a leisi en, dan sori en wan poeblikâsi na ini a tongo foe en. Efoe joe no abi wan, dan sori en a poeblikâsi na ini a tongo di joe abi na joe. Taigi en taki joe sa proeberi foe kon baka nanga wan eksemplaar na ini a tongo foe en. Aksi san na en nen, èn skrifi dati makandra nanga na adres. Kande joe kan gi den bodoi disi na a moro krosibei gemeente noso groepoe foe sma foe a tongo dati, foe di joe e gebroiki a ’Te bezoeken anderstalig adres’-formulier (formulier foe fisiti sma di e taki tra tongo) (S-7Oa). Foe kan kisi moro bodoi fa joe kan seni den bodoi disi go na den brada di moesoe kisi dati, dan loekoe bladzijde 3 foe Wi Kownoekondre Dienst foe oktober 1993. Efoe joe no man kisi no wan sma di e taki a tongo dati foe go baka foe fisiti a sma, dan joesrefi kan teki a tjalensi, èn kande joe kan studeri srefi nanga a sma, ala di joe e gebroiki wan poeblikâsi na ini joe tongo toe. — 1 Kor. 9:19-23.
Gi kotoigi na sma di no de kresten
11 Efoe wi abi sabi foe wan toe sani foe a relisi background foe wan sma, dan dati sa jepi wi foe gi wan boen kotoigi foe Gado Kownoekondre. A boekoe De mens op zoek naar God e gi wi inzicht na ini den moro bigi relisi foe grontapoe so taki wi kan froestan nofo foe san sma e bribi, èn na so fasi kan jepi den foe kisi sabi foe waarheid.
12 A boksoe na tapoe a lasti bladzijde foe na inlegvel disi e gi wan lijst nanga poeblikâsi di na organisâsi foe Jehovah gi foe gebroiki dati na sma di no de kresten. Te wi e leisi den poeblikâsi disi, dan wi sa froestan fa foe taki nanga sma foe a boen njoensoe. Wi no moesoe froegiti taki a pikin boekoe — Fa foe bigin èn go doro nanga bijbel takimakandra de wan wrokosani di de wan jepi toe. Bladzijde 12-15 foe a pikin boekoe dati e gi wi praktis rai fa foe taki nanga Boedasma, Hindoesma, djoe, nanga Moslimsma.
13 Loekoe boen san joe e taki: Wi moesoe loekoe boen taki wi no abi wan fasti fasi foe denki foe sma foe wan spesroetoe relisi, foe di wi e kon na a bosroiti taki a persoonlijk bribi foe den de a srefi leki di foe tra sma foe a srefi relisi. Na presi foe dati, proeberi foe froestan fa a sma di joe e taki nanga en e denki (Tori. 10:24-35) Leki wan Moslimsma, Salimoon ben kisi a leri taki a Koran de a wortoe foe Gado. Ma noiti a no ben man teki a Moslim leri taki wan Gado di abi someni sari-atifasi ben sa gi sma skin-ati na ini wan faja hèl. Wan dei a ben kisi wan kari foe Jehovah Kotoigi foe kon na wan konmakandra. A ben erken a waarheid wantewante, èn nanga prisiri a e dini now leki wan owroeman na ini a kresten gemeente.
14 Te wi e gi kotoigi na sma di no abi kresten bribi, dan wi moesoe loekoe boen taki a fasi fa wi e bigin taki nanga den, no e meki wi lasi na okasi di wi abi foe taki nanga den foe a boen njoensoe (Tori. 24:16). Bakaman foe son relisi no e warderi en srefisrefi te wi e proeberi foe meki den kenki a bribi foe den. So boen, de na ai foe feni penti na tapoe san joe kan poti wan fondamenti foe takimakandra, so taki joe kan hari a prakseri foe den na tapoe a heri waarheid foe Gado wortoe. Sma di wi kan teki gersi nanga skapoe sa doe wan sani na tapoe a switi fasi fa wi e taki nanga den èn a krin fasi fa wi e pristeri a waarheid.
15 Den wortoe di wi e froekisi foe gebroiki, na wan prenspari sani di wi moesoe hori na prakseri toe efoe wi no wani taki sma e weigri foe taki nanga wi foe a boen njoensoe, sondro a de fanowdoe. Foe eksempre, efoe joe taki wantewante taki joe na wan kresten, dan wantronwantron joe arkiman ben sa kan moksi joe nanga den kerki foe krestenhèit, èn dati ben sa de leki wan skotoe di kan hendri a takimakandra. A kan abi winimarki toe efoe joe e sori go na bijbel leki „den Boekoe foe bijbel” noso „den santa boekoe”. — Mat. 21:42; 2 Tim. 3:15.
16 Efoe joe e miti nanga wan sma di abi wan relisi di no de wan kresten relisi èn joe firi taki joe no de bekwaam nofo foe gi kotoigi wantewante, dan gebroiki na okasi foe kon sabi a sma nomo, libi wan traktaat na baka, taigi en san na joe nen èn aksi en san na en nen. Dan baka te joe sreka joesrefi nofo, go baka na baka wán noso toe dei foe gi kotoigi. — 1 Tim. 4:16; 2 Tim. 3:17.
17 Gi kotoigi na Boedasma: (Loekoe kapitel 6 na ini De mens op zoek naar God.) Den sani di Boedasma e bribi e difrenti foeroe foe a wán bakaman na a trawan. A Boeda relisi e bribi na ini a man foe India, Boeda Gautama, foe a di foe siksi jarihondro b.G.T., leki a moro boen sma foe a relisi èn a sma di den moesoe waka na en baka, na presi foe bribi taki wan persoonlijk Kriaman de. Di Gautama ben si wan siki man, wan owroe man, nanga wan dede man gi a fosi leisi, a ben broko en ede nanga san a libi wani taki. ’Sma ben gebore foe njan pina nomo, foe kon owroe, èn foe dede?’, a ben aksi ensrefi. A no de foe taki, dati wi kan piki opregti Boedasma di wani kisi wan piki tapoe den aksi disi.
18 Te joe e taki nanga Boedasma, dan gebroiki soso den positief boskopoe nanga den krin waarheid di de foe feni na ini a moro santa boekoe foe ala boekoe, bijbel. Leki foeroe tra sma, Boedasma abi belangstelling gi vrede, boen gwenti nanga wet, nanga na osofamiri libi, èn foeroetron den breiti foe taki foe den tori disi. Disi kan meki taki joe kan poti spesroetoe prakseri na tapoe a Kownoekondre leki a troetroe loesoe gi den problema foe a libisma famiri.
19 Na son presi na ini Sranan, joe abi Sneisi sma di abi a Boeda relisi èn di e bribi na ini tra Owstoe filosofia. Di wan sisa na ini Montana, na ini den Verenigde Staten foe Amerkankondre, ben si wan Sneisi man na ini wan wenkri, a ben gi en wan traktaat na ini a tongo foe en èn a ben pristeri en wan bijbelstudie. A man ben taki: „Joe wani taki a Santa Bijbel? Mi soekoe disi mi heri libi langa!” A ben bigin studeri a wiki dati en a ben bigin fisiti ala den konmakandra.
20 Na ini wan pisi ten foe tin jari, wan pionier sisa na ini Nevada, di de na ini den Verenigde Staten foe Amerkankondre, leri a waarheid na Sneisi studenti. Di a ben wroko na ini wan gebow nanga aiti oso pe den studenti disi ben libi, a ben begi Jehovah foe jepi en foe bigin wan studie na ini ibri oso. Na ini toe wiki a ben studeri nanga no moro mendri leki wán studenti na ini ibri oso. Wan fasi foe taki nanga sma di e tjari winimarki gi en, na foe taigi a sma dati a feni wan sani di ala studenti e broko den ede nanga dati — den alamala wani vrede nanga kolokoe. Baka dati a e aksi efoe dati na a broko-ede foe a sma toe. Den e agri alaten. A e poti prakseri na tapoe a brochure Blijvende vrede en blijvend geluk — Hoe ze te vinden, di meki gi Sneisi sma. Baka di wán studenti studeri feifi leisi nomo, a ben taigi en taki a ben soekoe a waarheid langa ten kaba, èn now a feni en.
21 Gi kotoigi na Hindoesma: (Loekoe kapitel 5 na ini De mens op zoek naar God.) A Hindoe bribi no abi wan fasti gronprakseri. A filosofia dangra srefisrefi. Hindoesma e si a moro prenspari gado, Brahman (Brahma a Kriaman, Vishnu a wan di e kibri libi, nanga Siva, a sma di e pori sani), leki wan dri-wánfasi. A bribi di den e bribi na ini wan sili di no man dede, de prenspari gi a leri foe den foe reïncarnatie, èn a e meki Hindoesma bribi na ini wan lot. (Loekoe a Redeneren-boekoe, bladzijde 354-358, èn A Waktitoren foe 15 mei 1997, bladzijde 3-8.) A Hindoe bribi e leri sma foe froedrage makandra, èn taki ala relisi e sori go na a srefi waarheid.
22 Wan fasi foe bigin taki nanga wan Hindoesma na foe tjari kon na krin a howpoe di wi abi di gron tapoe bijbel, taki wi sa libi foe têgo na ini volmaaktifasi na grontapoe, èn so srefi den piki di bijbel e gi na tapoe den prenspari aksi di libisma abi èn di e gi sma satisfaksi.
23 Gi kotoigi na djoe: (Loekoe kapitel 9 na ini De mens op zoek naar God.) Tra fasi leki tra relisi di no de kresten relisi, a djoe bribi abi en roetoe na ini historia, no na ini anansitori. Na ini den Hebrew Boekoe foe bijbel di sma skrifi nanga jepi foe Gado en santa jeje, wi kisi wan prenspari sani di e jepi sma na ini a soekoe di den e soekoe a troe Gado. Tokoe kontrari a wortoe foe Gado, wan prenspari leri foe a djoe bribi foe a ten disi na a bribi na ini wan sili di no man dede. Joe kan poti wan fondamenti foe takimakandra, foe di joe e taki dati a troe taki wi e dini a Gado foe Abraham, èn foe di joe e erken taki wi alamala e kisi foe doe nanga den srefi problema na ini a grontapoe foe tide.
24 Efoe joe e miti nanga wan djoe di no e bribi na ini Gado, dan joe kan aksi en efoe na ala ten a ben denki so, èn dati sa jepi joe foe kon si moro krin san ben sa hari a prakseri foe en. Foe eksempre, kande noiti wan sma no tjari kon na krin gi en na wan fasi di e gi satisfaksi, foe san ede Gado gi pasi meki ogridoe de. Wi kan gi opregti djoe a deki-ati foe go ondrosoekoe baka san na a troe identiteit foe Jesus leki a Mesias, no nanga jepi foe a falsi fasi fa krestendom e prenki en, ma na a fasi fa djoe skrifiman foe den Griki Boekoe foe bijbel e prenki en.
25 Gi kotoigi na Moslimsma: (Loekoe kapitel 12 na ini De mens op zoek naar God.) Moslimsma na bakaman foe na Islam (noso mohammedanisme), di e bribi na ini Allah leki na wan-enkri gado foe den èn na ini Mohamed (570-632 G.T.) leki a lasti èn moro prenspari profeiti foe Allah. Foe di den no e bribi taki Gado ben abi wan manpikin, Moslimsma e erken Jesus leki wan profeiti foe Gado di no de so prenspari, ma noti moro. A Koran, di owroe moro mendri leki 1400 jari, e kari pisi na ini den Hebrew Boekoe foe bijbel nanga den Griki Boekoe foe bijbel. Na Islam nanga a katolik bribi e kroederi nanga makandra na ini foeroe sani. Ala toe relisi e leri taki a sili foe libisma no man dede, taki te sma dede den e kon na ini wan situwâsi pe den e kisi skin-ati gi wan pisi ten, èn taki wan faja hèl de.
26 Wan krin penti di wi kan gebroiki leki wan fondamenti foe takimakandra na taki wi e bribi dati wán troe Gado nomo de, èn taki bijbel skrifi nanga jepi foe en santa jeje. Wan sma di e leisi a Koran finifini kan si taki a e sori go na a Tora, den Psalm, nanga den Evangelie leki a wortoe foe Gado, èn a leisi taki a moesoe erken den leki fa den de èn a moesoe gi jesi na den. So boen, joe kan pristeri a sma wan studie foe den boekoe disi.
27 A pristeri disi kan wroko kande nanga wan sma di e taki dati en na wan Moslimsma: „Mi no taki nanga foeroe Moslimsma, ma mi leisi wan sani foe wan toe leri foe a relisi foe joe na ini a pikin boekoe disi. [Go na bladzijde 15 na ini a pikin boekoe — Fa foe bigin èn go doro nanga bijbel takimakandra.] A e taki dati joe e bribi taki Jesus ben de wan profeiti, ma taki Mohamed ben de a lasti èn moro prenspari profeiti. Joe e bribi toe taki Moses ben de wan troe profeiti? [Gi okasi foe piki.] Mi kan sori joe san Moses ben leri foe Gado foe a persoonlijk nen foe En?” Baka dati leisi Exodus 6:2, 3. Na a gobaka, joe ben sa kan taki foe na ondro-edeprakseri „Wán Gado, wán relisi” tapoe bladzijde 13 na ini a pikin boekoe De tijd voor ware onderwerping aan God.
28 Na ini a ten disi, foeroe sma e handri na ini wánfasi nanga den wortoe foe Jesaja 55:6, pe wi e leisi: „Soekoe Jehovah oen pipel, ala di oenoe kan feni en. Kari en, ala di a sori taki a de krosibei.” Disi abi foe doe nanga ala sma di de opregti, awinsi sortoe tongo den e taki noso sortoe relisi background den abi. Wi kan abi a froetrow taki Jehovah sa blesi den moeiti foe wi te wi e meki moeiti foe go èn „meki disipel foe sma foe ala den nâsi”. — Mat. 28:19.
[Faki na tapoe bladzijde 6]
POEBLIKÂSI DI MEKI GI SMA DI NO DE KRESTEN
Boedasma
Op zoek naar een vader (A soekoe di sma e soekoe wan papa) (pikin boekoe)
„Zie! Ik maak alle dingen nieuw” („Loekoe! Mi e meki ala sani kon njoen”) (brochure)
Sneisi
Lasting Peace and Happiness—How to Find Them (Vrede nanga kolokoe di e tan — Fa foe feni den) (brochure)
Hindoesma
Van Kurukshetra tot Armageddon — en uw overleving (Foe Kurukshetra te na Armagedon — èn a tan di joe man tan na libi) (pikin boekoe)
Onze problemen — Wie zal ons helpen ze op te lossen? (Den problema foe wi — Soema sa jepi wi foe loesoe den?) (brochure)
De weg der goddelijke waarheid die tot bevrijding leidt (A pasi foe waarheid di e kon foe Gado èn di e meki sma kon fri) (pikin boekoe)
Een overwinning op de dood — Ook voor u mogelijk? (Wini abra dede — A kan gi joe so srefi?) (pikin boekoe)
Waarom dienen wij God te aanbidden in liefde en waarheid? (Foe san ede wi moesoe anbegi Gado na ini lobi nanga waarheid?) (brochure)
Djoe
Zal er ooit een wereld zijn zonder oorlog? (Wan ten sa kon pe orlokoe no de?) (brochure)
Moslimsma
Hoe de weg te vinden naar het Paradijs (Fa foe feni a pasi go na a Paradijs) (traktaat)
De tijd voor ware onderwerping aan God (A ten pe wi moesoe saka wisrefi troetroe na ondro Gado) (pikin boekoe)