San Yu Sa Taigi wan Moslimsma?
1 ¿Yu ben gi kotoigi kaba na wan Moslimsma? Efu dati de so, dan kande yu kon sabi taki Moslimsma abi wan fayafaya bribi na ini Gado. Ma den no sabi furu fu a Paradijs di o kon na grontapu, soleki fa den profeiti fu Yehovah ben taki na fesi, èn wi ben sa wani prati a howpu disi nanga den (1 Tim. 2:3, 4). Den sani di wi o taki now, sa yepi yu fu gi wan bun kotoigi.
2 Moslimsma e bribi na ini Allah, noso Gado, èn den e bribi taki Mohammed na a profeiti fu Gado. A santa buku fu den na a Koran èn den e kari a relisi fu den, Islam, san wani taki „a saka di wan sma e saka ensrefi na ondro Gado”. A Koran e taki dati lei nanga na anbegi fu kruktu gado fowtu, taki Gado na wán sma èn taki A no de wan pisi fu wan Dri-wánfasi. So srefi a e leri sma fu a man di a sili no man dede, fu a hèlfaya èn fu wan hemel paradijs. Moslimsma e teki a Bijbel leki Gado Wortu, ma den e bribi taki a kenki, ala di a Koran, di de ete na ini en fosi tongo, tan soifri.
3 Sori Switifasi, Takt, Nanga a Koni fu Man Si Sani Krin: Te yu e suku fu taki nanga wan Moslimsma, sori switifasi nanga takt (Odo 25:15). Hori na prakseri taki den sani di den Moslimsma e bribi ankra dipidipi èn taki den ben leri moro furu fu den sani disi na ede. So bun, Moslimsma di ben kisi leri na yeye fasi no ben leri fu rideneri nanga sma fu leri di abi fu du nanga relisi èn fu ondrosuku gi densrefi san na a wani fu Gado (Rom. 12:2). Fu yepi Moslimsma, dan pasensi nanga takt de tumusi prenspari.—1 Kor. 9:19-23.
4 No gebroiki wortu di ben sa meki Moslimsma denki taki yu abi fu du nanga Krestenhèit. Tyari kon na krin taki yu no de wan pisi fu a Katolik noso Protestant relisi, ma taki yu de tra fasi. Te yu e taki fu a Bijbel, kari en a Buku fu Gado. Fu di Moslimsma no lobi den wortu „a Manpikin fu Gado”, meki nofotron a moro betre fu no gebroiki den noso fu no taki fu a tori dati te leki a sma go na fesi kaba na yeye fasi. Ma yu kan taki fu Yesus, ala di yu e kari en wan profeiti noso boskopuman. No hari taki. Efu yu e si taki a sma e bigin atibron, gowe wantewante ma du dati na wan lespeki fasi.
5 A moro betre fu taki nanga wán sma nomo leki fu taki nanga wan grupu sma. Moro furu a de wan koni sani fu umasma gi kotoigi na umasma èn mansma na mansma. A de krin taki disi no de so ala ten, ma toku den musu gebroiki a koni fu man krutu sani bun. So srefi, furu Moslimsma kan atibron esi-esi nanga san den e prakseri fu umasma krosi di no de bescheiden èn so srefi tu nanga a fasi fa umasma e sorgu gi densrefi. Den sisa musu hori dati na prakseri.—1 Kor. 10:31-33.
6 Sani Di Yu Kan Taki fu Den: Taki sondro fu syen fu a bigi di Gado bigi èn a lobi fu en. No draidrai fu taki dati yu na wan sma di e bribi trutru, taki Gado na wán sma (no wan Dri-wánfasi), èn taki a fowtu fu anbegi kruktu gado. Taki fu a godelowsufasi di de ini a grontapu fu a ten disi—feti, dyugudyugu na mindri borgu, a bita-ati di wan ras e firi gi a tra ras èn a hoigrifasi di de so furu na mindri relisi sma.
7 A brochure De leiding van God—Onze weg naar het Paradijs (A Tiri fu Gado—A Pasi fu Wi fu Go na Paradijs) sa gi yu moro inzicht fu tori di yu kan gebroiki fu bigin wan takimakandra nanga Moslimsma. A brochure meki fu taki nanga Moslimsma di e libi na ini wan kontren pe den kan firi densrefi fri fu studeri Bijbel.
8 Leki wan pristeri, yu ben sa kan taki:
◼ „Mi e meki spesrutu muiti fu taki nanga Moslimsma. Mi leisi fu yu relisi èn mi denki taki mi abi leti fu taki dati Moslimsma e bribi na ini wán tru Gado èn na ini ala den profeiti. [Gi a sma okasi fu piki.] Mi ben sa wani taki nanga yu fu wan owru profeititori di e taki na fesi taki grontapu o kenki kon tron wan Paradijs. ¿Mi kan leisi gi yu san a profeiti ben skrifi? [Leisi Yesaya 11:6-9.] A profeititori disi e meki mi prakseri fu wan pisi di den teki puru fu a Koran san yu kan feni ini a brochure disi.” Go na bladzijde 9 na ini a Leiding van God-brochure èn leisi a pisi disi di den teki puru èn di skrifi nanga deki letter, san e sori taki den regtfardikiwan sa kisi grontapu. Efu a sma e sori belangstelling, dan go doro nanga a takimakandra ala di yu e taki fu paragraaf 7 te nanga 9 na a tra bladzijde. Libi a brochure na baka èn seti sani fu go baka.—Wan tra pristeri yu kan feni na ini Wi Kownoekondre Dienst fu februari 1998, bladzijde 6, paragraaf 27.
9 Te yu e gi sma wan kari fu luku a Leiding van God-brochure finifini, dan a moro betre fu kari dati wan takimakandra na presi fu kari en wan studie fu a Bijbel. Te yu kaba nanga a brochure, dan a studenti sa musu de so fara fu man studeri a San Gado e aksi-brochure noso a Sabi-buku. Tra publikâsi di de spesrutu gi den Moslimsma na a traktaat Hoe de weg te vinden naar het Paradijs (Fa fu Feni a Pasi Go na a Paradijs) nanga a pikin buku De tijd voor ware onderwerping aan God (A Ten Pe Wi Musu Saka Wisrefi Trutru na Ondro Gado).
10 Now di wi sabi den sani disi fu na Islam bribi nanga den sani di kan meki den atibron esi-esi, dan wi kan luku finifini san wi e gi den Moslimsma fu leisi èn fa wi e gi den kotoigi. Meki Yehovah tan blesi den muiti di wi e meki fu yepi ala sortu sma fu kari a nen fu Yehovah èn fu kisi frulusu.—Tori. 2:21.