Aksi Boksu

◼ ¿Yu sreka yusrefi gi wan seryusu situwâsi di yu no ben fruwakti?

Na ini a disiten grontapu, „ten nanga sani di e pasa èn di sma no sabi na fesi” nofotron e wroko makandra fu meki wan seryusu situwâsi de di abi fu du nanga datra-yepi, so srefi a druk di e poti na wi tapu fu teki brudu transfusie (Preik. 9:11). So taki wi kan de srekasreka gi den sortu sani disi di kan pasa, Yehovah gi yepi na furu fasi nanga yepi fu en organisâsi, ma a e fruwakti fu wi taki wi e du san wi musu du. Na ondrosei wan lijst de nanga penti fu yepi yu.

• Tyari a nyun Vooraf opgestelde medische richtlijn/ontheffing-karta (brudukarta) ala ten nanga yu.

• Luku taki den pikin fu yu tyari den nyun identiteit-karta.

• Luku na inlegvel fu Wi Kownukondre Dienst fu september 1992, èn oefen fa fu rideneri nanga datra èn nanga krutubakra fu a fasi fa yu wani taki yu pikin musu kisi yepi.

• Luku den artikel di e taki fu den sani di de na ini brudu èn tra sani di kan gebroiki na presi fu brudu. (Wi e rikomanderi: De Wachttoren fu 1 oktober 1994, bladzijde 31; 1 yuni 1990, bladzijde 30-31; 1 maart 1989, bladzijde 30-31; Ontwaakt! fu 8 december 1994, bladzijde 23-27; 8 augustus 1993, bladzijde 22-25; 22 november 1991, bladzijde 10; nanga den inlegvel fu Wi Kownukondre Dienst fu september 1992 nanga december 1990. Hori den na ini wan map so taki yu kan feni den wantewante.)

• Bosroiti nanga wan bun konsensi efu yu kan gi primisi fu gebroiki masyin di e meki a brudu waka dorosei fu yu skin, noso efu yu kan teki dresi di abi sani na ini di teki puru fu brudu.

• Efu a kan, bifo yu e go na ati-oso, meki den owruman sabi dati so taki den kan yepi yu èn den kan meki kontakti nanga a Ziekenhuiscontactcomité (ZCC) (Ati-oso Kontakti Komte) efu a de fanowdu. Efu a abi fu du nanga wan yongu pikin, dan aksi den owruman fu taki biten nanga a ZCC.

Tyari Kon na Krin Taki Yu E Weigri Brudu: Rapport e sori taki wan tu brada nanga sisa e wakti te leki a lasti momenti fu taigi den datra di o yepi den taki den no wani brudu. Disi no eerlijk gi den datra nanga tra sma di musu yepi yu èn yu kan kon na ini a kefar taki den sa gi yu transfusie. Efu den datra sabi taki den sani di yu e bribi èn di yu wani, buweisi na ini prenspari karta pe yu nen skrifi na ondro èn di e taki soifri san yu wani, dan a e yepi den fu wroko go doro sondro fu wakti èn nofotron a e gi den moro okasi fu gi yu datra-yepi sondro brudu.

Fu di seryusu situwâsi nanga yu gosontu kan pasa iniwan ten, nofotron te yu no e fruwakti en srefisrefi, meki yu musu du sani nownow fu kibri yusrefi nanga den pikin fu yu so taki yu no e kisi brudu transfusie.​—Odo 16:20; 22:3.