¿Wi No Yere a Sani Dati Kaba?
1 ¡Iya, wi ben yere en kaba! Ala leisi baka, Yehovah e taki furu sani na ini en Wortu fu a bun fu en pipel. Yesus ben e taki furutron baka fu den leri fu en, di ben abi fu du nanga difrenti sani fu a Kownukondre. Doronomo den apostel fu en ben e luku yeye afersi syatu baka nanga den wan di ben tanapu steifi na ini a waarheid.—Rom. 15:15; 2 Petr. 1:12, 13; 3:1, 2.
2 Na ini a ten fu wi na organisâsi fu Yehovah seti sani, so taki furutron wi kan luku den prenspari pisi tori syatu baka na den gemeente konmakandra. Sonwan fu den publikâsi wi studeri furutron kaba. ¡Iya, a de prenspari fu yere sani baka di wi yere kaba!
3 A Taki fu Sani Ibritron Baka De Prenspari Srefisrefi: Den frumane fu Yehovah, e meki a frustan di wi e frustan sani kon moro bun, a e bradi a fasi fa wi e si sani, èn a e tranga a fasti bosroiti fu wi fu no lasi pasi na yeye fasi (Ps. 119:129). Te wi e luku den markitiki nanga den gronprakseri fu Gado baka, dan a de neleki wi e luku na ini wan spikri. A e yepi wi fu ondrosuku wisrefi finifini èn fu feti nanga den firi fu de ’wan sma di yere èn e frigiti’.—Yak. 1:22-25.
4 Efu wi no e tan memre wisrefi na sani fu a waarheid, dan tra sani sa abi krakti tapu wi ati. Den frumane fu Gado e tranga wi fu kakafutu gi den pori krakti fu a grontapu fu Satan (Ps. 119:2, 3, 99, 133; Fil. 3:1). Den frumane di wi e kisi doronomo èn di abi fu du nanga den kontru fu den pramisi fu Gado, e pusu wi fu „tan hori wakti” (Mark. 13:32-37). Te wi e taki fu den Bijbel waarheid ibritron baka dan dati e yepi wi fu tan na tapu a pasi di e tyari wi go na têgo libi.—Ps. 119:144.
5 Fa Wi Kan Feni Winimarki gi Wisrefi: Wi musu ’boigi wi ati go den frumane fu Gado’ (Ps. 119:36). Te den o taki fu wan tori di wi sabi kaba na ini wan gemeente konmakandra, dan wi musu sreka wisrefi na fesi, suku den tekst di kari, èn luku fa wi kan gebroiki a sani di taki. No meki a pasa taki wi no sreka wisrefi gi a schriftelijk overzicht fu a Theokrasia Diniwroko-skoro, fu di wi e denki taki a no de prenspari (Luk. 8:18). Noiti wi ben sa wani tron sma di no e poti prakseri na den konmakandra, fu di den e taki ibritron baka fu fundamenti leri na den konmakandra fu wi.—Hebr. 5:11.
6 Meki wi abi a srefi fasi fu a psalm skrifiman: „Na ini a pasi fu den frumane fu yu mi abi prisiri trutru, neleki ala den tra warti sani” (Psalm 119:14). ¡Iya, wi ben yere den warti sani disi na fesi kaba, èn soleki fa a sori wi sa yere den baka. Fu san ede? Bika Yehovah sabi taki a de fanowdu fu wi yere den!