Wan ten foe tan na ai

„A boen njoensoe moesoe preiki fosi na ini ala nâsi. . . . Ma a sma di horidoro te na a kaba, na en sa kisi froeloesoe.” — MARKUS 13:10, 13.

1. Foe san ede wi moesoe horidoro èn hori deki-ati?

WI MOESOE horidoro — na mindri wan geslakti foe sma di no e bribi èn di kroektoe! Sensi 1914 wan geslakti foe libisma kon kroektoe neleki na ini a ten foe Jesus. Na ini a ten disi, kroektoefasi de na heri grontapoe. Na ini den „lasti dei” disi, den „moeilek ten di tranga foe pasa” di na apostel Paulus ben taki foe en, e kwinsi a libisma famiri. ’Ogriman nanga bidrigiman e tan kon moro ogri.’ A de krin foe si taki „heri grontapoe didon na ini a makti foe na ogriwan”, Satan Didibri, di e doe en lasti moeiti foe pori grontapoe. Ma no lasi-ati! Wan „bigi banawtoe” de na pasi di sa tjari froeloesoe kon di e tan gi ala den wan di lobi regtfardikifasi. — 2 Timoteus 3:1-5, 13; 1 Johanes 5:19; Openbaring 7:14.

2. Fa wan profeititori ben kon troe na ini 1914?

² A prisiri taki now Jehovah poti Masra Jesus Krestes leki Kownoe na hemel, èn na so wan fasi A sreka sani foe poeroe den sma di de feanti foe a libisma famiri èn di e kwinsi den (Openbaring 11:15). Neleki fa a ben de nanga a fosi kon foe a Mesias, na so wan aparti profeititori di Danièl ben skrifi, e kon troe toe na ini a jarihondro disi. Na ini Danièl 4:16, 17, 32, den e froeteri wi taki a kownoekondre di abi a reti foe tiri, no ben o tiri na tapoe grontapoe foe wan pisi ten foe „seibi ten”. Na ini a moro bigi kontroe, den seibi ten disi na den seibi bijbel jari foe 360 ’dei’ gi wán ten, noso 2520 jari ala nanga ala.a Den bigin foe sensi 607 b.G.T., di Babilon ben bigin trapoe a kownoekondre foe Israèl na ondro den foetoe, te go miti 1914 G.T., a jari di Jesus ben poti leki kownoe na hemel, leki a Kownoe di abi a reti foe tiri a libisma famiri. Baka dati „den fasti ten foe den nâsi” ben kon na wan kaba (Lukas 21:24). Ma den nâsi weigri foe saka densrefi na ondro a njoen Kownoekondre foe a Mesias. — Psalm 2:1-6, 10-12; 110:1, 2.

3, 4. (a) Na sortoe fasi wi ben kan teki den sani foe a fosi jarihondro gersi nanga den di foe a ten foe wi? (b) Sortoe aksi di e fiti wi kan poti?

³ Di a di foe seibitenti wiki foe den jari ben doro (29-36 G.T.), èn agen di a jari 1914 kon krosibei, den sma di abi frede gi Gado ben e froewakti a kon foe a Mesias. Èn a ben kon troetroe! Ma na ini ala toe okasi, a fasi fa a kon ben difrenti foe san sma ben froewakti. So srefi toe, na ini ala toe okasi, te joe agersi en nanga tra ten, dan baka wan sjatoe pisi ten wan ogri „geslakti” e kisi kroetoe te foe kaba, foe di Gado ben gi a komando. — Mateus 24:34.

⁴ Na ini a fosi artikel, wi ben si fa na ogri djoe geslakti di ben aksi foe kiri Jesus, ben kon na wan kaba. San de foe taki dan foe a pori geslakti foe libisma di e kakafoetoe noso no e ke nanga en na ini a ten disi srefi? O ten a kroetoe sa kon na tapoe a geslakti disi foe sma di no abi bribi?

„Tan na ai”!

5. (a) Foe san ede a no de fanowdoe foe wi sabi a ten foe „a dei nanga a joeroe” foe Jehovah? (b) Nanga sortoe gosontoe rai Jesus ben kaba a profeititori foe en, soleki fa Markus e sori?

⁵ Baka di Jesus ben taki na fesi foe den sani di ben o pasa fosi a „bigi banawtoe”, a ben taki toe: „Foe a dei nanga a joeroe dati no wan sma no sabi, no den engel foe hemel noso a Manpikin, leki soso a Tata wawan” (Mateus 24:3-36; Markus 13:3-32). Wi no abi foe sabi den joisti ten foe den sani di e pasa. Na presi foe dati, wi moesoe poti wi prakseri na tapoe taki wi e tan na ai, e kweki wan tranga bribi, èn e tan doe foeroe na ini a diniwroko foe Jehovah — èn no tapoe a teri foe dei. Jesus ben kaba a moi profeititori foe en nanga den wortoe: „Tan loekoe, tan na ai, bikasi joe no sabi o ten a fasti ten de. . . . Tan na ai . . . San mi e taigi oenoe, mi e taigi ala sma: Tan na ai” (Markus 13:33-37). Kefar e loeroe na ini a doengroe grontapoe foe a ten disi. Wi moesoe tan na ai! — Romesma 13:11-13.

6. (a) Na ini san wi ben sa moesoe ankra a bribi foe wi? (b) Fa wi kan „teri den dei foe wi”? (c) San de a moro prenspari sani di Jesus wani taki nanga „geslakti”?

⁶ No wawan wi moesoe poti prakseri tapoe den profeititori di skrifi nanga jepi foe santa jeje èn di e taki foe den lasti dei foe wan ogri seti, ma wi moesoe ankra a bribi foe wi foenamkoe ini a warti ofrandi foe Krestes Jesus nanga den toemoesi moi pramisi foe Gado di abi den gron tapoe na ofrandi disi (Hebrewsma 6:17-19; 9:14; 1 Petrus 1:18, 19; 2 Petrus 1:16-19). Foe di a pipel foe Jehovah angri foe si a kaba foe na ogri seti disi, meki son tron den go rai o ten a „bigi banawtoe” ben sa bigin èn den ben meki den sani disi di den ben bereken abi foe doe srefi nanga o langa a geslakti foe 1914 e libi. Ma tokoe wi „e kisi wan ati di koni”, no te wi e go rai omeni jari noso dei wan geslakti abi, ma te wi e go denki fa foe „teri den dei foe wi” nanga a prèise di wi e prèise Jehovah nanga prisiri (Psalm 90:12). Na presi foe gi wi wan markitiki fa foe bereken a ten, a wortoe „geslakti” di Jesus ben gebroiki, e sori foenamkoe go na tapoe sma foe a srefi ten, foe wan pisi ten ini a historia nanga den eigifasi di e meki den difrenti foe trawan.b

7. San wan profesor na ini historia skrifi foe „a geslakti foe 1914”, èn fa disi abi foe doe nanga a profeititori foe Jesus?

⁷ Akroederi san skrifi na tapoesei, wan profesor na ini historia, Robert Wohl ben skrifi ini en boekoe The Generation of 1914: „Wan geslakti nanga a srefi historia background no de wan sani di joe e taki foe en taki a e kaba nanga wan ten. . . . A no de wan sani di marki nanga wan ten.” Ma a ben tjari kon na krin taki a Fosi Grontapoefeti ben meki sma firi „wan bigi difrenti nanga a ten di pasa”, èn a ben taki moro fara: „Den wan di pasa a feti libilibi, noiti moro no ben man poeroe a prakseri taki wan grontapoe ben kaba èn wan trawan ben bigin na ini augustus 1914.” A sani disi de troe srefisrefi! A sani disi ben poti prakseri na tapoe na inibere foe a tori. „A geslakti disi” foe libisma foe sensi 1914 ondrofeni ogri kenki. Den si fa grontapoe ben lai nanga broedoe foe miljoenmiljoen sma. Feti, a kiri di sma e kiri heri ras, terrorisme, ogridoe, nanga kroektoedoe kon wantronso na heri grontapoe. Angriten, siki, nanga seks hoeroedoe abi a grontapoe foe wi na ini en makti. Jesus ben taki na fesi: „Oenoe srefi, te oenoe [den disipel foe en] si den sani disi e feni presi, sabi dan, taki a kownoekondre foe Gado de krosibei. Foe troe, mi e taigi oenoe: A geslakti disi no sa pasa kwetikweti te leki ala den sani disi pasa.” — Lukas 21:31, 32.

8. Fa den profeiti foe Jehovah e poti krakti na tapoe taki a de fanowdoe foe tan na ai?

⁸ Ija, a wini di a Mesian Kownoekondre sa wini a heri feti de krosibei! Wi sa abi winimarki dan, te wi e loekoe na wan ten noso e go rai foe sabi o langa wan „geslakti” e libi troetroe? Kwetikweti! Habakuk 2:3 e taki krinkrin: „Bika a fisjoen de ete gi a fasti ten, èn a e tan hari go na a kaba, èn a no sa froeteri no wan lei. Srefi efoe a ben sa meki den wakti tapoe en, dan loekoe nanga faja froewakti na a kon foe en; bika sondro misi a sa kon troe. A no sa kon lati.” A dei pe Jehovah o aksi frantiwortoe e kon moro krosibei. — Jeremia 25:31-33; Maleaki 4:1.

9. Sortoe sani di pasa sensi 1914 e sori taki a ten sjatoe?

⁹ Di a Kownoekondre foe Krestes ben bigin foe tiri na ini 1914, den ben trowe Satan go na grontapoe. Disi ben wani taki „heloe foe grontapoe . . . bika Didibri saka kon na oenoe, a abi bigi atibron, foe di a sabi taki a abi wan sjatoe pisi ten nomo” (Openbaring 12:12). A ten dati sjatoe troetroe te joe teki en gersi nanga den doesoendoesoen jari di Satan tiri. A Kownoekondre de krosibei, èn so srefi a dei nanga a joeroe taki Jehovah o tjari kroetoe kon tapoe a kroektoe geslakti disi! — Odo 3:25; 10:24, 25.

A „geslakti” di e pasa gowe

10. Fa „a geslakti disi” de neleki a di foe den dei foe Noa?

¹⁰ Meki wi go ondrosoekoe moro fini a sani di Jesus ben taki na Mateus 24:34, 35: „Foe troe, mi e taigi oenoe: A geslakti disi no sa pasa kwetikweti te leki ala den sani disi pasa. Hemel nanga grontapoe sa pasa gowe, ma den wortoe foe mi no sa pasa gowe kwetikweti.” Den wortoe foe Jesus di e kon now e sori taki ’no wan sma sabi a dei nanga a joeroe dati’. Wan moro prenspari sani na taki a e sori wi taki wi moesoe kibri wisrefi gi den trapoe di de lontoe wi na ini a geslakti disi. Foe dati ede Jesus e taki toe : „Bika neleki fa den dei foe Noa ben de, na so a denoja foe a Manpikin foe libisma sa de. Neleki fa a ben de na ini den dei dati bifo a froedoe, den ben e njan, den ben e dringi, man ben e trow èn oema den ben e gi foe trow, te leki a dei taki Noa ben go na ini na ark; èn den no ben poti prakseri na tapoe te leki a froedoe ben kon èn ben figi den alamala poeroe; na so a denoja foe a Manpikin foe libisma sa de” (Mateus 24:36-39). Djaso Jesus ben teki a geslakti disi na ini en ten gersi nanga a wan na ini a ten foe Noa. — Genesis 6:5, 9; foetoewortoe.

11. Na sortoe fasi Jesus ben teki ’geslakti’ gersi nanga makandra soleki fa Mateus nanga Lukas ben skrifi?

¹¹ Disi no ben de a fosi tron taki den apostel ben jere Jesus teki ’den geslakti’ gersi makandra na a fasi disi, foe di wan toe dei bifo a ben taki foe ensrefi: „A Manpikin foe libisma . . . moesoe ondrofeni foeroe pen èn a geslakti disi sa weigri foe erken en. Moro fara, neleki fa a ben pasa na ini den dei foe Noa, na so a sa de toe na ini den dei foe a Manpikin foe libisma” (Lukas 17:24-26). So boen, Mateus kapitel 24 nanga Lukas kapitel 17 e taki foe a srefi tori. Ini den dei foe Noa „ala sma [di] ben pori en pasi na grontapoe” èn di ben kisi pori na ini a Froedoe, ben de „a geslakti disi”. Na ini den dei foe Jesus, a djoe pipel di ben fadon komoto na bribi èn di ben weigri foe erken Jesus, ben de „a geslakti disi”. — Genesis 6:11, 12; 7:1.

12, 13. (a) Soema na „a geslakti disi” na ini a ten disi, di moesoe pasa gowe? (b) Fa a pipel foe Jehovah e kakafoetoe nownowde gi a „kron èn kroektoe geslakti” disi?

¹² Foe dati ede, na ini a lasti kontroe foe a profeititori foe Jesus na ini a ten disi, dan soleki fa a e sori „a geslakti disi” e sori go na den sma na grontapoe di e si a marki foe a denoja foe Krestes, ma e weigri foe kenki den pasi. Kontrari foe dati, wi leki disipel foe Jesus e weigri foe meki a fasi fa „a geslakti disi” e libi, kenki wi. Ala di wi de na ini grontapoe, wi no moesoe de wan pisi foe en „bikasi a fasti ten de krosibei” (Openbaring 1:3; Johanes 17:16). Na apostel Paulus e froemane wi: „Tan doe ala sani sondro foe kroetoekroetoe nanga foe haritaki, so taki oenoe kan kon de sondro fowtoe èn boen, pikin foe Gado sondro flaka na mindri foe wan kron èn kroektoe geslakti, na mindri foe soema oenoe e skèin leki tjariman foe leti na ini grontapoe.” — Filipisma 2:14, 15; Kolosesma 3:5-10; 1 Johanes 2:15-17.

¹³ A skèin di wi „e skèin leki tjariman foe leti” no abi na ini wawan taki wi e sori foe abi wan krin kresten persoonlijkheid, ma moro prenspari taki wi e meki a komando kon troe, di Jesus ben gi na ini wan profeititori: „A boen njoensoe disi foe a kownoekondre sa preiki na heri grontapoe pe sma e libi, leki wan kotoigi gi ala nâsi, èn dan a kaba sa kon” (Mateus 24:14). No wan sma no kan taki o ten a kaba disi sa kon, ma wi sabi taki a kaba foe „a geslakti disi” foe ogri sma sa kon so esi leki a kotoigiwroko doe leki fa Gado ben wani dati „te na den moro farawe pisi foe grontapoe”. — Tori foe den Apostel 1:8.

„A dei nanga a joeroe dati”

14. Sortoe froemane Jesus nanga Paulus ben gi ini a tori foe „den ten nanga den pisi ten”, èn fa wi moesoe handri na tapoe?

¹⁴ Te a kotoigiwroko doe kaba na heri grontapoe na a fasi fa Jehovah abi na prakseri, dan a sa de en ’dei nanga joeroe’ foe poeroe na owroe grontapoe seti disi. Wi no abi foe sabi na fesi san na a dei. So boen, foe di na apostel Paulus ben waka na baka na eksempre foe Jesus, a ben froemane: „Ma foe den ten nanga pisi ten, oen brada, a no de fanowdoe foe mi skrifi oenoe foe dati. Bika oensrefi sabi heri boen taki a dei foe Jehovah e kon soifri leki wan foefoeroeman na neti joeroe. Te den e taki: ’Vrede nanga seikerfasi!’ dan wan tron so wan pori sa kon na ini wán momenti na den tapoe neleki a pen foe wan bere-oema; èn den no sa lon komoto kwetikweti.” Loekoe tapoe san Paulus ben poti prakseri: Te den e taki’! Ija, te den e taki wan sani foe „vrede nanga seikerfasi”, te joe no e froewakti en srefisrefi, dan Gado sa tjari en kroetoe kon wantenwanten. A rai foe Paulus troetroe e fiti heri boen: „Foe dati ede, no meki wi sribi go doro leki den trawan, ma meki wi tan na ai èn hori wi prakseri na wán”! — 1 Tesalonikasma 5:1-3, 6; loekoe so srefi den vers 7-11; Tori foe den Apostel 1:7.

15, 16. (a) Foe san ede wi no moesoe denki taki Armagedon de moro fara leki wi ben bribi kande? (b) Fa a soevereiniteit foe Jehovah moesoe kon kisi krakti na ini a ten di de krosibei na wi fesi?

¹⁵ A moro krin fasi disi foe si sani, foe „a geslakti disi” wani taki dati Armagedon de moro fara leki san wi ben prakseri? Kwetikweti! Ala di noiti wi no ben sabi a „dei nanga a joeroe”, Jehovah Gado ben sabi dati ala ten, èn en no e kenki (Maleaki 3:6). A de krin foe si fa grontapoe e soengoe moro nanga moro go foe kisi wan têgo pori. A fanowdoe foe tan na ai de moro prenspari leki fa a ben de oiti. Jehovah tjari kon na krin gi wi „den sani di sa moesoe pasa djonsrode”, èn wi moesoe handri na wan fasi di e sori taki wi sabi o tranga dati de fanowdoe. — Openbaring 1:1; 11:18; 16:14, 16.

¹⁶ Tan na ai o moro a ten e kon krosibei, bikasi Jehovah de foe tjari rampoe kon na tapoe a heri seti foe Satan! (Jeremia 25:29-31) Jehovah e taki: „Mi sa meki misrefi kon hei troetroe èn santa misrefi èn meki misrefi kon bekènti na fesi na ai foe foeroe nâsi; èn den sa moesoe kon sabi taki mi na Jehovah” (Esekièl 38:23). A „dei foe Jehovah” di sa kon seiker, e kon krosibei! — Joèl 1:15; 2:1, 2; Amos 5:18-20; Sefanja 2:2, 3.

Regtfardiki „njoen hemel nanga wan njoen grontapoe”

17, 18. (a) Fa „a geslakti disi” e pasa gowe, soleki fa Jesus nanga Petrus e taki? (b) Foe san ede wi moesoe tan na ai na ini a fasi fa wi e tjari wisrefi èn na ini den sani di wi e doe foe di wi gi wisrefi na ini a dini foe Gado?

¹⁷ Foe ala ’den sani di moesoe pasa’ Jesus ben taki: „Hemel nanga grontapoe sa pasa gowe, ma den wortoe foe mi no sa pasa gowe kwetikweti” (Mateus 24:34, 35). A sori leki Jesus ben abi na prakseri a „hemel nanga grontapoe” — den tiriman nanga den wan di e kisi tiri — foe „a geslakti disi”. Na apostel Petrus ben gebroiki den srefi wortoe disi foe sori go na den „hemel nanga grontapoe di de nownowde” di den „kibri gi a faja èn di den kibri foe kroetoe èn foe gi den takroe sma pori”. Baka dati, a e taki fa „a dei foe Jehovah sa kon leki wan foefoeroeman, pe den hemel [tirimakti] sa pasa gowe” makandra nanga wan pori libisma libimakandra, noso „grontapoe”, nanga en sondoe doe. Baka dati, na apostel e froemane [wi] foe „tjari [wisrefi] na wan santafasi èn doe sani di e sori taki wi gi [wisrefi] na ini a dini foe Gado, [ala di wi] e froewakti èn e hori boen na prakseri a denoja foe a dei foe Jehovah di nanga jepi foe dati, sa pori hemel nanga faja èn den element di faja srefisrefi, sa kon smèlter!” San e pasa baka dati? Petrus e poti wi prakseri tapoe ’den njoen hemel nanga wan njoen grontapoe èn drape regtfardikifasi sa de’. — 2 Petrus 3:7, 10-13.c

¹⁸ Den „njoen hemel” dati, a Kownoekondre tirimakti foe Krestes Jesus nanga den kompe kownoe foe en, sa saka blèsi kon na tapoe a regtfardiki „njoen grontapoe” foe libimakandra foe a libisma famiri. Joe de wan sma di sa de wan memre foe a libimakandra dati? Efoe dati de so, dan joe abi reide foe prisiri foe a moi ten di de na joe fesi! — Jesaja 65:17-19; Openbaring 21:1-5.

19. Sortoe bigi grani wi kan abi now?

¹⁹ Ija, nownow srefi den e tjari wan regtfardiki „geslakti” foe a libisma famiri kon na wán. Na ini a ten disi a „koni èn getrow srafoe” e sorgoe gi leri foe Gado di de akroederi den wortoe foe Psalm 78:1, 4: „O mi pipel, arki a wet foe mi; poti jesi na den sani di mi mofo e taki . . . , froeteri den srefi na a geslakti di moesoe kon ete, den prèise foe Jehovah nanga en krakti nanga den wondroe wroko di a doe” (Matheus 24:45-47). Tapoe 14 april foe a jari disi, na ini moro leki 75.500 gemeente èn na so wan 230 kondre, moro leki 12.000.000 sma na heri grontapoe ben fisiti a Memrefesa foe a dede foe Krestes. Joe ben de na mindri den? Meki a de so taki joe e poti bribi na ini Krestes Jesus èn ’kari a nen foe Jehovah foe kisi froeloesoe’. — Romesma 10:10-13.

20. Fa wi moesoe tan na ai, foe di „a ten di tan abra no langa moro”, èn nanga sortoe froewakti?

²⁰ „A ten di tan abra no langa moro”, na apostel Paulus ben taki. Foe dati ede, a de wan ten foe tan na ai ala ten èn abi foeroe foe doe na ini a wroko foe Jehovah, ala di wi e horidoro te wi e kisi foe doe nanga tesi èn nanga a si di sma no wani si trawan na ai, sani di na ogri geslakti foe libisma ben tjari kon na wi tapoe (1 Korentesma 7:29; Mateus 10:22; 24:13, 14). Meki wi tan na ai èn si fa ala den sani di ben taki na fesi na ini bijbel, sa kon tapoe „a geslakti disi” (Lukas 21:31-33). Te wi e lowe komoto gi ala den sani disi èn te wi e tanapoe na fesi a Manpikin foe libisma foe di Gado feni wi boen, dan te foe kaba, wi sa kan kisi a prijs foe têgo libi.

[Foetoewortoe]

Aksi foe loekoe sani sjatoe baka:

◻ Fa wi ben sa moesoe „tan na ai” now, baka di wi si a kontroe foe Danièl 4:32?

◻ Fa den Evangelie foe Mateus nanga Lukas e meki wi kon sabi san na „a geslakti disi”?

◻ San wi e si èn fa wi moesoe handri, ala di wi e froewakti „a dei nanga a joeroe dati”?

◻ Sortoe sani a froewakti di wi e froewakti wan regtfardiki „njoen hemel nanga wan njoen grontapoe” moesoe gi wi deki-ati foe doe?

[Prenki na tapoe bladzijde 15]

A libisma famiri di e firi kwinsi sa feni froelekti te na ogri geslakti disi pasa gowe

[Sma di abi a reti foe a prenki]

Alexandra Boulat/Sipa Press

[Sma di abi a reti foe den prenki]

Left and below: Luc Delahaye/Sipa Press

[Prenki na tapoe bladzijde 16]

Den glori „njoen hemel nanga wan njoen grontapoe” de leti krosibei gi ala sma foe a libisma famiri