Aksi foe leisiman
Jesus ben gi deki-ati: „Span oensrefi boen tranga foe pasa a smara doro go na inisei, bika foeroe sma, mi e taigi oenoe, sa proeberi foe go na inisei, ma den no sa man” (Lukas 13:24). San a ben wani taki nanga dati, èn fa wi kan fiti dati na ini a ten disi?
Wi kan froestan a moi pisi disi moro boen efoe wi ben sa loekoe a situwâsi di ben meki a kon taki a sani disi ben taki. So wan siksi moen bifo Jesus dede, dan a ben de na Jerusalem na a ten di den ben e memre a dei di den ben gi a tempel abra baka na Gado. A ben taki dati en ben de a skapoeman foe Gado skapoe, ma a ben tjari kon na krin taki moro foeroe djoe no ben o de na mindri den sortoe skapoe dati bika den ben weigri foe arki. Di a ben taki dati a ben de „wán” nanga en Tata, dan den djoe ben teki ston foe ston en. A ben lon komoto go na Perea pasa a Jordan liba. — Johanes 10:1-40.
Drape wan man ben aksi: „Masra, a de so, taki pikinso sma nomo o kisi froeloesoe?” (Lukas 13:23) A sani dati di a ben aksi ben de wan aksi di ben e fiti, foe di djoe foe a ten dati ben abi a prakseri taki pikinso sma nomo ben sa froedini froeloesoe. Nanga na eigifasi di den ben sori, a no moeilek foe froestan soema den ben prakseri ben o de den pikinso sma disi. Te wi e loekoe fa sani ben sa waka baka ten, dan wi e si fa den ben fowtoe srefisrefi!
Toe jari langa, Jesus ben de na den mindri, e gi den leri, e doe wondroe, èn e bradi na okasi gi den foe den kan kon tron erfgenaam foe a hemel Kownoekondre. Nanga sortoe bakapisi? Den djoe, nanga den fesiman foe den spesroetoe, ben abi bigimemre foe di den ben de bakapikin foe Abraham èn foe di den ben kisi a Wet foe Gado (Mateus 23:2; Johanes 8:31-44). Ma den no ben wani erken èn piki tapoe a sten foe a Troetroe Boen Skapoeman. A ben de leki wan doro di ben opo na den fesi, nanga na okasi foe kisi a prenspari presenti foe tron wan memre foe a Kownoekondre efoe den ben sa go na ini, ma den ben weigri. Pikinso sma nomo, spesroetoe foe den sma foe a moro lagi groepoe ben jere Jesus boskopoe foe waarheid, den ben doe wan sani na tapoe, èn den ben tan na en sei. — Lukas 22:28-30; Johanes 7:47-49.
Tapoe a dei foe a Pinksterfesa na ini 33 G.T., a ben de den lastiwan dati di ben o kisi salfoe nanga santa jeje (Tori foe den Apostel 2:1-38). Den no ben de na mindri den wrokoman foe onregtfardikifasi di Jesus ben taki foe den taki den ben o kaw den tifi foe di den no ben teki a grani di ben opo gi den. — Lukas 13:27, 28.
Foe dati ede, na ini a fosi jarihondro, dan den „foeroe sma” ben de moro foeroe den djoe, èn spesroetoe den relisi fesiman. Den wan disi ben taki dati den ben e soekoe a boen-ati foe Gado — ma soso akroederi den eigi markitiki èn nanga den fasi fa den wani, no nanga den di foe Gado. Tra fasi leki den, den „pikinso sma” di ben doe wan sani foe di den abi serjoesoe belangstelling foe de wan pisi foe a Kownoekondre, ben kon tron salfoe memre foe a kresten gemeente.
Loekoe now a moro bradi fasi fa a e fiti na ini den dei foe wi. Foeroe sma di e go na den kerki foe krestenhèit kisi leri taki den o go na hemel. Ma a froewakti disi no gron tapoe soifri leri foe den Boekoe foe bijbel. Neleki den fositen djoe, den sma disi wani a boen-ati foe Gado, ma soso tapoe den eigi kondisi.
Ma na ini a ten foe wi, ala di na pikinso sma nomo, doe wan sani tapoe a Kownoekondre boskopoe na wan saka fasi, gi densrefi abra na Jehovah, èn kon de sma di o kisi a boen-ati foe En. Disi meki den tron „manpikin foe a kownoekondre” (Mateus 13:38). Den sortoe salfoe „manpikin” disi ben bigin kisi a kari na a Pinksterfesa na ini 33 G.T. Jehovah Kotoigi e bribi langa ten kaba taki a boeweisi foe a fasi fa Gado e handri nanga en pipel e sori leki, te joe loekoe en moro finifini, taki den memre foe a hemel groepoe kisi kari kaba. Foe dati ede, den sma di leri a bijbel waarheid na ini den lasti jari kon froestan taki na okasi gi a howpoe foe têgo libi na wan paradijs grontapoe e gi na den now. Den disi kon de moro foeroe ini nomroe leki a fikapisi foe salfoe kresten di e kon moro mendri èn di abi a howpoe foe go na hemel troetroe. Lukas 13:24 no e fiti moro foeroe na den wan di no e froewakti foe go na hemel, ma troetroe a abi koni rai gi den.
Foe di a e gi wi deki-ati foe span wisrefi boen tranga, dan Jesus no ben e taki dati en noso en Tata e poti problema gi wi na pasi foe hendri wi. Ma wi e froestan foe Lukas 13:24 taki den sani di Gado e aksi foe wi de na so wan fasi taki den e poeroe den wan di no warti. „Span oensrefi boen tranga” wani taki meki foeroe moeiti, wroko nanga ala krakti di wi abi. So boen, wi ben sa kan aksi wisrefi: ’Mi e wroko nanga ala krakti di mi abi?’ Wi ben sa kan brokobroko Lukas 13:24 nanga den wortoe: ’Mi moesoe span misrefi boen tranga foe pasa a smara doro go na inisei, bika foeroe sma sa proeberi foe go na inisei, ma den no sa man. So boen, mi e span misrefi boen tranga troetroe? Mi de leki wan atleet ini den fositen stadion di e doe ala san a man foe wini a prijs? No wan sortoe atleet leki dati ben sa de sondro spirit, e teki en safrisafri. Mi e teki en safrisafri?’
Den wortoe foe Jesus e gi a prakseri taki son sma ben o kon soekoe ’foe pasa a doro foe go na inisei’ soleki fa a fiti gi den nomo, na wan makriki fasi soleki fa den e feni en boen. A sortoe fasi dati foe denki ben sa kan abi krakti tapoe wan toe aparti kotoigi. Son wan ben sa kan prakseri so: ’Mi sabi krestensma di gi densrefi na a dini foe Gado èn di ben wroko nanga ala krakti di den ben abi foeroe jari kaba, e òfer foeroe sani; tokoe, na a ten di den dede, a kaba foe na ogri seti foe sani disi no ben kon ete. So boen, kande a moro betre taki mi doe en pikinso moro safrisafri, e libi wan gewoon libi.’
A makriki foe prakseri a fasi disi, ma a de wan koni fasi troetroe? Foe eksempre, den apostel ben e prakseri so wan fasi? Kwetikweti. Den ben gi a troe anbegi ala san den ben abi — te leki den dede. Paulus, foe eksempre, ben kan taki: „Foe [Krestes] wi e gi kotoigi, . . . Foe dati ede meki mi e wroko tranga èn e span misrefi tranga akroederi a fasi fa en e wroko, èn di e wroko na ini mi nanga krakti.” Baka ten a ben skrifi: „Foe dati ede meki wi e wroko tranga èn e span wisrefi tranga, foe di wi poti wi howpoe na wan libi Gado tapoe, di de wan Froeloesoeman foe ala sortoe sma, spesroetoe foe den getrow-wan.” — Kolosesma 1:28, 29; 1 Timoteus 4:10.
Wi sabi taki Paulus ben doe a joisti sani srefisrefi foe di a ben span ensrefi tranga. Fa ibriwan foe wi sa de kolokoe efoe wi kan taki neleki Paulus ben taki: „Mi feti a heri boen feti, mi lon a streilon te na a kaba, mi hori a bribi (2 Timoteus 4:7). So boen, akroederi den wortoe foe Jesus di skrifi na Lukas 13:24, ibriwan foe wi kan aksi wisrefi: ’Mi e gi misrefi nanga faja èn de aktief doronomo? Ija, mi e gi nofo boeweisi doronomo, taki mi teki a rai foe Jesus na ati: „Span oensrefi boen tranga foe pasa a smara doro go na inisei”?’