„Span isrefi nanga ala i krakti”

„Span isrefi nanga ala i krakti foe psa a smara doro go na insé, bika foeroe sma, mi e taigi oenoe, sa proeberi foe go na inisé, ma den no sa man.” — LUKAS 13:24.

1. Pe na lostoe foe moro bigi pisi foe den sma e go?

EFOE joe ben aksi Robbie di ben abi siksi jari foe san-ede nanga ala prisiri a e go na a kownoekondrezaal, dan a sa piki: „Mi e leri foe Jehovah èn foe na paradijs pe mi kan libi boen langa nanga den meti.” A neef foe en foe dri jari, Dustin, e firi na geregeld fasi di en papa nanga mama e go na komakandra boen nofo foe sabi precies oten a moe kon nanga a wantewante babari foe en: „Wani go na kownoekondrezaal!” San Robbie kan taki èn san Dustin moe leri boen ete, de wan sani di e taki nanga foeroe sma — libi, tégo libi. Libisma wani foe kisi ferloesoe. Ma fa? Soso foe di den e go na kerki komakandra?

2. (a) Foe san-ede wan sma no kan ferdini ferloesoe? (b) Fa den wortoe foe Jezus na ini Lukas 13:24 e tjari kon na krin san de fanowdoe foe tjari ferloesoe?

² Joe no kan ferdini ferloesoe foe di joe e go na komakandra ofoe tapoe sortoe tra fasi toe. Ferloesoe no e kostoe no wan sani; a de wan presenti foe Gado. Tokoe Jehovah Gado e aksi moeiti foe wi sé efoe wi wani de ini en boen-ati foe kisi en presenti foe tégo libi (Romeini 6:23). Sortoe moeiti? Wan foe den de dati wi moe span wisrefi nanga ala krakti ini en dienst! Opregti warderi moe poesoe wi foe doe disi. Na wan séker okasi wan man ben aksi na Manpikin foe Gado, Jezus Kristus, na aksi di e kon: „Masra a de pikinso sma di e kisi ferloesoe?” A piki foe Jezus no ben de wawan gi a sma di ben aksi a sani, ma ooktoe gi ala tra sma di abi belangstelling gi ferloesoe, èn ooktoe gi wi. A ben gi leki piki: „Span isrefi nanga ala krakti foe psa na smara doro go na ini, bikasi foeroe sma, mi e taigi oenoe sa proeberi foe go na inisé, ma den no sa man.” — Lukas 13:23, 24.

3. (a) Foe san-ede na aksi di na man ben aksi ben de ongewoon? (b) Fa Jezus e tjari wi kon na ini na piki foe en?

³ Na aksi di a man di den no ben kari en nen dja ben aksi, no ben de wan gewoon aksi. A ben aksi: „A de pikinso sma di e kisi ferioesoe?” A no ben aksi: „Mi sa de a mindri den pikinso sma di sa kisi ferloesoe?” ofoe „Fa mi kan kisi ferloesoe?” Kande a ben poti na onséker aksi foe en akroederi na djoe filosofie di ben leri dati soso wan skotoe nomroe foe sma ben sa kisi ferloesoe.a San mag de ooktoe a réde foe a gridi di a ben gridi foe sabi sani, Jezus ben de es’esi foe teki na aksi poeroe foe a kontren foe abstracte theorie èn gi en wan praktis fasi na ini wan sma libi — wan fasi foe poti en ini joe libi. A dwengi a sma, di ben poti na aksi foe go denki foe san en ben moesoe doe, foe kisi ferloesoe. Ma moro de ete ini a tori foe di den wortoe foe Jezus „span isrefi nanga ala i krakti” de na ini meervoud, meki den moe gi wi tranga ooktoe foe go denki dipi foe na fasi fa wi e doe wi anbegi.

4. San wi moesoe doe foe kisi tégo libi?

⁴ Na kisi foe tégo libi de foe dat’ede no so makriki soleki son sma kande e denki. Jezus ben poti krakti na tapoe tranga wroko, tapoe moeiti di e doe dorodoro, foe „pasa ini na smara doro go na inisé”. Na moeiti disi di de na libi e kisi en krakti foe wan bribi di bow na tapoe a gi jesi na den leri foe Kristus. Foe na kisi foe ferloesoe wi moesoe doe soboen moro leki ’foe jere en wortoe’; wi moe ’doe’ den ala ten nomo. — Lukas 6:46-49; Jakobus 1:22-25.

Joe moesoe „stré wan krakti stré” now

5. (a) San den wortoe foe Jezus wani taki: „Span isrefi nanga ala i krakti”? (b) Fa den wortoe disi e gi wan moro dipi betekenis na a fasi fa joe e si sani na ini a tori foe santa dienst?

⁵ San den wortoe ’span isrefi nanga ala i krakti’ wani taki? Na ini na Griki tongo di ben gebroiki biginbigin na wortoe de a-go-ni-ze-sthe di komoto foe na wortoe (a’gon) di wani taki „Wegaterrein, presi foe feti”. The Kingdom Interlinear Translation e vertaal a wortoe disi nanga „stré”. A wan moi sani foe si dati den wortoe „stré foe no dede” ofoe „feti nanga dede” kan vertaal ooktoe nanga a wortoe di komoto foe Grikitongo „agoniseren.” Tjari kon a joe fesi soboen wan stadion foe owroeten èn loekoe fa den atleet e worstel ofoe e span densrefi srefsrefi foe wini a prijs. Aladi na Griki werkwortoe di kari djaso kan de soboen wan technische term di e sori tapoe a feti foe sma na ini den Griki pré, tokoe a e poti krakti na tapoe na vermane foe Jezus foe gi joesrefi nanga joe heri ati. Moeiti di e doe nanga toe ati no de nofo srefsrefi. — Lukas 10:27; teki gersi 1 Korinte 9:26, 27.

6. Foe san-ede wi moe span wisrefi now nanga ala wi krakti?

⁶ O langa wi moe ’stré foe psa go na ini na smara doro’? (Lukas 13:24, Nieuwe Vertaling van het Nederlands Bijbelgenootschap) Loekoe boen a tapoe den wortoe foe Jezus na ini Lukas 13:24 èn loekoe fa „span isrefi nanga ala krakti”, di poti na ini tegenwoordige tijd de abrasé foe „sa proeberi”, di de ini toekomende tijd. Foe dat’ede meki a de ooktoe now a ten foe feti nanga ala krakti. A de krin dati den sma di no mag go na inisé e proeberi foe kon na inisé tapoe wan ten di de a moro boen ten gi densrefi. Ma dan a de lati; a doro, ofoe na okasi foe go na inisé, sroto èn greni. Jeus e go moro fara foe taki na ini Lukas 13:25 dati te na masra foe na oso ben sroto na doro kaba, sma sa kon naki tapoe na doro èn begi: ’Masra opo gi wi’, ma a sa gi den leki piki: ’Mi no sabi pe oen komoto.’” Fa disi de wan sari bakapisi di e wakti den sma di no e meki now na anbegi foe Jehovah leki na moro prenspari sani na ini na libi! — Mattéus 6:33.

7. Fa Filippi 3:12-14 e sori na tapoe a moeiti di wi moe doe alaten, èn foe san-ede disi de fanowdoe?

⁷ Wi moe tan stré nanga ala krakti. No wan sma foe wi ben psa krinkrin na „smara doro” go na inisé kaba. Paulus ben de sabisabi foe disi. A strélon foe en foe a libi ben de wan faja moeiti di ben kon ibri dé baka. A ben skrifi: „No dati mi ben kisi en kaba ofoe ben tjari kon de volmaakti, ma mi e feti foe si ofoe na sani di Kristus ben graboe mi, dati mi ben mag graboe en ooktoe. Mi brada, mi no e denki foe misrefi dati mi graboe en kaba, ma wan sani de faste: Den sani di de na mi baka mi e frigiti èn mi e langa misrefi go na den sani di de a mi fesi, mi e feti baka na marki foe a prijs. foe a kari na tapoesé di Gado e meki doe kon nanga jepi foe Kristus Jezus.” ( Wi e poti strepi dja na ondro den wortoe.) — Filippi 3:12-14.

8. (a) Foe sortoe réde meki „foeroe sma” e poti na dorosé foe na tégo libi? (b) Sortoe warskow disi abi gi wi?

⁸ Soema de den „foeroe sma” èn foe san-ede den no man foe go na inisé? Den „foeroe sma” de na kristenheid, spesroetoe a klasse foe en kerki-leriman. Den e taki dati den sabi Jezus foedi foe krosbé èn de wan pisi foe en osofamiri foe di den taki dati ’den ben njan èn dringi nanga en.’ Ma foe di na tapoe den égi kondisi, èn no tapoe na kondisi foe Gado den wani kisi ferloesoe foe Gado meki Jezus e taki leti a den fesi taki a no sabi den èn a e si den leki „wrokoman foe onregtvaardikifasi” (Lukas 13:26, 27). Aparti sma di den e poti a dorosé foe no go ini na tégo libi, ben sa kan de srefi den sma di na ini na santa dienst foe den gi Jehovah e kon slap èn di now abi wan fasi foe „doe en safri-safri” ini a tori foe na troe anbegi. Na faja foe den gi na kownoekondre-afersi kon kowroe (Openbaring 3:15, 16). Kande den abi ete wan ’fasi foe gi densrefi na ini a dini foe Gado’ — wan agersi velddienst nanga go na komakandra — ma den no e sori taki den abi na sortoe foe bribi di de na troetroe poesoekrakti na baka na troe anbegi (Teki gersi 2 Timóteus 3:5.) Den no e ferstan dati soso „proeberi” foe go ini „smara doro” no de nofo. Wan sma moe stré nanga ala en krakti foe psa go ini a doro dati.

Foe san-ede foe psa go ini wan „smara doro”

9. Foe san-ede wan sma moe span ensrefi nanga ala en krakti foe psa na smara doro go na inisé?

⁹ Na smara doro foe go ini ferloesoe de opo gi ala sma. Ma den „foeroe sma” no lobi na stré di e aksi foe go na inisé. San de wantoe sani di e meki a de fanowdoe dati wan sma span ensrefi nanga ala en krakti foe psa go na ini na smara doro? Wan sma moe kisi fosi soifri sabi foe na bijbel waarheid èn leri sabi Jehovah nanga Kristus Jezus (Johannes 17:3). Disi wani taki dati wan sma moesoe trowe a wan sé den gwenti nanga doe foe grontapoe kerki, èn ooktoe di foe na kristenheid. A wani taki dati wan sma doe a wani foe Gado net soleki Jezus ben doe disi di a ben de na grontapoe dja (1 Petrus 2:21). Leki wan kristen di gi ensrefi abra èn dopoe, wan sma moe tan farawe ooktoe foe a lobi foe goedoe, foe hoeroedoe èn foe den doti libi foe a grontapoe (1 Johannes 2:15-17; Efese 5:3-5). Den doe disi moesoe poti a wan sé èn kristen égifasi moe kon na ini den presi. — Kolosse 3:9, 10, 12.

10. Sortoe kroederi de a mindri dwengi joesrefi èn a kisi foe tégo libi?

¹⁰ Den „pikinso sma” sabi o warti a de foe de nanga faja ini a diniwroko èn foe sori nanga disi na froktoe foe na jeje, pe joe abi na ini en ooktoe a dwengi foe joesrefi (Galacia 5:23). Nanga jepi foe Jehovah santa jeje den e stré wan stré nanga ala den krakti foe dwengi den skin èn foe tjari en go na a marki foe tégo libi. — 1 Korinte 9:24-27.

San den wortoe foe Jezus wani taki gi joe?

11. (a) Tapoe sortoe kontren foe na libi son sma kande moe span densrefi nanga ala den krakti èn foe san-ede? (b) Na ini sortoe wroko ala sma kan span densrefi nanga ala den krakti?

¹¹ Efoe joe dopoe njoenjoen ofoe e wroko kaba tintin jari kaba aktief nanga Jehovah organisaatsi, wi no kan kon slap na ini den moeiti foe wi foe plisi en. Soleki fa den wortoe foe Jezus e sori krin, dan nanga wi heri ati wi moe gi wisrefi na a dini foe Gado, klarklari foe psa na smara doro foe go na inisé, san dati mag kostoe oenoe ooktoe. Aladi Jezus no wawan ben taki foe kenki nanga a kon moro bigi foe wi dienst gi Gado, tokoe sonwan foe wi moe span wisrefi nanga ala krakti foe tjari kenki kon ini a waka nanga libi foe den ofoe foe libi takroe gwenti sodati ’na nowan fasi den e gi wan réde foe stotoe foetoe fadon’ (2 Korinte 6:1-4). Trawan a mindri wi moe loekoe boen alaten dati den hori densrefi na wan boen programma foe persoonlek studie sodati „a lobi foe den mag de moro foeroe psa marki nanga soifri sabi èn na koni foe si sani dorodoro” (Filippi 1:9-11). Dan trawan baka moe span densrefi moro krakti foe fisiti alaten ala gemeente komakandra, èn ooktoe na boekoestudie èn foe abi wan prati na den (Hebrewsma 10:23-25). Ma wi alamala kan poti ai na tapoe wi velddienst foe si ofoe wi e span wisrefi nanga ala. krakti troetroe foe doe „na wroko foe wan evangeliumprékiman”. — 2 Timóteus 4:5.

12. Sortoe aksi ben kan aksi foe si na ini o fara wi e span wisrefi na jeje fasi?

¹² Gi wan lo foe sma di e kon moro foeroe, dan den fasi fa den go na fesi foe span densrefi krakti foe dini Jehovah, ben meki dati den ben feni den boen foe na jepi-pionierdienst, na gewone pionierdienst, ofoe na Betheldienst. Ma fa a de nanga joe? Efoe joe de wan kownoekondre prékiman, dan joe kan wantoe lési ini wan jari foe go na ini na jepi-pionierdienst ofoe srefi tron gewone pionier? Efoe joe de jepipionier kaba, joe e feti dan na baka na gewone pionierdienst? Efoe dati no de so, foe san-ede joe no ben sa go teki dati dan na prakseri? Tapoe a fasi disi joe ben kan tesi na blesi foe kweki wan moro krosbé matifasi nanga Jehovah Gado èn Jezus Kristus. — Ps. 25:14.

Joe kan span joesrefi foe pionier?

13. (a) Sortoe toe sani de toemsi fanowdoe efoe joe wani tron pionier? (b) Tapoe sortoe kontren foe na libi kande joe moe tjari kenki kon foe pionier?

¹³ Efoe joe ben sa kan de gewone pionier ma joe no de en ete, ’joe kan stré wan krakti stré’ foe tjari kenki kon ini joe libi foe kan pionier? Toe sani de toemsi prenspari. Ini na fosi presi a lostoe foe joe moesoe go na a pionierwroko. Ini a di foe toe presi joe moe de ini den joisti omstandigheid. Efoe joe no abi na lostoe ma begi foe dati dan. Taki nanga pionier. Meki joe activiteit now leki gemeente prékiman kon moro foeroe. Go someni tron leki joe kan na ini na jepi-pionierdienst, Efoe den omstandigheid foe joe no e gi pasi dati joe go doe a dienst disi now, loekoe dan efoe kenki kan tjari kon. Wan trowman di e wroko no a foe wroko kande. Wan sma di doro den jari foe kisi pensioen, no a foe tan wroko kande. Wan hé libistandaard, diri fakansi, den moro njoen oto, nanga so moro fara, no de fanowdoe gi na libi. — Lukas 12:15; 1 Johannes 2:15-17.

14. (a) Foe san-ede wan bepaalde trowpaar no ben feni vréde na ini foe tan de gemeento prékiman? (b) Sortoe marki den ben poti na a fesi foe den pikin foe den?

¹⁴ Wan papa foe dri manpikin, foe soema toe no de tini ete, ben bigin siksi jari psa kaba foe pionier. Foe san-ede? „Mi ben wani doe moro”, a tjari kon na krin. „Efoe mi ben sa kan de gewone pionier èn mi no ben de en, dan mi no ben sa handri akroederi na gi di mi gi misrefi abra na Gado.” En oema ben go ooktoe na ini na gewone pionierdienst. Foe san-ede? „Fo jari baka makandra mi ben de na ini na jepi-pionier dienst èn te foe kaba mi ben kon ferstan taki a ben kon de makriki”, ai taki. „Mi wani abi wan prati dorodoro na a wroko disi di noiti moro sa kon baka èn gi den manpikin foe wi na joisti eksempre.” Na masra èn na wefi ben leri sabi na waarheid baka di den ben kisi leri foe wan héskoro (universiteit). „Den papa nanga mama foe wi ben aksi foe wi, dati wi ben sa go fo jari na a héskoro”, a papa ben taki. Sortoe marki den ben poti na fesi foe den manpikin foe den foe dat’ede? „Mi e meki den boi foe mi sabi dati nanga ala prisiri wi e si dati den go pionier èn a moro wéniki doe Betheldienst fo jari langa.”

15. (a) San de wantoe réde foe san-ede son sma ben span densrefi foe dini leki gewone pionier? (b) Foe sortoe réde joe ben sa wani de nanga ala prisiri na ini na foeroetendienst?

¹⁵ Now wantoe réde e kon foe san-ede trawan ben teki na bosroiti foe tron gewone pionier:

„Na jejefasi mi no ben de no wan pe èn dati ben de wan sani di ben trobi mi.” (Robert H.).

„Mi no ben de tevréde noiti foe de wan geregelde prékiman.” (Rhea H.)

„Pionierwroko gi wan richting nanga wan marki na ini mi libi.” (Hans K.)

„Mi ben wani dini Jehovah dorodoro èn pionierwroko ben de a fasi di mi ben abi foe doro a marki dati.” (Chanranjit K.)

„Mi ben sa sari efoe mi no ben sa gebroiki mi energie, krakti nanga jongoe jari foe abi wan prati na a bigi wroko disi.” (Gregory T.)

„Jehovah e blesi soso moeiti di doe. Mi ben moesoe gi en wan sani foe a kan blesi.” (Graceann T.

„Pionierwroko e jepi mi foe sori fa mi e denki foe Jehovah” (Marco P.)

„Wan grontapoe wroko foe heri dé no ben gi mi na kolokoe di mi ben si a mindri den pionier.” (Nancy P.)

Sortoe réde joe ben kan poti a tapoe foe a lijst disi?

Joe e doe ala sani san joe man?

16. Pionier de den enkri sma di e span densrefi krakti? Tjari disi kon a krin.

¹⁶ Wan lo kotoigi foe Jehovah ben ondrosoekoe opregti èn na ini begi den persooniek omstandigheid foe den èn ben si dati den e doe ala sani san den man na ini den omstandigheid foe den now. Kande joe de wan foe den. Efoe dati de so, abi dek’ati dan. Jehovah nanga en Manpikin lobi joe èn abi troetroe warderi gi na dienst di joe e gi nanga joe heri ati. (Teki gersi nanga Lukas 21:1-4.) Foe den politiek ofoe ekonomia omstandigheid di no de so boen meki son brada foe wi na ini den kondre foe eksempre e meki ibri wiki féfi ofoe siksi wrokodé foe négi joeroe, soso foe kan sorgoe foe den fanowdoe sani foe tan a libi. Na ini wan kondre pe a wroko foe Jehovah Kotoigi foe a sé foe lanti de na ondro hebi verbod, dan den sma di e pionier — èn den kondre disi e meki wi si wan nomroe foe pionier di e gro moro nanga moro — de gewoonlek sma di kisi pensioen, jongoewan di e doe den grontapoe wroko a neti èn mama (nanga pikin) di a kondre taki den no mag foe doe grontapoe wroko.

17. Fa na geval foe Epafroditus e sori dati Jehovah no e marki a fasi fa wi e span wisrefi nanga na omeni wroko di wi e doe ini en dienst?

¹⁷ Ma kande joe e taki ete: ’Mi ben sa wani de moro tranga na skinfasi. Efoe mi ben kan de jongoe baka!’ Ma no lasi ati. Den no e marki den moeiti foe wi nanga a omeni wroko di wi e doe na ini a santa dienst foe Gado. Joe e memre Epafroditus ete? Di a ben siki dan na omeni tranga moeiti di a ben man foe doe na ini „a wroko foe Masra” no ben sa man foe teki gersi nanga san a ben doe di a de gesontoe. Tokoe Paulus e prijse en foe a moeiti foe en. Te joe loekoe en leti dan, soleki Paulus e sori, ’wi moe si den sortoe foe man nanga oema dati na wan diri fasi’. — Filippi 2:25-30.

18. (a) Fa den sma di den omstandigheid foe den skotoe kan meki tokoe na foeroetendienst ini a gemeente go a fesi? (b) San joe kan doe foe gi tranga na a pionierprakseri a ini na gemeente?

¹⁸ Ma joe kan doe wan sani foe meki a foeroeten dienst na ini na gemeente go na fesi. San dan? Span joesrefi krakti foe sori na pionierprakseri ini joe aladé libi. Efoe na momenti disi foe eksempe, foe osofamiri ferplekti ede, joe no kan pionier, joe kan seti dan, dati trawan na ini na osofamiri — joe oema, joe pikin, brada ofoe sisa — kan pionier? Den sma di abi wan takroe gesontoe ofoe na trafasi malengri, kan sori opregti belangstelling gi den wan di man foe pionier, foe di so fara den omstandigheid foe den e gi pasi foe dati e go makandra nanga den na ini na velddienst. (Teki gersi nanga 1 Korinte 12:19-26.) Na tapoe a fasi disi ala sma na ini na gemeente kan span densrefi foe poti krakti tapoe na foeroeten dienst. Den bakapisi kan de wan dek’ati gi ala sma!

19. San moe de na bosroiti foe wi?

¹⁹ San a wani taki gi joe foe span joesrefi krakti? Disi wani taki dati joe e go a fesi na ini a richting foe go dopoe? Dati joe wini wan ofoe tra takroe gwenti? Dati na matifasi foe joe nanga Jehovah moe kon tranga tapoe wan ofoe tra fasi? A ben sa wani taki dati joe e feti na baka na jepipionierdienst? Na gewone pionierdienst? Na Betheldienst? San a wani taki ooktoe gi joe foe go a fesi na jejefasi, a de now ibri moeiti warti. Meki wi foe dat’ede alamala tan stré krakti foe di wi e psa na smara doro di e go na tégo libi!

[Foetoewortoe]

Punt di wi wani loekoe

◻ San Jezus ben bedoel di a ben gi na rai: „Span joesrefi krakti?”

◻ Oten èn fa den wortoe foe Jesus de a tapoe a libi foe joe?

◻ Foe san-ede den „foeroe sma” no man foe psa na smara doro go na inisé?

◻ Fa den sma foe di den omstandigheid foe den skotoe kan span densrefi?

◻ O langa wi moe stré na tapoe wan krakti fasi foe psa na smara doro foe go na inisé?