Mi ati foeroe nanga tangi
SOLEKI FA JOHN WYNN BEN FROETERI
Foeroetron mi no ben wani foe go na den konmakandra foe Jehovah Kotoigi! Mi ben doe neleki mi ben abi bere-ati noso ede-ati — iniwan sani foe no go na den konmakandra. Ma a tan di mi mama ben tan kánkan, ala ten ben meki taki den so-kari siki disi ben gowe esi-esi, èn dan tokoe mi ben sa waka den dri kilometer nanga en go na a Kownoekondre zaal, èn mi ben e arki te a ben e taki foe bijbel nanga wan moro owroe kompe.
DISI ben leri mi wan prenspari lès: Noiti papa nanga mama moesoe stòp foe de kánkan na wan lobi fasi gi den sani di boen na ini Gado ai (Odo 29:15, 17). Noiti den moesoe froegiti a froemane foe Gado foe ’no libi a kon di wi moesoe kon makandra’ (Hebrewsma 10:25). Te mi e prakseri baka foe mi libi, dan mi de grantangi srefisrefi taki mi mama ben meki mi doe san ben boen gi mi!
Tangi gi den boen eksempre
Ala di mi papa no ben de na bribi, tokoe a ben froedrage a bribi foe mi mama di mi mama ben tron wan Bijbelstudenti, soleki fa den ben kari Jehovah Kotoigi na a ten dati. Na ini 1913 mi mama ben go foe jere a lezing „Na a tra sei foe a grebi”, di Charles T. Russell, a fosi presidenti foe a Waktitoren Genootschap, ben hori. Ma a ben doro lati, èn ala stoeroe ben foeroe kaba. Foe dati ede, den ben aksi en foe sidon nanga den tra sma di ben kon lati, krosibei foe a podium, krosibei foe Pastor Russell. A lezing dati ben abi wan tranga krakti na en tapoe. A dei na baka, den ben tjari a lezing kon na doro na ini wan koranti foe a kontren, èn a ben hori wan eksemplaar foe en èn ben leisi en ibri tron baka.
Na baka a konmakandra, mama ben gi wan pisi papira nanga en nen na tapoe, èn heri esi wan Bijbelstudenti ben meki kontakti nanga en. Baka ten, a ben bigin prati bijbel traktaat oso foe oso, na ini a foto pe wi ben libi, Gloucester, na ini Ingrisikondre. Foe sensi a ten di mi nanga den toe sisa foe mi ben jongoe srefisrefi ete, wi ben abi wan prati nanga mama na ini a preikiwroko.
Di Harry Francis, wan fajafaja Bijbelstudenti, ben froisi kon na Gloucester, mama ben teki en nanga switifasi. No langa na baka, a ben sori persoonlijk belangstelling gi mi, èn a deki-ati di a ben gi mi ben de wan prenspari sani di ben meki mi tron wan pionier baka ten, soleki fa den e kari den foeroeten bedinari. Na eksempre foe brada Francis ben leri mi wan prenspari lès: Ala ten den moro owroe wan moesoe soekoe maniri foe gi den moro jongoewan deki-ati.
Di mi mama ben tron wan Bijbelstudenti, tra sma na ini Gloucester ben kon tron Bijbelstudenti toe. Ma, wan toe owroeman na ini a gemeente ben bigin denki toemoesi foeroe foe densrefi, èn den memre foe a klas — soleki fa den ben kari a gemeente na a ten dati — ben bigin waka na baka aparti sma. Na wan konmakandra, wan toe memre foe a gemeente ben poesoe mi mama na en baka foe dwengi en foe soetoe en anoe na loktoe foe gi en sten gi son owroeman. Ma mama ben sabi taki den owroeman no ben gi a joisti eksempre, èn a ben weigri foe meki sma abi krakti na en tapoe foe gi en sten gi den. Na a ten dati, pikinmoro na ini a pisi ten foe 1925 te go miti 1930, foeroe sma ben gowe foe a gemeente èn den no ben waka a pasi foe waarheid moro (2 Petrus 2:2). Tokoe noiti mama ben tapoe foe horibaka na wan loyaal fasi gi na organisâsi, èn na so fasi a ben poti wan boen eksempre gi mi.
Mi ben teki a sei foe waarheid
Te foe kaba, na ini juni 1939, di mi ben abi 18 jari, mi ben teki dopoe na ini a liba Severn. A jari dati, den ben poti mi na wroko toe leki a dinari di e sorgoe gi a geluid. Na ini a ten dati wi ben gebroiki wan bigi transcriptiemachine di ben bari na ini poebliki presi a boskopoe „Relisi na wan trapoe èn wan kroeka bisnis”. Na a ten dati, den ben poti foeroe prakseri foe poeroe a hoigrifasi èn den falsi leri foe krestenhéit kon na doro.
Wan leisi mi ben de na fesisei foe wan groepoe sma di ben e waka èn di ben e tjari spandoekoe di ben meki bekènti na wan sei „Relisi na wan trapoe èn wan kroeka bisnis” èn na a tra sei „Dini Gado nanga Krestes a Kownoe”. Wan pikin asi ben waka toe na wi baka èn a ben abi toe bigi prenki na ala toe sei na en baka, di ben meki a poeblikitaki bekènti. A ben moesoe de wan sani foe si a groepoe sma dati e waka na ini a kefalek relisi foto Gloucester!
Ala di wi ben abi moni problema na oso, tokoe mama ben gi mi deki-ati foe tron wan pionier. So boen, na ini september 1939, na a bigin foe a di foe Toe Grontapoefeti, mi ben doro na mi fosi pionier toewijzing na ini Leamington, wan pikin foto na ini Warwickshire. A foto ben de na oso foe wan toe kerki tiriman di ben de nanga pensjoen.
Wi ben gebroiki wan lekti grammafoon na ini wi oso-foe-oso diniwroko, ala di wi ben drai den lezing foe Joseph F. Rutherford, di ben de presidenti foe a Watch Tower Bible and Tract Society na a ten dati. Kontrari foe dati, a transcriptiemachine foe wi (di wi ben kan gebroiki gi moro bigi poebliki) ben moro hebi, èn wi ben tjari en na ini wan beibiwagi. Son tron den kerki tiriman ben jagi wi gowe foe den djari foe den, foe di den ben atibron na tapoe a boskopoe di ben poeroe a falsi relisi kon na doro. Ma wi no ben lasi-ati. Jehovah ben blesi wi wroko, èn na ini a ten disi wan gemeente di abi moro leki wán hondro Kotoigi, de na ini Leamington.
Na ini 1941, ala di a di foe Toe Grontapoefeti ben e rigeri, mi ben froisi go na Wales, pe mi ben pionier na ini den foto Haverfordwest, Carmarthen, nanga Wrexham. Leki wan foeroeten bedinari, mi ben kisi primisi foe no doe sroedati wroko, ma sma no ben froestan foe san ede wi ben de neutraal. Foe dati ede, den ben kragi mi nanga mi patna taki wi ben de spion noso memre foe wan sikrit groepoe di ben horibaka gi a feanti. Wan neti, skowtoe ben lontoe a wagi foe wi pe wi ben tan na ini. Mi patna, di didjonsro ben komoto na wroko pe a e poeroe ston-krofaja, ben soetoe en ede go na doro foe si soema ben de drape. En fesi ben lai nanga fini ston-krofaja, èn a ben gersi gi den skowtoe taki a ben de klariklari foe go feti wan komando feti. Wi ben moesoe tjari sani kon na krin gi den!
Wi ben kisi foeroe blesi na ini den toewijzing foe wi. Wan leisi di wi ben de na ini Carmarthen, John Barr foe a bijkantoro na ini Londen (now a de wan memre foe a Tiri Skin) ben fisiti wi èn ben gi wi deki-ati. Na a ten dati, soso toe preikiman ben de na ini Carmarthen; nownowde moro leki wán hondro de. Nownow, Wrexham abi dri gemeente, èn no so langa pasa mi ben abi a grani foe gi wan moi Kownoekondre zaal na ini Haverfordwest abra na Jehovah. — 1 Korentesma 3:6.
Mi de tangi foe mi diniwroko
Ala di wi ben de na ini Swansea, Zuid-Wales, mi patna, Don Rendell, no ben kisi primisi foe no doe sroedati wroko. Den ben poti en na strafoe-oso ala di a ben tjari kon na krin taki foe en konsensi ede, a no ben man go na orlokoe foe go feti teige kompe kresten na ini tra kondre (Jesaja 2:2-4; Johanes 13:34, 35). Foe gi en deki-ati, èn so srefi foe gi den birtisma kotoigi, mi ben poti a transcriptiemachine krosibei foe a strafoe-oso èn ben drai bijbel lezing.
Ma wan toe oema na ini a birti no ben lobi disi èn den ben go teki kolekte foe pai den sroedati meki den fon mi nanga mi kompe. Wi ben gowe, èn ben lon so esi leki wi man — mi ben poesoe so srefi a beibiwagi nanga a transcriptiemachine na ini — foe go kibri na ini a Kownoekondre zaal. Ma di wi ben doro drape, a ben sroto! Na soso foe di skowtoe ben kon biten na ini a tori, meki dati ben fri wi foe wan serjoesoe fonfon.
Soleki fa a sori, foeroe sma ben kon sabi a sani disi di ben pasa. Di mi ben e preiki na ini boitipresi krosibei foe Swansea, wan pisi ten na baka dati, wan man ben taigi mi na wan boen fasi: „Oenoe e opo taki gi a krestendom, neleki a jonkoeman na ini Swansea di ben meki bekènti sondro frede san a ben bribi èn di ben moesoe lon foe soekoe kibri.” A ben froewondroe srefisrefi di a ben kon sabi taki mi ben de a jonkoeman dati!
A no ben makriki foe pionier na ini den jari dati foe na orlokoe. Wi no ben abi foeroe grontapoe goedoe, ma wi ben warderi èn ben njan boen foe den sani di wi ben abi. Ala ten wi ben kisi jeje njanjan doronomo, èn noiti wi ben misi wan konmakandra, boiti te wi ben siki. Mi ben bai wan owroe baisigri, èn wi ben poti bigi baskita na en tapoe foe kan tjari wan grammafoon èn so srefi bijbel poeblikâsi. Son tron mi ben rèis 80 kilometer na ini wán dei na tapoe baisigri! Mi ben pionier pikinmoro seibi jari langa èn nanga prisiri mi e memre den dei dati baka.
Na ini 1946, na baka di a di foe Toe Grontapoefeti ben kaba, mi ben kisi wan kari foe wroko na Bethel, soleki fa den ben kari den prenspari gebow foe Jehovah Kotoigi na ini den kondre pe den ben de. Na a ten dati, a Bethel foe wi ben de na 34 Craven Terrace, na sei a London Tabernacle. Mi ben lobi foe abi demakandra nanga den owroewan drape, soleki Alice Hart, di sma e denki taki en papa, Tom Hart, ben de a fosi Kotoigi na ini Ingrisikondre.
Kisi wan getrow kompe
Na ini 1956 mi ben gowe foe Bethel foe trow nanga Etty, wan pionier di mi ben kon sabi boen di a ben kon foe Bakrakondre foe fisiti en sisa di ben libi na ini Londen na a ten dati. Pikinmoro na a kaba foe na orlokoe, Etty ben leri sma foe skrifi nanga wan typmasjin èn stenografie na wan bisnis skoro na ini Tilburg, na a zuidsei foe Bakrakondre. Wan dei, wan tra man di ben gi leri toe, ben aksi en foe rèi nanga en na tapoe baisigri go na oso so taki a ben kan de seiker taki a doro boen na oso. A ben de wan Lomsoe. Di den ben doro, wan takimakandra ben bigin nanga a Protestant papa nanga mama foe Etty. Wan matifasi ben bigin, èn a leriman ben fisiti den doronomo na oso.
No langa na baka di na orlokoe ben kaba, a leriman disi ben kon na a oso foe Etty, e bari: „Mi feni a waarheid!”
„Mi ben prakseri taki joe ben taigi wi taki joe ben abi a waarheid di joe ben de wan Lomsoe!”, a papa foe Etty ben piki.
„Nôno!” a ben piki fajafaja. „Na Jehovah Kotoigi abi a waarheid!”
Wi ben gebroiki a neti dati èn foeroe tra neti na baka dati, foe abi serjoesoe bijbel takimakandra. No langa na baka, Etty ben tron wan pionier. Na ini en diniwroko a ben miti nanga ogri gens toe, di ben kon foe a Lomsoe Kerki na ini Bakrakondre. Pikin-nengre, di den priester ben soetoe faja gi, ben sa broeja den takimakandra foe en te a ben e go oso foe oso, èn na ini wán kefal den ben broko en baisigri. A ben tjari en baisigri go na wan monteur di ben teki wan brochure foe en na fesi. „Loekoe san den pikin-nengre doe!” a ben taki nanga watra-ai.
„We, no gi abra”, a man ben piki na wan switi fasi. „Joe e doe wan boen wroko. Mi sa meki joe baisigri sondro taki joe abi foe pai.” Èn a ben doe dati toe.
Etty ben kon si taki den priester no ben broko den ede nanga den ipi foe den, te na a ten di a ben bigin studeri bijbel nanga den sma. Dan den priester nanga den non ben sa kon loekoe foe swaki a bribi di den sma ben abi na ini bijbel èn na ini Jehovah. Ala di disi ben pasa, tokoe a ben abi foeroe boen bijbelstudie.
Tangi gi a libi foe wi makandra
Na baka a trow foe wi, Etty nanga mi ben kisi a toewijzing foe doe rèis wroko na ini Ingrisikondre, èn pikinmoro feifi jari langa wi ben fisiti den gemeente foe tranga den na jejefasi. Ne mi ben kisi wan kari foe fisiti a di foe 36 klas foe Gilead, di ben hori na a edekantoro foe Jehovah Kotoigi foe heri grontapoe, na ini Brooklyn, New York. A skoro di ben tan tin moen langa, di ben kaba na ini november 1961, ben seti spesroetoe foe meki mansma kan doe wroko na ini den bijkantoro foe Jehovah Kotoigi. Ala di mi no ben de, Etty ben tan na ini Ingrisikondre na a Bethel foe Londen. Na baka di mi ben klari a skoro nanga boen bakapisi, wi ala toe ben kisi a toewijzing drape na Bethel.
Na ini den 16 jari na baka dati, mi ben wroko na a dienst afdeling, èn ben e seti afersi di abi foe doe nanga den wroko foe den gemeente. Dan, na ini 1978, di a Bethel opziener, Pryce Hughes, dede, den ben poti mi na wroko na ini en presi. Foe de frantiwortoe gi a boen foe den memre foe wi Bethelfamiri di e gro — wi abi moro leki 260 memre na ini wi famiri now — na wan toewijzing di ben gi winimarki na ini den foeroe jari disi.
Na ini 1971 mi lobi mama dede di a ben abi 85 jari. Etty nanga mi ben go baka na Gloucester gi a beri, pe wan brada ben taki na wan moi fasi foe a howpoe di mi mama ben abi foe go na hemel (Filipisma 3:14). Mi de tangi gi a lobi sorgoe di den sisa foe mi, Doris nanga Grace, ben gi mi mama di a ben owroe, èn dati ben meki taki Etty nanga mi ben man tan go doro na ini a foeroeten diniwroko.
Foeroetron Etty nanga mi e prakseri foe wi papa nanga mama èn fa den ben kweki wi na so wan lobi èn strak fasi. Wi abi wan kefalek bigi paiman na den! Spesroetoe mi mama ben de wan heri moi eksempre gi mi nanga den sisa foe mi, foe di a ben bow warderi na ini wi gi Jehovah èn en organisâsi.
Ija, wi ati e foeroe nanga tangi te wi e prakseri foe ibri njoen dei di wi abi foe dini wi hemel Tata, Jehovah. A de wan kefalek boen lobi Gado! A psalm skrifiman foe bijbel, ben taki fa wi e firi di a ben skrifi: „Mi sa hei joe, o mi Gado a Kownoe, èn mi sa blesi joe nen te ten di no skotoe, ija, foe têgo. Heri dei mi sa blesi joe, èn mi sa prèise joe nen te ten di no skotoe, ija, foe têgo.” — Psalm 145:1, 2.
[Prenki na tapoe bladzijde 26]
Nanga mi wefi, Etty