Gado e wroko na wan „kron” fasi?

„DEUS ESCREVE CERTO POR LINHAS TORTAS” („GADO E SKRIFI soifri ala di a e gebroiki kron lin”) na wan odo na ini Brasjonkondre. A wani taki dati ala ten Gado e doe reti sani, ma sontron a e doe dati na wan fasi di no sori boen na libisma ai. Foe eksempre, te wan sma de na ini a moro boen pisi ten foe en libi èn dede, dan foeroe sma e taki ’Gado kari en kon na hemel’. Efoe wan sma malengri na skin fasi noso miti wan rampoe, dan son sma e taki ’Na Gado wani’. Foe di sma e gi Gado a fowtoe te sma dede, te den abi problema na skin fasi, noso tra sani pasa nanga den di e gi sari, meki den sani disi di sma e taki, wani taki dati Gado ’e skrifi kron’, taki a e doe sani na wan fasi di libisma no man froestan.

Foe san ede foeroe kerki sma e bribi taki Gado na a sma di e tjari dede nanga problema kon? Den bribi disi gron foeroetron na tapoe wan fowtoe fasi fa sma e froestan wan toe aparti Bijbeltekst. Meki wi go loekoe wan toe foe den sjatoe.

● „Soema e gi a babaw-wan, noso a dofoewan, noso a wan di e si krin, noso a wan di breni? A no mi, Jehovah?” — Exodus 4:11.

Disi wani taki dati na Gado abi a fowtoe foe ala den sma di malengri? Nôno. Disi no ben o de akroederi a fasi fa Gado de. Bijbel e taigi wi: „Ibri kriatoeroe foe Gado boen srefisrefi” (1 Timoteus 4:4). A no en abi a fowtoe te wan sma gebore breni, babaw, noso dofoe. A wani soso boen sani gi den kriatoeroe foe en, bika na foe En „ibri boen presenti nanga ibri volmaakti kado” e kon. — Jakobus 1:17.

A ben de a fosi papa nanga mama foe wi, Adam nanga Eva, di foe di densrefi ben wani oproeroe teige Gado, meki den ben lasi a volmaaktifasi foe den èn den no ben man meki volmaakti pikin moro (Genesis 3:1-6, 16, 19; Job 14:4). Di den bakapikin foe den ben e trow èn ben e kisi pikin, dan moro nanga moro onvolmaaktifasi, so srefi a malengri di sma kon malengri na skin sei, ben bigin de foe si na libisma. Ala di a no Jehovah Gado ben meki den sani disi pasa, tokoe a gi pasi meki den feni presi. Foe dati ede a ben kan taki dati na ensrefi ’e gi’ a babaw-wan, a dofoewan, nanga a breniwan.

● „A sani di meki kon kron, no kan meki kon reti baka.” — Preikiman 1:15.

Na Gado ben meki den sani kron? Kwetikweti. Preikiman 7:29 e taki: „Gado ben meki libisma opregti, ma densrefi meki den eigi plan.” A Contemporary English Version e froeklari a tekst disi so: „Wi ben eerlijk dorodoro di Gado ben kria wi, ma now wi abi kron froestan.” Na presi foe teki den regtfardiki markitiki foe Gado, dan moro foeroe man nanga oema, foe espresi teki a bosroiti foe handri akroederi den eigi plan, den eigi triki denki, den eigi taktik, noso den eigi fasi foe doe sani — nanga takroe bakapisi gi densrefi. — 1 Timoteus 2:14.

So srefi, soleki fa na apostel Paulus ben taki, a ben de bika foe a sondoe foe libisma taki „den kriatoeroe ben kon na ondro soso sani” (Romesma 8:20). Èn libisma „no kan meki [a situwâsi disi] kon reti baka”. Gado wawan kan poeroe ala kroektoedoe èn ala den soso sani foe grontapoe.

● „Loekoe a wroko foe a troe Gado, bika soema man meki den sani di a meki kron, kon reti baka?” — Preikiman 7:13.

Nanga tra wortoe, Kownoe Salomo e aksi: ’Sortoe libisma kan meki den mankeri nanga den onvolmaaktifasi di Gado e gi pasi foe dati, kon reti baka?’ No wan sma, bika Jehovah Gado abi wan reide foe san ede a e gi pasi meki den sani disi e feni presi.

Foe dati ede Salomo e rikomanderi: „Firi boen tapoe wan boen dei, èn loekoe tapoe wan takroe dei taki a troe Gado meki disi srefi neleki a wan dati, so taki libisma no man feni noti kwetikweti na baka den” (Preikiman 7:14). Wan sma moesoe warderi wan dei te sani e go boen gi en èn a moesoe sori warderi foe di ensrefi e doe boen sani. A moesoe si wan boen dei leki wan presenti foe Gado. Ma fa a de te a dei e tjari rampoe kon? Wan sma ben sa doe boen foe „si”, dati wani taki, foe froestan, taki Gado gi pasi meki rampoe feni presi. Foe san ede a doe dati? Salomo e taki: „So taki libisma no man feni noti na baka den.” San disi wani taki?

Foe di Gado e gi pasi meki wi ondrofeni prisiri èn so srefi problema, meki dati e memre wi taki wi no man taki fa a tamara sa de. Rampoe kan miti a regtfardikiwan èn so srefi a godelowsoewan. A e miti ala sma. Disi moesoe meki wi froestan o prenspari a de foe no froetrow tapoe wisrefi, ma tapoe Gado, ala di wi e hori na prakseri taki „Gado na lobi” (1 Johanes 4:8). Ala di kande wi no e froestan wan toe sani nownow, tokoe wi kan de seiker taki baka te ala sani doe kaba, dan den sani di Gado gi pasi meki den feni presi, sa tjari boen gi ala sma te foe kaba di abi foe doe nanga a tori.

Awansi san a e gi pasi foe de, tokoe noiti den sani dati sa doe den reti-atisma ogri foe têgo. Na apostel Petrus ben tjari disi kon na krin di a ben taki wan sani foe a pina di ben kon na tapoe en kompebribiman na ini a ten foe en: „Baka di oenoe pina wan sjatoe pisi ten, dan a Gado foe ala no-froedini boen-ati, di ben kari oenoe kon na ini en têgo glori ini wánfasi nanga Krestes, ensrefi sa tjari a leri di oenoe kisi kon na wan kaba, a sa meki oenoe kon de kánkan, a sa meki oenoe kon de tranga.” — 1 Petrus 5:10.

A ten foe poti sani kon reti

Jehovah e gi wi krakti foe horidoro na ondro den tesi foe wi na ini a ten disi. A e pramisi so srefi foe meki „ala sani kon njoen” (Openbaring 21:5). Ija, a de a prakseri foe en taki heri esi en hemel Kownoekondre sa meki den sma di malengri kon gosontoe baka, èn a sa tiri na opo di den dedewan sa opo baka. A tirimakti dati sa pori so srefi a sma di en pasi kron — Satan Didibri (Johanes 5:28, 29; Romesma 16:20; 1 Korentesma 15:26; 2 Petrus 3:13). Dati sa de wan blesi troetroe gi den sma na heri grontapoe di abi frede gi Gado, te a ten foe Gado doro foe poti sani kon reti!

[Sma di abi a reti foe a prenki na tapoe bladzijde 28]

Di Job ben e jeri foe den rampoe di ben miti en/The Doré Bible Illustrations/Dover Publications