Jehovah en organisâsi e horibaka gi joe diniwroko
„Mi ben si wan tra engel e frei na mindrisei foe hemel, èn a ben abi têgo boen njoensoe foe meki bekènti leki prisiri njoensoe.” — OPENBARING 14:6.
1. Fa Jehovah Kotoigi kisi tesi, èn foe san ede den ben man go doro na ondro dati?
FOE san ede a de so prenspari foe kon si a ròl di Jehovah en hemel organisâsi e plèi na ini a hori di a e horibaka gi a kresten diniwroko? We, Jehovah Kotoigi ben sa man doe a preiki foe a boen njoensoe foe a Kownoekondre foe Gado na heri grontapoe sondro a horibaka di den kisi foe Jehovah en hemel legre? Jehovah Kotoigi doe a preikiwroko dati na ini wan jarihondro foe troetroe nationalisme, politiek sistema di abi ala makti, grontapoefeti nanga difrenti problema di den e miti. Den Kotoigi ben sa man go doro sondro a jepi foe Jehovah na ini a kroetoe di sma e kroetoe den sondro reide na ini foeroe kondre, a desko di sma e desko den èn a froefolgoe di sma e froefolgoe den foeroetron na wan ogri-ati fasi? — Psalm 34:7.
A man di den ben man go doro ala di na ala sei den kisi gens
2. Sortoe srefi sortoe sani den troe kresten foe a fosi jarihondro ben e ondrofeni neleki den di foe a ten disi?
2 Na ini a di foe 20 jarihondro disi, feanti na relisi sei èn na politiek sei poti ibri sortoe sani na pasi foe hendri den, na a sei foe wet èn na tra fasi foe proeberi foe tapoe a wroko foe Jehovah. Kresten brada nanga sisa ondrofeni froefolgoe, sma taki sani teige den, den kragi èn lei gi den na wan ogri-ati fasi — den kiri srefi foeroe foe den — foeroetron, foe a soetoe di den kerki tiriman foe Babilon a Bigiwan e soetoe faja gi den. Wi kan taki, neleki ini a kefal foe den fositen kresten, dati „foe troe, foe a sekte disi wi kon sabi taki na ala presi sma e taki sani teige den”. Neleki fa den djoe kerki tiriman foe a ten foe Krestes ben kiri densrefi foe taki en so, foe stòp a diniwroko foe en, na so den kerki tiriman nanga den sma di fadon komoto na bribi, makandra nanga den politiek freiri foe den, proeberi foe stòp a bigi kotoigi leriwroko foe Jehovah en pipel. — Tori foe den Apostel 28:22; Mateus 26:59, 65-67.
3. San wi kan leri foe a soifri retifasi foe Henryka Żur?
3 Loekoe leki wan eksempre san ben pasa na Polen tapoe 1 maart l946. Henryka Żur, wan Kotoigi meisje di abi 15 jari èn di ben libi krosibei foe Chełm, ben e waka nanga wan tra Kotoigi, wan brada, foe fisiti sma di abi belangstelling na ini wan krosibei dorpoe. Memre foe wan katolik sroedati groepoe di den ben kari Narodowe Siły Zbrojne (Nationaal Sroedati Legre), ben graboe den. Den ben fon a brada srefisrefi, ma a ben libi pasa. A no ben waka so nanga Henryka. Den ben gi en hebi skin-ati na wan ogri-ati fasi foeroe joeroe langa ala di den ben e proeberi foe dwengi en foe a meki a katolik marki foe a kroisi. Wan foe den man di ben gi en skin-ati ben taki: „Na inisei joe kan denki san joe wani, ma meki a katolik marki foe a kroisi nomo. Noso wan koegroe e wakti joe!” A ben kon swaki ini en soifri retifasi? Nôno. Den relisi fredeman ben srepi en go ini wan boesi krosibei drape èn den ben soetoe en kiri. Tokoe, en ben wini! Den no ben man broko en soifri retifasi.a — Romesma 8:35-39.
4. Fa politik nanga relisi elementi proeberi foe meki wan kaba kon na a Kownoekondre preikiwroko?
4 Moro leki wan hondro jari den handri nanga den disiten foetoeboi foe Gado na wan grofoe fasi èn sondro lespeki. Foe di Jehovah Kotoigi no de èn den no wani de wan pisi foe den relisi foe Satan di moro foeroe sma e horibaka gi, meki den e si den leki wan boen prooi gi iniwan sma di wani kroetoe den nanga partèifasi na prakseri noso gi iniwan fanatiek gensman. Na wan faja bita-ati fasi den politiek groepoe doe ogri nanga den. Foeroe Kotoigi kisi hebi skin-ati foe a bribi foe den ede. Srefi den sokari demokrâsia tiri proeberi foe tapoe a preikiwroko foe a boen njoensoe. Te so fara leki na ini 1917 na Canada nanga Amerkankondre, den kerki tiriman ben soetoe faja gi den kragi taki den Bijbel Studenti, soleki fa den ben sabi den Kotoigi na a ten dati, e proeberi foe broko a tirimakti. Den brada di ben tiri a wroko foe a Waktitoren Genootschap ben poti na strafoe-oso ma baka ten den ben krin den dorodoro foe den falsi kragi di den ben kisi. — Openbaring 11:7-9; 12:17.
5. Sortoe wortoe dini leki wan deki-ati gi den foetoeboi foe Jehovah?
5 Satan gebroiki ala wrokosani di a abi foe proeberi foe tapoe a kotoigiwroko foe den brada foe Krestes nanga den getrow kompe foe den. Tokoe, soleki fa so foeroe ondrofenitori e sori, no wan sani di sma taki foe tapoe skreki gi den, no wan ogri di e doe nanga tranga na skinfasi, no wan doengroe-oso, no wan strafoeman kampoe èn srefi a kiri di den kiri den, no ben man tapoe a mofo foe Jehovah Kotoigi. Èn na so sani ben waka na ini a heri historia. Ibritron baka, den wortoe foe Elisa gi den deki-ati: „No frede, bika moro de di de nanga wi leki den wan di de nanga den.” Wan reide de taki a nomroe foe getrow engel bigi moro leki den legre foe Didibri! — 2 Kownoe 6:16; Tori foe den Apostel 5:27-32, 41, 42.
Jehovah e blesi faja preikiwroko
6, 7. (a) Sortoe moeiti ben doe froekoefroekoe foe preiki a boen njoensoe? (b) Sortoe kenki di ben wroko boen, ben feni presi foe bigin nanga 1943?
6 Na ini a heri 20 jarihondro, Jehovah Kotoigi gebroiki foeroe sani foe a technologie di e go boen na fesi, so taki den kan meki a bigi wroko foe gi kotoigi kan jere moro tranga èn go na fesi moro esi bifo a kaba e kon. Na ini 1914, Pastor Russell, a fosi presidenti foe a Waktitoren Bijbel èn Traktaat Genootschap, ben meki a fosi gebroiki foe den a-troesoe-gi nanga felem di e boeweigi, go na fesi, èn di na a srefi ten ben abi wortoe di gron tapoe bijbel di ben de foe jere tapoe grammofoonplaat, ini wan bijbel felem foe aiti joeroe langa di den ben kari a „Photo-Drama der Schepping”. A ben froewondroe a poebliki na ini foeroe kondre na ini a ten dati. Baka ten, na ini jari l930 te nanga l949 sma ben kon sabi den Kotoigi foe na oso-foe-oso preikiwroko foe den nanga grammofoon di joe ben kan tjari nanga anoe, di den ben gebroiki grammofoonplaat foe bijbel-lezing foe J.F. Rutherford, a di foe toe presidenti foe a Genootschap.
7 Na ini 1943 den ben teki wan deki-ati bosroiti na ondro a tiri foe Nathan. H. Knorr, a di foe dri presidenti foe a Genootschap, di den ben bosroiti foe opo wan skoro gi preikiman ini ibri gemeente. Den Kotoigi ben o kisi leri foe preiki èn gi leri oso foe oso sondro a gebroiki foe a grammofoonplaat. Sensi a ten dati, dan tra skoro orga foe gi leri na zendeling, foeroeten pionierbedinari, gemeente owroeman èn opziener di abi frantiwortoe na ini den bijkantoro foe a Waktitoren Genootschap. San na a bakapisi?
8. Fa Kotoigi ben sori tranga bribi na ini 1943?
8 Na ini 1943, na a mindri foe a di foe Toe Grontapoefeti, 129.000 Kotoigi nomo ben e wroko fajafaja ini 54 kondre. Tokoe, den ben abi bribi nanga overtoigi taki Mateus 24:14 ben o kon troe bifo a kaba ben kon. Den ben abi a fasti overtoigi taki Jehovah ben o meki sma bariwroko gi a prenspari warskow boskopoe bifo ala den sani di ben o pasa a wan baka a trawan ben o tjari wan kaba kon na a kroeka seti foe sani disi (Mateus 24:21; Openbaring 16:16; 19:11-16, 19-21; 20:1-3). A moeiti foe den ben abi boen bakapisi?
9. Sortoe troe tori e sori taki a Kotoigiwroko e go boen?
9 Na ini a ten disi pikinmoro 13 kondre de di ibriwan foe den abi moro leki 100.000 fajafaja Kotoigi. Foeroe foe den na kondre pe moro foeroe sma na foe a Katolik Kerki. Tokoe, loekoe a situwâsi. Brasjonkondre abi so wan 450.000 preikiman foe a boen njoensoe, èn moro leki 1.200.000 sma ben fisiti a Memrefesa foe a dede foe Krestes na ini 1997. Meksikow na wan tra eksempre, nanga pikinmoro 500.000 Kotoigi èn moro leki 1.600.000 sma na a Memrefesa. Tra Katolik kondre na Italia (so wan 225.000 Kotoigi), Fransikondre (so wan 125.000) Spanjorokondre (moro leki 105.000), nanga Argentinia (moro leki 115.000). Na Amerkankondre, pe den Protestant, Katolik nanga den Djoe relisi abi moro foeroe sma, so wan 975.000 Kotoigi de èn moro leki 2.000.000 ben fisiti a Memrefesa. Foe troe, bigi ipi sma e komoto na Babilon a Bigiwan, a grontapoemakti foe falsi relisi nanga en dangra leri èn den e drai kon na den makriki èn seiker pramisi foe „njoen hemel nanga wan njoen grontapoe”. — 2 Petrus 3:13; Jesaja 2:3, 4; 65:17; Openbaring 18:4, 5; 21:1-4.
Fiti densrefi na den sani di sma abi fanowdoe
10. Fa situwâsi kon kenki na ini son presi?
10 Foeroe foe den sma di drai kon na Jehovah nanga jepi foe Krestes Jesus, den ben miti den oso foe oso (Johanes 3:16; Tori foe den Apostel 20:20). Ma den gebroiki tra fasi. Situwâsi kenki èn ekonomia situwâsi kon de so taki foeroe oemasma e wroko now na doro. Nofotron, na wiki dei, wan toe sma nomo de foe feni na oso. So boen, Jehovah Kotoigi fiti densrefi na a situwâsi. Neleki Jesus nanga den fosi disipel, den e go pe den kan feni sma èn na a ten di den kan miti den. — Mateus 5:1, 2; 9:35; Markus 6:34; 10:1; Tori foe den Apostel 2:14; 17:16, 17.
11. Pe Jehovah Kotoigi e preiki na ini a ten disi, èn nanga sortoe bakapisi?
11 Jehovah Kotoigi e bigin doe wan sani densrefi èn na wan koni fasi den e preiki gi sma na bigi parkeerpresi, winkelcentrum, fabriki, kantoro nanga bisnispresi, skoro, skowtoe kantoro, pompstation, hotel nanga restaurant èn na strati. Te joe loekoe en boen, dan den e preiki na ala presi pe den kan feni sma. Èn te sma de na oso, dan den Kotoigi e tan go fisiti den drape na den oso. A praktis fasi disi foe go taki nanga sma, ala di wi e fiti wisrefi na a situwâsi foe den abi leki bakapisi taki moro bijbel poeblikâsi e prati. Wi e feni sma di wi kan agersi nanga skapoe. Njoen bijbelstudie e bigin. Moro leki feifi nanga afoe miljoen friwani preikiman e doe fajafaja a moro bigi leriwroko foe a libisma historia! Joe abi a grani foe de wan foe den? — 2 Korentesma 2:14-17; 3:5, 6.
San e boeweigi Jehovah Kotoigi?
12. (a) Fa Jehovah e gi en pipel leri? (b) Sortoe bakapisi a leri disi abi?
12 Sortoe ròl a hemel organisâsi e plèi ini ala den sani disi? Jesaja ben profeteri: „Ala den manpikin foe joe sa de sma di Jehovah gi leri, èn a vrede foe den manpikin foe joe sa de pasa marki” (Jesaja 54:13). Jehovah e leri a bradafasi disi di de na ini wánfasi na heri grontapoe nanga jepi foe en organisâsi di ai kan si na grontapoe — na den Kownoekondre zaal, na den kongres èn na den bigi konmakandra. Wánfasi nanga vrede na a bakapisi. A leri foe Jehovah meki wan aparti sortoe pipel, di kisi leri foe lobi makandra èn den sma na den sei leki densrefi, èn no foe no wani si den sma na den sei na ai, awansi pe den e libi na a grontapoe disi di e tjari prati kon èn di prati toe. — Mateus 22:36-40.
13. Fa wi kan de seiker taki a tiri foe engel abi foe doe nanga a preikiwroko?
13 Lobi e boeweigi Jehovah Kotoigi foe go doro nanga a preikiwroko, awansi den e ondrofeni mi-no-ke fasi noso gens (1 Korentesma 13:1-8). Den sabi taki a wroko foe den di e kibri libi e kisi tiri foe hemel, soleki fa Openbaring 14:6 e taki. San na a boskopoe di den e bariwroko gi na ondro a tiri foe engel? „Frede Gado èn gi en glori, bika a joeroe doro te a sa tjari kroetoe kon, èn foe dati ede, anbegi a Sma di ben meki hemel nanga grontapoe nanga se nanga den watra fonten.” A preiki di sma e preiki a boen njoensoe foe a Kownoekondre e hei a nen foe Jehovah. Sma e kisi a kari foe gi a Kriaman, Gado, glori, èn no den kriatoeroe èn na evolutieleri di de wan kibritori. Èn foe san ede a preikiwroko de so tranga fanowdoe? Foe di a joeroe foe kroetoe doro — a kroetoe teigi Babilon a Bigiwan èn ala tra pisi foe a seti foe sani foe Satan di ai kan si. — Openbaring 14:7; 18:8-10.
14. Soema toe de na ini a bigi leriwroko disi?
14 No wan kresten di gi ensrefi abra na Gado de fri foe a preikiwroko disi. Owroeman di abi jejefasi e teki fesi na ini a preikiwroko makandra nanga a gemeente. Pionier di kisi boen leri e doe a wroko foeroeten. Fajafaja preikiman foe a kownoekondre boskopoe, efoe den kan preiki wan toe joeroe nomo noso foeroe joeroe wan moen, e panja a boskopoe na ibri oekoe foe grontapoe. — Mateus 28:19, 20; Hebrewsma 13:7, 17.
15. San na wan sani di e sori taki a preikiwroko foe Jehovah Kotoigi abi krakti na tapoe sma?
15 Ala den moeiti disi abi krakti na tapoe grontapoe? Wan makriki boeweisi taki a abi krakti na en tapoe na den foeroetron di Jehovah Kotoigi e hari sma prakseri na ini TV programa èn na ini njoensoe koranti. Nofotron den e poti krakti na tapoe a fasti bosroiti foe wi èn a doro di wi wani doro ibriwan sma. Ija, a faja foe wi èn wi doronomo denoja e hari a prakseri foe den awansi a moro bigi pisi foe sma e weigri foe arki a boskopoe nanga den boskopoeman.
A faja foe wi foe kaba a kotoigiwroko
16. Sortoe fasi foe denki wi moesoe abi now na ini a sjatoe ten di tan abra?
16 Wi no sabi omeni ten libi abra gi a seti foe sani disi, ma wi no abi foe sabi dati toe so langa leki a reide foe san ede wi e dini Gado de soifri (Mateus 24:36; 1 Korentesma 13:1-3). Ma wi sabi foe troe taki, bifo Jehovah kan sori a lobi, a makti nanga a retidoe foe en, dan a boen njoensoe moesoe preiki „fosi” (Markus 13:10). Foe dati ede, awansi omeni jari wi wakti kande nanga bigi froewakti tapoe a kaba foe na ogri, onregtfardiki, ogri-ati grontapoe disi, tokoe na wan faja fasi, wi moesoe handri akroederi a gi di wi gi wisrefi abra na Gado akroederi a situwâsi foe wi. A kan taki wi kon owroe noso siki, ma tokoe wi kan dini Jehovah nanga a faja di wi ben abi di wi ben moro jongoe èn di wi gosontoe ben moro boen. Kande wi no man pasa someni ten moro na ini a diniwroko leki fa wi ben doe bifo, ma wi kan tan tjari a srefi srakti-ofrandi foe prèise gi Jehovah. — Hebrewsma 13:15.
17. Froeteri foe wan ondrofenitori di e gi deki-ati, di ben sa kan jepi wi alamala.
17 Foe dati ede, awansi wi jongoe noso owroe, meki wi sori fajafasi èn prati a positief njoen grontapoe boskopoe nanga ala sma di wi e miti. Meki wi de leki a meisje di ben abi seibi jari èn di ben e sjensjen, di ben go nanga en mama na wenkri na Australia. Na a Kownoekondre zaal a ben jere o prenspari a de taki wi alamala moesoe preiki, foe dati ede a ben poti toe bijbel brochure ini en boekoetas. Di a mama foe en ben de bezig na a toonbangi, a pikin meisje no ben de foe si moro. Di a mama ben soekoe en, a ben e pristeri wan oema wan brochure! A mama ben go na a oema èn aksi pardon taki kande a pikin foe en ben sa froeferi na oema na wan noso tra fasi. Ma na oema ben teki a brochure nanga switifasi. Di a mama ben de en wawan nanga na oemapikin foe en baka, a ben aksi en pe a ben kisi a deki-ati foe go taki nanga wan freimde sma. Na oemapikin ben piki: „Mi ben taki ini misrefi, Rèdi, stèdi, gow! Dan mi ben go!”
18. Fa wi kan sori wan toemoesi boen fasi foe denki?
18 Wi alamala moesoe abi a fasi foe denki leki a meisje foe Australia, spesroetoe efoe wi kan go na freimde sma noso srefi na tiriman nanga a boen njoensoe. Kande wi e frede taki den o weigri. No meki wi frigiti san Jesus ben taki: „No broko oen ede nanga san oenoe sa tjari kon na fesi te oenoe e opo taki gi oensrefi, noso san oenoe sa taki; bika a santa jeje sa leri oenoe den sani di oenoe moesoe taki na a srefi joeroe dati.” — Lukas 12:11, 12.
19. Fa joe e si joe diniwroko?
19 So boen froetrow tapoe a jepi foe Gado en santa jeje te joe e go foe taki nanga den sma foe a boen njoensoe na wan switi fasi. Foeroetron miljoenmiljoen sma e poti den howpoe tapoe man nanga oema di no warti en, di tide den de èn tamara den no de moro. Wi e froetrow tapoe Jehovah nanga en hemel organisâsi — Krestes Jesus, den santa engel nanga den salfoe kresten di kisi wan opobaka — di de na libi foe têgo! Foe dati ede, hori na prakseri: „Moro de nanga wi leki den di de nanga den!” — 2 Kownoe 6:16.
[Foetoewortoe]
a Foe tra eksempre, loekoe a Jaarboek van Jehovah’s Getuigen 1994, bladzijde 217-220.
San joe e piki?
◻ Sortoe ròl a hemel organisâsi foe Gado e plèi ini a man di Jehovah pipel ben man go doro?
◻ Sortoe politiek nanga relisi elementi kon doe Jehovah Kotoigi ogri na ini a di foe 20 jarihondro?
◻ Fa Jehovah Kotoigi fiti a diniwroko foe den na den situwâsi foe difrenti ten?
◻ San e boeweigi joe foe preiki?
[Prenki na tapoe bladzijde 17]
Henryka Żur
[Prenki na tapoe bladzijde 18]
Amerkankondre
Japan
Martinik
Kenia
Amerkankondre
Jehovah Kotoigi e preiki awansi pe den kan feni sma èn o ten den kan miti den
[Prenki na tapoe bladzijde 20]
Na ini den fosi jari foe a jarihondro disi, dan den ben gebroiki grammofoon foe prati a boen njoensoe foe a Kownoekondre