Wan wroko di musu du nanga sakafasi
1 A Wortu fu Gado e gi wi a rai fu „abi wan yeye fu sakafasi, [fu] no pai ogri baka nanga ogri . . . ma na presi fu dati, [fu] gi wan blesi” (1 Petr. 3:8, 9). A rai dati e fiti trutru na ini a preikiwroko. Fu tru, a Kresten diniwroko kan de wan tesi na tapu a sakafasi fu wi.
2 Sakafasi na wan fasi di e yepi wi fu horidoro te wi e ondrofeni sani di no de so switi. Te wi e preiki, dan wi e go na sma di wi no sabi, sondro taki den kari wi fu kon taki nanga den. Dati meki son leisi, son sma no o handri na wan switi fasi nanga wi. Efu wi wani tan preiki, aladi wi e kisi fu du nanga den sortu situwâsi disi, dan wi musu abi sakafasi. Na ini wan birti pe a no ben de makriki fu preiki, dan tu yari langa, tu pionier sisa ben e go oso fu oso, sondro taki den ben kisi na okasi fu taki nanga wan sma! Ma den tan horidoro, èn now yu abi tu gemeente na ini a birti dati.
3 Fa fu du te wan sma grofu: Sakafasi sa yepi wi fu du neleki Yesus te tra sma grofu noso te den no e handri na wan switi fasi nanga wi (1 Petr. 2:21-23). Wan leisi di wan sisa ben go na wan oso, dan wan uma bigin kosi en, baka dati a masra fu na uma kosi en tu èn a yagi en fu a prasi. A sisa lafu na wan switifasi èn a taki dati a ben e howpu fu taki nanga den wan tra leisi. A sani disi ben naki na ati fu den sma disi srefisrefi. Di Kotoigi ben naki na den doro wan tra leisi, dan den arki èn den teki a kari fu go na wan konmakandra na a Kownukondre zaal. A sisa di den ben yagi gowe a fosi leisi, ben de drape fu bari den wan switikon èn a ben gi den kotoigi tu. Te wi e „sori safrifasi èn bigi lespeki”, dan wi tu kan safu na ati fu sma di no wani arki.—1 Petr. 3:15; Odo 25:15.
4 No abi bigifasi: A no fu di wi abi sabi fu Bijbel, meki wi musu si tra sma moro lagi leki wi. Wi no musu taki fu den na wan fasi di e sori taki wi e soso den (Yoh. 7:49). Na presi fu dati, Bijbel e gi wi a rai fu no „taki ogri fu nowan sma” (Tit. 3:2). Te wi abi sakafasi neleki Yesus, dan wi e gi trawan kowru-ati (Mat. 11:28, 29). Sma o arki wi moro esi te wi abi sakafasi.
5 Iya, sakafasi e yepi wi fu horidoro te wi e preiki na ini birti pe a no makriki fu preiki. A kan safu na ati fu sma di no wani arki èn a e meki taki trawan wani fu arki a Kownukondre boskopu. Ma a moro prenspari sani, na taki a e plisi Yehovah, di e „sori bun-ati gi den sma di abi sakafasi”.—1 Petr. 5:5.