’Den wortu di unu e taki musu abi sowtu ala ten’
1. San a wani taki fu ’poti sowtu gi den wortu fu wi?’
1 „Un musu taki na wan switi fasi ala ten, iya, den wortu fu unu musu abi sowtu, so taki unu sabi fa un musu piki ibriwan sma” (Kol. 4:6). San a wani taki fu poti sowtu gi den wortu fu wi? A wani taki fu gebroiki den yoisti wortu, fu taki na wan switi fasi so taki den arkiman sa prisiri fu arki wi. A de prenspari trutru fu du disi na ini a preikiwroko.
2. San Yesus du fu man preiki gi wan Samaria uma?
2 Na eksempre fu Yesus: Di Yesus ben e rostu na wan watra peti, a ben teki na okasi fu taki nanga wan Samaria uma di ben kon na a peti fu kisi watra. Na difrenti leisi na ini a takimakandra, na uma ben taki sani di ben e sori taki den Dyu nanga den Samariasma ben abi trobi langa ten kaba. A ben taki tu dati a ben e bribi taki den Samariasma ben de bakapikin fu Yakob, aladi den Dyu na a tra sei ben e bribi trutru taki den Samariasma komoto fu sma di ben de trakondre sma. Na presi fu haritaki nanga en, Yesus ben tan hori a takimakandra na wan switi fasi. Leki bakapisi fu dati, a ben man preiki gi na uma disi nanga den sma fu a foto èn den alamala ben kisi wini fu dati.—Yoh. 4:7-15, 39.
3. Fa wi kan waka baka Yesus eksempre te wi de na ini a diniwroko?
3 Te wi e preiki, dan wi musu hori a marki fu wi na prakseri. Wi abi a marki fu „preiki a bun nyunsu di abi fu du nanga bun sani” (Rom. 10:15). Te wi e taki nanga na ososma, dan wi musu taki na wan switi fasi èn wi musu gebroiki Bijbel na wan fasi di e gi en deki-ati. A no musu kisi a denki taki wi e krutu a bribi fu en. Efu a sma taki wan sani di fowtu, dan wi no abi fu sori a sma esi-esi taki a meki wan fowtu. Kande a sma taki wan sani di wi feni bun, noso di wi kan gebroiki fu prèise en. Kande wi kan sori en san Bijbel e taki, fu di wi e taki: „Ma fa yu e denki fu a tori disi?”
4. San wi musu du te wan ososma e taki grofu?
4 San wi o du te na ososma e taki grofu, noso efu a wani haritaki nanga wi nomo? Wi musu tan sori switifasi nanga safri-atifasi te wi e taki nanga en (2 Tim. 2:24, 25). Efu a sma no wani arki a Kownukondre boskopu, dan a moro bun fu tapu a takimakandra na wan koni fasi èn fu gowe.—Mat. 7:6; 10:11-14.
5. Sortu bun bakapisi wan sisa ben abi di a ben piki na ososma na wan switi fasi?
5 Yu kan abi bun bakapisi: Di wan sisa ben pruberi fu gi kotoigi na wan birtisma, dan na uma ben atibron èn a bigin kosi. Na wan switi fasi a sisa taki: „Gi mi pardon taki mi meki yu ati bron. Pasa wan switi dei moro fara.” Tu wiki baka dati, na uma naki na tapu a doro fu a sisa èn a aksi a sisa pardon fu a fasi fa a ben handri. Na uma ben sori tu taki a ben wani sabi san a sisa ben wani taigi en. Nofo tron wan piki di gi na wan switi fasi e tyari bun bakapisi kon!—Odo 15:1; 25:15.
6. Fu san ede a de prenspari fu poti sowtu gi den wortu fu wi te wi e du wi diniwroko?
6 Wi musu pruberi fu meki den wortu fu wi abi sowtu te wi e preiki a bun nyunsu. Srefi efu na ososma no wani arki, dan kande wan tra leisi a sa wani arki te Yehovah Kotoigi kon na en oso.