Wi alamala kan gi Yehovah wan sani
1 Yu ben sabi taki libisma kan gi Gado wan sani? Abel ben gi wan tu fu den moro bun meti di a ben e kweki leki ofrandi na Yehovah, èn Noa nanga Yob ben tyari den srefi sortu ofrandi tu (Gen. 4:4; 8:20; Yob 1:5). A no de fu taki, dati den ofrandi disi no ben meki a Mekiman kon moro gudu, fu di a abi ala sani kaba. Ma nanga den ofrandi disi den getrow man ben sori taki den lobi Gado nanga den heri ati. Na ini a ten disi, wi kan gebroiki wi ten, wi krakti, nanga den gudu di wi abi, leki „wan srakti-ofrandi fu prèise” Yehovah.—Hebr. 13:15.
2 Wi ten: A moi fu si taki sma e „gebroiki ibri okasi bun”, fu di a ten di den ben e gebroiki fu du sani di no de so prenspari, den e gebroiki now fu du moro na ini a diniwroko (Ef. 5:15, 16). Kande wi kan seti sani tra fasi na ini wi libi, so taki wi kan du a yepi-pionierwroko wán mun na ini a yari noso moro langa. Kande wi kan tan moro langa leki fa wi gwenti, na ini a preikiwroko. Efu wi e wroko 30 miniti moro langa ibri wiki, dan dati o meki taki wi e wroko sowan tu yuru moro langa na ini wan mun.
3 Wi krakti: Te wi wani abi nofo krakti fu du wi diniwroko, dan wi no musu abi prisiriten nanga wroko di e meki taki wi e kon weri so te, taki wi no o man du ala san wi man gi Yehovah. Wi no musu broko wi ede tumusi nanga sani di kan meki taki wi „lasi-ati”, fu di dati e meki taki wi no abi nofo krakti fu dini Gado (Odo 12:25). Srefi te wi abi bun reide fu broko wi ede nanga wan sani, a ben o moro bun fu ’trowe wi hebi tapu Yehovah’!—Ps. 55:22; Fil. 4:6, 7.
4 Den gudu di wi abi: Wi kan gi den gudu di wi abi fu horibaka sosrefi gi a preikiwroko. Paulus ben gi Kresten brada nanga sisa a deki-ati fu kon kisi a gwenti fu „poti someni moni leki a man na wan sei”, so taki den kan gi wan sani na den sma di de na nowtu (1 Kor. 16:1, 2). Na a srefi fasi, wi kan poti moni na wan sei fu horibaka gi den sani di a gemeente abi fanowdu èn sosrefi fu horibaka gi a preikiwroko di e du na heri grontapu. Yehovah e warderi den sani di wi e gi nanga wi heri ati, srefi efu dati na wan pikinso nomo.—Luk. 21:1-4.
5 Yehovah gi wi furu sani (Yak. 1:17). Wi e sori taki wi de nanga tangi gi den sani dati, te wi e gi furu fu wi ten, wi krakti, nanga den gudu di wi abi, fu dini en. Yehovah e prisiri te wi e du dati, fu di ’a lobi a sma di e gi sani nanga prisiri’.—2 Kor. 9:7.