Wi musu gi makandra deki-ati te wi de na ini a preikiwroko
1 Wi alamala e warderi en te wi e kisi deki-ati fu „wortu di taki na a yoisti ten” (Odo 25:11). Te wi e wroko makandra nanga tra sma na ini a preikiwroko, dan fa wi kan sorgu taki den sani di wi e taki e gi den deki-ati?
2 Takimakandra di e gi trawan deki-ati: Te wi de na ini a preikiwroko makandra nanga den brada nanga sisa fu wi, dan a ben o bun fu taki fu sani di kan yepi wi fu abi wan moro bun matifasi nanga Gado (Ps. 37:30). Wi kan taki fu a fasi fa wi o pristeri den publikâsi, noso wi kan fruteri den moi sani di wi ondrofeni no so langa pasa na ini a preikiwroko (Tori. 15:3). Kande wi kan taki fu wan moi sani di wi leisi na ini Bijbel, na ini den nyun tijdschrift, noso fu sani di wi leri na wan gemeente konmakandra. Wi kan taki sosrefi fu wan tu moi sani di kon na fesi na wan publikitaki di wi yere no so langa pasa na a Kownukondre zaal.
3 A kan de so taki wi e lasi-ati te wan ososma e taki fu wan sani di wi no man fruklari gi den. Te wi komoto na a oso dati, dan a ben o bun fu teki wan tu miniti baka dati fu taki fu a sani disi nanga a preikiman di e wroko nanga wi. Wi kan aksi en fa wi kan fruklari a tori disi wan tra leisi, èn kande wi kan gebroiki a Bijbel takimakandra-buku fu du dati. Te wi feni taki a preikiman di e wroko nanga wi ben taki wan moi sani na ini a takimakandra di a ben abi nanga na ososma, dan wi kan gi en deki-ati fu di wi e prèise en gi dati.
4 Wi kan bigin fu gi trawan deki-ati: A de so taki langa wi no wroko nanga son sma na a bukustudie grupu fu wi? Te wi e aksi trawan fu wroko makandra nanga wi na ini a preikiwroko, dan na so fasi wi e „gi makandra deki-ati” (Rom. 1:12). Den gewoon pionier nanga den yepi-pionier ben o breiti te tra preikiman e wroko nanga den, spesrutu fruku mamanten noso na mofoneti te furu preikiman no de na ini a preikiwroko. Wi kan horibaka gi den pionier te wi e wroko makandra nanga den. A de so taki wan preikiman de di siki, èn di no man du so furu na ini a diniwroko? Te wi aksi so wan preikiman fu go nanga wi na wan bijbelstudie, dan dati o tyari wini kon gi wi èn sosrefi gi a preikiman disi.—Odo 27:17.
5 Ala ten wi e gi makandra deki-ati te wi e prèise trawan, èn te wi e taigi den taki wi e warderi den sani di den e du, srefi te a de wan pikin sani nomo. Wi musu tan hori a sani dati na prakseri te wi e wroko makandra nanga trawan na ini a preikiwroko, fu di wi wani „tan gi makandra deki-ati”.—1 Tes. 5:11.