Fa wi kan yepi den sma di kon na a Memrefesa?
1. Fa kotoigi o gi na wan heri bun fasi tapu 22 maart 2008?
1 Tapu 22 maart 2008, milyunmilyun sma na heri grontapu sa kisi kotoigi na wan heri bun fasi. Den sma di e kon na a Memrefesa sa yere fu a bigi lobi di Yehovah sori, fu di a sorgu taki a lusu-paiman pai gi libisma (Yoh. 3:16). Den sma disi sa leri fu a Kownukondre èn den sa leri fa Yehovah o gebroiki a Kownukondre dati fu meki a wani fu en pasa na heri grontapu (Mat. 6:9, 10). Den sma disi sa si gi densrefi taki a pipel fu Gado abi lobi gi makandra èn taki den de na ini wánfasi. Boiti dati densrefi sa ondrofeni a switifasi di wi abi.—Ps. 133:1.
2. Fa wi kan yepi den bijbelstudenti di go na a Memrefesa?
2 Bijbelstudenti: Sonwan fu den sma di sa go na a Memrefesa sa de sma di bigin studeri Bijbel nanga wi no so langa ete. Meki den kon sabi suma na den brada nanga sisa. Fruteri den fu den alawiki konmakandra, èn sori den syatu na inisei fu a Kownukondre zaal. Te a lezing e hori, a takiman sa gi den sma disi deki-ati fu tan meki muiti fu kisi wan bun matifasi nanga Gado. Yu kan gebroiki den sani di a takiman taki fu gi den studenti fu yu deki-ati.
3. Fa wi kan gi deki-ati na den preikiman di no e preiki moro èn di kon na a Memrefesa?
3 Den preikiman di no e preiki moro: Sonwan fu den sma di sa kon na a Memrefesa na preikiman di no e preiki moro. Du muiti fu sori den switifasi fu di yu e go taki den odi. No aksi sani noso taigi den sani di kan meki den firi syen. Wan tu dei baka a Memrefesa, den owruman musu go na den sma di no e preiki moro, ma di kon na a Memrefesa. Den owruman sa prèise den sma dati fu a muiti di den du fu kon na a Memrefesa, èn na wan switi fasi den sa gi den sma dati wan kari fu kon na a gemeente konmakandra di e kon.
4. Fa ibriwan fu wi kan yepi den sma di kon na a Memrefesa?
4 Den sma di e kon na a Memrefesa: Kande sonwan fu den sma di kon na a Memrefesa na sma di wi sabi, noso famiriman di wi kari. Trawan kisi wan kari kande na a pisi ten di wi ben e gi sma a spesrutu papira fu kari den kon na a Memrefesa. Efu yu e si sma di yu no sabi, dan no wakti fu den kon na yu, ma go na den, taigi den fa yu nen èn gi den wan switikon. Kande noiti ete den kon na wan fu den konmakandra fu wi. Te yu e taki nanga den, dan kande yu kan kon sabi pe den e tan èn fa yu kan miti den baka. Te yu e go na den wan tu dei baka a Memrefesa noso te yu bel den, dan yu kan gi den deki-ati fu leri moro fu Bijbel èn yu kan aksi den efu den wani studeri Bijbel.
5. San wi kan taki fu bigin wan bijbelstudie?
5 Te wi e go baka na den sma, dan wi kan gebroiki den tori di kon na fesi na ini a lezing fu a Memrefesa, fu taki fu a Bijbel leri-buku. Fu eksempre, a takiman di hori a lezing fu a Memrefesa sa leisi Yesaya 65:21-23. Te yu e go baka na a sma, dan yu kan taki fu a lezing, èn yu kan taigi en: „Meki mi sori yu wan tu tra blesi di wi kan kisi nanga yepi fu a lusu-paiman.” Baka dati, taki fu bladzijde 4 nanga 5 fu a Bijbel leri-buku. Noso yu kan taki: „Furu sma e aksi densrefi o ten wi o ondrofeni den sani di kari na ini a profeititori fu Yesaya.” Baka dati, taki fu paragraaf 1 te go miti 3 fu kapitel 9. Wan tra fasi fa wi kan gi a sma deki-ati fu bigin wan bijbelstudie, na fu taki fu wan tu sani di a takiman ben taki. Baka dati wi kan taki fu a Bijbel leri-buku, èn sori en fa wi e hori wan bijbelstudie.
6. Sortu okasi wi e kisi te wi e gi yesi na a komando fu Yesus fu memre a dede fu en?
6 Meki wi alamala du muiti fu suku okasi fu yepi bijbelstudenti, preikiman di no e preiki moro, èn tra sma di kon na a Memrefesa (Luk. 22:19). Fu tru, Yehovah sa blesi ala muiti di wi e meki fu du moro na ini a Kownukondre diniwroko fu wi.