Gi bun buweisi

TE YU e taki wan sani, dan den arkiman fu yu abi a reti fu aksi: „Fu san ede a sani disi de tru? San na a buweisi di a takiman e tyari kon na fesi, di e meki taki mi kan bribi san a e taki?” Leki wan leriman, yu abi a plekti fu piki den sortu aksi dati, ma sosrefi fu yepi yu arkiman feni a piki tapu den aksi dati. Efu a sani di yu e taki, de prenspari gi a tori fu yu, dan sorgu taki yu e tyari krakti buweisi kon na fesi fu yepi yu arkiman so taki den kan bribi san yu e taki. Disi sa yepi yu fu overtoigi trawan taki a tori di yu e taki na wan tru tori.

Na apostel Paulus ben taki nanga overtoigi. A ben pruberi fu kenki a prakseri fu den wan nanga suma a ben taki, fu di a ben gi den bun buweisi. Sosrefi a ben taki-go-taki-kon nanga den arkiman fu en na wan fasi di ben makriki fu frustan, èn a ben taki neleki a ben begi den fu gi yesi na en. Nanga disi a gi wi wan moi eksempre fu waka na en baka (Tori. 18:4; 19:8). A no de fu taki dati wan tu sma sabi taki kefalek bun, ma den e taki nanga overtoigi fu kori trawan (Mat. 27:20; Tori. 14:19; Kol. 2:4). Den kan bigin fu taki sani di gersi taki den tru. Den e teki sani fu sma di e drai den tori. Moro fara, den kan gebroiki frafra buweisi, èn den no e gebroiki den buweisi di no e kruderi nanga a denki fu den. Ete wan sani di den kan du na fu wroko moro tapu a firi fu sma leki tapu a denki fu sma. Wi musu luku bun fu no teki nowan fu den sortu fasi disi abra.

Den buweisi musu komoto trutru fu Gado Wortu. San wi e leri trawan, no musu komoto fu wisrefi. Wi e meki muiti fu prati nanga trawan den sani di wi leri fu Bijbel. Fu du a wroko disi leki leriman, dan wi e kisi furu yepi fu den buku di a getrow èn koni srafu grupu e tyari kon na doro. Den buku disi e gi wi a deki-ati fu ondrosuku Bijbel finifini. Wi fu wi sei, e meki trawan luku san skrifi na ini Bijbel, no fu di wi wani sori den nomonomo taki wi abi reti, ma wi e du dati fu di nanga sakafasi wi wani meki densrefi si san Bijbel e taki. Wi e agri nanga Yesus Krestes, di ben begi en Tata: „Yu wortu na waarheid” (Yoh. 17:17). Nowan sma abi moro makti leki Yehovah Gado, a Mekiman fu hemel nanga grontapu. Efu den buweisi fu wi e komoto fu a Wortu fu En, dan dati kan meki den de trutru bun buweisi.

Sontron yu kan taki nanga sma di no sabi Bijbel so bun, noso di no e bribi taki Bijbel na trutru a Wortu fu Gado. Dan yu sa musu de nanga koni fu si krin o ten èn fa yu musu sori a sma wan bijbeltekst. Ma yu musu meki muiti fu sori yu arkiman so esi leki yu man san Bijbel e taki, bika dati na a moro bun buku pe wi kan feni bun buweisi.

Yu kan kari wan bijbeltekst di abi fu du nanga a tori di yu wani buweisi. Ma te yu e kari a tekst dati, dan yu denki taki yu buweisi a tori kaba nanga dati? Dati no abi fu de so kwetikweti. Kande yu musu poti a prakseri fu yu arkiman na den vers lontu a bijbeltekst di yu kari fu sori fa dati e horibaka trutru gi den sani di yu e taki. Efu yu wani gebroiki wan bijbeltekst fu sori wan sma fa a musu tyari ensrefi, ma den vers lontu a tekst dati no e taki fu a tori dati, dan kande yu sa musu kari tra sani leki buweisi. Kande yu sa musu gebroiki tra bijbeltekst di abi fu du nanga san yu e taki, so taki den arkiman kan firi taki san yu e taki na trutru sani di komoto fu den Buku fu Bijbel.

Sorgu dati yu no e taki so furu sani fu wan bijbeltekst, dati te fu kaba yu e taki sani di a tekst no e sori. Leisi a tekst finifini. Kande a tekst e taki fu a tori di yu nanga yu arkiman e taki makandra. Ma toku, efu yu wani taki yu buweisi overtoigi yu arkiman, dan den musu man si a srefi sani na ini a tekst di yu e si leki wan buweisi fu a tori.

Tra buweisi di e horibaka gi san yu e taki. Sontron, a kan de wan yepi gi yu te yu e kon nanga tra buweisi di no skrifi na ini Bijbel ma di e kon fu tra presi di sma kan frutrow. Disi kan yepi den fu frustan taki san Bijbel skrifi na sani di tru srefisrefi.

Fu eksempre, yu kan sori go na sani di wi kan si na grontapu nanga hemel fu sori taki wan Mekiman musu de. Kande yu kan poti prakseri na den wet soleki a zwaartekracht (a krakti di e meki taki sani di fadon e tan na gron, èn den no e tan frei na loktu). Kande yu kan taki-go-taki-kon nanga a sma tu fu sori en taki efu den sortu wet disi de, dan wan Sma musu de di meki den wet disi. A fasi fa yu e taki-go-taki-kon nanga wan sma sa go bun efu a e kruderi nanga san skrifi na ini Gado en Wortu (Yob 38:31-33; Ps. 19:1; 104:24; Rom. 1:20). Te yu e gi sma den sortu buweisi disi, dan yu sa man sori den taki san Bijbel e taki, e kruderi nanga den sani di den kan si nanga den eigi ai.

Yu e du muiti fu yepi wan sma frustan taki Bijbel trutru na a Wortu fu Gado? Yu kan sori go na wan tu sabiman di taki dati Bijbel na trutru a Wortu fu Gado. Ma dati wani taki dati yu gi buweisi kaba taki a tori tru? Te yu e kari san sabiman e taki, dan dati e yepi soso den sma di e lespeki den sabiman disi. Kande yu kan sori go na sabidensi fu sori taki Bijbel de tru. Yu denki taki dati ben o buweisi a tori? Efu yu ben o kari den sani di onvolmaakti sabiman e denki, fu sori taki Bijbel de tru, dan a ben o de neleki yu e bow tapu wan swaki fondamenti. Na a tra sei, efu yu e bigin nanga a Wortu fu Gado, baka dati yu e sori go na den sani di sabiman kon feni èn di e sori taki Bijbel na wan buku di skrifi sani soifri, dan den buweisi di yu e kari kon sa de neleki yu e bow tapu wan steifi fondamenti.

Awansi sortu sani yu wani buweisi, sorgu taki yu tyari nofo buweisi kon na fesi. O furu buweisi yu musu tyari kon na fesi, sa anga fu den arkiman fu yu. Fu eksempre, efu yu e taki fu den lasti dei soleki fa dati skrifi na 2 Timoteyus 3:1-5, dan kande yu kan sori yu arkiman tapu wan nyunsu di furu sma sabi èn di e sori taki libisma ’no sa lobi den famiri moro’. A wan eksempre dati kan de nofo fu sori den sma taki a marki disi fu den lasti dei e kon tru noyaso.

Te yu e teki tu sani gersi nanga makandra, dan dati kan de wan yepi tu. Ma dati no wani taki dati yu buweisi a tori kaba; yu musu man sori o warti disi de fu di yu e sori san Bijbel srefi e taki. Ma te yu teki den tu sani gersi nanga makandra, dan dati kan yepi wan sma fu si taki san yu e taki musu de so. Fu eksempre, yu kan du disi te yu wani sori wan sma taki Gado Kownukondre na wan tirimakti. Yu kan sori en taki neleki den tirimakti fu libisma, dan Gado en Kownukondre abi tiriman, a abi sma di e libi na ondro a tiri disi, a abi wet, a abi sistema fu krutu afersi, èn a abi wan sistema fu gi sma leri.

Furu tron yu kan fruteri trutru ondrofenitori fu sori o koni a de fu fiti a rai fu Bijbel na ini a libi fu wi. Yu kan fruteri sani tu di yusrefi ondrofeni, fu horibaka gi san yu e taki. Fu eksempre, te yu e sori wan sma o prenspari a de fu leisi èn studeri Bijbel, dan kande yu kan fruteri en fa yu libi kon moro bun fu di yusrefi du dati. Di na apostel Petrus ben wani gi den brada fu en deki-ati, dan a ben sori tapu wan sani di ensrefi si nanga en eigi ai (2 Petr. 1:16-18). Paulus sosrefi ben kari sani di ensrefi ondrofeni (2 Kor. 1:8-10; 12:7-9). A no de fu taki, dati yu no musu fruteri tumusi furu fu yusrefi, bika dan yu ben sa kan hari a prakseri fu den sma kon tapu yusrefi.

Fu di libisma miti difrenti sani na ini den libi èn fu di ibri libisma abi en eigi denki, dati meki den buweisi di yu e tyari kon na fesi fu overtoigi son sma, kan de buweisi di no e overtoigi tra sma. Fu dati ede, prakseri fa yu arkiman e denki, so taki yu kan luku sortu buweisi yu sa gebroiki èn fa yu sa tyari den buweisi disi kon na fesi. Odo 16:23 e taki: „Na ati fu a koni sma e meki taki en mofo sori taki a e si sani krin, èn a e gi en mofobuba koni fu man overtoigi sma.”