Taki tranga nofo

EFU wan takiman no taki tranga nofo, dan wan tu fu den arkiman kan bigin dyonko. Efu wan preikiman e taki tumusi safri na ini a preikiwroko, dan a kan pasa taki na ososma no sa poti prakseri moro na den sani di a preikiman e taki. Èn efu den sma di de tapu den konmakandra no e taki tranga nofo te den e gi piki, dan trawan na a konmakandra no sa kisi a deki-ati di den abi fanowdu (Hebr. 10:24, 25). Na a tra sei, efu wan takiman e taki moro tranga tapu momenti di a no musu du dati, dan den arkiman no sa firi switi, iya, den kan bigin fuga srefi fu en.​—Odo 27:14.

Prakseri den arkiman fu yu. Nanga suma yu e taki? Nanga wán sma nomo? Nanga wan osofamiri? Nanga wan pikin grupu di e miti makandra fu go na ini a preikiwroko? Nanga a heri gemeente? Noso yu e taki nanga bun furu sma tapu wan kongres? A de krin taki sontron a fiti fu taki nanga wan krakti sten, ma son leisi a no fiti srefisrefi fu du dati.

Na furu okasi, den futuboi fu Gado ben taki nanga bigi grupu sma. Di den ben gi a tempel na Yerusalem abra na Yehovah na ini a ten fu Salomo, dan sani soleki mikrofon no ben de fu yepi den takiman fu taki moro tranga. Fu dati ede Salomo ben tanapu na tapu wan hei presi, a ben blesi a pipel èn a du dati „nanga wan tranga sten” (1 Kow. 8:55; 2 Kron. 6:13). Hondrohondro yari baka dati, baka di santa yeye ben kanti na tapu wan pikin grupu fu Kresten na ini Yerusalem na a Pinksterfesa fu 33 G.T., dan ipi-ipi sma ben kon tanapu lontu den Kresten disi. Sonwan fu den sma ben wani sabi moro, ma trawan baka ben spotu den Kresten. Petrus ben sori koni trutru, di a „ben opo tanapu . . . èn a ben opo en sten” (Tori. 2:14). Na so fasi a ben gi wan bun krakti kotoigi.

Fa yu kan kon sabi efu yu e taki tranga nofo? Wán fu den moro bun sani di yu kan du, na fu luku den arkiman fu yu. Efu yu e si taki wan tu arkiman e meki muiti fu yere san yu e taki, dan yu musu pruberi fu taki pikinso moro tranga.

Awansi wi e taki nanga wán sma nomo, noso wi e taki nanga wan grupu, toku a ben sa de wan koni sani fu luku suma na den sma di e arki wi. Efu wan sma dofu pikinso èn a no e yere so bun, dan yu sa musu taki moro tranga. Ma wan tu sma di no de so gaw moro fu frustan sani fu di den kon owru kaba, no sa lobi en te yu e bigin bari. A kan srefi taki den o feni taki yu e taki grofu te yu e bari. Na ini wan tu kulturu a de so taki efu wan sma e bari, dan dati e sori taki en ati e bron noso taki a no abi pasensi.

Prakseri a babari di kan meki taki sma no e arki yu. Te yu de na ini a preikiwroko, dan den sani di yu e miti sa meki taki yu sa musu luku o tranga yu musu taki. A kan taki yu musu meki furu muiti fu taki moro tranga te oto e rei pasa, te pikin e meki babari, te dagu e meki babari, noso te poku noso telefisi e prei tranga. Na a tra sei, na den presi pe den oso de krosibei fu makandra, dan na ososma kan syen pikinso te yu e taki so tranga taki den tra sma fu a birti e yere yu tu.

Den brada di e hori lezing na ini a gemeente noso tapu den kongres, e miti nanga difrenti sortu situwâsi tu. Fu taki nanga wan sma na dorosei, de heri tra fasi leki fu hori wan lezing na ini wan zaal pe ala sani de moi fu yere. Na ini wan kondre fu Latijns-Amerika, tu zendeling ben hori wan lezing tapu a dyari fu wan sma di ben wani sabi moro. Den ben hori a lezing aladi furu babari ben de fu di sma ben sutu bombel na tapu a pren na ini a birti, èn wan kakafowru ben bari doronomo!

Te yu e hori wan lezing, dan wan sani kan pasa di e meki taki yu musu wakti pikinso fosi yu e taki go doro, noso kande yu musu taki moro tranga. Fu eksempre, efu wan konmakandra e hori na wan presi pe a daki meki nanga zinkplaat, dan wan hebi alen di e bigin fadon wantronso kan meki taki den arkiman no sa man yere a takiman so bun moro. Te wan pikin e krei, noso te sma e kon lati na den konmakandra, dan dati kan puru a prakseri fu den arkiman fu san yu e taki. Te yu sabi san yu musu du te den sortu sani disi e miti yu, dan dati sa meki taki den arkiman sa man nyan bun srefisrefi fu den sani di yu abi fu fruteri den.

Efu mikrofon de, dan a takiman kan gebroiki dati. Disi kan yepi den arkiman fu frustan en moro bun. Ma toku a takiman sa musu man taki moro tranga efu dati de fanowdu. Na wan tu presi pe a faya e koti ibri tron baka, dan den takiman musu man taki go doro sondro yepi fu wan mikrofon.

Prakseri a pisi tori di yu e taki. A tori di yu o taki na ini yu lezing sa sori yu tu efu yu musu taki moro tranga noso moro safri. Efu yu musu taki na wan krakti fasi fu wan tori, dan no pori a lezing fu di yu e taki tumusi safri. Fu eksempre, efu yu e leisi krutuboskopu fu Bijbel, dan yu sa musu taki nanga moro krakti. Disi de heri tra fasi leki te yu ben o leisi rai di e taki fu a sori di wi musu sori lobi. Luku a tori bun fu kon sabi efu yu musu taki moro tranga noso moro safri. Ma luku bun taki yu e du dati sondro fu hari a prakseri fu den arkiman kon tapu yusrefi.

Prakseri a marki di yu wani doro. Efu yu wani gi yu arkiman deki-ati fu wroko nanga moro faya, dan yu sa musu taki moro tranga fu poti krakti tapu san yu e taki. Efu yu wani kenki a denki fu den arkiman, dan no taki so tranga taki den no wani arki yu moro. Efu yu wani gi trowstu, dan furu tron a moro bun fu taki nanga wan switi sten.

O ten a bun fu taki moro tranga. Te yu e kari wan sma di e wroko noso di e du wan tra sani, dan furu tron a bun fu taki moro tranga. Papa nanga mama sabi disi, fu dati ede den e taki moro tranga te den e kari den pikin fu kaba nanga a prei di den e prei èn fu kon na inisei. Wan fesiman sa musu taki moro tranga tu kande, te a e aksi den sma tapu wan gemeente konmakandra noso tapu wan bigi konmakandra fu suku den presi fu sidon. Te preikiman de na ini a preikiwroko, dan kande den sa musu bari fu taki odi te den e waka miti sma di e wroko tapu gron.

Srefi te wan sma e arki yu kaba, dan a de prenspari fu tan taki tranga nofo. Wan sten di no krakti nofo kan meki taki sma e bigin denki taki a takiman no sreka ensrefi, noso taki a no de seiker fu san a e taki.

Te wi e gi wan komando, dan wi kan gi sma deki-ati fu du wan sani fu di wi e taki moro tranga (Tori. 14:9, 10). Te wi e bari fu taigi wan sma fu du wan sani, noso fu no du wan sani, dan dati kan kibri a sma tu gi ogri. Na ini Filipi wan waktiman fu wan dungru-oso ben wani kiri ensrefi fu di a ben denki taki den strafuman fu en lowe gowe. „Paulus ben bari tranga, a taki: ’No du yusrefi ogri, bika wi alamala de dyaso!’” Na so a waktiman no ben kiri ensrefi moro. Baka dati, dan Paulus nanga Silas preiki gi a waktiman disi nanga en osofamiri, èn den alamala ben teki a waarheid.​—Tori. 16:27-33.

San yu kan du fu man taki moro tranga noso moro safri. Wan tu sma musu meki moro muiti leki trawan fu leri sabi o tranga den musu taki. Wan sma kan abi wan swaki sten, èn dati kan meki taki a no man taki tranga nofo. Ma toku efu a e du muiti, dan a kan leri fu taki pikinso moro tranga, aladi kande toku a o taki safu ete. Luku fa yu e bro èn fa yu e tanapu. Pruberi fu sidon leti-opo èn fu tanapu leti-opo tu. Hari bro dipi so taki yu e furu yu fokofoko nanga bro. Te yu e du dati, dan yu sa man taki moro tranga, noso moro safri te dati de fanowdu.

Trawan baka, abi a problema taki den e taki tumusi tranga. Kande den teki a gwenti dati fu di den e wroko dorosei noso fu di den e wroko na wan presi pe furu babari e meki. Na a tra sei, kande den gro kon bigi na wan presi pe ala sma e bari èn pe sma e koti trawan mofo te den e taki. Dati e meki taki den e firi taki a wan-enkri fasi fa den kan taki wan sani tu, na te den e taki moro tranga leki trawan. Bijbel e gi leki rai fu tan sori „trutru sari-ati, bun-atifasi, sakafasi, safri-atifasi nanga langa pasensi”. Te safrisafri den e du den sani disi di Bijbel e gi leki rai, dan densrefi sa man si o tranga noso o safri den musu taki te den e taki nanga trawan.​—Kol. 3:12.

Te yu e sreka yusrefi bun, te yu e kisi moro ondrofeni fu di ala ten baka yu e go na a preikiwroko, èn te yu e begi Yehovah, dan dati sa yepi yu fu man taki tranga nofo. Awansi yu e taki komoto fu a podium, noso yu e taki nanga wán sma nomo na ini a preikiwroko, prakseri fa yu kan yepi a tra sma nanga den sani di yu e taki.​—Odo 18:21.