KAPITEL WÁN
Wan sroto de gi wan kolokoe osofamiri?
1. Foe san ede tranga osofamiri de prenspari na ini a libisma libimakandra?
NA OSOFAMIRI na a moro owroe seti na grontapoe, èn a e plei wan prenspari ròl na ini a libisma libimakandra. Na ini a heri historia, tranga osofamiri jepi foe meki tranga libimakandra. Na osofamiri na a moro boen seti foe kweki pikin foe tron lepi bigisma.
2-5. (a) Froeteri foe a seikerfasi di wan pikin e firi na ini wan kolokoe osofamiri. (b) Sortoe problema de na ini wan toe osofamiri?
2 Wan kolokoe osofamiri na wan lanpe foe kisi kibri èn seikerfasi. Prakseri pikinso foe a moro boen osofamiri di kan de. Te den e njan te neti, dan a papa nanga mama di e broko den ede gi den pikin foe den, e sidon nanga den èn e taki nanga den foe den sani di ben feni presi a dei dati. Na wan faja fasi den pikin e froeteri a papa nanga mama foe den san ben pasa na skoro. A ten di den de makandra e rostoe, e gi ibriwan foe den a krakti gi wan tra dei, te den sa de dorosei foe na osofamiri.
3 Na ini wan kolokoe osofamiri, wan pikin sabi taki en papa nanga mama sa sorgoe gi en te a e siki, èn taki kande a heri neti den sa kenki presi sei en bedi. A sabi taki a kan go na en mama noso papa nanga den problema di a abi na ini en jongoe jari èn taki a kan kisi rai nanga jepi. Ija, a pikin e firi taki noti no kan pasa nanga en, awansi o foeroe problema de na grontapoe.
4 Te den pikin gro kon bigi, dan foeroe tron den e go trow èn den abi den eigi osofamiri. „Wan sma e kon froestan omeni a moesoe de en papa nanga mama tangi, te ensrefi abi wan pikin”, na so wan odo foe den Owstoe kondre e taki. Nanga foeroe tangi nanga lobi, den pikin di kon bigi, e proeberi foe meki den eigi osofamiri de kolokoe, èn den e sorgoe toe gi a papa nanga mama foe den di kon owroe now èn di e prisiri foe de nanga den granpikin.
5 Kande joe e prakseri now: ’We, mi lobi mi osofamiri, ma mi osofamiri no de leki a wan di wi ben taki foe en didjonsro. Mi masra nanga mi e wroko tapoe difrenti ten èn pikinmoro noiti wi e si makandra. Wi e taki moro foeroe foe moni problema.’ Noso joe e taki: ’Den pikin nanga den granpikin foe mi e libi na wan tra foto, èn noiti mi man si den’? Ija, foe reide ede di den wan di abi foe doe nanga dati no man basi, foeroe osofamiri no de a moro boenwan di kan de. Ma tokoe son sma abi wan kolokoe osofamiri libi. Fa dati doe kon? Wan sroto de gi wan kolokoe osofamiri? A piki na ija. Ma bifo wi o taki san na a sroto, wi moesoe piki wan prenspari aksi.
SAN NA WAN OSOFAMIRI?
6. Foe sortoe osofamiri wi sa taki na ini a boekoe disi?
6 Na den Westsei kondre, moro foeroe foe den osofamiri abi wan papa, wan mama, nanga pikin. Granpapa nanga granmama kande e libi na ini den eigi oso, so langa den man doe dati. Ala di den e hori kontakti nanga moro fara famiriman, tokoe den no abi foeroe plekti na den disi. Na ini a boekoe disi, wi sa taki moro foeroe foe na osofamiri di abi papa nanga mama nanga pikin. Ma tra sortoe osofamiri kon de moro nanga moro wan gewoon sani na ini den lasti jari disi — osofamiri di abi soso a papa noso a mama wawan, a stief-osofamiri, nanga na osofamiri pe a papa nanga mama no e libi nanga makandra foe wan sani ede.
7. San na a moro bradi osofamiri?
7 Wan gewoon sani na ini wan toe koeltoeroe na a moro bradi osofamiri. Na ini a seti disi, efoe a kan, dan a de a gwenti taki den pikin e sorgoe gi den granpapa nanga granmama, èn den krosibei banti nanga frantiwortoe e go doro te na den fara famiriman. Foe eksempre, kande memre foe na osofamiri e jepi foe sorgoe gi den bradapikin noso sisapikin foe den, noso gi moro fara famiriman, e kweki den kande, èn e pai srefi foe den kan kisi leri. Den gronprakseri di wi o taki foe den na ini a poeblikâsi disi, de toe gi den moro bradi osofamiri.
NA OSOFAMIRI DI DE NA ONDRO STRESS
8, 9. Sortoe problema na son kondre e sori taki na osofamiri e kenki?
8 Na ini a ten disi, na osofamiri e kenki — a de wan sari sani foe taki dati a no e kenki kon moro boen. Wan eksempre de foe si na India, pe wan wefi kan libi nanga a famiri foe en masra èn e wroko na ini na oso na ondro a tiri foe a famiri foe en masra. Ma na ini a ten disi, a de wan gewoon sani gi wefi na India foe go soekoe wan wroko dorosei foe na oso. Ma soleki fa a sori, tokoe sma e froewakti foe den taki den moesoe doe den ròl foe den na ini na oso, soleki fa a gwenti de. Na foeroe kondre, na aksi di ben kon na fesi na: Omeni wroko wan oema di abi wan dorosei wroko, moesoe doe na ini na oso, te joe e teki en gersi tra memre foe na osofamiri?
9 Na ini den libimakandra na den Owstoe kondre, a de wan gwenti taki bradi osofamiri de di abi wan tranga banti. Ma na ondro a krakti foe a fasi fa den e tjari densrefi, taki a persoonlijk belang foe wan sma prenspari moro leki iniwan tra sani èn na ondro a stress foe den ekonomia problema, a moro bradi osofamiri di ben de wan gwenti, kon swaki. Foe dati ede, foeroe sma e feni taki a de wan hebi foe sorgoe gi owroe memre foe na osofamiri, na presi foe si en leki wan plekti noso wan grani. Den e meshandri son wan foe den owroe papa nanga mama. Ija, a meshandri di sma e meshandri den owroewan èn a sorgoe di den no e sorgoe gi den, de foe feni na foeroe kondre na ini a ten disi.
10, 11. Sortoe troetori e sori taki na osofamiri e kenki na den kondre na Europa?
10 Brokotrow e tron moro nanga moro wan gewoon sani. Na Spanjorokondre, a nomroe foe brokotrow ben kren go miti 1 brokotrow na mindri 8 trow, na ini a bigin foe den lasti tin jari foe a di foe twenti jarihondro — wan bigi gro na ini 25 jari nomo, foe 1 brokotrow na mindri 100 trow. Ingrisikondre, di abi a moro hei nomroe foe brokotrow na Europa, soleki fa sma e taki, (den e froewakti taki 4 na mindri 10 trow sa broko), si taki wantronso a nomroe foe osofamiri di abi soso a papa noso a mama, kon moro foeroe.
11 A gersi taki foeroe sma na Doisrikondre e gowe libi na osofamiri di den ben gwenti. Na ini den jari baka 1990, 35 procent foe ala den Doisri osofamiri ben abi soso a papa noso a mama èn 31 procent ben abi toe sma nomo. So srefi den sma na Fransikondre no e trow so foeroe moro, èn den sma di tokoe e trow, e brokotrow moro foeroe tron èn moro froekoe leki fa a gwenti ben de. Moro nanga moro sma wani foe libi makandra sondro foe teki a frantiwortoe di trow e tjari. Den srefi sortoe gwenti disi de foe si na heri grontapoe.
12. Fa den pikin e pina foe den kenki ede na ini a disiten osofamiri?
12 San e pasa nanga den pikin? Moro nanga moro pikin na Amerkankondre èn na foeroe tra kondre, gebore foe wan paar di no trow, son wan e gebore foe jongoe tini. Foeroe tini oemapikin abi wan toe pikin foe difrenti papa. Njoensoe foe heri grontapoe e taki foe miljoenmiljoen pikin di no abi oso èn di e wakawaka lontoe na tapoe strati; foeroe foe den e lowe foe den oso pe den sma ben meshandri den noso foe di den famiri ben jagi den foe di den no man sorgoe gi den pikin moro.
13. Sortoe problema di de na ala sei, e poeroe a kolokoe na ini osofamiri?
13 Ija, na osofamiri de na ini wan toemoesi moeilek situwâsi. Boiti den sani di wi ben taki foe den kaba, dan tini di e meki oproeroe, a meshandri di sma e meshandri pikin, ogri di e doe nanga tranga na ini a trowlibi, a de di sma de sopiman, nanga tra kefalek takroe problema e poeroe a kolokoe na ini foeroe osofamiri. Gi boen foeroe pikin nanga bigisma, na osofamiri no de wan lanpe srefisrefi.
14. (a) Soleki fa wan toe sma e taki, san na den sani di e meki taki osofamiri de na ini toemoesi moeilek situwâsi? (b) Fa wan sabiman foe wet foe a fosi jarihondro e taki foe a fasi fa a grontapoe foe a ten disi de, èn sortoe krakti a kontroe foe den wortoe disi abi na tapoe na osofamiri libi?
14 Foe san ede na osofamiri de na ini wan toemoesi moeilek situwâsi? Son sma e taki dati a toemoesi moeilek situwâsi foe osofamiri na ini a ten disi, de foe di oemasma ben bigin wroko na dorosei. Tra sma e sori go na a go di den boen gwenti nanga wet e go na baka na ini a ten disi. Èn den e kari tra reide toe. Pikinmoro toe doesoen jari pasa kaba, wan bekènti sabiman foe wet ben taki na fesi taki foeroe druk ben sa kon na tapoe na osofamiri, di a ben skrifi: „Na ini den lasti dei moeilek ten sa kon, di sa tranga foe pasa. Bika sma sa lobi densrefi nomo, sma sa lobi moni, de asranti, abi heimemre, de blasfemiasma, de trangajesi na papa nanga mama, de sondro tangi, no sa de loyaal, no sa abi natuurlijk firi foe lobi, no sa de klariklari foe meki kroederi, de ogri-ati leiman, de sondro foe man dwengi densrefi, sa abi wan krasi fasi foe doe sani, de sondro lobi gi boen sani, de toriman, no sa ke foe noti, sa abi bigimemre, sa lobi prisiri moro leki den lobi Gado” (2 Timoteus 3:1-4). Wan sma ben sa kan tweifri taki den wortoe disi e kon troe na ini a ten disi? Na ini wan grontapoe di abi den sortoe situwâsi disi, a de wan froewondroe sani taki foeroe osofamiri de na ini wan toemoesi moeilek situwâsi?
A SROTO GI WAN KOLOKOE OSOFAMIRI
15-17. Na sortoe tiri wi sa sori go na ini a boekoe disi, di abi a sroto gi wan kolokoe osofamiri?
15 Na ala sei sma e gi rai fa foe kisi kolokoe na ini na osofamiri. Na den Westsei kondre, moro nanga moro boekoe nanga tijdschrift de di e gi rai nanga praktis jepi. A problema de taki den sma di e gi rai e taki kontrari makandra, èn a moro njoen rai foe tide, tamara sma kan si en leki sani di no sa wroko.
16 We dan, pe wi kan feni tiri gi na osofamiri, di wi kan froetrow? We, joe ben sa go loekoe na ini wan boekoe di skrifi sowan 1900 jari pasa kaba? Noso joe ben sa denki taki so wan boekoe leki disi no ben sa fiti a ten disi srefisrefi moro? A troetori na, taki a troetroe sroto gi wan kolokoe osofamiri de foe feni ini joisti so wan fonten.
17 A fonten dati na bijbel. Soleki fa ala den boeweisi e sori, dan Gado ben meki sma skrifi a boekoe disi. Na ini bijbel wi e feni a froeklari disi: „Ala den Boekoe foe bijbel Gado meki sma skrifi den èn den boen foe leri sma, foe piri-ai gi sma, foe poti sani reti, nanga foe gi tranga leri na ini regtfardikifasi” (2 Timoteus 3:16). Na ini a poeblikâsi disi wi sa gi joe a deki-ati foe go loekoe fa bijbel kan jepi joe foe „poti sani reti” te joe doe wan sani na a stress èn na den problema di e miti osofamiri na ini a ten disi.
18. Foe san ede a reidelek foe erken bijbel leki wan tiri foe gi rai na ini a trowlibi?
18 Efoe joe abi a firi taki a no kan taki bijbel kan jepi foe meki osofamiri kolokoe, dan prakseri foe disi: A Sma di meki sma skrifi bijbel, na a Sma di poti a seti foe a trowlibi (Genesis 2:18-25). Bijbel e taki dati en nen na Jehovah (Psalm 83:18). En na a Mekiman èn ’a Tata, foe soema ibri famiri kisi den nen’ (Efeisesma 3:14, 15). Jehovah loekoe na osofamiri libi foe sensi a bigin foe a libisma famiri. A sabi den problema di kan opo kon èn a gi rai fa foe loesoe den. Na ini a heri historia, den sma di ben gebroiki den bijbel gronprakseri na wan opregti fasi na ini na osofamiri libi foe den, ben feni moro foeroe kolokoe.
19-21. Sortoe ondrofenitori foe a ten disi e sori a krakti di bijbel abi foe loesoe den problema na ini a trowlibi?
19 Foe eksempre, wan oso-wefi na Indonesia ben lobi dòbel srefisrefi. Foeroe jari langa a no ben sorgoe gi den dri pikin foe en èn doronomo a ben meki trobi nanga en masra. Ne a ben bigin studeri bijbel. Safrisafri na oema ben kon bribi den sani di bijbel ben taki. Di a ben gebroiki a rai foe bijbel, a ben kon tron wan moro boen wefi. Den moeiti di a ben doe èn di ben gron na tapoe bijbel gronprakseri, ben tjari kolokoe kon gi en heri osofamiri.
20 Wan oso-wefi na Spanjorokondre e taki: „Wi ben trow wán jari nomo di wi ben bigin kisi serjoesoe problema.” En nanga en masra no ben abi foeroe sani pe den de wán, èn den no ben taki foeroe nanga makandra, boiti te den ben abi wan kesekese. Ala di den ben abi wan jongoe oemapikin, tokoe den ben bosroiti foe broko a trow na lanti. Ma bifo dati ben feni presi, den ben kisi a deki-ati foe loekoe na ini bijbel. Den ben studeri a rai di bijbel gi man nanga oema di trow èn den ben bigin gebroiki a rai. A no ben teki langa di den ben kan taki na wan switi fasi nanga makandra, èn a pikin osofamiri foe den de kolokoe na ini wánfasi.
21 Bijbel e jepi moro owroe sma toe. Foe eksempre, loekoe na ondrofenitori foe wan Japan trowpaar. A masra ben atibron esi-esi èn son tron a ben doe ogri nanga tranga. Den oemapikin foe a trowpaar ben bigin studeri bijbel fosi, ala di a papa nanga mama foe den ben gens den. Ne a masra ben bigin studeri toe, ma en wefi ben tan gens. Ma baka wan toe jari, a ben kon si a boen bakapisi di bijbel gronprakseri abi na tapoe en osofamiri. Den oemapikin foe en ben sorgoe boen gi en, èn en masra ben kon abi wan moro safoe ati. Den sortoe kenki disi ben boeweigi na oema foe loekoe na ini bijbel toe, èn dati ben abi a srefi boen bakapisi tapoe en. Ala leisi na owroe oema disi e taki: „Wi ben tron wan paar di trow troetroe.”
22, 23. Fa bijbel e jepi sma foe ala sortoe kondre foe feni kolokoe na ini na osofamiri libi foe den?
22 Den sma disi de na mindri den boen foeroe sma di kon sabi a sroto gi wan kolokoe osofamiri. Den teki a rai foe bijbel èn gebroiki en. Ija, leki iniwan tra sma, den libi na ini a srefi grontapoe di e doe ogri nanga tranga, di no abi boen gwenti nanga wet èn di abi druk na ekonomia sei. Boiti dati, den na onvolmaakti sma, ma den e feni kolokoe te den e proeberi foe doe a wani foe a Sma di poti a seti foe na osofamiri. Soleki fa bijbel e taki, Jehovah Gado na „a Sma di e leri joe foe gi joesrefi wini, a Sma di e meki joe waka na tapoe a pasi di joe moesoe waka”. — Jesaja 48:17.
23 Ala di bijbel ben kaba skrifi sowan toe doesoen jari pasa kaba, tokoe a rai foe en de troetroe gi a ten disi. Moro fara, a ben skrifi gi ala sma. Bijbel a no wan Amerkan boekoe noso wan boekoe gi den Westsei kondre. Jehovah ’ben meki foe wán sma ibri nâsi foe libisma’, èn A sabi fa ala sma meki (Tori foe den Apostel 17:26). Den gronprakseri foe bijbel de gi ibri sma. Efoe joe e gebroiki den, dan joe toe sa kon sabi a sroto gi wan kolokoe osofamiri.