Den ogri jeje na kiriman!
Satan nanga den ogri jeje ala ten abi ogri-ati èn de kefarlek. Ini owroeten Satan ben kiri den meti nanga foetoeboi foe na getrow man Job. Dan a ben kiri den tin pikin foe Job, foe di a ben meki „wan bigi winti” naki na oso broko pe den ben de na ini. Baka dati Satan ben naki Job nanga „takroe soro, komoto na en ondrofoetoe te go na en ede”. — Job 1:7-19; 2:7.
Ini den dei foe Jesus, den ogri jeje ben meki wan toe sma kon babaw èn breni (Mateus 9:32, 33; 12:22). Den ben gi wan man skin-ati èn ben meki a koti en skin nanga ston (Markus 5:5). So srefi den ben meki wan boi bari boen tranga, dan ben naki en trowe na gron, èn „ben meki en skin hari-go-hari-kon hebi”. — Lukas 9:42.
Ini na ten di pasa, den ogri jeje ben meki son sma siki èn ben meki a skin foe tra sma ben hari-go-hari-kon
Ini a ten disi, Satan nanga den ogri jeje lobi foe kiri sma ete neleki ala tra ten. Te joe loekoe en boen, den ogri wroko foe den ben kon moro foeroe sensi den ben trowe den komoto na hemel. Tori di komoto na heri grontapoe e kotoigi foe na ogri-ati-fasi foe den. Den e pina son sma nanga siki. Trawan den e trobi na neti, e meki den no man sribi ofoe e meki den dren takroe dren. Trawan den e gebroiki na seks fasi. Trawan baka den e meki kon law ofoe e meki den kiri sma ofoe e kiri densrefi.
Den ogri jeje ini a ten disi e meki son sma doe ogri; den e trobi trawan na neti, e meki den dren takroe dren
Lintina, di e libi na Sranankondre, e froeteri taki wan ogri jeje ben kiri 16 sma foe en famiri èn ben pina en 18 jari langa na skin èn na jeje fasi. A e froeteri foe san ensrefi ben ondrofeni, taki den ogri jeje „abi prisiri foe pina den sma, di den abi ini den makti, ala di den sma no wani de na den ondro. Den e pina den sma disi te na a dede foe den”.
Ma Jehovah man foe kibri en foetoeboi gi den kon di Satan e kon na den tapoe foe doe den ogri. — Odo 18:10.