Bigin wan takimakandra di e hari sma prakseri
1. San wi kan leri fu den difrenti fasi fa den fosi Kresten ben bigin wan takimakandra?
1 Den fosi Kresten ben preiki a bun nyunsu gi sma fu difrenti kulturu nanga bribi (Kol. 1:23). Aladi den alamala ben taki fu a srefi boskopu, èn dati ben de Gado Kownukondre, toku den ben bigin wan takimakandra na difrenti fasi so taki a ben fiti den arkiman. Fu eksempre, di Petrus ben bigin taki nanga den Dyu di ben abi furu lespeki gi Bijbel, dan a taki san a profeiti Yoèl ben taki (Tori 2:14-17). Ma luku fa Paulus ben taki-go-taki-kon nanga den Grikisma soleki fa a skrifi na ini Tori fu den apostel 17:22-31. Na ini a ten disi, sma na ini son kontren abi lespeki gi Bijbel èn wi kan taki wantewante fu Bijbel nanga den te wi e go oso fu oso. Ma wi musu de nanga koni te wi e taki nanga den sma di no wani sabi noti fu Bijbel, noso fu kerki, noso di no de fu wan Kresten bribi.
2. Fa wi kan gebroiki den publikâsi fu yepi den sma di abi lespeki gi Bijbel èn den sma di no abi lespeki gi Bijbel?
2 Gebroiki den publikâsi na wan bun fasi: Bigin nanga a dienstyari disi, ibri tu mun wi o pristeri tra publikâsi èn wi o poti prakseri na den tijdschrift, traktaat, nanga brochure. Srefi efu moro furu sma na ini wi kontren no wani sabi noti fu Bijbel, toku a moro bun fu taki nanga den fu wan artikel di o hari den prakseri. A kan taki wi no leisi wan Bijbeltekst srefi noso wi no taki fu Bijbel a fosi leisi te wi miti a sma. Ma efu a sma wani sabi moro, dan wi kan go baka na en fu yepi en so taki a kan poti bribi na ini a Mekiman èn en Wortu. Ma na a tra sei, te wi e preiki gi sma di abi lespeki gi Bijbel, dan wi kan bigin wan takimakandra èn wi kan gebroiki publikâsi di o hari den prakseri. Fu taki en leti, ala ten wi kan pristeri a Bijbel leri-buku, noso den brochure Arki Gado nanga Arki Gado èn libi fu têgo awansi san wi musu pristeri a mun dati. A moro prenspari sani na fu bigin wan takimakandra na wan fasi di o hari sma prakseri.
3. Na sortu fasi na ati fu sma na ini wi kontren de leki wan gron?
3 Wroko a gron: Wan sma en ati de leki wan gron di musu prani (Luk. 8:15). Son gron musu wroko moro bun so taki den tru tori fu Bijbel di de leki siri kan sutu rutu èn gro na ini sma ati. Den fosi preikiman ben prani na tapu ala sortu gron, èn dati ben gi den furu prisiri fu di den ben abi bun bakapisi (Tori 13:48, 52). Wi kan abi a srefi prisiri dati te wi e poti prakseri na a fasi fa wi e bigin wan takimakandra.