No tapu yusrefi fu du moro—No denki taki yu no bun nofo
1. Fu san ede son sma e tweifri fu hori wan Bijbelstudie?
1 Yu e tweifri fu aksi sma efu den wani studeri Bijbel fu di yu denki taki yu no o man hori wan Bijbelstudie bun? Na ini owruten son futuboi fu Yehovah, soleki Moses nanga Yeremia, ben denki taki den no ben bun nofo fu du a wroko di den ben kisi fu du (Eks. 3:10, 11; 4:10; Yer. 1:4-6). Ma furu sma e denki so tu. San yu kan du fu no abi a denki dati?
2. Fu san ede wi no musu denki taki a nofo te wi e preiki oso fu oso nomo aladi wi e libi en gi tra sma fu hori Bijbelstudie?
2 Wi musu hori na prakseri taki Yehovah noiti sa aksi wi fu du wan sani di wi no man du (Ps. 103:14). Sobun a komando fu ’meki sma tron disipel’, èn fu „leri den”, na wan sani di wi man du (Mat. 28:19, 20). Yehovah no gi a grani disi wawan na den sma di abi furu ondrofeni noso na den sma di sabi du a wroko disi bun (1 Kor. 1:26, 27). Fu dati ede, wi no musu denki taki a nofo te wi e preiki oso fu oso nomo èn wi no musu libi en gi tra sma fu hori Bijbelstudie.
3. Fa Yehovah e meki taki wi bun nofo fu hori Bijbelstudie?
3 Yehovah e meki taki wi bun nofo: Na Yehovah e meki taki wi bun nofo fu meki disipel (2 Kor. 3:5). Nanga yepi fu en organisâsi, Yehovah leri wi den tru tori fu Bijbel, di srefi sma di kisi a moro hei skoroleri na ini a grontapu disi no sabi (1 Kor. 2:7, 8). Yehovah sorgu taki sma skrifi na ini Bijbel san na den difrenti fasi fa a Bigi Leriman, Yesus, ben gi leri so taki wi kan teki na eksempre fu en. A e tan gi wi leri tu nanga yepi fu a gemeente. Boiti dati, Yehovah gi wi difrenti sani fu gi sma leri fu Bijbel. A gi wi wrokosani soleki a Bijbel leri-buku, di e leri sma den tru tori fu Bijbel na wan krin fasi èn na wan fasi di makriki fu frustan. Fu hori wan Bijbelstudie kan de moro makriki leki san wi denki.
4. Fu san ede wi kan abi a frutrow taki Yehovah o yepi wi?
4 Yehovah yepi Moses nanga Yeremia fu du a wroko fu den (Eks. 4:11, 12; Yer. 1:7, 8). Wi kan aksi Yehovah tu fu yepi wi. Fu taki en leti, te wi e hori wan Bijbelstudie, dan wi e leri wan sma den tru tori fu Yehovah èn a sani disi e prisiri Gado (1 Yoh. 3:22). Fu dati ede, du muiti fu hori wan Bijbelstudie, fu di dati na wan fu den moro prisiri sani fu a preikiwroko.