Abi switifasi èn sori fa yu e firi

ALA libisma abi firi, èn den firi disi na wan prenspari sani fu a libi. Te wan sma e sori fa a e firi, dan a e sori san de na ini en ati, sortu sma a de na inisei, èn fa en e firi fu wan situwâsi noso fu tra sma. Fu di furu sma miti nanga wan lo ogri na ini den libi, èn sontron fu di a kulturu fu den de so, dati meki furu fu den sma disi no wani meki trawan sabi fa den e firi. Ma Yehovah e gi wi a deki-ati fu kweki bun fasi, èn wi musu sori trawan den fasi dati na wan fasi di fiti.​—Rom. 12:10; 1 Tes. 2:7, 8.

Den wortu di wi e taki, kan sori trawan fa wi e firi. Ma efu den wortu di wi e taki no e sori fa wi e firi, dan den wan di e arki wi, kan tweifri efu wi e taki komoto fu wi ati. Na a tra sei, efu wi taki den wortu nanga a yoisti firi, dan a fasi fa wi e taki sa de moi fu arki, èn dati baka sa naki na ati fu den sma di e arki wi.

Sori switifasi. Furu tron wi e firi switi te wi e prakseri den moi fasi di tra sma abi. Sobun, te wi e taki fu den moi fasi fu Yehovah èn te wi e taki fa wi e warderi a bunfasi fu Yehovah, dan sma musu man yere na a sten fu wi taki wi lobi En èn taki wi de nanga tangi na ati (Yes. 63:7-9). Èn te wi e taki nanga tra sma, dan wi musu taki switi nanga den tu.

Wan gwasiman ben kon na Yesus èn a begi Yesus fu dresi en. Prakseri fa yu ben o yere a sten fu Yesus di a taki: „Mi wani. Kon krin” (Mark. 1:40, 41). Luku tu efu yu man si fa wan uma di ben lasi brudu sowan 12 yari kaba, e waka miti Yesus safrisafri. Na uma e waka miti en fu bakasei, èn a e fasi den franya fu Yesus krosi. Di a kon frustan taki Yesus kon sabi disi, dan na uma e kon na fesisei aladi a e beifi, a e fadon na Yesus futu, èn a e taki na fesi ala sma fu san ede a fasi Yesus krosi èn fa dati ben dresi en. Prakseri fa Yesus e piki en a momenti dati: „Umapikin, yu bribi meki yu kon betre; go na yu oso nanga vrede” (Luk. 8:42b-48). A switifasi di Yesus ben sori na den okasi dati, e naki wi ati teleki a dei fu tide.

Te wi de neleki Yesus fu firi sari gi tra sma èn te wi wani yepi den trutru, dan dati sa de fu si na a fasi fa wi e taki nanga den. Te wi e taki nanga den na so wan switi fasi, dan den e si taki a no meki wi e meki en, ma a e komoto fu wi ati trutru. A switifasi di wi e sori, kan meki taki wan sma sa arki san wi abi fu taki. Furu fu den sani di wi e taki te wi de na ini a preikiwroko, e gi wi na okasi fu sori switifasi. Wi kan sori so wan switifasi spesrutu te wi e taki-go-taki-kon nanga trawan, te wi e gi den deki-ati, te wi e frumane den, èn te wi e sori den taki wi e frustan fa den e firi.

Efu yu abi switifasi gi trawan, dan sori dati nanga a fasi fa yu e poti yu fesi. Te yu e sori switifasi, dan dati sa hari den arkiman fu yu, neleki fa a faya fu wan krofaya e hari wan sma fu go sidon krosibei fu a krofaya tapu wan kowru neti. Efu den arkiman no man si na yu fesi taki yu abi switifasi, dan den no sa sabi efu yu e broko yu ede trutru nanga den. Wan sma no kan du neleki a abi switifasi, ma a musu de wan sani di e kon trutru fu en ati.

Sma musu yere tu na yu sten taki yu abi switifasi. Efu yu abi wan tranga grofu sten, dan a kan muilek gi yu fu taki na wan switi fasi. Ma te yu e meki muiti trutru, dan bakaten yu sa man taki nanga switifasi. Wan sani di kan yepi yu, na fu memre taki te wan sma e taki sani syatu èn a e taki gaw, dan dati e meki a e taki sondro firi. Leri fu hari wan tu wortu moro langa te yu e taki. Disi sa yepi yu fu taki na wan switi fasi.

Ma wan moro prenspari sani, na a sani na san yu e poti prakseri. Efu trutru yu e poti prakseri na den sma nanga suma yu e taki, èn efu trutru yu wani fruteri den wan sani di kan gi den winimarki, dan den sa firi dati na a fasi fa yu e taki.

Te yu hori wan fayafaya lezing, dan dati e gi trawan deki-ati. Ma te yu e hori yu lezing, dan yu musu sori switifasi tu. A no nofo taki wi e overtoigi wan sma fu kenki a fasi fa a e denki, ma wi musu doro na ati fu a sma tu, so taki a kan du san wi e taki.

Sori tra firi tu. Wan sma di brokosaka, kan frede, a kan lasi-ati, noso a kan broko en ede nanga wan sani. Ala ten wi musu de nanga prisiri, èn wi musu sori trawan tu taki wi de nanga prisiri te wi e taki nanga den. Na a tra sei, wi musu feti nanga wan tu tra firi fu no sori trawan den firi disi. Den firi disi no fiti gi wan Kresten (Ef. 4:31, 32; Fil. 4:4). Wi kan sori trawan ala sortu fasi fa wi e firi. Wi kan du dati nanga den wortu di wi e taki, nanga a sten fu wi, nanga a faya di wi e sori te wi e taki, nanga a fasi fa wi e poti wi fesi te wi e taki, èn nanga den sani di wi e meki nanga wi anu te wi e taki.

Bijbel e kari ala sortu firi di wan sma kan abi. Sontron Bijbel e kari a nen fu a firi nomo di wan sma sori. Ma tra leisi, Bijbel e fruteri wan tori di ben pasa noso wan sani di wan sma taki, èn den sani dati e sori fa wan sma e firi. Te yu e leisi den tori disi nanga wan tranga sten èn te yu e sori den firi disi nanga a fasi fa yu e taki, dan yu nanga den sma di e arki yu sa kisi moro wini fu dati. Fu man du dati, dan yu musu poti yusrefi ini a presi fu den sma fu suma yu e leisi. Ma toku, hori na prakseri taki te yu e hori wan lezing, dan a no prei yu e prei wan komediprei. Sobun, luku bun taki yu no du sani pasa marki. Sorgu taki den sma di e arki yu, man frustan krinkrin san e pasa na ini a pisi di yu e leisi.

A musu fiti na a tori di yu e taki. Te yu e taki nanga faya, dan furu tron na den sani di yu musu taki, e yepi yu fu de nanga faya. A srefi sani wi kan taki tu fu te yu musu sori switifasi nanga tra firi. Na den sani di yu musu taki, sa yepi yu fu abi switifasi tu èn fu sori tra firi di de fanowdu.

Opo yu Bijbel èn luku san skrifi na ini Mateyus 11:28-30. Baka dati dan leisi a krutuboskopu di Yesus ben gi den leriman fu Wet nanga den Fariseiman, soleki fa dati skrifi na ini Mateyus kapitel 23. A no de fu taki dati Yesus no ben taki den faya krutuboskopu disi na wan dededede fasi.

Na Genesis kapitel 44 wi kan leisi fa Yuda ben begi Yosef gi en brada Benyamin. Sortu firi yu denki wan sma musu sori te a e leisi a kapitel disi? Luku sortu firi den e sori na ini vers 13. Luku sosrefi sortu sani na ini vers 16 e sori yu fa Yuda ben firi fu a sani di meki a rampu disi pasa, èn pruberi fu si sosrefi san Yosef du, soleki fa a skrifi na Genesis 45:1.

Sobun, awansi wi e leisi noso wi e taki, toku wi no musu poti prakseri na wortu nanga prakseri wawan. Fu di efu wi wani leisi bun noso efu wi wani taki bun, dan wi sa musu poti prakseri sosrefi na a fasi fa wan sma musu firi te a e yere den wortu nanga den prakseri di wi e leisi noso e taki.