Meki trawan frustan san yu e taki

TE YU e taki, dan du moro leki fu fruteri wan tori nomo. Meki muiti fu meki den sma di e arki yu, frustan san yu e taki. Disi sa yepi yu nanga den sma fu frustan makandra bun, awansi yu e taki na ini a gemeente, noso nanga sma di no de Kotoigi.

Furu sani de di kan yepi wan sma fu taki na so wan fasi dati trawan e frustan en. Wi ben taki fu wan tu fu den na ini Les 26, „Seti a lezing fu yu na wan fasi di no muilek fu frustan”. Wi ben taki moro fara fu wan tu tra sani na ini Les 30, „Sori taki yu wani kon sabi wan sma moro bun”. Na ini a les disi, wi sa kari ete wan tu sani.

Gebroiki wortu di sma man frustan bun, taki na wan makriki fasi. Efu yu wani, taki yu nanga trawan frustan makandra bun, dan yu no musu gebroiki muilek wortu, èn yu no musu taki na wan muilek fasi tu. A Bergitaki fu Yesus na wan kefalek bun eksempre fu wan lezing di ala sma man frustan, awansi suma den de, noso awansi pe den e libi. Kande den sani di den e yere na nyun sani gi den. Ma den kan frustan san Yesus ben taki, bika a ben taki fu sani di abi fu du nanga wi alamala: fa fu de koloku, fa fu tron moro bun mati nanga trawan, fa fu du nanga den broko-ede fu a libi, èn fa fu kon sabi san na a moro bun fasi fu libi. Èn Yesus ben taki den sani di a abi na prakseri, nanga wortu di ala sma ben man frustan wantewante (Mat. kapitel 5-7). A no de fu taki dati Bijbel e gi wi furu eksempre di e sori wi fa trawan ben taki. Drape wi kan si taki sonwan ben taki sani moro langa, ma trawan ben taki sani pikinmoro syatu. A moro prenspari sani di yu wani du, na fu taki san yu abi na prakseri, na wan krin fasi di ala sma kan frustan.

Srefi efu yu e taki fu muilek tori, toku yu kan meki en makriki fu frustan gi trawan, fu di yu no e gebroiki muilek wortu èn yu e taki na wan makriki fasi. Fa yu kan du dati? No taki fu ala sortu finifini tori di yu arkiman no abi fanowdu. Seti a tori fu yu na so wan fasi taki a e meki den moro prenspari penti kon krin na fesi. Luku finifini sortu prenspari bijbeltekst yu o gebroiki. Na presi fu go esi-esi fu a wan tekst go na a trawan, dan a moro bun fu leisi ibri tekst èn fu taki fu en fosi yu go na wan tra tekst. Te yu wani fruteri sma wan bun sani di yu abi na prakseri, dan no gebroiki tumusi furu wortu so taki den no man frustan moro san yu e taki.

Te yu e hori wan oso-bijbelstudie, dan gebroiki den srefi gronprakseri disi tu. No pruberi fu tyari ala finifini tori kon na krin gi a studenti. Yepi en fu frustan den moro prenspari sani krinkrin. Bakaten, te ensrefi e studeri èn te a de na den gemeente konmakandra, dan a kan leri den tra finifini tori tu.

Efu yu wani pristeri a tori fu yu na wan fasi di no muilek gi trawan fu frustan, dan yu musu sreka yusrefi bun. Yusrefi musu frustan bun san a tori fu yu wani taki, bifo yu kan meki trawan frustan en. Te trutru yu e frustan wan sani, dan yu sa man taki fu san ede a sani dati de so. Yu sa man taki en nanga yu eigi wortu tu.

Tyari den wortu di trawan no sabi, kon na krin gi den. Sontron a de so, taki efu yu wani yu arkiman frustan san yu e taki, dan yu musu tyari den wortu di den no sabi, kon na krin gi den. No denki taki yu arkiman sabi ala sani kaba, ma no go denki tu taki den no sabi noti. Fu di yu studeri Bijbel, meki wanwan leisi yu kan kari wortu di trawan no sabi. Den sma di no abi demakandra nanga Yehovah Kotoigi, no sa man frustan wan tu wortu efu wi no e tyari den wortu dati kon na krin gi den. Den no sa frustan taki wortu soleki „fikapisi”, „getrow èn koni srafu”, „tra skapu”, nanga „bigi ipi” na wortu di e sori go na spesrutu grupu fu sma (Rom. 11:5; Mat. 24:45; Yoh. 10:16; Openb. 7:9). Na so a de tu efu wan sma no sabi na organisâsi fu Yehovah Kotoigi, dan kande a no sa frustan den wortu soleki „preikiman”, „pionier”, „kringopziener”, nanga „Memrefesa”.

Wan tu wortu de na ini Bijbel di wi e gebroiki furu, ma sosrefi sma di no de Kotoigi, e gebroiki den wortu dati furu tu. Toku a kan de fanowdu fu sori den soifri san den wortu disi wani taki. Fu eksempre, furu sma e denki taki „Armagedon” na wan bigi feti di o feti nanga sani soleki atoombom. Kande den e denki tu taki „Gado Kownukondre” abi fu du nanga wan sani di de na ini wan sma ati noso nanga wan sani na ini hemel, ma den no e si „Gado Kownukondre” leki wan trutru tiri. Te sma e taki fu a „sili”, dan trawan kan denki fu wan yeye sani di e gowe libi a libisma skin te a dede. Milyunmilyun sma e leri taki „santa yeye” na wan sma, taki a de wan pisi fu wan Dri-wánfasi. Fu di so furu sma no e hori densrefi kwetikweti na san Bijbel e taki, dati meki kande den abi yepi fanowdu fu frustan san Bijbel wani taki nanga den wortu: „Lowe gi hurudu.”​—1 Kor. 6:18.

Fu di sma no e leisi Bijbel dorodoro, dati meki a kan pasa taki den no sa frustan yu te yu e taki: „Paulus ben skrifi . . . ” noso „Lukas ben taki . . . ” A kan taki yu sa musu kari ete wan tu sani fu sori taki Paulus noso Lukas ben de wan Kresten apostel noso wan Bijbel skrifiman.

Aladi den Bijbel na ini Sranantongo e gebroiki marki soleki „meter”, wan marki di sma sabi na ini a ten disi, toku yu kan yepi den fu frustan moro bun o bigi wan sani de. Fu eksempre, luku taki a skrifi dati na ark fu Noa ben langa 150 meter, a ben bradi 25 meter, èn a ben hei 13 meter (Gen. 6:15). Ma efu yu ben o fruteri fu wan sani di den arkiman sabi èn di bigi a srefi neleki na ark, dan dati ben o yepi den fu frustan moro bun o bigi na ark ben de.

Fruteri den arkiman moro sani efu dati de fanowdu. Efu yu wani tyari wan sani kon na krin gi yu arkiman, dan a kan taki yu sa musu du moro leki fu taki wan sani soifri nomo. Na ini a ten fu Esra, dan den ben leisi a Wet na ini Yerusalem, ma den ben tyari en kon na krin tu so taki a pipel ben man frustan a Wet. Den Leifisma ben yepi a pipel fu frustan san a Wet ben wani taki, èn den ben sori den fa fu gebroiki a Wet fu yepi den nanga den sani di ben miti den na a ten dati (Neh. 8:8, 12). Na a srefi fasi, te yu e leisi bijbeltekst, dan yu musu teki yu ten fu fruteri san den wani taki, èn fa yu arkiman kan gebroiki den tekst disi.

Baka di Yesus dede èn ben opo baka, dan a sori den disipel fu en taki den sani di ben pasa nanga en, ben de wan kontru fu den Buku fu Bijbel. Yesus ben sori den tu taki den abi a frantwortu fu gi kotoigi fu den sani di den si (Luk. 24:44-48). Yu kan yepi sma si fa den sani di den e leri abi fu du nanga den eigi libi. Te yu e du dati, dan den sa man frustan moro bun san yu e leri den.

Fa na ati de na ini a tori. Ma a no de fu taki, srefi efu yu tyari wan sani kon na krin gi wan sma, toku tra sani de ete di sa meki taki a sma e frustan a tori noso no e frustan en. Te wan sma en ati no wani teki sani, dan dati de neleki wan skotu di e tapu en fu frustan san yu e taki (Mat. 13:13-15). Te wan sma e denki sani soso na skin fasi, dan yeye afersi na don sani gi en (1 Kor. 2:14). Te wan sma e denki na so wan fasi, dan a ben o bun fu tapu a takimakandra wantewante, dati wani taki, na a momenti dati a ben o bun fu no taki go doro.

Ma sontron wan sma no man teki san yu e taki, fu di a sma abi problema na ini en libi. Ma efu ibri tron baka a sma disi e kisi na okasi fu yere den tru tori fu Bijbel, dan baka wan pisi ten dati kan meki taki so wan sma e bigin teki den tru tori disi. Di Yesus taigi den apostel fu en taki sma ben o wipi en èn baka dati den ben o kiri en, dan den apostel no ben frustan disi. Fu san ede den no ben frustan disi? Fu di dati no ben de san den ben fruwakti, èn den no ben wani srefisrefi taki dati ben musu pasa nanga Yesus! (Luk. 18:31-34) Ma toku, bakaten, 11 fu den apostel dati ben kon frustan a tori. Disi ben de fu si, fu di den du soifri san Yesus leri den.

San wan bun eksempre kan du. Sma kan frustan moro bun san wi e taki, no nanga den wortu di wi e taki wawan, ma sosrefi nanga den sani di wi e du. Furu sma di ben go na wan Kownukondre zaal gi a fosi tron, ben taki dati den no e memre den sani di taki, ma den e memre a lobi di den ben si krinkrin. A de di wi de nanga prisiri, yepi furu ososma tu fu arki den tru tori fu Bijbel. Wan tu sma si a lobi bun-ati di Yehovah en pipel e sori gi makandra. Den si sosrefi taki aladi trawan ben gens Yehovah en pipel, toku en pipel ben yepi makandra so switi. Disi meki taki den sma disi kon na a bosroiti taki den Kotoigi musu fu abi a tru bribi. Sobun, te yu e meki muiti fu meki sma frustan den tru tori fu Bijbel, dan prakseri fa yu e tyari dati kon na krin, èn prakseri sosrefi sortu eksempre yusrefi e gi.