Waktitoren LIBRARY TAPU INTERNET
Waktitoren
LIBRARY TAPU INTERNET
Sranantongo
  • BIJBEL
  • BUKU
  • KONMAKANDRA
  • kr kap. 10 blz. 112-120
  • A Kownu e krin na anbegi fu en pipel

Felem no de na a pisi disi.

Sorry, wan sani no go bun di wi pruberi fu drai a felem.

  • A Kownu e krin na anbegi fu en pipel
  • Gado Kownukondre e tiri!
  • Edeprakseri
  • A srefi sortu tori
  • A meki „den Leifisma” kon krin
  • „Un hori unsrefi krin”
  • Kresten musu hori Kresneti?
  • Kresten musu gebroiki a kroisi?
  • A e puru „den ogriwan na mindri den reti-ati sma”
  • Pe kresneti foe a ten disi komopo
    A Waktitoren—A e taki fu Yehovah Kownukondre 1997
  • Kresten musu hori Kresneti?
    A Waktitoren—A e taki fu Yehovah Kownukondre (Gi a preikiwroko)—2017
  • Kresneti—Fu San Ede A De na ini den Owstusei Kondre Srefi?
    A Waktitoren—A e taki fu Yehovah Kownukondre 1999
  • Kresneti — Foe san-ede a pôpi so na Japan?
    A Waktitoren—A e taki fu Yehovah Kownukondre 1991
Moro sani
Gado Kownukondre e tiri!
kr kap. 10 blz. 112-120

KAPITEL 10

A Kownu e krin na anbegi fu en pipel

FU SAN A KAPITEL E TAKI

Wi o luku fu san ede Yesus yepi den bakaman fu en fu tapu nanga falsi leri èn fa a du dati

1-3. San Yesus du di a si sma e du ala sortu sani na ini a tempel di no fiti?

YESUS ben abi furu lespeki gi a tempel na ini Yerusalem, fu di a ben sabi taki bun langa kaba a tempel ben de a moro prenspari presi na grontapu pe sma ben e anbegi a tru Gado. Ma te sma e anbegi a santa Gado Yehovah, dan den musu du dati na wan krin noso soifri fasi. Sobun, yu kan frustan fa Yesus ben e firi di a kon na a tempel tapu 10 Nisan na ini a yari 33 èn a si fa sma ben e du sani na ini a tempel di no fiti srefisrefi. San den sma ben e du?​—Leisi Mateyus 21:12, 13.

2 Na ini a Fesidyari fu den sma di no de Dyu, gridi bisnisman nanga sma di ben e kenki moni ben e bedrigi den anbegiman di ben e kon drape fu tyari ofrandi gi Yehovah.a Yesus „yagi ala den sma go na dorosei di ben e seri èn ben e bai sani na ini a tempel. A drai den tafra tapu fu den sma di ben e broko moni” (Luku Nehemia 13:7-9.) A taigi den gridi man dati taki den e meki na oso fu en papa tron „wan presi pe fufuruman e tan”. Na so Yesus sori taki a ben abi lespeki gi a tempel nanga a Sma di den ben e anbegi drape. Ala ten sma musu anbegi en Papa na wan krin fasi!

3 Hondrohondro yari baka di Yesus tron a Mesias Kownu, a krin wan tra tempel. A tempel disi na wan agersi tempel di abi fu du nanga ala sma di wani dini Yehovah soleki fa En wani. Sobun, san na a agersi tempel di a meki kon krin?

A meki „den Leifisma” kon krin

4, 5. (a) Fa den salfu bakaman fu Yesus ben kon krin na ini a pisi ten fu 1914 te na a bigin fu 1919? (b) A de so taki Yehovah ben kaba krin a pipel fu en? Tyari disi kon na krin.

4 Kapitel 2 fu a buku disi e taki dati baka di Yesus tron Kownu na ini 1914, en nanga en Papa kon luku fa sani ben e go na ini na agersi tempel. A tempel disi na den sani di Gado seti, so taki sma kan anbegi en na wan krin fasi.b Di den kon, den si taki den salfu Kresten noso „den Leifisma” ben musu kon krin noso soifri (Mal. 3:1-3). Sensi 1914 te na a bigin fu 1919 Yehovah „krin” en pipel fu di a gi pasi taki den kisi difrenti tesi nanga problema. Koloku taki den salfuwan ben man horidoro di den tesi disi miti den. Now den kon krin èn den de fayafaya fu sori taki den e horibaka gi a Mesias Kownu!

5 Ma a de so taki Yehovah ben kaba krin en pipel? Nôno. Na ini den lasti dei Yehovah meki a Mesias Kownu yepi den bakaman fu en fu kon moro krin, so taki den kan tan na ini na agersi tempel. Na ini den tu kapitel baka a wan disi wi o luku tu fasi fa a meki den kon moro krin: (1) A yepi den fu libi wan moro krin libi èn (2) a seti sani moro bun na ini na organisâsi. Ma meki wi luku fosi fa a meki na anbegi fu den kon moro krin. Yesus du furu fu yepi den bakaman fu en fu anbegi Gado na wan krin fasi. Sonwan fu den sani di a du ben de krin fu si, ma tra sani di a du wi no si. Te wi e prakseri den sani disi, dan a e tranga wi bribi trutru.

„Un hori unsrefi krin”

6. Te wi e luku san Yehovah taigi den Dyu katiboman, dan san dati e leri wi fu a fasi fa wi musu anbegi Gado?

6 Meki wi luku san Yehovah taigi den Dyu katiboman di ben o gowe libi Babilon na ini a yari 537 Fosi Krestes. (Leisi Yesaya 52:11.) Den Dyu ben o drai go baka na Yerusalem fu bow a tempel baka èn fu seti a tru anbegi baka (Esra 1:2-4). Yehovah ben wani taki en pipel ben musu gowe libi iniwan sani di ben abi fu du nanga den falsi gado fu Babilon. Luku san a taigi den: „No fasi nowan sani di no krin”, „komoto drape” èn „un hori unsrefi krin”. A soifri anbegi fu Yehovah no musu moksi nanga nowan sani di abi fu du nanga falsi anbegi. San disi e sori wi? Te wi wani anbegi Yehovah na wan krin fasi, dan wi no musu abi noti fu du nanga nowan leri noso gwenti fu falsi anbegi.

7. Fa Yesus yepi den bakaman fu en fu tan anbegi Gado na wan krin fasi?

7 Syatu baka di Yesus tron Kownu, a seti sani fu yepi den bakaman fu en fu tan anbegi Gado na wan krin fasi. Na ini 1919 a poti wan koni srafu di de fu frutrow fu luku den bakaman fu en (Mat. 24:45). Na a pisi ten dati den Bijbel Ondrosukuman no ben e horibaka moro gi furu falsi kerkileri. Ma na anbegi fu den ben musu kon moro krin. Nanga yepi fu a koni srafu, Krestes meki den bakaman fu en kon si safrisafri taki den ben musu tapu nanga son fesa nanga gwenti (Odo 4:18). Meki wi luku wan tu fu den.

Kresten musu hori Kresneti?

8. Sortu sani di abi fu du nanga Kresneti den Bijbel Ondrosukuman ben sabi langa ten kaba, ma san den no ben frustan ete?

8 Langa ten kaba den Bijbel Ondrosukuman ben si taki Kresneti komoto fu sma di ben e anbegi falsi gado. Den ben si tu taki Yesus no gebore tapu 25 december. A Waktitoren fu december 1881 ben taki: „Milyunmilyun sma di de na ini den Kresten kerki ben e anbegi falsi gado fosi. Den ben kenki a nen fu a kerki fu den, ma den sani di den ben e bribi no ben kenki. Na so den priester fu den falsi gado tron Kresten priester èn den fesa fu den falsi gado tron Kresten fesa. Kresneti na wan fu den fesa disi.” Na ini 1883 wan artikel ben de na ini A Waktitoren di ben nen „O ten Yesus gebore?” Na artikel ben sori taki Yesus gebore na a pisi ten fu oktober.c Ma den Bijbel Ondrosukuman no ben frustan ete taki den ben musu tapu fu hori Kresneti. Srefi a Betelfamiri na Brooklyn tan hori a fesa disi. Ma baka 1926 sani kenki. Fu san ede?

9. San den Bijbel Ondrosukuman kon frustan fu Kresneti?

9 Baka di den Bijbel Ondrosukuman go luku sani moro fini, den kon frustan a tori disi moro krin. Di den luku pe Kresneti komoto èn san sma e du na a fesa dati, dan den kon frustan taki a fesa disi e gi Gado porinen. Na ini a tijdschrift „A Gowtu ten” fu 14 december 1927 wan artikel ben de di ben nen „Pe Kresneti komoto?” Na artikel ben taki dati Kresneti na wan fesa fu sma di ben e anbegi falsi gado èn sma e prakseri soso prisiri te den e hori a fesa dati. Na artikel sori taki Krestes no taigi den bakaman fu en fu hori a fesa dati. Na a kaba fu na artikel ben skrifi: „Wan lasti sani di e sori taki den sma di e dini Yehovah nanga den heri ati no kan hori Kresneti kwetikweti, na taki a grontapu disi, a sondu skin, èn Didibri lobi a fesa disi èn den wani taki a e go doro.” A no de fu taki dati a Betelfamiri no hori Kresneti na ini december fu a yari dati èn den no hori en noiti moro!

„PE KRESNETI KOMOTO”

NA INI december 1928 Brada Richard H. Barber (na tapu a fowtow na tapu bladzijde 114) hori wan krakti lezing na radio di ben abi fu du nanga Kresneti. Bakaten den skrifi wan artikel fu a lezing disi na ini „A Gowtu Ten” fu 12 december 1928. Na artikel ben nen „Pe Kresneti komoto”. Luku wan tu sani di ben skrifi na ini a lezing disi:

  • „Satan . . . meki sma bribi taki a moro prenspari fu memre taki a beibi Yesus gebore leki fu memre a dede fu a man Yesus, fu di a no wani taki sma frustan o prenspari a lusu-paiman de.”

  • „Ala sma sabi taki na a pisi ten fu Kresneti sma e denki soso prisiri, den e dringi sopi te fu drungu èn den e gi densrefi abra na den eigi lostu . . . A no de fu taki dati nowan fu den sani disi e gi grani na Yehovah Gado nanga en Manpikin.”

  • „Now Didibri kori sma na so wan fasi taki den kerki abi fesa, fesadei, faste-dei, nanga santa dei di e gi grani na falsi gado . . . Didibri kori sma fu teki den fesa disi abra èn a meki den kenki den fesa disi kon tron Kresten fesa. Na so a e wisiwasi a Moro Hei Gado Yehovah.”

A lasti leisi di a Betelfamiri e hori Kresneti na ini 1926, wan marki de lontu na ede fu Richard H. Barber

A lasti leisi di Kresneti hori na Betel na Brooklyn, na ini 1926

10. (a) Sortu sani fu Kresneti ben kon na krin na ini wan lezing na ini december 1928? (Luku sosrefi a faki „Pe Kresneti komoto”.) (b) Fa Gado pipel kisi rai fu tapu nanga tra fesa nanga fesadei di no bun? (Luku a faki „San son fesa nanga fesadei wani taki trutru”.)

10 A yari baka dati den Bijbel Ondrosukuman kon frustan moro fu Kresneti. Tapu 12 december 1928 Brada Richard H. Barber, wan fu den brada di ben e teki fesi na a edekantoro, ben hori wan lezing na radio di ben e sori taki a fesa disi komoto fu falsi anbegi. San Gado pipel du di den kisi krin rai na ini a lezing disi fu na edekantoro? Brada Charles Brandlein di e memre fa en osofamiri tapu fu hori Kresneti, taki: „A de so taki wi ben mandi di wi ben musu tapu nanga den fesa fu falsi gado? Kwetikweti! . . . A ben de neleki wi puru wan doti krosi na wi skin, dan wi trowe en gowe.” Brada Henry A. Cantwell, di ben de wan kring-opziener bakaten, taki a srefi sortu sani: „Aladi wi ben gwenti hori a fesa disi, toku wi ben breiti fu tapu nanga en fu kan sori Yehovah taki wi lobi en.” Den trutru bakaman fu Krestes ben de klariklari fu tyari kenki kon èn fu tapu nanga wan fesa di komoto fu falsi gado.d​—Yoh. 15:19; 17:14.

11. Fa wi kan sori taki wi e horibaka gi a Mesias Kownu?

11 Den Bijbel Ondrosukuman na moi eksempre gi wi! Te wi e prakseri san den du, dan a bun fu aksi wisrefi: ’Fa mi e si den rai di wi e kisi fu a koni srafu? Mi breiti fu teki den rai disi èn mi e du san den brada disi e taki?’ Te wi de klariklari fu gi yesi na den, dan wi e sori taki wi e horibaka gi a Mesias Kownu di e meki a koni srafu gi den futuboi fu en nyanyan na a reti ten.​—Tori 16:4, 5.

SAN SON FESA NANGA FESADEI WANI TAKI TRUTRU

NA INI den yari di pasa Krestes yepi den bakaman fu en fu no de wan pisi fu grontapu. Frukufruku kaba Gado pipel ben sori taki tru Kresten no kan hori son fesa nanga fesadei. Luku san son artikel ben taki fu sonwan fu den:

  • Pasen. „Pasen ben de wan prenspari fesa gi den sma di ben e anbegi falsi gado. Sma di e taki dati den na Kresten teki a fesa disi abra èn bakaten a tron wan fesa fu den Kresten kerki.”​—„A Gowtu Ten”, 12 december 1928, bladzijde 168.

  • Valentijnsdag. „Valentijnsdag na wan santa dei gi son sma. Ma te wi e luku pe a komoto, dan a krin taki a no santa srefisrefi.”​—„A Gowtu Ten”, 25 december 1929, bladzijde 208.

  • Friyaridei. „Bijbel e taki fu tu friyaridei nomo. Wan ben de fu Farao, a kownu fu Egepte na ini a ten fu Yosef, èn a trawan ben de fu Herodes di meki sma kiri Yohanes a Dopuman. Ala den tu man disi ben de sma di ben e anbegi falsi gado. Na nowan presi Bijbel e sori taki Gado pipel ben e hori friyari-oso.”​—„A Gowtu Ten”, 6 mei 1936, bladzijde 499.

  • Nyun-Yari. „Na Nyun-Yari sma lobi hori bradyari fesa èn den e dringi sopi te fu drungu. A heri fasi fa sma e hori en, e sori taki wan Kresten no kan teki prati na a fesa disi, awinsi tapu sortu dei a e fadon. Den fosi Kresten no ben e hori a fesa disi.”​—„Ontwaakt!”, 22 december 1946, bladzijde 24.

Kresten musu gebroiki a kroisi?

A kroisi nanga a kownu-ati

A kroisi nanga a kownu-ati (Luku paragraaf 12 nanga 13)

12. Fa den Bijbel Ondrosukuman ben e si a kroisi furu yari langa?

12 Furu yari langa den Bijbel Ondrosukuman ben e si a kroisi leki wan sani di e sori taki den na Kresten. Den ben frustan taki den no ben musu anbegi a kroisi, fu di den ben sabi taki afkodrei no bun (1 Kor. 10:14; 1 Yoh. 5:21). Sensi 1883, A Waktitoren ben sori kaba taki „ala fasi fu afkodrei na tegu sani gi Gado”. Ma toku den Bijbel Ondrosukuman no ben e si en leki wan fowtu sani fu gebroiki a kroisi na son okasi. Fu eksempre, den ben feni en wan grani fu weri wan spesrutu pina na tapu den krosi. A pina disi ben abi wan kroisi nanga wan kownu-ati na tapu. Den ben feni taki a pina disi ben e sori taki den ben o kisi a kownu-ati fu libi efu den ben o tan dini Gado te na dede. Na ini 1891 den bigin poti a kroisi nanga a kownu-ati na tapu a kafti fu A Waktitoren tu.

13. Sortu sani di abi fu du nanga a kroisi, den bakaman fu Krestes kon frustan? (Luku sosrefi a faki „Safrisafri den kon si san a kroisi wani taki trutru”.)

13 Den Bijbel Ondrosukuman ben lobi a kroisi nanga a kownu-ati. Ma syatu fosi 1930 den bakaman fu Krestes bigin si san a kroisi wani taki trutru. Brada Grant Suiter, di ben de wan memre fu a Tiri Skin bakaten, e memre san den ben taki na wan bigi konmakandra di ben hori na ini 1928 na ini Detroit, Michigan na Amerkankondre. A taki: „Na a konmakandra den no ben sori nomo taki a kroisi nanga a kownu-ati no prenspari, ma den sori tu taki a fowtu.” Na ini den yari baka dati den kon si a tori disi moro krin. A ben de krin taki den no ben kan gebroiki a kroisi efu den ben wani anbegi Gado na wan krin èn soifri fasi.

SAFRISAFRI DEN KON SI SAN A KROISI WANI TAKI TRUTRU

Wan man fasi a pina di abi a kroisi nanga a kownu-ati na en dyakti, na tapu en lapelkarta
  • Den pina di abi a kroisi nanga a kownu-ati no prenspari èn den no bun tu.​—Wan kongres na ini Detroit, Michigan na Amerkankondre 1928.

  • Den pina di abi a kroisi nanga a kownu-ati de leki den popki fu falsi gado.​—Preparation, 1933, bladzijde 239.

  • A kroisi e kon fu den sma di ben e anbegi falsi gado.​—„A Gowtu Ten”, 28 februari 1934, bladzijde 336.

  • Yesus dede na wan postu. A no dede na wan kroisi.​—„A Gowtu Ten”, 4 november 1936, bladzijde 72; Riches, 1936, bladzijde 27.

Na ini furu Bijbel den vertaal a Griki wortu stauros leki „kroisi”. Ma luku fa son buku e sori san a wortu disi wani taki:

  • „Fu taki en leti, a Griki wortu [stauros] . . . wani taki wan postu nomo.”​—Cyclopedia of Biblical, Theological, and Ecclesiastical Literature.

  • „Solanga yu si a wortu disi, a abi fu du nanga wan postu. A no de a srefi leki wan ’kroisi’.”​—Crucifixion in Antiquity.

  • „Wan steifi postu, neleki den wan di gronman e gebroiki fu meki skotu. A no wani taki nowan tra sani.”​—History of the Cross.

  • „Noiti a wani taki tu postu, awinsi fa yu ben o poti den na tapu makandra. Ala ten a de wán postu nomo.”​—The Companion Bible.

  • „Wan postu di tanapu leti-opo . . . Noiti a wani taki tu pisi udu na tapu makandra awinsi fa yu ben o poti den.”​—A Critical Lexicon and Concordance.

14. Fa Gado pipel ben feni den sani di den kon sabi fu a kroisi?

14 Fa Gado pipel ben feni den sani di den kon sabi fu a kroisi? A de so taki den tan gebroiki a kroisi nanga a kownu-ati di den ben lobi so te? Lela Roberts di dini Yehovah furu yari langa taki: „Di wi kon frustan san a kroisi ben wani taki trutru, a no ben muilek fu poti en na wan sei.” Wan tra fayafaya sisa di nen Ursula Serenco ben taki wan sani di ben sori fa furu brada nanga sisa ben e denki. A taki: „Wi ben lobi a kroisi nanga a kownu-ati, fu di a ben e memre wi na a dede fu wi Masra èn a ben e sori taki wi na fayafaya Kresten. Ma di wi kon frustan taki a abi fu du nanga falsi gado, dan wi ben breiti taki a leti skèin moro krin na tapu wi pasi, soleki fa Odo 4:18 e sori.” Den trutru bakaman fu Krestes no ben wani du nowan sani di abi fu du nanga falsi anbegi!

15, 16. Fa wi kan sori taki wi wani hori den fesidyari fu na agersi tempel fu Yehovah krin?

15 Na so wi e si sani na ini a ten disi. Wi e si krin taki Krestes e gebroiki a koni srafu di de fu frutrow fu yepi en pipel fu tan anbegi Gado na wan krin fasi. Sobun, te den e warskow wi taki son fesa nanga gwenti e komoto fu falsi anbegi, dan wantewante wi e gi yesi. Neleki den brada nanga sisa di ben e libi na a bigin fu a pisi ten di Yesus kon, wi e sorgu tu taki den fesidyari fu na agersi tempel fu Yehovah tan krin.

16 Na ini den lasti dei Krestes du son sani tu di wi no man si. A du den sani disi fu kibri den gemeente fu Yehovah gi sma di wani pori na anbegi fu wi. San na den sani disi? Meki wi luku san a du.

A e puru „den ogriwan na mindri den reti-ati sma”

17, 18. Tyari kon na krin san den sani disi fu na agersitori fu a fisinèt wani taki: (a) den fringi wan fisinèt go na ini se, (b) „ala sortu fisi fasi na ini” a fisinèt, (c) den poti den bun fisi na ini bari, èn (d) den trowe den fisi di no bun.

17 Ala ten Kownu Yesus Krestes e luku den gemeente fu Gado pipel na heri grontapu. Krestes nanga den engel e prati den ogrisma fu den reti-ati sma, aladi wi no sabi krin fa den e du dati. Yesus ben taki fu a sani disi di a ben fruteri na agersitori fu a fisinèt. (Leisi Mateyus 13:47-50.) San na agersitori disi wani taki?

Fisiman e hari wan net nanga fisi komoto na ini a se

A fisinèt na a Kownukondre preikiwroko di e du na mindri libisma di de leki wan se (Luku paragraaf 18)

18 Den fringi „wan fisinèt . . . go na ini se”. A fisinèt na a Kownukondre preikiwroko di e du na mindri libisma di de leki wan se. „Ala sortu fisi fasi na ini.” A bun nyunsu e hari ala sortu sma. A e hari sma di e meki muiti fu tron tru Kresten. A e hari sma tu di ben wani sabi moro na ini a bigin, ma di no wani du muiti fu kon na ini a tru anbegi.e Den „piki ala den bun fisi puru èn den poti den na ini bari”. Reti-ati sma e kon makandra na ini den gemeente di de leki den bari, so taki den kan anbegi Yehovah na wan krin fasi. ’Den trowe den fisi di no bun.’ Na ini den lasti dei Krestes nanga den engel e „puru den ogriwan na mindri den reti-ati sma”.f Dati meki den sma di no abi wan krin ati èn di no wani libi den falsi leri nanga gwenti, no kisi pasi fu pori den gemeente.g

19. Te yu e prakseri san Krestes du fu meki Gado pipel tan krin èn fu meki a tru anbegi tan soifri, dan fa yu e firi?

19 A e tranga wi bribi fu si taki wi Kownu Yesus Krestes e kibri den wan di a e sorgu, a no so? A moi fu si taki Krestes abi a srefi faya di a ben abi na a ten di a krin a tempel di a ben de na grontapu. Te now ete a e horibaka fayafaya gi a tru anbegi èn gi tru anbegiman. Wi de nanga tangi trutru taki Krestes du ala muiti fu meki Gado pipel tan krin èn fu meki a tru anbegi tan soifri! Wi kan sori taki wi e horibaka gi a Kownu nanga en Kownukondre te wi e wai pasi gi ala sani di abi fu du nanga falsi anbegi.

a Na a tempel den Dyu ben musu gebroiki wan tra sortu moni fu pai a belasting fu a tempel. Den man di ben e kenki moni ben meki den sma pai den fu kenki a moni gi den. Son leisi den sma ben musu bai meti tu fu tyari leki ofrandi. Soleki fa a sori, dan Yesus ben kari den bisnisman „fufuruman”, fu di den ben aksi den sma tumusi furu moni gi a wroko di den ben e du gi den.

b Dyaso na grontapu a pipel fu Yehovah e dini en na ini den fesidyari fu a bigi agersi tempel fu en.

c Na artikel disi ben sori taki ’Yesus no ben kan gebore na ini a kowru pisi ten fu a yari, fu di Bijbel e sori taki den skapuman ben de na dorosei nanga den skapu fu den.’​—Luk. 2:8.

d Na ini wan brifi fu 14 november 1927 Brada Frederick W. Franz skrifi: „Wi no o hori Kresneti a yari disi. A Betelfamiri bosroiti fu no hori Kresneti moro.” Wan tu mun baka dati Brada Franz skrifi na ini wan brifi fu 6 februari 1928: „Safrisafri Masra e meki wi kon krin, so taki wi no e meki den srefi fowtu leki a Babilon organisâsi fu Didibri.”

e Fu eksempre, na ini 2013 wi ben abi 7.965.954 preikiman èn 19.241.252 sma ben go na a Memrefesa fu a dede fu Krestes di wi e hori ibri yari.

f A prati di den e prati den bun fisi fu den fisi di no bun no de a srefi leki a prati di den e prati den skapu fu den bokoboko (Mat. 25:31-46). A prati di den e prati den skapu fu den bokoboko, na te sma o kisi krutu fu a lasti leisi na a ten fu a bigi banawtu di e kon. Solanga a ten dati no doro, den sma di de leki den fisi di no bun kan drai kon na Yehovah èn den kan kon na ini den gemeente di de leki den bari fu na agersitori.​—Mal. 3:7.

g Te fu kaba den o trowe den fisi di no bun go na ini wan onfu. Disi e sori taki den o kisi pori na ini a ten di e kon.

A Kownukondre na wan trutru sani gi yu?

  • San Krestes seti fu yepi den bakaman fu en fu tan anbegi Gado na wan krin fasi?

  • Fa Krestes gebroiki en koni srafu di de fu frutrow fu meki den bakaman fu en si taki den no kan hori Kresneti moro èn taki den no kan gebroiki a pina di ben abi a kroisi nanga a kownu-ati na tapu?

  • Te yu e prakseri san Krestes du fu meki a tru anbegi tan soifri, dan fa yu e firi?

    Sranantongo buku (1978-2025)
    Log Out
    Log In
    • Sranantongo
    • Seni en gi wan sma
    • Settings
    • Copyright © 2025 Watch Tower Bible and Tract Society of Pennsylvania
    • Gebruiksvoorwaarden
    • Privacybeleid
    • Privacyinstellingen
    • JW.ORG
    • Log In
    Seni en gi wan sma