MWBR19 09 Verwijzing gi Wi Kresten libi nanga a preikiwroko studie-buku

2-8 SEPTEMBER

GUDU NA INI GADO WORTU | HEBREWSMA 7-8

„Wan priester fu têgo, neleki Melkiseidek”

it-2-O 286

Melkiseidek

Kownu fu Salem fu owruten èn „priester fu a Moro Hei Gado” Yehovah (Ge 14:18, 22). En na a fosi priester di kari na ini Bijbel. Wan pisi ten fosi a yari 1933 Fosi Krestes a ben de priester kaba. Fu di a ben de kownu fu Salem, san wani taki „Freide”, meki Paulus e kari Melkiseidek a „Kownu fu Freide” èn sosrefi „Kownu di e du san reti” fu di na dati en nen wani taki (Heb 7:1, 2). Soleki fa a sori, dan Salem fu owruten ben de a moro prenspari pisi fu a foto di wi kon sabi bakaten leki Yerusalem. A nen fu a presi disi de fu si tu na ini a wortu Yerusalem èn son leisi sma e kari Yerusalem „Salem” tu.​—Ps 76:2.

Baka di Abram (Abraham) wini Kedorla-omer nanga den kownu di ben de nanga en, dan a famiri-edeman Abram kon na Syafei-lagipresi noso „Kownu-lagipresi”. Drape Melkiseidek „tyari brede nanga win kon” èn a blesi Abraham. A taki: „Meki a Moro Hei Gado, Mekiman fu hemel nanga grontapu, blesi Abram. Blesi fu a Moro Hei Gado, di meki yu wini den feanti fu yu!” Baka dati Abraham gi a kownu disi di ben de priester tu, „wan di fu tin pisi fu ala san a ben abi”. A gi en „den moro bun sani di a teki fu den feanti fu en” di a ben wini na ini a feti.​—Ge 14:17-20; Heb 7:4.

it-2-O 287 ¶5

Melkiseidek

Fa a kan taki sma no sabi ’o ten Melkiseidek gebore noso o ten a dede’?

Paulus ben taki wan sani fu Melkiseidek di e hari wi prakseri. A ben taki: „Sma no sabi suma na en papa nanga mama, noso suma na den afo fu en èn den no sabi tu o ten a gebore noso o ten a dede, ma fu di a kon de leki a Manpikin fu Gado, meki a e tan wan priester fu ala ten” (Heb 7:3). Neleki tra libisma, Melkiseidek ben gebore èn a dede tu. Ma wi no sabi suma na en papa nanga mama, suma na den afo fu en, noso suma na en bakapikin. Bijbel no e taki tu o ten a gebore èn o ten a dede. Sobun, a fiti taki Melkiseidek e prenki Yesus Krestes, di e tan wan priester fu ala ten. Melkiseidek no teki a priesterwroko abra fu nowan sma èn nowan sma teki a wroko fu en abra. Na a srefi fasi nowan granpriester di ben de leki Krestes, ben de fosi en èn Bijbel e sori tu taki noiti wan granpriester o kon baka en. Aladi Yesus ben de fu a lo fu Yuda èn a gebore leki wan bakapikin fu Kownu David, toku a no den sani dati meki a tron priester èn a no den sani dati meki a tron kownu nanga priester na a srefi ten. A tron priester nanga kownu fu di Yehovah srefi ben pramisi en dati.

it-2-O 287

Melkiseidek

A e prenki Krestes leki priester. Na ini wan prenspari profeititori di abi fu du nanga a Mesias, Yehovah e pramisi David en „Masra”: „Yu na wan priester fu têgo neleki Melkiseidek!” (Ps 110:1, 4) A psalm disi ben e sori den Hebrewsma fu san ede den ben kan bribi taki a pramisi Mesias ben o de kownu nanga priester na a srefi ten. Na ini a brifi di na apostel Paulus skrifi gi den Hebrewsma, a sori krin taki na „Yesus” na a sma dati „di tron wan granpriester fu têgo, neleki Melkiseidek”. Na so sma no ben abi fu tweifri na dati.​—Heb 6:20; 5:10.

Diki moro dipi

it-2-O 1094 ¶5

Frubontu

Fu san ede a Wetfrubontu ’no ben de fanowdu moro’?

Baka di Gado meki a profeiti Yeremia taki dati a ben o meki wan nyun frubontu, dan a Wetfrubontu ’no ben de fanowdu moro’ (Yer 31:31-34; Heb 8:13). Na ini a yari 33, a Wetfrubontu kon na wan kaba di Krestes dede na a pinapostu (Kol 2:14), èn a nyun frubontu kon na en presi.​—Heb 7:12; 9:15; Tor 2:1-4.

it-1-O 1077 ¶1-2

Yesus Krestes leki granpriester. Na ini a Bijbel buku Hebrewsma a e kon na krin taki sensi di Yesus Krestes opo baka èn a go na hemel, a tron „wan granpriester fu têgo, neleki Melkiseidek” (Heb 6:20; 7:17, 21). Fu sori taki a priesterwroko fu Krestes prenspari moro a di fu Aron nanga den bakapikin fu en a skrifiman fu a buku Hebrewsma e sori taki na a Moro Hei Gado ben poti Melkiseidek leki kownu èn leki priester. A no kisi den frantwortu dati fu den afo fu en. Krestes Yesus no ben de fu a lo fu Leifi, ma fu a lo fu Yuda èn a ben de wan bakapikin fu David. Sobun a no fu di a ben de wan bakapikin fu Aron meki a tron priester, ma na Gado srefi poti en leki priester, neleki fa a ben du dati nanga Melkiseidek (Heb 5:10). Psalm 110:4 e taki: „Yehovah meki wan sweri (èn a no o kenki en prakseri). A taki: ’Yu na wan priester fu têgo neleki Melkiseidek!’” A pramisi disi meki taki Krestes tron Kownu nanga Priester na ini hemel. Boiti dati, a kisi makti na ini a Kownukondre tu fu di a de wan bakapikin fu David. Na so a kisi a reti fu tron kownu soleki fa Gado ben pramisi na ini a frubontu di a ben meki nanga David (2Sa 7:11-16). Den sani disi meki taki a tron kownu nanga priester, neleki Melkiseidek.

Ete wan sani de di e meki taki a priesterwroko fu Krestes prenspari moro a di fu Aron nanga den bakapikin fu en. Ala ten a ben de so taki a moro bigiwan e blesi a moro pikinwan. Na so Melkiseidek ben blesi Leifi. Ma fa dati kan efu Leifi no ben gebore ete? We, wi sabi taki Abraham ben pai Melkiseidek, a kownu fu Salem di ben de priester tu, wan di fu tin pisi fu den moro bun sani di a ben teki fu den feanti fu en. Fu di Leifi na wan bakapikin fu en meki wi kan taki dati Leifi, di ben de na afo fu den Dyu priester, ben pai a di fu tin pisi dati tu. Sobun, di Melkiseidek blesi Abraham wi kan taki dati a blesi Leifi tu (Heb 7:4-10). Boiti dati, na apostel Paulus e sori tu taki „sma no sabi suma na [Melkiseidek] en papa nanga mama, noso suma na den afo fu en èn den no sabi tu o ten a gebore noso o ten a dede”. Disi e prenki a têgo priesterwroko fu Yesus Krestes di kisi wan opobaka èn di „abi libi di no man pori”.​—Heb 7:3, 15-17.

9-15 SEPTEMBER

GUDU NA INI GADO WORTU | HEBREWSMA 9-10

„Wan skaduw fu den bun sani di musu kon ete”

it-2-O 1104 ¶6

Kisi pardon

Na ini a Wet di Gado ben gi den Israelsma, a ben sori taki te wan sma wani kisi pardon fu a sondu di a du teige Gado noso teige wan tra sma, dan a fosi sani di a ben musu du ben de fu meki sani kon bun baka na a fasi fa a Wet ben taki. Nofo tron a ben musu tyari a brudu fu wan srakti-ofrandi gi Yehovah (Le 5:5–6:7). Dati meki Paulus ben taki: „Iya, soleki fa a Wèt e taki, dan pikinmoro ala sani e kon krin nanga brudu èn efu brudu no kanti trowe, dan sma no kan kisi pardon” (Heb 9:22). Te yu luku en bun, a brudu fu den meti di den ben tyari leki ofrandi no ben man meki taki wan sma no abi sondu moro noso taki a no kisi nowan konsensi fonfon moro (Heb 10:1-4; 9:9, 13, 14). Na a tra sei a nyun frubontu di ben o kon, ben o meki taki sma kisi pardon fu sondu trutru nanga yepi fu a lusu-paiman fu Yesus Krestes (Yer 31:33, 34; Mt 26:28; 1Kor 11:25; Ef 1:7). Srefi di Yesus ben de na grontapu a sori taki a abi a makti fu gi sma pardon fu den sondu fu den di a dresi wan lanman.​—Mt 9:2-7.

it-2-O 1175

Sondro sondu

A Wet di Gado ben gi Moses ben bun dorodoro. A Wet di Gado ben gi Israel nanga yepi fu Moses ben e sori taki wan grupu sma ben musu wroko leki priester èn taki sma ben musu tyari difrenti sortu meti leki ofrandi. Aladi a Wet ben bun dorodoro fu di a ben kon fu Gado, toku na apostel e sori taki a Wet, a seti fu den priester, nanga den ofrandi di sma ben e tyari no ben man puru ala den sondu fu den sma di ben e hori a Wet (Heb 7:11, 19; 10:1). Na presi taki a Wet ben e puru sondu nanga dede, a ben e sori sma moro krin taki den abi sondu (Ro 3:20; 7:7-13). Toku ala den seti disi ben e wroko soleki fa Gado ben wani dati. A Wet ben de wan „leriman” di ben e tyari sma go na Krestes. Na a fasi dati a ben de wan „skaduw fu den bun sani di musu kon ete” (Ga 3:19-25; Heb 10:1). Dati meki te Paulus e taki dati „a sondufasi fu libisma ben meki a Wèt kon swaki” èn taki „a no ben man frulusu sma” (Ro 8:3), dan soleki fa a sori a ben abi a Dyu Granpriester na prakseri (a granpriester disi ben poti na wroko soleki fa a Wet ben taki fu teki fesi te sma ben e tyari ofrandi èn na a dei te sma e tyari ofrandi fu tapu den sondu, a ben e go na ini a Moro Santa Presi nanga a brudu di a ben musu tyari leki ofrandi). Ma a granpriester ben de wan sondu sma èn a no ben man frulusu den sma di a ben e dini krinkrin, soleki fa Hebrewsma 7:11, 18-28 e sori. Aladi den ofrandi di sma ben e tyari nanga yepi fu a priesterwroko fu Aron nanga den bakapikin fu en ben e meki taki Gado ben kan feni a pipel bun, toku den ben sabi taki den na sondu sma ete. Na dati na apostel Paulus ben abi na prakseri di a taki dati den srakti-ofrandi dati ’no ben kan meki sma di e anbegi Gado, kon de sondro sondu’. Sobun, den no ben man meki sma kisi wan krin konsensi dorodoro. (Heb 10:1-4; luku Heb 9:9.) A granpriester no ben man pai a lusu-paiman di ben ben de fanowdu fu meki sma kon fri fu sondu trutru. Soso a priesterwroko fu Krestes di e tan go doro èn a srakti-ofrandi fu en, man du dati.​—Heb 9:14; 10:12-22.

Diki moro dipi

w92-O 1/3 31 ¶4-6

Aksi fu leisiman

Paulus ben taki dati wan meti noso wan sma ben musu dede fu meki den frubontu na mindri Gado nanga libisma abi krakti. A Wetfrubontu na wan eksempre fu dati. Moses ben de a mindriman. Na en Gado ben gebroiki fu meki a frubontu na mindri Gado nanga den Israelsma. Sobun, Moses ben abi a prenspari frantwortu fu meki den Israelsma kon na ini a frubontu nanga Gado. Dati meki wi kan taki dati Moses na a libisma di meki a Wetfrubontu di ben komoto fu Yehovah. Ma a ben de so taki Moses brudu ben musu kanti trowe fu meki a furbontu disi kon abi krakti? Nôno. Na presi fu dati den ben tyari meti leki ofrandi èn den gebroiki a brudu fu den meti na presi fu a brudu fu Moses.​—Hebrewsma 9:18-22.

Ma fa a de nanga a nyun frubontu na mindri Yehovah nanga na Israel fu Gado? Yesus Krestes ben abi a bigi grani fu de a Mindriman di ben o yepi meki a frubontu disi na mindri Yehovah nanga na Israel fu Gado. Aladi a nyun frubontu disi ben komoto fu Yehovah, toku a ben gebroiki Yesus fu seti en gi en. Boiti taki Yesus ben de a Mindriman fu a frubontu disi, a ben de makandra nanga den fosi sma di ben o de na ini a frubontu dati (Lukas 22:20, 28, 29). Boiti dati, a ben man tyari na ofrandi tu di ben de fanowdu fu meki a frubontu kon abi krakti. Na ofrandi dati no ben de wan meti ofrandi ma a ben de a libi fu wan sma di no abi sondu. Dati meki Paulus ben man taki dati Krestes ben de a libisma di ben seti a nyun frubontu. Baka di „Krestes . . . go na ini hemel srefi fu go na fesi Gado gi a bun fu wi”, a nyun frubontu ben kon abi krakti.​—Hebrewsma 9:12-14, 24.

Di Paulus ben e taki fu Moses nanga Yesus taki den na libisma di ben meki wan frubontu, dan a no ben wani taki nanga dati taki den frubontu disi ben komoto fu den, ma den ben komoto fu Gado. Den tu man disi ben abi a prenspari frantwortu leki mindriman fu seti den tu frubontu disi gi Gado. Gi ala tu frubontu wan meti noso wan libisma ben musu dede fu meki a frubontu abi krakti. A libi fu meti ben de fanowdu na presi fu a libi fu Moses, èn Yesus ben gi en eigi brudu gi den wan di de na ini a nyun frubontu.

it-1-O 518-519

Dopu

Lukas e taki dati Yesus ben e begi na a ten di a dopu (Lu 3:21). Boiti dati, a skrifiman fu a brifi gi den Hebrewsma e taki dati di Yesus Krestes „kon na grontapu” (sobun, a no di a gebore èn di a no ben man leisi noso taki de wortu disi, ma di a ben go dopu fu bigin du a diniwroko fu en) a ben taki san skrifi na Psalm 40:6-8 (LXX): „Srakti-ofrandi nanga tra sortu ofrandi yu no ben wani, ma yu sreka wan skin gi mi. . . . Luku! Mi kon (na ini den buku-lolo den ben skrifi fu mi) fu du yu wani, mi Gado” (Heb 10:5-9). Di Yesus gebore a ben de fu a Dyu pipel di ben meki wan frubontu nanga Gado, dati na a Wetfrubontu (Eks 19:5-8; Ga 4:4). Sobun, Yesus ben de kaba na ini wan frubontu nanga Yehovah Gado di a go na Yohanes fu teki dopu. Dati meki a ben e du moro leki san a Wet ben e aksi fu en. A ben gi ensrefi na en Papa Yehovah fu du a „wani” fu en, fu di a gi en eigi skin di ben „sreka” leki ofrandi èn fu di a sorgu taki sma no ben o abi fu tyari meti ofrandi moro soleki fa a Wet ben e taki. Na apostel Paulus e taki: „Na a ’wani’ fu Gado di den e taki fu en dyaso, meki wi kon santa, fu di Yesus Krestes gi en skin leki wan ofrandi wán leisi nomo fu ala ten” (Heb 10:10). Fu di Yesus ben wani du a wani fu en Papa, meki a wroko tu fu a bun fu a Kownukondre èn a ben gi ensrefi fu du a wroko dati tu (Lu 4:43; 17:20, 21). Fu di Yehovah ben breiti taki en Manpikin gi ensrefi na a fasi disi meki a salfu en nanga santa yeye, èn a taki: „Yu na mi Manpikin, a lobiwan. Na yu mi feni bun.”​—Mr 1:9-11; Lu 3:21-23; Mt 3:13-17.

16-22 SEPTEMBER

GUDU NA INI GADO WORTU | HEBREWSMA 11

„Fu san ede bribi prenspari”

Diki moro dipi

it-1-O 776 ¶2

Bribi

Sma fu owruten di ben sori bribi. Ibriwan fu den ’someni kotoigi di de na wi lontu neleki wan bigi wolku’ èn di Paulus ben taki fu den (Heb 12:1) ben abi wan tranga bribi. Fu san ede? Prakseri na eksempre fu Abel. A ben de seiker taki san Gado ben taki fu a pramisi „pikin” di ben o masi na ede fu „a sneki” ben o kon tru. A ben si nanga en eigi ai san ben de a bakapisi fu a strafu di Yehovah ben gi en papa nanga mama na ini Eden. Na dorosei fu Eden, Adam nanga en famiri ben abi fu wroko bun tranga fu kan nyan fu di Gado ben fluku a gron so taki soso makabon nanga takru wiwiri ben e gro drape. A no de fu taki dati Abel si fa Eva ben e angri fu en masra èn fa Adam ben e basi en frow. A musu de taki en mama ben fruteri fu a pen di a ben abi te a ben e meki pikin. Na a ten dati kerub-engel ben de ete di ben e hori wakti na a dyari fu Eden èn wan feti-owru di ben e bron nanga faya. Na so fasi sma no ben man go na ini a dyari (Ge 3:14-19, 24). Ala den sani disi ben de leki „krin buweisi” di ben e meki taki Abel ben de seiker taki a pramisi „pikin” ben o kon fu tyari frulusu kon soleki fa Gado ben pramisi. Na so a bribi fu en meki taki a ben „gi Gado wan srakti-ofrandi” di ben warti moro a di fu Kain.​—Heb 11:1, 4.

23-29 SEPTEMBER

GUDU NA INI GADO WORTU | HEBREWSMA 12-13

„Yehovah e piri-ai gi wi fu di a lobi wi”

Diki moro dipi

w89-O 15/12 22 ¶10

Tyari ofrandi di e meki Yehovah ati prisiri

¹⁰ Dati meki den Hebrewsma ben musu luku bun taki sma di ben abi a Dyu bribi no ben e ’drai den ede nanga ala sortu leri di den no ben sabi’ (Galasiasma 5:1-6). A no den leri dati e meki taki wan sma e tan tanapu steifi na ini a tru anbegi, ma na ’den bun di Gado e du gi wi’. A sori leki son sma ben e krutu nanga makandra fu nyanyan nanga ofrandi, fu di Paul taki dati a no ’nyanyan e gi wi krakti fu di den sani dati no e tyari wini gi den sma di e poti prakseri na dati wawan’. A bribi fu wan sma kan kon tranga soso te a e dini Gado fayafaya èn te a abi warderi gi a lusu-paiman, a no te a e broko en ede tumusi furu nanga nyanyan noso nanga spesrutu dei di a wani memre (Romesma 14:5-9). Boiti dati na ofrandi fu Krestes meki taki den ofrandi di de Leifisma ben gwenti tyari no ben de fanowdu moro.​—Hebrewsma 9:9-14; 10:5-10.

it-2-O 962

Piri-ai

Te Yehovah e gi pasi taki frufolgu miti den futuboi fu en, dan disi kan de leki piri-ai, noso leki leri di a e gi wi so taki wi kan tron sma di e du san reti. Èn wi o kisi wini fu dati srefi te den tesi pasa kaba (Heb 12:4-11). Srefi a Manpikin fu Gado man sori taki a e firi gi sma leki granpriester soso fu di en Papa ben gi pasi taki a pina.​—Heb 4:15.

30 SEPTEMBER–6 OKTOBER

GUDU NA INI GADO WORTU | YAKOBUS 1-2

„Sani di e tyari sondu nanga dede kon”

g17.4-O 14

Tesi

Yu e kisi tesi te wan sani e hari yu, spesrutu te a sani dati no bun. Luku wan eksempre: Yu e waka na ini wan wenkri fu bai sani, ma dan yu ai e fadon tapu wan sani di yu wani. Wantronso yu e prakseri taki yu ben kan fufuru a sani sondro taki sma kisi yu. Ma yu konsensi e taigi yu fu no du en! Dati meki yu e puru a sani dati na yu ede èn yu e waka go doro. Te dati pasa, dan a tesi no abi krakti moro na yu tapu èn yu na a winiman.

SAN BIJBEL E TAKI

Te yu e kisi a firi fu du wan sani di no bun, dan dati no wani taki dati yu na wan ogri sma. Bijbel e sori krin taki wi alamala e kisi tesi (1 Korentesma 10:13). San prenspari, na san wi e du te wi e kisi tesi. Son sma e tan prakseri fu du na ogri èn te fu kaba den e gi abra. Tra sma e puru a prakseri dati na den ede wantewante, fu di a no bun.

„Ibri sma e kisi tesi fu di en eigi lostu e hari en èn e kori en.”​—Yakobus 1:14.

g17.4-O 14

Tesi

Bijbel e sori sortu sani kan meki taki wan sma du ogri. Yakobus 1:15 e taki: „Te a [sma] kweki a lostu [di no fiti], a e tyari sondu kon te fu kaba.” Sobun, te wi e tan prakseri sani di no fiti, dan a no abi misi taki te fu kaba wi o du a sani dati tu. Toku wi no abi fu de srafu fu sondu lostu di no fiti. Wi kan de seiker taki wi kan wini den.

Diki moro dipi

it-2-O 197

Leti

Yehovah na „a Tata fu den leti na hemel” (Yak 1:17). En „na a sma di e meki son skèin leti na deiten. A poti wèt gi a mun nanga den stari fu meki den skèin leti na neti” (Yer 31:35). Ma a no dati wawan, na en e meki taki wi man si den tru tori fu en di e skèin leki wan leti na tapu wi pasi (2Kor 4:6). Den wet fu en, den bosroiti fu en, nanga en wortu na wan leti gi den sma di e gi yesi na den sani dati (Ps 43:3; 119:105; Odo 6:23; Yes 51:4). A psalm skrifiman ben taki: „Na a leti fu yu e meki taki wi man si leti.” (Ps 36:9; luku Ps 27:1; 43:3.) Neleki fa a leti fu a son e skèin moro krin o moro a son e opo, na so a leti tapu a pasi fu den reti-ati sma e skèin moro krin fu di a sabi fu Gado e meki den frustan sani moro bun (Odo 4:18). Te wi e waka a pasi di Yehovah e sori wi, dan wi e waka na ini a leti fu en (Yes 2:3-5). Ma te wan sma e tan prakseri fu du ogri, dan a de na ini bigi dungru. Dati meki Yesus ben taki: „Efu yu ai e luku sani di no bun, dan yu heri skin o dungru. Efu a faya na ini yu dede, dan yu o de na dungru trutru.”​—Mt 6:23; luku De 15:9; 28:54-57; Odo 28:22; 2Pe 2:14.

it-2-O 1266 ¶4

Wet

„A wèt fu a kownu.” Neleki fa wan kownu hei èn prenspari moro tra libisma, na so „a wèt fu a kownu” hei èn prenspari moro ala tra wet di de (Yak 2:8). A moro prenspari sani di a Wetfrubontu ben e leri sma na fu sori lobi. Dati meki a komando di e taki „yu musu lobi tra sma leki fa yu lobi yusrefi” (dat na „a wèt fu a kownu”) ben de a di fu tu moro prenspari komando. A heri Wet nanga den leri fu den Profeiti ben komoto fu den tu moro bigi komando (Mt 22:37-40). Aladi Kresten no abi fu hori densrefi na a Wetfrubontu, toku den musu hori densrefi na a wet fu a Kownu Yehovah nanga en Manpikin, Kownu Yesus Krestes, di ben meki a nyun frubontu.