TORI FU A KAFTI | ENGEL—FU SAN EDE WI MUSU SABI MORO FU DEN?

San Bijbel e taki fu engel?

Yu wani kon sabi moro fu den engel? Suma na den? Suma meki den èn san den e du? A moro bun presi pe yu kan feni piki tapu den aksi disi, na Bijbel, a Wortu fu Gado (2 Timoteyus 3:16). San Bijbel e fruteri wi fu engel?

Neleki fa Gado na wan yeye, na so engel na yeye tu di wi no man si èn di „no abi libisma skin nanga bonyo”. Den bun engel e libi na hemel. Nofo tron Bijbel e sori taki den e dini leti na fesi Gado.—Lukas 24:39; Mateyus 18:10; Yohanes 4:24.
Na ini owruten, Gado ben e seni engel kon na grontapu fu du wroko gi en. Den engel disi ben e teki libisma skin fu du den wroko dyaso èn baka dati den ben drai go baka na hemel leki yeye.—Krutuman 6:11-23; 13:15-20.
Aladi Bijbel e taki fu engel leki den na mansma èn aladi engel ben e teki mansma skin te den ben kon na grontapu, toku yu no abi mansma nanga umasma engel ini hemel. Den no e trow èn kisi pikin. Boiti dati, engel no ben libi fosi na grontapu leki beibi, yongusma noso bigisma. Na Yehovah meki den engel èn dati meki Bijbel e kari den „manpikin fu a tru Gado”.—Yob 1:6; Psalm 148:2, 5.
Bijbel e taki fu ’den tongo fu libisma èn fu den tongo fu engel’. Disi e sori taki den yeye disi abi wan tongo di den e taki. Aladi Gado ben gebroiki engel fosi fu taki nanga libisma, toku a no wani taki wi e dini den noso taki wi e begi den.—1 Korentesma 13:1; Openbaring 22:8, 9.
Yu abi milyunmilyun engel, kande furu milyard srefi.—Danièl 7:10; Openbaring 5:11.
Engel „tranga srefisrefi”. Den tranga omeni tron moro libisma èn den koni moro libisma tu. Soleki fa a sori, dan engel kan frei bun snel. Libisma no man frustan o snel den man frei.—Psalm 103:20; Danièl 9:20-23.
Aladi den engel koni èn den tranga omeni tron moro wi, toku wan tu sani de di den no sabi.—Mateyus 24:36; 1 Petrus 1:12.
Engel abi difrenti fasi. Den kan sori den moi fasi di Gado abi èn den kan teki den eigi bosroiti. Sobun, neleki libisma den kan bosroiti fu du bun noso ogri. A sari taki son engel bosroiti fu trangayesi Gado.—Yudas 6.

Fa den engel fu Gado orga?

A gran engel, Mikael abi makti moro ala den tra engel. Bijbel e sori krin taki Mikael na a tra nen fu Yesus Krestes.—1 Tesalonikasma 4:16; Yudas 9.

Seraf-engel abi wan hei posisi na ini a seti fu Gado. Den abi a grani fu dini leti na fesi a kownusturu fu Gado.—Yesaya 6:1-3.

Kerub-engel abi wan hei posisi tu èn den abi spesrutu frantwortu. Den e sorgu gi sani di abi fu du nanga a glori fu na Almakti Gado. Furu tron Bijbel e taki dati den e dini krosibei fu Gado.—Genesis 3:24; Esekièl 9:3; 11:22.

Den milyunmilyun tra engel e dini leki boskopuman fu Gado. Den e du wroko na ini a nen fu Gado èn den e du a wani fu en.a—Hebrewsma 1:7, 14.

a Efu yu wani sabi moro fu engel, dan luku kapitel 10 fu a buku San Bijbel kan leri wi? Luku sosrefi a pisi di nen „Ete wan tu sani” na ini na artikel di nen „A gran engel Mikael”. Na Yehovah Kotoigi meki a buku disi. A de fu feni tu na www.pr418.com/srn.