LES 10

Kenki yu sten

Odo 8:4, 7

SAN YU MUSU DU: Meki den arkiman frustan krin san yu e taki èn meki den firi san yu e taki. Yu kan du dati te yu e taki moro tranga noso moro safri, te yu e taki nanga wan moro hebi sten noso nanga wan moro fini sten èn te yu e taki moro gaw noso moro slow.

FA YU KAN DU DISI:

Taki moro tranga noso moro safri. Taki moro tranga te yu e tyari wan prenspari penti kon na krin èn te yu wani gi den arkiman deki-ati fu du wan sani. Yu kan taki tranga tu te yu e leisi krutuboskopu na ini Bijbel. Taki moro safri te yu e doro wan pisi na ini a lezing pe yu wani hari a prakseri fu den arkiman noso te yu o leisi wan pisi pe wan sma e frede noso e broko en ede.

No taki nanga wan tranga sten na ini a heri lezing, noso den arkiman kan firi leki yu e bari den. Boiti dati, yu no musu du sani di o meki sma poti tumusi furu prakseri na yu.
Taki nanga wan moro hebi sten noso nanga wan moro fini sten. Efu a de wan gwenti na ini a tongo fu yu, dan yu kan taki nanga wan moro hebi sten te yu o taki fu wan tori di yu lobi noso te yu o taki o bigi noso o fara wan sani de. Yu kan taki nanga wan moro fini sten fu poti krakti tapu son wortu.
Taki moro gaw noso moro slow. Taki moro gaw te yu e taki fu wan span tori. Taki moro slow te yu o fruteri wan prenspari sani.

Luku bun taki yu no bigin taki gaw wantronso, noso yu kan meki den arkiman skreki. No taki so gaw tu taki trawan no man frustan san yu e taki.