ONDROFENITORI
Mi poti Yehovah na a fosi presi na ini ala mi bosroiti
WAN moi mamanten na ini 1984, di mi ben de na pasi fu go na wroko, mi ben e denki wan artikel di ben kon na ini A Waktitoren. Na a ten dati mi ben e libi na ini wan gudu birti na Caracas, na Venezuela. Na artikel ben taki fa den birtisma fu wi e si wi. Di mi ben e luku den oso na ini a birti, dan mi ben prakseri na misrefi: ’Fa den birtisma e si mi? Leki wan sma di abi wan hei posisi na a bangi pe a e wroko? Noso leki wan anbegiman fu Gado di e wroko na bangi fu man sorgu en osofamiri?’ Mi kon si taki den birtisma fu mi ben e si mi nomo leki wan man di abi wan hei posisi na bangi èn mi no ben lobi a sani dati. Dati meki mi bosroiti fu tyari kenki kon.
Mi gebore tapu 19 mei 1940 na ini a foto Amioûn, na ini Libanon. Wan tu yari baka dati, a famiri fu wi froisi go na a foto Tripoli. Drape mi gro kon bigi na ini wan famiri di ben de koloku, di ben sabi Yehovah Gado èn di ben lobi en. Fu den feifi pikin fu mi papa nanga mama mi ben de a moro yonguwan. Wi ben de nanga dri meisje nanga tu boi. Mi papa nanga mama no ben e si wroko nanga moni leki a moro prenspari sani. A moro prenspari sani gi wi famiri ben de fu studeri Bijbel, fu go na den Kresten konmakandra, èn fu yepi trawan fu kon sabi Gado.
Wan tu salfu Kresten ben de na ini wi gemeente. Wan fu den ben de Michel Aboud, di ben hori a Bukustudie. A ben kon sabi a waarheid na ini New York èn a bigin nanga a preikiwroko na ini Libanon na ini 1921. Mi e memre heri bun fa a ben sori lespeki gi tu yongu sisa di ben go na a Gileadskoro èn o furu a ben yepi den. Den sisa dati ben de Anne nanga Gwen Beavor. Den ben kon tron bun mati fu wi. Furu yari baka dati, mi ben breiti srefisrefi fu miti Anne baka na ini Amerkankondre. Wan pisi ten baka dati mi miti Gwen tu. A ben trow nanga Wilfred Gooch èn den ben e dini na a bijkantoro na Londen, Ingrisikondre.
A PREIKIWROKO FU WI NA INI LIBANON
Di mi ben yongu, wan tu Kotoigi nomo ben de na ini Libanon. Ma wi ben fruteri trawan fayafaya fu den sani di wi ben sabi fu Bijbel. Wi tan du dati, aladi wan tu kerki fesiman ben e gens wi. Wan tu fu den sani di ben pasa nanga wi mi kan memre heri bun ete.
Wan dei, mi nanga mi sisa Sana ben e preiki na ini wan gebow di ben abi wan tu oso. Wan priester waka kon na a pisi pe wi ben taki nanga wan fu den sma di ben e libi drape. A musu de taki wan sma ben bel en. A priester bigin kosi mi sisa. En ati ben bron so te taki a pusu Sana fu a trapu èn Sana kisi mankeri. Wan sma bel skowtu èn di skowtu doro den sorgu taki Sana kisi yepi. Den tyari a priester go na skowtu post pe den kon si taki a ben abi wan gon. A komandanti fu skowtu aksi a priester: „Dan suma na yu dan? Wan kerkiman noso wan gangster?”
Wan tra sani di mi sabi bunbun ete na di a gemeente fu wi ben yuru wan bus fu tyari wi go na wan farawe foto pe wi ben o go preiki a bun nyunsu. A ben de wan prisiri okasi teleki wan priester drape tyari wan tu sma kon na wán fu du ogri nanga wi. Den sma ben kosi wi, den fringi ston kon na wi tapu srefi èn mi papa kisi mankeri na en ede. Mi kan memre ete taki en fesi ben lai brudu. A waka go baka na a bus makandra nanga mi mama èn wi alamala waka go na den baka. Wi ben frede srefisrefi. Ma noiti mi o frigiti san mi mama taki di a ben e figi a brudu puru na mi papa fesi. A taki: „Grantangi Yehovah, gi den pardon. Den no sabi san den e du.”
Wan tra leisi baka, wi ben go luku wan tu famiriman fu wi na ini a foto pe wi ben e tan. Wan prenspari kerki fesiman, wan bisschop, ben de na mi granpapa en oso. A bisschop ben sabi taki mi papa nanga mama ben de Yehovah Kotoigi. Fu ala den sma di ben de drape, a poti aksi gi mi aladi mi ben abi siksi yari nomo. A taki: „Yu dati, fu san ede yu no dopu?” Mi taigi en taki mi na wan pikin ete èn efu mi wani dopu mi ben musu sabi moro fu Bijbel èn mi bribi ben musu de moro tranga. Fu di a no ben lobi a piki fu mi, meki a taigi mi granpapa taki mi no sori lespeki gi en.
Ma den sortu sani disi no ben pasa furu. Nofo tron a de so taki sma fu Libanon abi switifasi. Dati meki wi ben abi furu moi takimakandra fu Bijbel nanga sma èn wi ben abi furu Bijbelstudie.
WI FAMIRI BOSROITI FU FROISI GO NA WAN TRA KONDRE
Di mi ben de na skoro ete, wan yongu brada fu Venezuela ben kon nanga fakansi na Libanon. A ben kon na den konmakandra na wi gemeente èn a bigin hori nanga mi sisa Wafa. Baka wan pisi ten den trow èn den go libi na Venezuela. Te Wafa ben skrifi wi, dan ibri leisi a ben aksi mi papa fu froisi kon na Venezuela nanga a heri famiri. A ben du dati fu di a ben e misi wi srefisrefi. Te fu kaba, wi arki en èn wi bosroiti fu froisi go drape!
Na ini 1953 wi doro na ini Venezuela èn wi go libi ini Caracas, krosibei fu a paleisi fu a presidenti. Fu di mi ben yongu ete, meki mi ben lobi en te mi ben e si fa a presidenti e pasa ini en wagi aladi wan sma ben e rèi en. A no ben makelek gi mi papa nanga mama fu gwenti wan tra kondre, wan tra tongo, wan tra kulturu, tra sortu nyanyan, èn wan tra sortu weer. Ma leti fa den ben e bigin gwenti pikinso, wan sari sani pasa.
Fu kruktu-anusei go na reti-anusei: Mi papa. Mi mama. Mi na ini 1953 di wi famiri froisi go na Venezuela
WAN SARI SANI PASA
Mi papa bigin firi siki. Wi no ben gwenti a sani dati, fu di ala ten mi papa ben de wan tranga èn gosontu man. Wi no ben man memre taki oiti a ben siki. Datra ondrosuku en èn den kon si taki a abi kanker. Den du wan oparâsi na en. A sari srefisrefi taki wán wiki baka dati mi papa dede.
A muilek fu taki fa wi ben sari. A ben hebi gi wi trutru. Na a ten dati mi ben abi 13 yari nomo. Wi no ben fruwakti srefisrefi taki wi papa ben o dede èn wi no ben denki taki wi ben kan de koloku baka. Wan heri pisi ten mi mama ben feni en muilek fu bribi taki en masra dede. Ma wi ben kon si taki a libi e go doro èn Yehovah yepi wi fu horidoro. Di mi ben abi 16 yari, mi klari middelbaar skoro na ini Caracas, èn mi ben wani yepi sorgu mi famiri trutru.
Mi sisa Sana nanga en masra, Rubén, ben yepi mi trutru fu kon krosibei na Yehovah
Na a srefi ten, mi sisa Sana trow nanga Rubén Araujo, di ben klari a Gileadskoro èn di ben drai kon baka na Venezuela. Den bosroiti fu froisi go na New York. Di mi famiri bosroiti taki mi musu go studeri na wan universiteit, dan mi go na New York èn mi go tan nanga mi sisa nanga mi swagri. Di mi ben e tan nanga den, den yepi mi trutru fu kon moro krosibei na Yehovah. Boiti dati, yu ben abi furu lepi brada na ini a Spanyorotongo gemeente fu wi na Brooklyn. Tu fu den brada dati di mi ben kon sabi èn di mi ben warderi ben de Milton Henschel nanga Frederick Franz. Den brada disi ben e dini na Brooklyn Betel.
Na ini 1957 di mi dopu
Na a kaba fu a fosi yari na universiteit na New York, mi bigin denki san mi ben o du nanga mi libi. Mi ben leisi artikel na ini A Waktitoren fu Kresten di ben poti marki na ini a diniwroko fu Yehovah èn mi ben denki dipi fu den tori dati. Mi ben si fa den pionier nanga den Beteliet na ini wi gemeente ben de koloku èn mi ben wani de leki den. Ma mi no ben dopu ete. Bakaten mi kon frustan o prenspari a de fu gi mi libi abra na Yehovah. Mi du dati èn mi teki dopu tapu 30 maart 1957.
MI TEKI PRENSPARI BOSROITI
Baka di mi dopu, mi ben wani tron wan pionier. Mi ben wani du a sani dati trutru, ma mi ben kan si tu taki a ben o muilek gi mi fu du dati. Mi no ben sabi efu mi ben o man pionier èn go na universiteit na a srefi ten. Mi bosroiti fu no go moro na universiteit, ma fu drai go baka na Venezuela fu tron wan pionier. Na a ten dati mi nanga mi famiri na ini Venezuela skrifi furu brifi gi makandra fu a tori disi.
Mi drai go baka na Caracas na ini yuni 1957. Ma mi ben kan si taki a situwâsi fu mi famiri no ben bun. Ete wan sma ben musu wroko fu yepi sorgu a famiri. Fa mi ben kan yepi? Mi ben kan kisi wan wroko na bangi ma mi ben wani pionier trutru. Na fu a sani dati mi ben drai kon baka na Venezuela. Mi bosroiti fu du ala tu. Wan tu yari langa mi ben wroko heri wiki na bangi èn mi ben e dini leki pionier tu. Mi ben abi bun furu fu du, ma noiti mi ben de so koloku!
Wan tra sani di meki mi de koloku, na di mi miti Sylvia. Mi trow nanga a moi Doisri sisa disi di lobi Yehovah trutru. Sylvia ben froisi kon na Venezuela nanga en papa nanga mama. Te fu kaba wi kisi tu pikin: wan boi, Michel (Mike), nanga wan meisje, Samira. Boiti dati mi teki a frantwortu na mi tapu fu sorgu gi mi mama. Dati meki a kon tan nanga wi. Aladi mi ben abi fu stop nanga a pionierwroko fu di mi ben abi fu sorgu mi famiri, toku mi ben tan de fayafaya na ini a preikiwroko. Te fakansi ben de, dan mi nanga Sylvia ben gwenti go na ini a yepi-pionierwroko efu a ben man.
WAN TRA PRENSPARI BOSROITI
Den pikin fu wi ben de na skoro ete di a sani pasa di mi fruteri na a bigin. Mi musu de eerlijk taki mi ben abi wan switi libi èn tra sma di ben e wroko na tra bangi ben e lespeki mi. Ma toku mi ben wani taki sma sabi mi leki wan anbegiman fu Yehovah. Mi ben tan prakseri a sani dati. Dan mi nanga mi frow go sidon taki fu a moni di wi ben abi. Efu mi ben o stop nanga a wroko na bangi, dan mi ben o kisi wan bigi moni. Fu di wi no ben abi paiman, meki wi ben denki taki efu wi ben o gebroiki wi moni soso gi den sani di wi abi fanowdu trutru, dan a moni dati ben o de nofo gi wi fu wan heri pisi ten.
A no ben makelek fu teki a bosroiti dati, ma mi lobi wefi nanga mi mama horibaka gi mi. Now mi ben kan go pionier baka. Mi ben breiti srefisrefi! Ala sani ben seti taki mi ben o bigin pionier, ma dan wi kisi wan nyunsu di wi no ben fruwakti.
WAN MOI NYUNSU!
Wi ben breiti srefisrefi nanga a di fu dri pikin fu wi, Gabriel
Wan dei, a datra fu wi taigi wi taki Sylvia de nanga bere. Wi no ben fruwakti dati. Wi ben breiti srefisrefi ma mi ben prakseri a bosroiti di mi ben teki fu du a pionierwroko baka. Mi ben o man pionier baka? Syatu baka di wi kisi a moi nyunsu, wi bigin breiti taki wi famiri ben o kisi ete wan pikin. Ma mi ben aksi misrefi efu mi ben o man pionier ete.
Baka di wi taki nanga makandra, wi bosroiti taki toku mi ben o tron wan pionier. A boi fu wi Gabriel, gebore na ini april 1985. Mi stop nanga a bangi wroko èn mi tron wan gewoon pionier baka na ini yuni 1985. Bakaten mi tron wan memre fu a Bijkantoro Komte. Ma a bijkantoro no ben de na ini Caracas. Disi ben wani taki dati tu noso dri dei wan wiki mi ben abi fu rèi go sowan 80 kilometer na a bijkantoro.
WI E FROISI
A bijkantoro ben de na ini a foto La Victoria. Dati meki wi bosroiti leki famiri fu froisi go drape fu man de moro krosibei fu Betel. Dati ben de wan bigi kenki gi wi alamala. Mi de nanga tangi trutru taki mi famiri horibaka gi a bosroiti disi. A fasi fa den ben tyari densrefi ben de wan bigi yepi gi mi. Mi sisa Baha, ben teki en na en tapu fu sorgu gi wi mama. Mike ben trow, ma Samira nanga Gabriel ben libi na oso ete. Di wi froisi go na La Victoria, dan dati ben wani taki dati den ben musu gowe libi den mati fu den na ini Caracas. Boiti dati, mi lobi wefi Sylvia ben musu kon gwenti a libi na ini wan pikin foto. Dati ben de heri tra fasi leki a libi na ini a mamafoto. Wi alamala ben musu kon gwenti fu libi na ini wan moro pikin oso. Iya, a froisi di wi froisi fu Caracas go na La Victoria ben de wan bigi kenki gi wi.
Ma dan sani kenki baka. Baka wan pisi ten Gabriel trow èn Samira froisi go libi en wawan. Baka dati, mi nanga Sylvia kisi a kari fu dini na Betel na ini 2007 èn te na a dei fu tide wi e wroko drape. Mike, a moro bigi boi fu wi e dini leki owruman èn a e pionier makandra nanga en wefi Monica. Gabriel na wan owruman tu èn en nanga en wefi Ambra e dini na Italiakondre. Samira e pionier èn a yepi tu nanga Betel-wroko na en eigi oso.
Fu kruktu-anusei go na reti-anusei: Mi nanga mi wefi, Sylvia, na a bijkantoro fu Venezuela. A moro bigi boi fu wi, Mike, nanga en wefi Monica. A meisje fu wi, Samira. A boi fu wi Gabriel nanga en wefi Ambra
MI BEN O TEKI DEN SREFI BOSROITI BAKA
Iya, mi ben abi fu teki furu prenspari bosroiti na ini mi libi. Ma mi no e sari fu den bosroiti di mi teki. Mi ben o teki den srefi bosroiti baka. Mi de nanga tangi gi ala den sani di mi ben man du gi Yehovah. Awinsi wi abi fu teki pikin bosroiti noso bigi bosroiti, Yehovah kan sorgu taki wi abi a freide „di bigi moro iniwan sani di libisma man frustan” (Fil. 4:6, 7). Mi nanga Sylvia breiti nanga a santa diniwroko di wi man du na Betel èn wi si taki Yehovah blesi den bosroiti di wi teki fu di wi poti en na a fosi presi na ini wi libi.