Aksi di e opo kon

◼ Sortu wini wi e kisi te wi e go na a gemeente di de na ini a kontren pe wi e libi?

Nanga yepi fu a seti fu a gemeente, wi e kisi a deki-ati di e meki taki wi e ’sori lobi èn e du bun wroko’ (Hebr. 10:24, 25). Nanga yepi fu a gemeente wi e leri a waarheid èn wi de srekasreka fu du a wroko di wi kisi fu meki disipel (Mat. 28:19, 20). Wi e kisi krakti tu fu horidoro te tesi miti wi èn wi abi lobi-ati opziener di e yepi wi fu kakafutu gi problema nanga broko-ede di e kon moro furu dei fu dei. A de krin fu si taki a gemeente de tumusi prenspari gi wi fu man horidoro. Ma fa wi sa kisi wini te wi e go na a gemeente di de na ini a kontren pe wi e libi?

A situwâsi fu ibri sma e difrenti. Sani soleki wan wroko, wan patna di no de na bribi, èn a fasi fa wan sma e kon na den konmakandra, kan abi krakti tapu a bosroiti di wan sma e teki fu go na wan spesrutu gemeente. Ma wan sma sa kisi trutru wini na yeye fasi èn a kan abi tra bun winimarki tu te a e go na a gemeente di de na ini a kontren pe a e libi. Te wan sani pasa, dan den owruman kan meki kontakti esi-esi nanga ala den preikiman. Na ini a ten di pasa wi ben luku wan tu tra wini di wi kan kisi na ini den Aksi boksu na ini Onze Koninkrijksdienst.—Luku a di fu mei 1991, april 1976 nanga maart 1967.

Furu tron a de moro makriki fu go na den konmakandra di de krosibei, fu di wi sa abi na okasi fu kon biten fu man taki nanga tra sma, fu sorgu gi den sani di de fanowdu, èn fu abi wan prati na a fosi singi nanga begi. Te den sma di wani sabi moro e libi na ini a birti fu wi, dan furu tron a de moro makriki gi wi fu meki kontakti nanga den. A de moro makriki tu fu hori wan bijbelstudie nanga den èn fu sori den na sortu konmakandra den kan go.

Wi sabi taki den osofamiri edeman sa begi te den sa luku na sortu gemeente den sa go èn den sa luku ala sani finifini fu kon sabi san moro bun gi na osofamiri fu den, na skin fasi èn na yeye fasi.—1 Tim. 5:8.