A lobi fu Yehovah e yepi wi fu no frede

1. San na wan tu sani di e frede sma?

LUKU den situwâsi disi di miti wan tu brada nanga sisa. Nestor nanga en wefi María, ben wani go dini na wan kontren pe moro preikiman de fanowdu.b Fu man du dati, den ben o abi fu leri fu no gebroiki so furu moni moro. Ma den ben e frede taki den no ben o de koloku trutru efu den no ben man libi leki fa den ben gwenti. Di Biniam tron wan Kotoigi na ini wan kondre pe den e gens a wroko fu wi, dan a kon si taki now di a ben tron wan futuboi fu Gado, a ben kan kisi frufolgu. A sani dati frede en. Ma san ben e frede en moro, na san en famiri ben o du te den ben o kon sabi taki a tron wan Yehovah Kotoigi. Valérie kon sabi taki a ben abi wan kanker di ben ogri srefisrefi èn a du tranga muiti fu feni wan datra di ben o wani yepi en sondro brudu. Wi kan frustan taki a ben frede taki a ben o dede.

2. Fu san ede wi musu du muiti fu no frede tumusi?

² Oiti den sani disi miti yu? Furu fu wi ben e frede di den sani disi miti wi. Ma efu wi no e leri fu no frede tumusi, dan wi kan teki don bosroiti di kan pori a matifasi fu wi nanga Yehovah. Na dati Satan wani. A wani tu taki wi e frede so te taki wi e trangayesi den wet fu Yehovah èn sosrefi a komando di a gi wi fu preiki a bun nyunsu (Openb. 12:17). Satan abi ogri-ati èn a abi furu makti. Ma yu kan kibri yusrefi gi en. Fa yu kan du dati?

3. San o yepi wi fu no frede?

³ Te wi abi a frutrow taki Yehovah lobi wi èn taki a de na wi sei, dan Satan no o man frede wi (Ps. 118:6). Fu eksempre, a skrifiman fu Psalm 118 ben kisi fu du nanga situwâsi di ben muilek srefisrefi gi en. A ben abi furu feanti èn sonwan fu den ben de heiheisma (vers 9, 10). Son leisi a ben abi furu broko-ede (vers 13). Èn Yehovah ben strafu en hebi (vers 18). Toku a psalm skrifiman ben taki: „Mi no sa frede.” Fu san ede a ben de seiker taki sani ben o waka bun nanga en? A ben sabi taki aladi Yehovah ben gi en hebi strafu, toku en hemel Papa ben lobi en trutru. A psalm skrifiman ben de seiker taki awinsi san ben miti en, en lobi Gado ben o yepi en ala ten.​—Ps. 118:29.

4. Gi sortu sani wi no o frede te wi abi a frutrow taki Gado lobi wi?

⁴ Wi musu bribi taki Yehovah lobi wi. Disi o yepi wi: (1) wi no musu frede taki wi no o man sorgu wi osofamiri, (2) wi no musu frede libisma, (3) wi no musu frede dede. Den sma di kari na ini a fosi paragraaf, leri fu no frede fu di den ben abi a frutrow taki Gado lobi den.

NO FREDE TAKI YU NO O MAN SORGU GI YU OSOFAMIRI

5. Sortu situwâsi kan gi wan osofamiri-edeman furu broko-ede? (Luku a fowtow na tapu a kafti.)

⁵ Wan Kresten osofamiri-edeman e si a frantwortu di a abi fu sorgu gi en osofamiri leki wan seryusu sani (1 Tim. 5:8). Efu yu na wan osofamiri-edeman, dan a kan taki yu ben frede taki yu ben o lasi yu wroko fu di a Corona-siki panya na ala sei. Kande yu ben e broko yu ede taki yu no ben o man gi yu osofamiri nyanyan, noso taki yu no ben o man pai yuru-oso. Kande yu ben e frede tu taki efu yu lasi yu wroko, dan yu no ben o man feni wan trawan. Noso kande, neleki fa a ben de nanga Nestor nanga María di kari kaba, yu ben tweifri fu teki wan tra wroko fu di dati ben o wani taki dati yu no ben o man libi moro leki fa yu ben gwenti fosi. Satan ben man meki furu sma tapu fu dini Yehovah fu di den ben abi den broko-ede disi.

6. San Satan wani meki wi bribi?

⁶ Satan wani meki wi bribi taki Yehovah no lobi wi èn taki a no o yepi wi fu sorgu gi wi osofamiri. Disi kan meki wi denki taki wi musu du iniwan sani di de fanowdu fu no lasi a wroko fu wi, awinsi wi abi fu du wan sani di de teige Bijbel gronprakseri.

7. San Yesus pramisi wi?

⁷ Yesus di sabi a Tata moro leki iniwan sma, e pramisi taki wi Tata ’sabi san wi abi fanowdu srefi bifo wi aksi en’ (Mat. 6:8). Èn Yesus sabi taki Yehovah de klariklari fu gi wi san wi abi fanowdu. Wi leki Kresten de na ini na osofamiri fu Yehovah èn fu dati ede wi kan de seiker taki leki Osofamiri-edeman, a o du soifri san a taigi ala osofamiri-edeman fu du na 1 Timoteyus 5:8.

8. (a) San o yepi wi fu no frede taki wi no o man sorgu gi wi osofamiri? (Mateyus 6:31-33) (b) Soleki fa a fowtow e sori, dan fa wi kan teki na eksempre fu a trowpaar di e tyari nyanyan gi wan sisa?

⁸ Te wi abi a frutrow taki Yehovah lobi wi èn taki a lobi wi osofamiri, dan a no o muilek gi wi fu bribi taki a o gi wi den sani di wi abi fanowdu. (Leisi Mateyus 6:31-33.) Yehovah wani sorgu gi wi èn a de krin taki a de klariklari fu du dati. Di a meki grontapu, dan a no gi wi soso den prenspari sani di wi abi fanowdu fu man tan na libi. Ma a meki furu sani na grontapu di e gi wi furu prisiri (Gen. 2:9). Awinsi son leisi wi abi soso den sani di wi abi fanowdu, toku wi musu hori na prakseri taki wi de na libi fu di na Yehovah sorgu gi den sani dati (Mat. 6:11). Ala ten wi musu hori na prakseri taki den sani di Yehovah o gi wi, warti moro leki iniwan sani di wi musu libi na baka now èn taki a o gi wi têgo libi na ini a ten di e kon. Na dati Nestor nanga María kon si.​—Yes. 65:21, 22.

9. San yu kan leri fu na eksempre fu Nestor nanga María?

⁹ Nestor nanga María ben abi wan moi oso èn bun wroko na ini Kolombia. Den e taki: „Wi ben prakseri fu seri wan tu fu den sani fu wi so taki wi ben kan go du moro gi Yehovah. Ma wi ben e frede taki wi no ben o de koloku efu wi no ben abi so furu moni leki fosi.” San yepi den fu no frede? Den prakseri den someni fasi fa Yehovah ben sori taki a lobi den. Fu di den ben abi a frutrow taki ala ten Yehovah ben o sorgu gi den, meki den libi a wroko fu den di ben e pai bun. Den seri den oso èn den froisi go tan na wan kontren pe moro preikiman ben de fanowdu. Fa den e denki fu a bosroiti di den teki? Nestor e taki: „Wi kon si taki san skrifi na Mateyus 6:33 na tru tori. Noiti wi mankeri wan sani èn wi de moro koloku now.”

NO FREDE LIBISMA

10. Fu san ede wi kan frustan taki libisma e frede tra libisma?

¹⁰ Sensi Adam nanga Eva trangayesi Yehovah, libisma abi a takru gwenti fu du ogri nanga trawan (Preik. 8:9). Fu eksempre, sma di abi makti e kwinsi trawan, ogriman e du ogri-ati sani, pikin na skoro e suku trobi nanga trawan na ini den klas èn den e kosi den, èn son sma e du ogri srefi nanga den famiriman fu den. Dati meki a no e fruwondru wi taki libisma e frede tra libisma. Fa Satan e gebroiki a sani disi fu meki wi trangayesi Gado?

11-12. Fu san ede Satan wani taki wi frede libisma?

¹¹ Satan wani taki wi frede so te gi libisma taki wi e tapu fu preiki noso fu du den tra sani di Yehovah wani taki wi du. Satan meki taki son regering tapu a wroko fu wi èn taki den frufolgu wi (Luk. 21:12; Openb. 2:10). Na ini a grontapu fu Satan, furu sma e fruteri sani di no tru fu Yehovah Kotoigi èn den e fruteri ogri-ati lei srefi fu den. Den sma di e bribi den lei disi kan spotu wi noso den kan du ogri nanga wi srefi (Mat. 10:36). A e fruwondru wi taki Satan e gebroiki den sani disi fu kisi wi? Kwetikweti. A ben e gebroiki den kaba sensi a fosi yarihondro.​—Tori 5:27, 28, 40.

¹² Ma Satan wani taki wi frede moro sani. Son sma frede san den famiriman fu den o denki te den tron Kotoigi. Son leisi den frede moro gi a sani disi, leki te sma ben o du ogri nanga den. Den lobi den famiriman fu den srefisrefi èn den wani taki den kon sabi èn kon lobi Yehovah. A e hati den fu yere fa den famiriman fu den e taki ogri fu a tru Gado èn fu den anbegiman fu en. Ma son leisi famiriman di ben e gens wi fosi, kon na ini a waarheid bakaten. Ma kow taki dati den famiriman fu wi no wani noti fu du nanga wi moro fu di wi tron Kotoigi? San wi o du?

13. Te wi abi a frutrow taki Gado lobi wi, dan fa dati e yepi wi te den famiri fu wi drai baka gi wi? (Psalm 27:10)

¹³ Wi kan kisi trowstu fu den moi wortu disi di skrifi na Psalm 27:10. (Leisi en.) Te wi e prakseri fa Yehovah lobi wi, dan wi no o frede san o pasa awinsi wi famiri drai baka gi wi. Èn wi de seiker taki Yehovah o blesi wi te wi e horidoro. Yehovah o gi wi ala san wi abi fanowdu fu tan na libi, a o yepi fu no bruya, fu de koloku èn a o yepi wi tu fu tan krosibei na en. Nowan sma man du dati leki Yehovah. Na dati Biniam di ben kari kaba na ini na artikel disi kon si.

14. San yu kan leri fu na eksempre fu Biniam?

¹⁴ Biniam tron wan Yehovah Kotoigi aladi a ben sabi taki Lanti ben kan frufolgu en na wan ogri-ati fasi. Ma Biniam ben sabi taki Yehovah lobi en. A sani disi yepi en fu no frede libisma. A e taki: „Mi no ben denki taki mi ben o kisi so hebi frufolgu fu lanti. Ma san ben e frede mi moro, na taki mi famiri ben o gens mi. Mi ben e frede taki mi papa di no ben de wan Kotoigi, no ben o feni en bun taki mi teki a waarheid. Èn mi ben e frede tu taki mi famiri ben o feni taki mi gi den syen.” Ma Biniam ben e bribi taki ala ten Yehovah e sorgu gi den wan di a lobi. Biniam e taki: „Mi prakseri fa Yehovah ben yepi trawan di den ben abi moni problema, di sma ben e frufolgu den, noso di sma ben e gens den na wan ogri-ati fasi. Mi ben sabi taki efu mi ben e tan gi yesi na Yehovah, dan seiker a ben o blesi mi. Skowtu hori mi omeni leisi èn den fon mi tu. Ma mi srefi ondrofeni fa Yehovah e yepi wi te wi e tan gi yesi na en na ini muilek ten.” Yehovah tron wan trutru Papa gi Biniam èn a pipel fu Yehovah tron wan trutru famiri gi en tu.

NO FREDE DEDE

15. Fu san ede a de wan gewoon sani taki wi e frede dede?

¹⁵ Bijbel e taki dati dede na wan feanti (1 Kor. 15:25, 26). Kande wi e frede te wi e prakseri dede, spesrutu te wi noso wan lobiwan fu wi siki seryusu. Fu san ede wi e frede dede? Fu di Yehovah meki wi na so wan fasi taki wi wani libi fu têgo (Preik. 3:11). Toku a bun fu frede dede fu di dati kan yepi wi fu no du sani di kan meki wi lasi wi libi. Dati meki wi o nyan gosontu nyanyan, wi o oefen wi skin, wi o go na datra èn dringi dresi te dati de fanowdu èn wi no o du dondon sani di kan meki wi lasi wi libi.

16. Fa Satan wani kisi wi fu di a sabi taki wi e frede dede?

¹⁶ Satan sabi taki wi no wani dede. Dati meki a e taki dati wi ben o de klariklari fu gi ala san wi abi, srefi a matifasi di wi abi nanga Gado, soso fu man tan na libi (Yob 2:4, 5). Ma a de krin taki Satan no abi leti. Ma fu di en na „a wan di man kiri sma”, meki a wani taki wi frede dede so te, taki wi drai baka gi Yehovah (Hebr. 2:14, 15). Son leisi sma di de na ondro a makti fu Satan, tapu skreki gi wi taki den o kiri wi efu wi no drai baka gi a bribi fu wi. Noso son leisi te Satan si taki wi e siki seryusu, dan a kan gebroiki dati fu meki wi teki wan bosroiti di Yehovah no feni bun. Datra noso famiriman di no e anbegi Yehovah kan dwengi wi fu teki brudu, èn disi o meki taki wi pasa den wet fu Yehovah. Noso son leisi wan sma kan pruberi fu kisi wi so fara fu teki wan tra datrayepi di den teige den gronprakseri fu Bijbel.

17. Te wi e luku Romesma 8:37-39, dan fu san ede wi no abi fu frede dede?

¹⁷ Aladi wi no wani dede toku wi sabi taki Yehovah o tan lobi wi awinsi wi lasi wi libi. (Leisi Romesma 8:37-39.) Te sma di Yehovah lobi e dede, dan a e tan memre den neleki den de na libi ete (Luk. 20:37, 38). A e angri fu gi den libi baka (Yob 14:15). Yehovah pai wan hei prijs so taki wi kan „kisi têgo libi” (Yoh. 3:16). Wi sabi taki Yehovah lobi wi trutru èn taki a e sorgu gi wi. Dati meki wi no musu drai baka gi Yehovah te wi e siki noso te sma wani kiri wi, ma na presi fu dati wi musu abi a frutrow taki Yehovah o gi wi trowstu, koni, nanga krakti. Na dati Valérie nanga en masra du.​—Ps. 41:3.

18. San yu leri fu na eksempre fu Valérie?

¹⁸ Valérie ben abi 35 yari di a kon sabi taki a ben abi wan kanker di ben ogri srefisrefi. Ma Valérie ben sabi taki Yehovah lobi en awinsi san pasa. Luku fa a sani dati yepi en fu no frede dede. A e fruteri: „Di wi kon sabi taki mi ben abi kanker, dan mi nanga mi masra skreki srefisrefi. Mi ben musu du wan bigi oparâsi fu man tan na libi. Mi taki nanga furu datra, ma den alamala weigri fu du na oparâsi sondro brudu. Mi ben frede, ma fu di mi sabi san a wet fu Gado e taki, meki mi no prakseri srefisrefi fu teki brudu. Mi heri libi langa Yehovah sori mi na someni difrenti fasi taki a lobi mi. Now mi ben abi na okasi fu sori en taki mi lobi en. Ibri leisi baka te den datra ben e taigi mi taki den no ben o man yepi mi sondro brudu, dan dati ben e gi moro deki-ati fu meki Yehovah breiti nanga mi èn fu no meki Satan wini. Te fu kaba den ben man du na oparâsi sondro brudu èn ala sani waka bun. Mi abi problema ete nanga a gosontu fu mi, ma ala ten Yehovah gi wi san wi ben abi fanowdu. Fu eksempre, a wiki fosi mi kon sabi taki mi ben abi kanker, dan wi ben de na a gemeente konmakandra èn wi ben e taki fu na artikel ’No frede te problema e miti yu na ini a ten disi’.c Na artikel disi trowstu wi srefisrefi. Wi e leisi en ibri tron baka. Wi gwenti leisi den sortu artikel disi èn wi e tan du a preikiwroko. Boiti dati, wi e go na den konmakandra ibri wiki. Na den sani disi yepi mi nanga mi masra fu no bruya èn fu teki bun bosroiti.”

YEHOVAH O YEPI WI FU NO FREDE

19. San o pasa heri esi?

¹⁹ Kresten na heri grontapu ben man horidoro na ini muilek situwâsi fu di Yehovah yepi den fu kakafutu gi Didibri (1 Petr. 5:8, 9). Yu man du dati tu. Heri esi Yehovah o taigi Yesus nanga den wan di o tiri makandra nanga en „fu tyari wan kaba kon na den wroko fu Didibri” (1 Yoh. 3:8). Baka dati a pipel fu Yehovah di e dini en na grontapu o de koloku fu di ’den no o frede nowan sma èn nowan sma o skreki den’ (Yes. 54:14; Mika 4:4). Ma fosi a ten dati doro wi musu du tranga muiti fu no frede.

20. San o yepi wi fu no frede?

²⁰ Wi musu tan abi a frutrow taki Yehovah lobi den futuboi fu en èn taki a e kibri den. A sani di o yepi wi, na te wi e denki dipi fu a fasi fa Yehovah kibri den futuboi fu en na ini a ten di pasa èn te wi e taki nanga trawan fu den tori dati. Wan tra sani di o yepi wi, na te wi e hori na prakseri fa a yepi wi fu pasa muilek situwâsi. Iya, Yehovah kan yepi wi fu no frede!​—Ps. 34:4.