LES 52
Fu san ede a prenspari fu luku san wi e weri èn fa wi e moi wisrefi?
Wi alamala wani weri krosi di wi lobi èn wi wani modo leki fa wi wani. Te wi e wroko nanga den rai na ini Bijbel, dan wi o weri krosi di wi lobi èn di Yehovah feni bun. Kon meki wi go luku san Bijbel e taki fu a tori disi.
1. Fa Bijbel kan yepi wi fu sabi san wi musu weri èn fa wi musu moi wisrefi?
Wi musu weri ’krosi di fiti. Wi musu du dati na wan lespeki fasi èn nanga krin frustan.’ Wi musu weri netjes tu, so taki sma kan si taki wi e „anbegi Gado” (1 Timoteyus 2:9, 10). A tekst disi e taki fu fo sani: (1) Wi musu weri krosi di „fiti”. Soleki fa yu si na den konmakandra, dan den brada nanga sisa na ini a gemeente no e weri a srefi sani. Toku den krosi di den e weri nanga a kapsel fu den e sori taki den e lespeki a Gado di den e dini. (2) A fasi fa wi e weri krosi musu sori taki wi e „lespeki” trawan. Dati wani taki dati wi no o weri krosi di sexy noso di e meki taki sma e poti tumusi furu prakseri na wi. (3) Wi musu sori taki wi de nanga „krin frustan”. Wi e du dati te wi no e weri ala nyun modo di kon. (4) Ala ten wi musu weri krosi di e sori taki wi e „anbegi” a tru Gado.—1 Korentesma 10:31.
2. Fu san ede wi musu hori wi brada nanga sisa na prakseri te wi o luku san wi o weri?
Aladi wi kan weri san wi wani, toku wi no wani weri krosi di o meki taki trawan firi fruferi. Na presi fu dati wi wani „plisi tra sma nanga bun sani di e gi den deki-ati”.—Leisi Romesma 15:1, 2.
3. Fa den krosi di wi e weri kan meki taki sma wani kon sabi moro fu Yehovah?
Ala ten wi e meki muiti fu weri krosi di fiti, ma te wi e go na den konmakandra èn te wi de na ini a preikiwroko, dan wi wani poti moro prakseri na san wi e weri. Wi no wani taki den krosi di wi e weri e meki taki sma no wani arki a bun nyunsu. Na presi fu dati wi wani weri krosi di e „moi a leri fu Gado” èn di e meki taki sma wani kon sabi moro fu en.—Titus 2:10.
SORTU TRA SANI YU KAN LERI?
Fa yu kan sorgu taki yu weri krosi di fiti èn taki yu moi yusrefi na wan fasi di fiti gi Kresten?
Den krosi di wi e weri kan sori efu wi abi lespeki gi lantiman. Aladi Yehovah e si san de na ini wi ati, toku den krosi di wi e weri musu sori taki wi abi lespeki gi en
4. Te wi e weri netjes, dan wi e sori lespeki gi Yehovah
Fu san ede a prenspari taki wi weri netjes? Leisi Psalm 47:2 èn taki fu den aksi disi:
Fa den krosi di wi e weri kan meki sma denki fu Yehovah?
Yu denki taki a de fanowdu fu luku san wi e weri te wi e go na konmakandra noso te wi de na ini a preikiwroko? Fu san ede yu piki so?
5. San kan yepi wi fu bosroiti sortu krosi wi o weri èn fa wi o moi wisrefi?
Ala ten den krosi fu wi musu krin, awinsi den diri noso den no diri. Èn awinsi pe wi de wi musu weri krosi di fiti. Leisi 1 Korentesma 10:24 nanga 1 Timoteyus 2:9, 10. Baka dati, taki fu san ede wi no wani weri krosi . . .
di no netjes noso di syabisyabi.
di strak tumusi, di e sori wi skin noso di sexy.
Aladi Kresten no e hori densrefi na a Wet fu Moses, toku a wet disi e sori den fa Yehovah e denki. Leisi Deuteronomium 22:5 èn taki fu den aksi disi:
Fu san ede wan umasma no musu weri krosi di e meki taki a gersi wan mansma èn wan mansma no musu weri krosi di e meki taki a gersi wan umasma? Fu san ede a fasi fa wan umasma e moi ensrefi no musu meki taki a gersi wan mansma èn a fasi fa wan mansma e moi ensrefi no musu meki a gersi wan umasma?
Leisi 1 Korentesma 10:32, 33 nanga 1 Yohanes 2:15, 16. Baka dati taki fu den aksi disi:
Fu san ede wi musu luku bun taki den krosi di wi e weri èn a fasi fa wi e modo no e meki sma na ini a birti noso na ini a gemeente firi fruferi?
Sortu krosi den sma na ini a kondre fu yu e weri èn na sortu tra fasi den e modo?
Yu denki taki ala den modo disi fiti gi Kresten? Fu san ede yu taki dati?
Wi kan weri difrenti sortu krosi èn wi kan abi difrenti sortu kapsel di fiti gi wan Kresten
SON SMA E TAKI: „Mi mag weri san mi wani.”
Na so yu e denki tu? Fu san ede yu piki so?
SAN YU LERI?
Te wi e weri krosi di fiti, dan wi e sori taki wi e lespeki Yehovah nanga tra sma.
Fa yu ben o piki den aksi disi?
Fu san ede a prenspari gi Yehovah sortu krosi wi e weri èn fa wi e moi wisrefi?
San na wan tu Bijbeltekst di kan yepi wi fu sabi sortu krosi wi musu weri èn fa wi musu moi wisrefi?
Fa sma kan denki fu a tru anbegi te den e luku den krosi di wi e weri?
TRA SANI DI YU KAN LUKU
Na ini na artikel disi yu kan si fa sma kan denki fu yu te den luku den krosi di yu e weri.
Na ini na artikel disi yu o si fu san ede yu musu denki bun fosi yu poti wan tatoeage.
Na ini na artikel disi yu o feni tra Bijbeltekst di kan yepi yu fu bosroiti sortu krosi yu musu weri.
„Den krosi fu yu e gi Gado glori?” (A Waktitoren, september 2016)
Na ini na artikel disi yu o si san yepi wan uma fu no krutu sma di ben weri krosi di en no ben gwenti weri.
„Moderne kleding was voor mij een struikelblok” (Ontwaakt!, 22 december 2003)