„Mi o blesi unu so te, taki unu no o mankeri nowan sani”

1, 2. (a) Sortu bun bosroiti iniwan fu wi kan teki? (b) Sortu profeititori kan tyari blesi kon gi wi?

A TEN disi na wan ten fu krutu nanga blesi. A de wan ten pe kerki e tan leri sma sani di no tru èn wan ten pe a tru anbegi e seti kon bun baka. A no de fu taki dati yu wani den blesi nanga den wini di a tru anbegi e tyari kon nownow kaba èn di a o tyari kon na ini a ten di de na wi fesi. Ma fa yu kan de seiker taki yu o kisi den blesi disi? A piki tapu na aksi dati abi fu du nanga wan profeititori di kon tru na wan prenspari fasi syatu baka di „den lasti dei” bigin na ini 1914 (2 Timoteyus 3:1). Maleaki ben taki: „’A tru Masra o kon na En tempel. En na a sma di unu e suku, a boskopuman fu a frubontu, èn a sma di unu e wakti fayafaya. Iya, a o kon trutru’, na so Yehovah di e tiri den legre taki.”​—Maleaki 3:1.

² A profeititori disi di de fu feni na ini a lastiwan fu den 12 profeiti buku, prenspari srefisrefi gi wi. Now di wi doro na a kaba fu a buku disi, dan wi o si taki a boskopu fu Maleaki prenspari srefisrefi na ini a ten disi. A buku fu en e gi wi prenspari rai di kan meki taki Yehovah ’blesi wi so te, taki wi no mankeri nowan sani’ (Maleaki 3:10). Meki wi luku kapitel 3 fu a buku Maleaki moro fini.

WAN TEN FU KRIN A TRU ANBEGI

3. San meki taki Gado teki „na Israel fu Gado” na presi fu na owruten pipel fu en?

³ Sowan feifi hondro yari baka a ten fu Maleaki, Yehovah kon na a tempel na ini Yerusalem fu krutu a pipel di a ben meki wan frubontu nanga den. A sma di ben teki presi gi en na Krestes, „a boskopuman fu a frubontu” di Gado ben meki nanga Abraham. A pipel dati ben sori taki den no ben warti moro fu kisi a blesi fu Gado, èn dati meki Yehovah no ben wani den moro (Mateyus 23:37, 38). A sani di pasa na ini a yari 70 na wan buweisi fu dati. Wan tra sani di pasa tu, na taki Gado teki wan tra pipel na ini a presi fu Israel. Dati na a „Israel fu Gado,” wan grupu fu 144.000 sma di a teki puru fu ala pipel (Galasiasma 6:16; Romesma 3:25, 26). Ma a profeititori fu Maleaki no ben abi fu du nanga a ten dati nomo. A abi fu du tu nanga a ten fu wi èn a kan meki taki Gado e ’blesi yu so te, taki yu no e mankeri nowan sani’.

4. Sortu aksi ben musu kisi piki baka di Yesus tron kownu na ini 1914?

⁴ Den Bijbel profeititori di kon tru e sori taki na ini 1914, Yesus Krestes tron Kownu fu Gado Kownukondre na hemel. Now a ten ben doro gi Yesus fu sori suma ben de a grupu Kresten di Gado feni bun. Suma ben o sori taki na anbegi fu en krin? Yu kan feni a piki tapu na aksi dati te yu e luku a sani disi di Maleaki ben skrifi: „Suma o de srekasreka na a dei te a o kon? Suma o tan tanapu te a o de fu si? Bika a o de leki a faya di wan sma e gebroiki fu meki gowtu kon soifri” (Maleaki 3:2). O ten Yehovah kon na a „tempel” fu en fu krutu sma, èn fa a du dati?

5, 6. (a) Di Yehovah kon luku na agersi tempel fu en, dan san ben de a situwâsi fu furu fu den sma di ben e kari densrefi anbegiman fu en? (b) San ben musu pasa nanga den salfu futuboi fu Gado?

⁵ A de krin taki Gado no ben kon na wan tempel fu ston. A lasti tempel pe sma ben e anbegi a tru Gado, kisi pori na ini a yari 70. Yehovah ben kon na wan agersi tempel, wan seti di e gi libisma na okasi fu anbegi en nanga yepi fu a lusu-paiman fu Yesus (Hebrewsma 9:2-10, 23-28). A no de fu taki dati den Kresten kerki no ben de na ini a tempel dati, fu di den kiri furu sma èn den du hurudu nanga falsi gado. Na presi fu gi sma a tru leri, den leri sma sani di no tru. Yehovah ’krutu den wantewante’ èn yu sabi taki a ben abi leti fu krutu den (Maleaki 3:5). Ma baka di Gado Kownukondre seti, dan wan grupu tru Kresten ben e dini na ini a fesidyari fu na agersi tempel fu Gado, èn den ben tai hori na Gado aladi den kisi hebi tesi. Ma srefi den salfuwan dati ben musu kon krin. Den buku fu den 12 profeiti e taki fu a tori dati, fu di den e gi wi moi pramisi di e sori fa a tru anbegi ben o seti kon bun baka èn fa den futuboi fu Gado ben o kon gosontu baka. Maleaki ben taki dati wan pipel ben o de di Yehovah ben o „krin . . . leki gowtu èn leki solfru”. Dan den „o tyari wan ofrandi gi Yehovah nanga wan reti ati”.​—Maleaki 3:3.

⁶ Wi sabi taki sensi 1914 te go miti a bigin fu 1919, Yehovah krin salfu Kresten fu di dati ben de fanowdu. A krin na anbegi fu den, den leri fu den, èn a meki den tapu nanga falsi gwenti.a Den salfuwan nanga a „bigi ipi” di bakaten kon anbegi Gado makandra nanga den kisi furu wini fu a sani di Gado du (Openbaring 7:9). Makandra den e tan tyari „wan ofrandi gi Yehovah nanga wan reti ati” èn ’Yehovah lobi na ofrandi’ dati.​—Maleaki 3:3, 4.

7. San wi musu aksi wisrefi fu kon sabi efu Gado feni wi bun?

⁷ Na dati a pipel fu Gado e du leki grupu, ma fa a de nanga ibriwan fu wi? Kande yu ben o aksi: ’Mi abi fowtu denki èn mi e du sani di no fiti? Mi musu krin misrefi ete neleki fa Yehovah ben krin den salfu futuboi fu en?’ Wi ben si kaba taki den 12 profeiti ben taki fu den fowtu denki nanga gwenti di sma ben abi. Den ben taki tu fu den bun fasi di sma ben abi èn fu den bun sani di sma ben du. A sani dati e yepi yu fu kon sabi moro bun san Yehovah ’e aksi fu yu’ (Mika 6:8). Den wortu ’fu yu’ e sori krin fu san ede ibriwan fu wi musu ondrosuku efu a de fanowdu taki wi krin wi libi moro fara.

„GRANTANGI, UN LUKU SAN MI O DU”

8. Sortu kari Yehovah gi a pipel fu en?

⁸ Luku san Yehovah e meki Maleaki taki na ini kapitel 3, vers 10. Drape yu o feni a moi kari disi: „’Grantangi, un luku san mi o du te unu teki a di fu tin pisi fu ala den sani di un musu tyari gi mi èn unu poti dati na ini den maksin, so taki nyanyan kan de na ini mi oso baka. Unu o si fa mi o opo den sroisi fu hemel, so taki blesi fadon leki alen gi unu. Mi o blesi unu so te, taki unu no o mankeri nowan sani’, na so Yehovah di e tiri den legre taki.” A kari disi de gi a heri pipel fu Gado. Yu feni taki a de gi yu tu?

9. San na den ofrandi nanga den di fu tin pisi di yu kan gi Yehovah?

⁹ Fa yu kan gi Yehovah „a di fu tin pisi” fu den sani di yu abi? A no de fu taki dati yu no de fruplekti fu gi den ofrandi di sma ben musu tyari na ondro a Wèt. Now Gado wani taki wi e tyari tra sortu ofrandi gi en. Soleki fa wi si na ini a kapitel na fesi, Paulus e kari a preikiwroko fu wi wan ofrandi (Hosea 14:2). Baka dati, na apostel taki fu wan tra sortu ofrandi. A ben skrifi: „Un no musu frigiti fu du bun èn fu prati san unu abi nanga trawan, bika Gado e prisiri nanga den sortu ofrandi dati” (Hebrewsma 13:15, 16). Sobun, a de krin taki „a di fu tin pisi” di Maleaki 3:10 e taki fu en abi fu du nanga na anbegi fu wi èn nanga tra sani di wi e gi Gado. Leki dopu Kresten yu e dini Yehovah nanga yu heri ati, ma a di fu tin pisi e prenki wan pisi fu den sani di yu abi èn di yu man gi Yehovah, noso di yu e gebroiki na ini a diniwroko fu en. Dati na yu ten, yu krakti, den gudu fu yu, nanga a moni di yu e gi fu horibaka gi a diniwroko.

10. Fa yu kan tesi Yehovah na wan fasi di fiti?

¹⁰ A fiti srefisrefi taki yu e gi Yehovah den di fu tin pisi dati nanga yu heri ati èn fu di yu lobi en. A prenspari tu taki yu e du dati fayafaya. Yu sabi taki a bigi dei fu Yehovah e kon esi-esi èn taki a e „meki sma frede” (Yoèl 2:1, 2, 11). Sma libi de na ini a tori. Gado e gi yu wan kari èn yusrefi kan teki a kari dati. Yehovah e aksi yu fu ’luku san a o du’ noso fu tesi en. A no de fu taki dati nowan libisma musu prefuru fu tesi Yehovah neleki a de wan Gado di no de fu frutrow (Hebrewsma 3:8-10). Ma yu kan tesi en na wan fasi di fiti. Fa so? A pramisi taki a o blesi yu. Te yu e gi yesi na Gado, dan a de neleki yu e tesi en, iya, a de neleki yu e aksi: ’A o blesi mi?’ Dan Yehovah o fruplekti ensrefi fu du dati, soleki fa a ben pramisi. Sobun, fu di Gado e gi yu na okasi fu ’luku san a o du’ noso fu tesi en, meki yu kan de seiker taki a o blesi yu bogobogo.

11, 12. Sortu blesi Yehovah gi a pipel fu en soleki fa yu srefi si?

¹¹ Yu si taki a pipel fu Yehovah gi bun furu gudu nanga tra sortu ofrandi na ini a diniwroko fu den. Yehovah ’blesi den so te, taki den no e mankeri nowan sani’. Wan fasi fa Gado blesi a pipel fu en, na taki sensi a bigin fu a di fu 20 yarihondro te go miti a ten disi, moro nanga moro sma e tron Yehovah Kotoigi. Yu si tu taki wi kon frustan furu fu „den dipi sani fu Gado” (1 Korentesma 2:10; Odo 4:18). Ma luku a tori disi tra fasi: Fa yusrefi kisi wini fu den blesi disi?

¹² Kande yu ben de fu wan tra kerki fosi, noso kande na bigin yu ben bigin go na den konmakandra fu Yehovah Kotoigi. O bun yu ben e frustan den prenspari leri fu Bijbel na a ten dati? Luku san yu kon sabi now sensi a ten dati èn luku fa yu man gebroiki Bijbel fu tyari sani kon na krin. Noso prakseri den dipi sani di yu kon frustan, sosrefi den profeititori di e kon tru now. Prakseri sosrefi fa yu man gebroiki den rai fu spesrutu Bijbeltekst moro bun now na ini yu libi. Luku fa yu go na fesi! Yu srefi kan taki a srefi sani disi di na apostel Petrus ben taki: „Wi kisi moro frutrow na ini den profeititori” (2 Petrus 1:19). San yu musu sabi na disi: Yu kisi „leri fu Yehovah” srefi èn yu de fu a pipel di e hori densrefi na a tru Kresten bribi èn di wani dini Yehovah fu têgo (Yesaya 54:13). Yu abi bun reide kaba fu taki dati a blesi yu bogobogo.

YU NEN SKRIFI NA INI A BUKU FU LIBI?

13. San kan meki taki a nen fu wan sma e skrifi na ini a buku fu Gado?

¹³ Maleaki 3:16 e taki fu tra blesi di wi o kisi fu Yehovah: „Disiten den wan di abi lespeki gi Yehovah ben e taki nanga makandra. Iya, ibriwan fu den ben e taki nanga wan trawan. Disiten Yehovah ben e poti prakseri na den èn a ben e arki den. Ne Yehovah gi a komando fu skrifi wan buku fu memre den wan di abi lespeki gi en èn di e hori en nen na prakseri.” Den salfuwan nanga den sma fu a bigi ipi ’abi bigi lespeki gi Yehovah’. Yu no e si en leki wan grani taki yu na wan Yehovah Kotoigi, iya, wan fu den koloku sma di e hori a nen fu Yehovah na prakseri, èn di e gi en glori na heri grontapu? Yu kan abi a dyaranti taki Yehovah no o frigiti den bun sani di yu du gi en.​—Hebrewsma 6:10.

14. Fa den 12 profeiti yepi yu fu kon sabi sortu denki nanga gwenti Yehovah no feni bun kwetikweti?

¹⁴ Ma san yu kan du fu sorgu taki a nen fu yu skrifi na ini ’a buku fu memre sma’, èn di e skrifi nownowde kaba na fesi Yehovah? Memre wan tu fu den koni rai di wi kisi na ini den buku fu den 12 profeiti. Wi kon sabi moro bun sortu gwenti, fasi, nanga denki Yehovah no feni bun. Fu eksempre, den profeiti sori wi taki wi no musu abi na angri fu du „ogri” nanga „hurudu”, fu di soleki fa Gado e taki, den sani dati no e kruderi nanga den wèt fu en èn den kan pori wi libi (Hosea 4:12; 6:9). Gado e teige den wan di e libi takru nanga a trowpatna fu den, noso nanga tra sma na ini den osofamiri (Maleaki 2:15, 16). Yehovah meki den profeiti sori krin taki a no lobi nowan ogridu (Amos 3:10). A meki den sori sma tu taki den no musu du kruka sani te den e du bisnis noso te den e du moni tori (Amos 5:24; Maleaki 3:5). Den 12 buku ben e sori tu o prenspari a de taki man di abi frantwortu no e teki sei, èn taki den no e denki densrefi nomo te den e krutu afersi.​—Mika 7:3, 4.

15. San na wan tu moi blesi di yu o kisi te yu e gi yesi na den rai fu den 12 profeiti?

¹⁵ Ma den profeiti no ben e poti prakseri nomo na sani di wi no musu du. Den sori tu sortu wini wi kan kisi te wi e du san Gado e taki. Wi sa abi wan moro bun matifasi nanga Yehovah (Mika 4:5). A gemeente fu wi o kon moro tranga te wi e du san reti èn te wi e preiki fayafaya. A trowlibi fu wi o waka moro bun, na osofamiri fu wi o de na ini wánfasi, èn den o poti moro prakseri na sani di abi fu du nanga na anbegi (Hosea 2:19; 11:4). Trawan o abi lespeki gi wi te wi e du san reti èn te wi abi wan krin ati. Neleki Yehovah, wi o sori sari-ati nanga lobi gi wi brada nanga sisa, èn den o du a srefi gi wi (Mika 7:18, 19). Wi o de nanga sma di lobi Gado, iya, brada nanga sisa di lobi san tru èn di lobi freide. Ma san moro prenspari, na taki wi o de mati fu Yehovah (Sakaria 8:16, 19). Yu no e agri taki wi e kisi den blesi disi kaba?

16. San wi man si krin na ini a ten disi, èn sortu bakapisi a sani disi o abi te a dei fu Yehovah doro?

¹⁶ Te wi e luku den sani di wi leri na ini a kapitel disi, dan a de krin fu si „suma na wan reti-ati sma èn suma na wan ogri sma”. Iya, wi kan si krin suma na tru Kresten èn suma na falsi Kresten (Maleaki 3:18). Wi e du muiti fu hori wisrefi na den leri fu Yehovah aladi sma na grontapu e saka go moro dipi na ini ogridu. Yu sabi tu taki a sani disi o abi seryusu bakapisi te „a bigi dei fu Yehovah” doro.​—Sefanya 1:14; Mateyus 25:46.

17. Fa yu kan gebroiki den rai na ini a buku disi na ini a ten di e kon?

¹⁷ A no de fu taki dati a rai fu den 12 profeiti e fiti tu gi a ten fu wi. Te problema e miti yu, noso te yu musu teki spesrutu bosroiti, dan a bun fu luku den bun rai baka di de fu feni na ini a buku disi. Na so yu kan sori taki yu abi na angri fu tan kisi leri fu Yehovah èn fu tan „waka den pasi” fu en (Mika 4:2). Ma wi no musu du dati fu wan pisi ten nomo. A no de fu taki dati yu wani taki yu nen skrifi fu têgo na ini a buku pe Yehovah e memre sma. Den buku fu den 12 profeiti kan yepi yu fu du dati.

DEN WAN DI ABI BRIBI O KISI FRULUSU

18. Sortu prenspari rai skrifi na Yoèl 2:32, èn san na apostel Paulus e taki moro fara fu a sani dati?

¹⁸ Yoèl e taki fu wan prenspari sani di kan meki taki Gado feni yu bun fu ala ten: „Ibri sma di e kari a nen fu Yehovah o kisi frulusu” (Yoèl 2:32). Tu apostel, Petrus nanga Paulus, ben taki a srefi prenspari sani disi (Tori fu den apostel 2: 21; Romesma 10:13). Ma Paulus e sori moro fara san prenspari tu. A e aksi: „Fa den o kari en efu den no bribi na ini en?” (Romesma 10:14) A no de fu taki dati yu wani kari a nen fu Yehovah èn bribi na ini en, now èn fu ala ten!

19. San a wani taki fu kari a nen fu Yehovah?

¹⁹ Te wi e kari a nen fu Yehovah, dan dati no wani taki nomo dati wi sabi a nen èn taki wi e gebroiki en (Yesaya 1:15). Den tra tekst lontu Yoèl 2:32 e sori taki wi musu abi trutru berow èn taki wi musu bribi taki Yehovah e gi wi pardon (Yoèl 2:12, 13). Te wi e kari a nen fu Gado, dan dati wani taki dati wi e leri sabi en moro bun, wi e frutrow na en tapu, wi e gi yesi na en, èn wi e poti en na a fosi presi na ini wi libi. Disi o meki taki wi o man de koloku fu têgo, èn dati na wan blesi fu Gado.​—Mateyus 6:33.

20. Te yu abi bribi, dan sortu moi blesi yu o man kisi?

²⁰ Yehovah ben meki Habakuk taki: „A reti-ati sma o tan libi fu di a abi bribi” (Habakuk 2:4). A bun fu tan hori a sani disi na prakseri. Disi na wan fu den prenspari tru tori fu Bijbel. Paulus ben poti prakseri dri leisi na a tekst dati na ini den buku fu en (Romesma 1:16, 17; Galasiasma 3:11, 14; Hebrewsma 10:38). A tekst dati e sori taki yu musu poti bribi na ini na ofrandi di Yesus Krestes tyari gi den sondu fu wi. Yesus ben taki: „Gado ben lobi grontapu so te, taki a gi en wan-enkri Manpikin, so taki ala sma di e bribi na ini en . . . sa kisi têgo libi.” Bijbel e taki moro fara: „A sma di e bribi na ini a Manpikin, e kisi têgo libi” (Yohanes 3:16, 36). Na a srakti-ofrandi dati di wi Frulusuman wawan kan tyari, sa meki taki sma kon betre baka. Baka di Maleaki skrifi san a bigi dei fu Yehovah o du nanga na ogri grontapu fu Satan, dan a taki moro fara: „Gi unu di e sori lespeki gi mi nen, a son fu retidu o skèin. A leti fu en o dresi sma.” Iya, Yesus o skèin leti di e dresi sma. A sani disi e meki taki nownow kaba sma man abi wan bun matifasi nanga Gado. Ma a e gi wi deki-ati fu sabi taki a leti dati o puru ala siki na ini a nyun grontapu!​—Maleaki 4:2.

21. Fu san ede yu kan bribi taki Yehovah man du san a abi na prakseri?

²¹ A prenspari tu taki wi e bribi taki Gado man du san a abi na prakseri. Na ini a ten fu Mika, a ben muilek fu frutrow tapu sma. A profeiti ben taki: „No bribi yu mati. Srefi yu bun mati yu no musu frutrow.” Ma Mika no ben lasi frutrow na ini Yehovah, èn yu no musu du dati tu. Mika ben taki: „Mi dati o wakti Yehovah” (Mika 7:5, 7). Tra fasi leki libisma di wi no man frutrow, Yehovah wani du san a abi na prakseri èn a abi a makti tu fu du dati. A o sori taki na en abi a reti fu tiri hemel nanga grontapu, èn sani o tan waka bun nanga sma di abi bribi.

22. Fa sani o waka nanga den wan di e kari a nen fu Yehovah?

²² Yu kan taki a srefi sani disi di Habakuk ben taki: „Mi o de nanga bigi prisiri fu Yehovah ede. Mi o prisiri nanga a Gado di o frulusu mi” (Habakuk 3:18). A profeiti Yoèl e sori fu san ede sma di e kari a nen fu Yehovah kan de nanga prisiri. A ben taki: Den „o kisi frulusu”. Paulus ben taki a srefi sani dati tu (Yoèl 2:32; Romesma 10:13). Fa den o kisi frulusu? A bribi fu yu kibri yu kaba gi den triki fu Satan èn gi den takru bakapisi di ogri sma e kisi (1 Petrus 1:18). Boiti dati, yu kan abi a frutrow taki yu o kisi frulusu te na ogri sistema disi o kon na wan kaba. Dati o gi yu okasi fu kisi den blesi di den 12 profeiti ben taki fu den.

A FASI FA A PARADIJS O DE

23, 24. (a) Sortu sani den 12 profeiti e fruteri wi fu a paradijs? (b) Fa den sani di den 12 profeiti skrifi e gi yu howpu?

²³ Têgo blesi e wakti den wan di „abi lespeki gi Yehovah” (Maleaki 3:16). Sonwan fu den 12 profeiti sori wi krin fa a paradijs di de leti na wi fesi o de. Den sani di den taki kan gi yu prisiri nanga howpu. Fu eksempre, Mika ben skrifi: „Ibriwan sma o sidon na ondro en eigi droifibon nanga en eigi figabon. Nowan sma o meki den frede” (Mika 4:4). Iya, te Gado Kownukondre o tiri, dan sani o waka heri bun nanga yu èn yu o nyan bun fu a tranga wroko di yu du!

²⁴ A howpu di yu abi taki wan kaba o kon na siki, sari, nanga dede srefi, o kon tru seiker. Prakseri fa den sma di o kisi libi baka o breiti taki den no abi sondu moro! Den o ondrofeni a sani disi di skrifi na Hosea 13:14: „Na ini Grebi mi o puru den. Mi o puru den na dede. Dede, pe den maka fu yu de? Grebi, yu man tyari pori kon ete?” Paulus ben sori taki a tekst dati abi fu du nanga den wan di o kisi wan opobaka fu libi na hemel.​—1 Korentesma 15:55-57.

25. Fa yu o firi te yu de na ini a nyun grontapu?

²⁵ Wi no abi fu tweifri taki sma o kisi wan opobaka fu libi na grontapu (Sakaria 8:6). Di Amos nanga Mika ben taki dati a pipel fu Gado ben o komoto na ini katibo, dan a kan taki sma no ben man bribi. Ma yu sabi taki den komoto na ini katibo (Amos 9:14, 15; Mika 2:12; 4:1-7). Den wan di ben drai kon baka na ini a kondre fu den ben taki: „A ben de leki wi ben e dren. Na a ten dati na soso lafu wi ben e lafu èn wi ben e bari fu prisiri. . . . Yehovah du bigi sani gi den. Fu tru, Yehovah du bigi sani gi wi. Fu dati ede wi kon de nanga prisiri” (Psalm 126:1-3). Na so yu o firi na ini a nyun grontapu te Yehovah ’o blesi yu so te, taki yu no o mankeri nowan sani’.

26. San e wakti den wan di e tan hori a dei fu Yehovah na prakseri?

²⁶ Baka „a dei te Yehovah” o puru ogridu na grontapu, dan a sa de moro krin fu si taki ’a kownumakti kon de fu Yehovah’ (Obadya 15, 21). A sani disi sa de wan tumusi moi blesi gi den sma na grontapu, a no so? Boiti dati, yu kan de wan fu den sma di o ondrofeni a sani disi di skrifi na Maleaki kapitel 3: „Yehovah di e tiri den legre taki: ’Den o kon de fu mi . . . Mi o sori sari-ati gi den neleki fa wan papa e sori sari-ati gi en manpikin di e gi yesi na en’” (Maleaki 3:17). Iya, fu di yu e gi yesi na Yehovah, meki yu o man kisi frulusu, èn te fu kaba a sani dati o meki taki ’Gado o blesi yu so te, taki yu no e mankeri nowan sani’. Dati na wan tumusi moi howpu!