PISI 9
Anbegi Yehovah nanga yu heri osofamiri
’Anbegi a sma di meki hemel nanga grontapu.’—Openbaring 14:7
Yu leri na ini a brochure disi taki Bijbel abi furu rai di o yepi yu nanga yu osofamiri. Yehovah wani taki unu de koloku. A e pramisi taki te unu e poti na anbegi fu en na a fosi presi, dan „unu o kisi ala den tra sani tu” (Mateyus 6:33). Yehovah wani trutru taki unu tron en mati. Gebroiki ibri okasi fu meki a matifasi di yu abi nanga Yehovah kon moro bun. Disi na a moro bigi grani di wan sma kan abi.—Mateyus 22:37, 38.
1 TRON WAN MORO BUN MATI FU YEHOVAH
SAN BIJBEL E TAKI: „’Mi o de un papa èn unu o de mi manpikin nanga mi umapikin’, na so Yehovah taki” (2 Korentesma 6:18). Gado wani taki yu musu tron wan bun mati fu en. Wan fasi fa yu kan du dati na te yu e begi. Yehovah wani taki yu e „begi doronomo” (1 Tesalonikasma 5:17). A wani sabi san de tapu yu ati èn sortu broko-ede yu abi (Filipisma 4:6). Te yu e begi nanga yu osofamiri, dan den o si taki yu e si Gado leki yu mati.
Yu no musu taki nanga Gado nomo, ma yu musu arki en tu. Yu kan du disi te yu e studeri en Wortu nanga tra buku di e taki fu Bijbel (Psalm 1:1, 2). Denki dipi fu den sani di yu leri (Psalm 77:11, 12). Te yu wani yere san Gado e taki, dan yu musu gwenti go na den Kresten konmakandra.—Psalm 122:1-4.
Wan tra prenspari fasi fa yu kan kisi wan bun matifasi nanga Yehovah na te yu e fruteri tra sma fu en. O moro yu e du disi, o moro yu o tron wan bun mati fu en.—Mateyus 28:19, 20.
SAN YU KAN DU:
Teki ten ibri dei fu leisi Bijbel èn fu begi
Sorgu taki na anbegi fu Gado prenspari moro prisiriten
2 MEKI UN OSOFAMIRI ANBEGI GI UNU PRISIRI
SAN BIJBEL E TAKI: „Kon krosibei na Gado èn a o kon krosibei na unu” (Yakobus 4:8). Yu musu bosroiti o ten unu o studeri leki osofamiri èn yu musu hori yusrefi na a ten dati (Genesis 18:19). Ma yu musu du moro leki dati. Gado musu de na ini yu libi ibri dei. Yepi yu osofamiri fu abi wan bun matifasi nanga Gado èn taki fu en „te unu e sidon na ini un oso, te unu e waka na strati, te unu e didon, èn te unu opo” (Deuteronomium 6:6, 7). Du muiti fu de leki Yosua di ben taki: „Mi nanga mi osofamiri, wi o dini Yehovah.”—Yosua 24:15.
SAN YU KAN DU:
Abi a gwenti fu studeri nanga yu osofamiri èn luku sortu rai ibri memre abi fanowdu